ɛYohana 8
8
ɛKuk ne Kɛ Wum Ɛbhɛ ne Nzangas
1ɛYɛso gha ne ji ɛbhɛ wara daa ne iGol Niphaa wo. 2Kɛ ne cwiil ne ihwɛlɛ ywiriri, ne ɛ kyii ɛ phɛ ne iDeng ngge. iDira ninyi de ne bhɛ tumɛy ɛlɔ ɛbhɛ gha, ne ɛ soos, ɛ ho ne mɛmɛ nibhɛ nɛ. 3Ninaa ne kpɛl ɛShara gha nɛ niFarisawa na ne yɛɛs ɛbhɛ ne ɛkuk ne kɛ wum ɛbhɛ ne nzangas, nibhɛ yɛk ɛbhɛ nɛ ɛ kyinak ɛnu ɛyisɛ nibhɛ gbik, 4nibhɛ ji yaak ɛYɛso yegha, “ɛKyɛɛ ne icwam, kɛ wum ɛkuk kɛghaa wo ɛ so ne nzangas. 5Ndɔ ɛShara gha, ɛMuusaa kɛ ne yɛk njwii nɛ wu te phengɛ ihywee nikuk kɛdee wo. Ɛɛ ne bo ɛlii?” 6Nibhɛ kaa boote ɛlɛ wo nibhɛ ten ɛbhɛ, tɛ nibhɛ ne ji sɛ ɛkɔn na nɛ yaa wum ɛbhɛ nɛ.
ɛYɛso gha ne see ito ɛ ho ne haa nikɔn ne ivel ne ikɛn ne iwɔ ɛbhɛ. 7Kɛ ne sɛ nibhɛ kɛ maa re ɛnu ɛyisɛ ne phomos ɛYɛso yegha ivol ba, ne ɛ yinɛ ito ɛbhɛ de ɛ yaak nibhɛ, “ɛNyi gha ne ɛ so tang ɛfɔt ndɔ mon no, te ɛbhɛ ɛ cwaak ne itsetsee yɛ.” 8Ne ɛ ta see ito de dɔng ɛ yaa haa nikɔn na ne ivel ba. 9Kɛ ne sɛ nibhɛ kɛ phok ɛlɛ wo, nibhɛ ne tek ɛlɔ yɛ nidaan-nidaan, nibhɛ tsa nɛ nihelem mɛ. Nibhɛ ne ji tek ɛYɛso yegha nggerey ne ɛkuk ka ɛ kɛ kyinak ɛnggyɛ wo. 10ɛYɛso gha ne yinɛ ito, ɛ phom ɛkuk ka ɛ yaak ɛbhɛ, “ɛKuk, nibhɛ so ɛbi lɛɛ? Sɔng ɛnyi kɛ cwaak ne itsetsee mo de nang nge?”
11ɛKuk ka ne kyii nɛ ɛ yɔngɔ, “ɛNdiinday, sɔng ɛdɛng kɛ cwaak ngɛ nang.”
ɛYɛso gha ne yaak ɛbhɛ, sɔng naa ne ma phoo yɛ nang. Hyel, sɔng ne ɛ tang bhɛ mɔn ɛfɔt to nang.#8.11 Sɔng ɛbyin ne iWee ne ile da kaa haa bok ikpɛn 7.53–8.11 nɛ ndɔ yɛ nang.
ɛYɛso gha Ɛbhɛ soye iWɛwɛy ɛZay De
12ɛYɛso gha ne ta boote nɛ ninyi na, ɛ yaak nibhɛ, “Mee nzo iwɛwɛy ɛzay de, ɛhiha ɛnyi ne ɛɛ roos me wo nang, sɔng aa ne hyel ndɔ gbyik kang, aa yang bok iwɛwɛy ne iken.”
13niFarisawa na ne yaak ɛbhɛ, “iGyɛ ɛ bol ivol ne ito mo. Sɔng ivol mo da ne so itin nɛ nang.”#8.13 Ta yɛɛn: ɛYoh 5.31.
14ɛYɛso gha ne kyii nɛ ɛ yaak nibhɛ, “Sɛɛ kyi yɔng nzi bol ivol ne ito nge da, ifɛ ne so itin nɛ, daa ɛli ne nzi yɛɛ ɛlɔ gha ne nggɛ le, ne ɛlɔ gha ne naa phɛ, nyinɛn no nang, sɔng ɛɛ ne yɛɛ ɛn ɛlɔ gha ne nggɛ le ne ɛlɔ gha ne naa phɛ nang. 15Ɛɛ hyɛ ɛn ɛnyi gha ɛshara gha ne icwas ɛten ɛsii, mee wo, sɔng nzi ne hyɛ ɛnyi ɛshara nang. 16Wu naa ne hyɛ ɛshara gha, naa ne hyɛ ɛhaa ne itin nɛ, daa ɛli ne sɔng mee nzi hyɛ nggenggere nge nang. Njwii hyɛ ne ɛKyɛɛ nge gha ne ɛ kɛ tom me wo. 17Ndɔ ɛShara mon na, kɛ ne haa i sim me nɛ wu ibol ɛnu ninyi ifaa so itin nɛ. 18Mee wo nzi ne bol ibol ne ito nge, ɛKyɛɛ nge gha ne ɛ kɛ tom me wo ne so ɛhaa ne ɛɛ bol daa ne ito nge de ne mang.”
