Johan 4
4
Zingsuv Hne Samaria Nung
1-2Zingsuv ama pangphie cuo li pata ziytuv tie ta tiynawna ama pi raalaa pata, Zingsuv ca Johan laata ziytuv a hluv vie hnyi te tiynawna a pi yi tapata Farasi tie ta ama thyipa kha Zingsuv ta a pachang tiyta, 3Judea ruo taa khata pya te Galilee ruo luo kha a kaa. 4Cuorasala Samaria ruo kha a cahraw paa. 5Cacuonakawta Jacob ta a saacapaa Josef a pipa luruo hne a ngieta tah a awpa Samaria pe Saikhar khy luo kha a chiy. 6Capa lieca Jacob takhue kha aw te Zingsuv ca a nang a buosa nakawta takhue kie lieca aa tu. Capa cuo ca ningchung hraw ta a cuo.
7Samaria cawsaanung pakha ca tiy the riypata a vaw te Zingsuv ta, “Tiy dang riypa na siy tie,” a ta. 8(A hnang ziytuv tie ca ning riypa calyi riypata khychung luo ama vaa ningta a cuo.) 9Samaria zaanung cata, “Judah ming pakha a cuo pata Samaria canung pakha a cuopa kama'a lie dang riypa tiy inaa hiepa cahing khaapanakawma a ta?” a ta (Judah ming ca Samaria ming hneta hmang a hrawpa ta hmuo khing vayi.)#4:9 Hluo vie caa-uv lieca hingpa caatluo hing aw vyi. 10Zingsuv ta, “Khazing ta aca pipa lasaw hing khaapama a cuo tapa hne tiy dang riypa caa hiepapaa hing ahungma tapa hing pachang la ca ama pali hing a hie'a cate hringna tiy kha aca pi aa,” a ta. 11Canung nung ta, “Abyipa, tiyphie ta na hnyi va, takhue ta aa thuvsa hyi. Khaapa taata ma capa hringna tiy ca na la aa? 12Hingpa takhue malie a pipa mingpa Jacob laata i le vie tapata ma naa rue? Ama hne a saata zaw hne a sahring zaw bangkhuo ta ama dangpa takhue tana a cuo,” a ta. 13Zingsuv ta, “Hingpa tiy a dangpa bangkhuo ca ama tiy a hrie pakhaa aa, 14cuorasala kama ta i pipa tiy a dangpa ca khatiy tahmuo a tiy hrie pakhaa'a va tli. I pi riypa tiy ca a chunglie kha chuozaa hringna a pipa acaatiy ta aa li aa,” a ta. 15Canung nung ta, “Abyipa, I tiy a hrie li tli riypa hne, hingpa luo zaw hing tiy the riypata i vaw li tli riypata capa tiy ca na pi tie!” a ta.
16Zingsuv ta, “Cakuo la naa vaapa kha va ku la a vaw pakhaa tie,” a ta. 17Canung nung ta, “Navaa hnyi va ang,” tapata a palie. Zingsuv ta, “Navaa hnyi va ang na tapa hing a hmuo. 18Capaa papangaa a hlaw tli yi cate ata lie naa hlawpapaa zaw hing naa vaapa hmisi ta cuo vyi. Na ripa hing aa hmuo,” a ta. 19Canung nung ta, “Abyipa, profet ta na cuopa ica pachang. 20Kiema mingchingmingvuo tie taca hingpa tluo lie hing Khazing kha amaa zaa bie, cuorasala niema taca Khazing ca Jerusalem liena abie riypa a cuo nama ta,” a ta. 21Zingsuv ta, “Canung nung, ica changpa hing zang tie, niema ta Paa ca hingpa tluo lie cuose, Jerusalem lie cuose namaa bie lina riypa cuo ca a vaw nguoluo tli. 22Niema ca nama pachang lipa khana namaa bie, kiema ca ma pachangpa kha maa bie, tahematapakieca khuona ca Judah ming'a taata a vawpa tana a cuo. 23Khazing abie hmisipa tie ta Paa ca thlaapa hne biehmisipa ta amaa biena cuo kha a vaw nguoluo te a vya tlung tli. Cahaa cata a biepa cana Paa ta a khingpa a cuo. 24Khazing ca Thlaapa ta cuote abiepa tie ta Thlaapa hne biehmisipa ta amaa bie riypatana a cuo,” a ta. 25Canung nung ta, “Messiah ca a vaw nguoluo tapa kha i pachang. Ama aa vaw thueta hmangting bangkhuo kha a pathyi diy aa,” a ta. 26Zingsuv ta, “Nama hne bie a ri nguoluopa kama hing ama ca tana i cuo,” a ta.
