Luka 22
22
Zingsuv Thie Riypata Ama Raw
(Mat 26:1-5; Mar 14:1-2; Jhn 11:45-53)
1Lawsena Pyi ama tapa Thiynung phuv lipa Viechuo pyi kha a ngie tli. 2Tluobyilepa tie hne phungbiesaya tie ca cawsaazaapuv kha ama ciy nakawta Zingsuv kha a paruvta tah thie khuna riypa luopuv ama huv nguoluo.
3Cakhutaata ziytuv hlyihning hrawlie ta pakha a cuopa Iskariot ama tapa Judah chung luo kha Setaa aa ngie. 4Cacuonakawta Judah ca tluobyilepa tie hne Biena-ing a huotuv abyi tie'a luo kha vaa te Zingsuv kha iema'a luo a pi khuna riypata bie a vaa rue yi. 5Ama palung tluosa te tuokaa pi riypata ama palung a tling. 6Ama zaw a palung tling te cawsaazaapuv pachang li pata iema kuv chung luo Zingsuv a pi thena riypa yi ta a chaw a rawpa cuo kha a huv.
Lawsena Pyi Cuota Atingna
(Mat 26:17-25; Mar 14:12-21; Jhn 13:21-30)
7Thiynung phuv lipa Viechuo Pyi, Lawsena tuvtaata ta hriykhung a rina cuo kha a vya pha. 8Cacuonakawta Zingsuv ta Piter hne Johan ca pathlie yite, “Vaa ungla ima ning riypata Lawsena Pyi sa kha va pachie tie ung,” a ta yi. 9Iema ta, “Khaapa lie va pachie riypata ma malie na khing?” ama ta. 10Ama ta, “Naa thlie tie ung, khypuv chung luo nama vaa ngie pahne tiybi ta tiy a vya cabalepapaa kha namaa taw aa. Aa ngienapa ing te khata va paziy ungla, 11capa ing a hnyituvpapaa kha, ‘Ma sayapa na, Kama hne naa ziytuv tie Lawsena zuosa ma ningna riypa khuo ca khaapa hingma a cuo? tapata hiehriy tie ung,’ a ta yi. 12A cung khuo lie thude hne cabya tluotlingsa pata ama chipa a khuo kusapa kha ca pahmung'a yite capalie ca va pachie tie ung,” a ta yi. 13Vaa yite Zingsuv ta a changpa dadang haakhata hmang bangkhuo kha va hmung yite capa lieca Lawsena zuosa ca ama pachie.
Abyipa Zuosa
(Mat 26:26-30; Mar 14:22-26; 1 Kor 11:23-25)
14A cuo a vya tling tiyta Zingsuv ca ziytuv tie hne khata cabya lieca aa tu. 15Ama ta, “Hing Lawsena zuosa hing ruvnaana i ang hluo ta niema hne ning pakhaw riypa hing i khing hringhruo. 16Tahematapakieca ica chang yi: Khazing Pena chunglie hingpa hing patling sapa a cuo hluo li ning'a va tli ang,” a ta. 17Cakhutaa Zingsuv ca panuo kha la te, Khazing'a luo alawna bie a hluo khu taata, “Hingpa hing a la ungla a re tie ung. 18Ica chang yi: Ata taahingta Khazing Pena a vya tlung hluo li hingpa mingsuv tiy hing dang'a va tli ang,” a ta. 19Cakhutaata viechuo zaw kha la te, Khazing'a luo alawna bie a chang khu taata, chechi te iema kha pi yite, “Hingpa hing nama cuota i pipa i pangpa tana a cuo, kama a thyi pakhaana riypata za tue mya ung,” a ta yi. 20Cahaa cata zuosa ama ning khu taata panuo zaw kha pi yite, “Hing panuo hing nama cuota i lyipa, i thiyse ta pacusapa Khazing biekuona thaapa tana a cuo,” a ta.#22:20 Hluo vie caa-uv lieca rina 19b-20 te hing aw vyi. 21Cuorasala mang tie ung! Kama naa lyituvpapaa ca hingpa cabya lie hing kama hne maa tuhne hing. 22Tahematapakieca Cawsaa Saacapaa ca rawrue ciepa haatana a ziy aa, cuorasala a lyituvpapaa cuota ca ciy aa chiy hringhruo,” a ta. 23Cakhutaata iema pakha hne pakha kha, hinghaapa hmang hing ahung hingma a tue aa, tapata amaa hiehriy.