19Nibhɛ ne phom ɛbhɛ nibhɛ yaak ɛbhɛ, “ɛKyɛɛ mo gha so ɛbii?”
ɛYɛso gha ne kyii nɛ ɛ yɔngɔ, “Sɔng ɛ yɛɛ ɛn mɛɛn gbik ne ɛKyɛɛ nge gha nang. Sɛɛ yɔng ɛ yɛɛ ɛn mɛɛn no, ɛ sɛɛ ne maa yɛɛ ɛn ɛKyɛɛ nge gha ne mang.”
20Ɛ kaa bol ivol lɛdaa wo nten de ne ɛ kaa mɛmɛ ninyi nɛ ndɔ ne iDeng ngge, cɛcɛk ɛlɔ gha ne i teesek ne izɛɛng. Gbik ne iphɛ ɛlɛy sɔng ɛnyi ne yɛɛ ne wum ɛbhɛ nang, daa ɛli ne nten ɛbhɛ de kaa kyi tɔ.
Sɔng Aa Yɛɛ ne Phɛ ɛn ɛLɔ gha ne Naa Phɛ wo Nang
21ɛYɛso gha ne ta yaak nibhɛ, “Naa bak ne ɛlɔ yɛ, aa ne tɔk ɛn mɛɛn, ne ɛ kus ɛn ndɔ ne ɛfɔt mon no. Sɔng aa yɛɛ ne phɛ ɛn ɛlɔ gha ne naa phɛ wo nang.”
22iBol lɛ ne te niYahodawa na ne yaa phomos en nibhɛ bo, “Aa phoo ito ɛbhɛ naa? iPhɛ phɛ kɛ te ɛ bo wu ɛlɔ gha ne yaa phɛ hang njwɛɛn yaa yɛɛ phɛ yɛwo naa?”
23ɛYɛso gha ne re ɛnu ɛyisɛ ɛ yɔngɔ, “Ɛ so nyini ninaa ndɔ ne ivel, ne nzo ɛhaa ɛdaa ne irywa. Ɛ so ɛn ninaa ndɔ ɛzay yɛghaa wo, sɔng ne nzo ɛhaa ndɔ ɛzay yɛghaa wo nang. 24Nzi bok nyini aa kus ɛn ndɔ ne ɛfɔt mon no; wu ˆɛ kɛ ne sang nang ɛn ne itin nɛ wu ‘Mee wo ne Nzo Mee wo’ ˆaa ne kus ɛn ndɔ ne ɛfɔt mon no ɛtsak.”
25Nibhɛ ne phom nibhɛ yɔngɔ, “Ɛ so yɛ ɛhay?”
ɛYɛso gha ne kyii nɛ ɛ yɔngɔ, “Nggu so ɛli ne nggɛ mɔng nyini ɛyisɛ gha. 26N bok nikɔn na gbom ne nzɛɛ bol daa ne ito mon de, ninaa ne nzɛɛ bol n phoo nyini nɛ. Nzi ne tɔng ɛzay ya ɛkɔn na ne nggɛ phok ɛlɔ ɛhaa ne ɛ kɛ tom me wo, nibhɛ ne ɛ so itin nɛ.”
27Sɔng nibhɛ ne seng wu ɛYɛso gha tɔng nibhɛ ibol ɛKyɛɛ ɛbhɛ nang. 28iPhɛ ɛlɛy yang, ɛYɛso gha ne yaak nibhɛ, “Sɛ́ sɛ ˆɛ kɛ yinɛ ɛn ɛNgɔn ɛNyi gha, ˆɛ sɛ ne ji seng ɛn ɛNyi gha ne nzo, ɛ ta seng ɛn sɔng nzi mɔn ɛdɛ ɛkɔn ɛhaa ne ito nge nang. Nzi yang bol nikɔn na ne ɛkyɛɛ gha kɛ mɛmɛ nɛ. 29ɛHaa ne ɛ kɛ tom me wo ɛ so ne mee, sɔng ɛ kɛ tek me nggenggere nge nang daa ɛli ne nzi mɔn nikɔn na nɛ nibhɛ yaa laasek ɛbhɛ irway cɛcɛɛy.” 30Ninyi na gbom nɛ nibhɛ kɛ tenes ɛYɛso yegha ɛ bol nikɔn nɛnaa wo ne nang ne itin nɛ ne ɛbhɛ.
iTin de Yaa Biri Yɛ
31ɛYɛso gha ne yaak niYahodawa na nɛ nibhɛ kɛ nang ne itin nɛ ne ɛbhɛ wo, “Wu ɛ kɛ wum ɛn ibol nge de, ne ɛ ji so ɛn ninɔn ne icwam nge na ntin nɛ. 32Aa ne ji seng ɛn itin de, itin de iphɛ yaa ne te nyini ɛ phɔrɔt ɛn.”
Ninɔn nTin ɛTaanggbey
33Nibhɛ ne kyii ɛbhɛ nɛ nibhɛ yɔngɔ, “Njwi so icwaang ɛBaraying, sɔng njwi kɛ ne ku teye nikpuru ɛhak ɛnyi nang, ˆaa ne mɔn ɛlii ˆɛ yɔng wu njwii sɛ phɔrɔt too?”
34ɛYɛso gha ne kyii nɛ ɛ yɔngɔ, “Nzi tɔng nyini itin nɛ, ɛhiha ɛnyi ne ɛ kɛ mɔn ɛfɔt, ɛ kɛ teye ɛkpuru ne ɛfɔt ta. 35Sɔng ɛkpuru gha ne so ɛhaa ne ijwee ntinting nang, ɛngɔn ne ijwee ɛbhɛ so ɛhaa ne ijwee gha ishay-ishay. 36iPhɛ ɛlɛy, wu ɛNgɔn na kɛ ne phɔt nyini wo, ˆɛ kɛ phɔrɔt ɛn nɛ ntin nɛ. 37Nzi yɛɛ ˆɛ so ɛn icwaang ɛBaraying ngo, gbik ne iphɛ ɛlɛy ɛɛ tɔk ɛn te ɛ sɛɛ phoo ɛn mɛɛn daa ɛli ne sɔng ɛ kɛ say ɛn ibol nge de nang. 38Nzi bol nikɔn na ne nggɛ yaang ɛlɔ ɛKyɛɛ nge gha, ɛɛ ne mɔn ɛn ninaa ne ɛ kɛ phok ɛn ɛlɔ ɛkyɛɛ mon.”
39Nibhɛ ne kyii ɛbhɛ nɛ nibhɛ yɔngɔ, “ɛBaraying ɛbhɛ so ɛkyɛɛ mos sa.”
ɛYɛso gha ne kyii nɛ ɛ yɔngɔ, “Sɛɛ yɔng ɛ so ɛn ninɔn ɛBaraying nga ɛtsak, ɛ sɛɛ ne mɔn ɛn nikɔn na ne ɛ kaa mɔn no. 40Nzo ɛnyi ne nggɛ tɔng nyini itin de ne nggɛ phok ɛlɔ ɛTaanggbey, gbik ne iphɛ ɛlɛy ɛ kɛ ne yaa tɔk ɛn ta ɛ sɛɛ phoo ɛn mɛɛn. Sɔng ɛBaraying nga kɛ ne mɔn ɛlɛ wo nang. 41Ɛɛ mɔn ɛn nikɔn na ne ɛkyɛɛ mon na kɛ mɔn.”
Nibhɛ ne kyii nɛ nibhɛ yɔngɔ, “Sɔng njwi so itso ne irywen nang, ɛTaanggbey ne ito ɛbhɛ, ɛbhɛ so ɛKyɛɛ mos sa zɔng, njwi ne so ninɔn ntin ɛbhɛ.”