Ahungma A Lece
24Ziytuv tie hrawlie kha ahungma a lecepa ta rue riypata a cuo, tapata bie a inapa a puv. 25Zingsuv ta, “Chuelyi siepahruo tie taca ama cawsaa zaw kha ama duv ta lesue yite capa naw a hnyituv tie kha ‘Phana a tuetuvpa,” ama za ta taw. 26Cuorasala niema ca cahaa cata cuo'a va ungciy; niema hrawlie a lecepa ca a syicepa haata aw'a te luochiytuv a cuopa ca changtaapa haata a cuo aa. 27Ahungma a le vie? Sa ning riypata a tupa kha ma, sa a pituv kha ma? Cabya lie a tupa kha le vie vama? Cuorasala kama ca niema hrawlie hing sa a pituv haa khatana i aw,” a ta yi.
28Ruvnaanapa i ang chung bangkhuo naa awpuotuv ca niema tana nama cuo; 29I Paa ta a pena ina pipa haata kama zaw ta niema kha ica pi'a yi. 30I Pena chunglie i cabya lie kha ning dang'a ung cate Israel mingphang hlyihning kha bie ripa riypata byithude cunglie namaa tu aa,” a ta yi.
Piter Ta A Thawna Riypa Kaw A Rilu
(Mat 26:31-35; Mar 14:27-31; Jhn 13:36-38)
31Zingsuv ta, “Simon, Simon! Naathlie tie! Setaa ta niema bangkhuo kha suo cathlyi haata cathlyi riypata naw a hie tli. 32Cuorasala, na zangna aa lie li riypata thlaa ica chuopa. Kama'a luo naa vya pali pakhaa tiyta na uvnu zaw kha thaazuo pi mya yi,” a ta. 33Piter ta, “Abyipa nama hne thaw tlahne riypa hne thiy pakhaw riypata a ting pacie patana i aw,” a ta. 34Zingsuv ta, “Piter, ica chang: Ata zuo lie hing, ama ca pachang va ang ne tapata yi thung ina thaw hluo li ciy, aa khang'a vyi,” a ta.
Tuokaabaw, Sahrie Hne Zueziy
35Cakhutaata Zingsuv ta ziytuv tie kha, “tuokaabaw, sahrie, hne phyipakaw a cake li pata ica pathlie ning yi kha suokha chuo a tluo a tling lipa a aw ma?” a ta yi. Iema ta, “Khaahmuo aw vyi,” ama ta. 36Zingsuv ta, “Cuorasala, ata hing ca, tuokaabaw a cuo li kie sahrie a hnyipa ca a phya se; zueziy a hnyi lipa ca a buohryicungle kha zaa sala a calyi se. 37Tahematapakieca ica chang yi: Caapathepa ta, ‘Ama ca a suepa tie hrawlie na ripuopa a cuo,’ tapata kama kaw a capepa kha a tling aa. Tahematapakieca kama kaw ama capepa bangkhuo kha a vya tlingle lawmaw aa,” a ta. 38Iema ta, “Mang tie, Abyipa, hinglie hing zueziy suohning a aw,” ama ta. “Ca zaa cata a de aa!” tapata a palie yi.
Oliv Tluo Lie Zingsuv Thlaa A Chuo
(Mat 26:36-46; Mar 14:32-42)
39Zingsuv ca pya te a tue tawpa haakhata Oliv tluocung luo kha kie te a ziytuv tie ta ama paziy. 40A hmang luo a pha tiyta iema kha, “Pasupaliyna luo nama tla li riypata thlaa chuo tie ung,” a ta yi. 41Cakhutaa alung vaa khang a hlana luo kha vaa te a pakhuv pane te thlaa a chuo. 42“I Paa, na palung a tling pata a cuo kieca hingpa te-angna panuo hing na lapa thi tie. Cuorasala kama khingna haa cuo li pata nama khingna haa cuo mangsue,” a ta. 43Vuoruo taata avuoming pakha zaa luo te thaa a pi. 44Palung riethyisa pata khuo vie ta thlaa chuo te a mathle ca thiydiy haata alyi luo a tla.#22:44 Hluo vie caa-uv lieca rina 43-44 hing aw vyi 45A thlaachuona taata thu te ziytuv tie'a luo kha a kaa tiyta amaa zaa hmung diypa kha a hmung yi, ama ngie a chisa nakawta a cuo. 46Ama ta, “Khaapanakawma namaa hmung? Thu ungla pasupaliyna chung luo nama tla li riypata thlaa chuo tie ung,” a ta yi.