42ɛYɛso gha ne yaak nibhɛ, “Sɛɛ yɔng ɛTaanggbey ya bhɛ so ɛkyɛɛ mon na, ɛ sɛɛ ne sim ɛn mɛɛn, daa ɛli ne nggɛ le daa ɛlɔ ɛTaanggbey ya, ɛlyilyɛghaa wo ne nzo ɛbɛ. Sɔng ngge yɛɛs ne igbɔm ne ito nge nang, ɛbhɛ kɛ tom me. 43iKyee iphɛ kɛ te ɛ kɛ sang seng ɛn ivol nge daa? iPhɛ so daa ɛli ne hame ɛ kɛ kyii ɛn ne icwas mon ɛlɔ ɛdaan ɛ tenes ɛn ibol nge de. 44Ɛ so ɛn ninaa ɛkyɛɛ mon ɛShɛtan, ɛɛ sim ɛn te ɛ sɛɛ roos ɛn ɛkɔn na ne ɛkyɛɛ mon na sim. Ne le ne itsa yɛ ɛ kaa ku so ɛhaa ne phobho ninyi ne ɛ sang bok itin nɛ, daa ɛli ne hame itin de so ndɔ ɛbhɛ. I sɛ ɛ kɛ hyɛ irywɛɛk ga, kaa so ɛɛ ku bol ɛkɔn na ne ɛbhɛ yɛ ɛ ku so, daa ɛli ne ɛ ku so ɛhaa ne irywɛɛk ka, ne ɛ ta so ɛkyɛɛ ninaa ne irywɛɛk ka. 45Daa ɛli ne nzi tɔng nyini itin de, iphɛ phɛ kɛ te ɛ sang nang ɛn ne itin nɛ ne me wo. 46ɛDɛ mon sɛɛ yɛɛ yɔng wu kɛ ku wum me ne ɛfɔt bɛ? Wu itin nɛ ne nzi ne tɔng ngo, ikyee iphɛ kɛ ne te ˆɛ sang nang ɛn ne itin nɛ ne me woo? 47ɛNyi gha ne ɛ so ne ɛTaanggbey ya, ɛɛ tenes ɛkɔn na ne ɛTaanggbey ya bol. ɛKɔn na ne ɛ kɛ ne te ɛ sang tenes ɛn mɛɛn no, sɔng ɛ so ɛn ninaa ɛTaanggbey ya nang.”
ɛYɛso, ne ɛBaraying
48niYahodawa na ne yaak ɛYɛso yegha, “Sɔng ibol mos de so itin nɛ ne njwi kaa yɔng wu ɛ soyɛ ɛnyi ne iSamariya gha, ɛphoo gha ta so ndɔ mo de nang nge?”
49ɛYɛso gha ne kyii nɛ ɛ yɔngɔ, “Sɔng ɛphoo so ndɔ nge nang, nzi yang naas ɛkyɛɛ nge ne ndiinday, ɛ ne ji bɛɛs ɛn mɛɛn. 50Sɔng nzi tɔk ito nge ne ndiinday de nang, ɛdɛ ɛnyi gha sonɛ ne ɛbhɛ tɔk me nɛ, ɛbhɛ ne ɛ ta so ɛhaa ne hyɛ ɛshara gha. 51Nzi tɔng nyini itin nɛ, ɛhiha ɛnyi ne ɛ kɛ roos ibol nge de, sɔng ɛ sɛ ne ku nang.”
52niYahodawa ne yaak ɛbhɛ, “ɛLyilyɛghaa ne njwi kɛ ji seng wu ɛphoo gha so ndɔ mo ɛtsak! ɛBaraying nga kaa ku, ninabawa na kaa ne ma kus, iphɛ dee ɛɛ ne bo wu ɛnyi gha ne ɛ kɛ roos ibol mo, wu hang ɛ sɛ ne ku. 53Ɛ phyin ɛkyɛɛ mos ɛBaraying ngeghaa? Ɛ kaa ku, ɛlɛy nɛ ninabawa na. Ɛ ji wɛɛ te ɛ soyɛ ɛhay?”
54ɛYɛso gha ne yɔngɔ, “Wu nggɛ nang ito nge ne ndiinday de, sɔng ito-ndiinday yɛ ne so ɛkɔn nang. ɛKyɛɛ nge gha, ne ɛ bo ɛn wu ɛ so ɛTaanggbey mon na ɛbhɛ ɛ naas me ne ndiinday de. 55Sɔng ɛ ku yɛɛ ɛn ɛbhɛ nang, nzi ne yɛɛ ɛbhɛ. Wu nggɛ ne yɔng wu hang nzi yɛɛ ɛbhɛ, naa ne te me ɛhaa ne irywɛɛk tɛ nyinɛn. Nzi ne yɛɛ ɛbhɛ, ne n da i roos ibol ɛbhɛ. 56ɛKyɛɛ mon ɛBaraying nga kaa bok irway ihwala gbom da ne icwas ne yaang nten nge de; ɛ kaa ne yaang, iphɛ ne nang ɛbhɛ irway ihwala.”
57Nibhɛ ne yaak ɛYɛso yegha, “Sɔng ishay mo de kɛ hɔn nzuwubɔ iwii nang, iphɛ ne ɛ kɛ ne yaang ɛBaraying ngeghaa?”
58ɛYɛso gha ne yaak nibhɛ, “Nzi tɔng nyini itin nɛ, ɛli ne tang yɛk ɛBaraying nge gha, ‘Nggu Sonɛ.’ ”
59iBol lɛ ne te nibhɛ ji tang ikpɛɛ tɛ nibhɛ phengɛ ɛbhɛ nɛ, ɛYɛso gha ne ree ye, ɛ byangaret ɛ wuru, ɛ tek iDeng ngge.
Currently Selected:
ɛYohana 8: etxNT
Tõsta esile
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project