Zingsuv Ama Lyina Hne Ama Patuvnapa
(Mat 26:47-56; Mar 14:43-50; Jhn 18:3-11)
47Zingsuv bie a ri nguoluo kalie pata a ziytuv tie hraw taata pakha a cuopa Judas ta aa vya chiypa cawsaazaapuv kha ama vya chiy. Zingsuv kha pahnuo riypata a vaa ngie. 48Cuorasala Zingsuv ta, “Judas, Cawsaa Saacapaa hing pahnuona tama na lyi,” a ta. 49A thaalie a awpa tie ta hmang a vya cuo riypa kha ama hmung tiyta, “Abyipa, zueziy hingta a ce'a kanaa yi pamaw?” ama ta. 50Iema hraw taa pakha ta tluobyilecepa siipaapa kha a vya ce te a cacuo luo naacakue a sa pathla. 51Cuorasala Zingsuv ta, “Ade se!” ta te a naacakue kha hrie te a patluo sa. 52Cakhutaa ta Zingsuv ta ama patuv riypata a vawpa tluobyilepa tie, biena-ing paliy byi tie hne uvthyi tie kha, “Kama hing damie haata patuv riypata ma zueziy hne tungbung hneta na maa vaw? 53Ningting ta niema hne Biena-ing chunglie i aw ning kha na patuv vade ungciy. Cuorasala ata hing ca khyzingna huvhaa a cahra ning cuote, niema cuo tana a cuo,” a ta yi.
Piter Ta Zingsuv A Thaw
(Mat 26:57-58, 69-75; Mar 14:53-54, 66-72; Jhn 18:12-18, 25-27)
54Zingsuv ca patuv yite Tluobyilecepa ing luo kha ama sikhyi. Cuorasala Piter ta aa hlapuv taakhata a paziy yi. 55Ahmie khingkhuo lie kha myipung thaw yite amaa tupakhawna lie kha Piter ca a tu ra. 56Myi kielie aa tupa kha changtaanung pakha ta hmung te hmiedesuo ta mang te, “Hingpapaa zaw hing Zingsuv'a lie a aw rapa tana a cuo ra,” a ta. 57Cuorasala Piter ta, “Cawsaanung, capapaa ca pachang va ang,” a ta. 58A cawta a awpa ta pakhapa ta hmung te, “Nama zaw hing iema hraw taa pakha tana na cuo,” a ta. Cuorasala Piter ta, “Cawsaapa, cuo va ang,” a ta. 59Siymaluo pakha tluv khu taata a hrangpa pakha ta a cusa pata, “Hingpapaa hing Zingsuv hneta a aw rapa tana a cuo hrahring, tahematapakieca Galilee ming tana a cuo,” a ta. 60Cuorasala Piter ta, “Cawsaapa, khaapama na ri tapa pachang va ang,” a ta. Bie a ri nguoluo kalie pata aa a khang. 61Abyipa ca a pali te Piter kha a mang, Piter ca Abyipa ta, “Ata zuo aa a khang hluo ta yi thung te ina thaw'a ciy,” a tapa kha aa kya thyi. 62Piter ca pya te palung ityalya khata a caa.
Zingsuv Ca Tue Hyalya Yite Ama Tuv
(Mat 26:67-68; Mar 14:65)
63Zingsuv ca a patuvpa tie khata tue hyalya yite ama tuv. 64A ming kha pahruv yite, “Ahungma caa tuv, ri tie,” ama ta. 65Cahaa cata esena bie kha a cunglie a hluvsa ama ri.
Bieripatuv Phuv Hmie luo Zingsuv Ama Chiykhyi
(Mat 26:59-66; Mar 14:55-64; Jhn 18:19-24)
66Khy a dyi taata Judah uvthyi tie, tluobyilepa tie, hne Phungbiesaya tie kha a hmya yite Zingsuv ca bieripatuv phuv hmie luo kha ama chiykhyi. 67Iema ta, “Messiah#22:67 Or Khrih na cuo kie malie chang tie,” ama ta. Ama ta, “Ica chang zaw yi ta na zang'a va ungciy; 68bie ica hiehriy zaw yima na palie'a va ungciy. 69Cuorasala ata taahingta Cawsaa Saacapaa hing Cungnungce Khazing cahrana cacuo luo kuo ta patu sapa a cuo aa,” a ta. 70Ama bangkhuo ta, “A cuo kie, Khazing Saacapaa ta na cuo ma?” ama ta. Ama ta, “I cuopa ca niema na a ri ungciy,” a ta yi. 71Cakhutaa iema ta, “Khaapa pachangkhyituv hrangpa ma a hu'a tli! Ama pakaa taa hrahring ta ma thyi tli,” ama ta.
Currently Selected:
Luka 22: LNT1
Tõsta esile
Share
Copy
Want to have your highlights saved across all your devices? Sign up or sign in
New Testament in Chin Lautu © Bible Society of Myanmar, 2015.