27Capa cuo lieca Zingsuv a ziytuv tie ca vya chiy yite canung nung hne bie amaa rue nguoluopa kha ama hmung tiyta ama nang a uosa. Cuorasala ahungtahmuo, “Khaama naa hu?” ta lipa yi ta, “Khaapanakawma hingpa nung hing bie na rihne?” ta ra vayi. 28Cakhutaata canungnung ca a tiybi kha thusesiy te, khychung luo kha kaa te cawsaa zaw kyihuo khata, 29“I tue buopa hmang bangkhuo naa chang khu diy papaa hing vya mang tie ung. Ama hing Messiah#4:29 Or Khrih ta cuo'a vama?” a ta yi. 30Cacuonakaw khychung taa cata pya yite Zingsuv'a luo ca ama vaa.
31Capa cuo ning ca ziytuv tie ta Zingsuv kha, “Rabbi, sa ning tie,” ama ta. 32Cuorasala ama ta, “Niema ta a kaw nama pachang lipa ning riypa sa na i hnyi,” a ta yi. 33Cacuonakawta ziytuv tie ca pakha hne pakha kha, “Pakhakha ta sa a vya pi pata a cuo biephung'a ma?” amaa ta. 34Zingsuv ta iema kha, “I sa ca naa pathlietuv khingna tue hne rehrie ina changpa palang hing tana a cuo,” a ta yi. 35Niema ta, “Ata taata thlapaliy khu pahne sa hrie tiy a ta aa,” nama ta cuo vama? Cuorasala ica chang yi: nama cahriy kha suo ungla; sa ca hming te khatluv tama hrie aa de tapa kha mang tie ung! 36Sa a hriepapaa ca a hrie muo kha pipa cuote chuozaa hringna cuota sa kha a papung nguoluo, cacuonakawta a ciy a cyituv hne sa a hrietuv kha suvkha ta ama palung a tluo pakhaw aa. 37‘Pakha ta ciy cyi te pakha ta sa a hrie,’ tapa bie ca ama lie hingna aa hmuo.
38Nama thlu lipa lu lie sa hrie riypatana ica pathlie yi; malie ta thlu yite niema ta ama thlu cienapa lie kha nama hrie,” a ta yi.
39Canung nung ta, “I za tue buopa bangkhuo tana ina chang diy,” tapata tehte a khuo nakawta Samaria ming a hluvpuv ta ama zang. 40Cacuonakawta Samaria ming ca Zingsuv'a luo amaa vaw tiyta, iema'a lie a pahy riypata paakie yite, ning hning a pahy siy. 41Zingsuv bie ripa kha thyi yite cawsaa a hluv hryly ta ama zang. 42Canung nung kyihuo khata, “Ata hing ca nama na ri nakawta cuo li pata kiema hrahring ta a bie ripa kha thyi pate ma zang; ama ca chuelyi Khuotuv a cuo hrahring tapa kha ma pachang,” ama ta.
Zingsuv Galilee Luo A Kaa
43Ning hning khu taata, Zingsuv ca Galilee ruo luo kha a si. 44(Tahema-tapakieca Zingsuv hrahring ta, “Profet ca a puvna ruo lieca pa-uvsathyina hmung vyi,” a ta.) 45Galilee luo a chiy tiyta, Galilee ming ta ama kha ama daw, tahematapakieca Jerusalem Lawsena Pyi luo kha vaa ra yite pyi chunglie ta a tuepa bangkhuo kha ama hmung nakawta a cuo.
Zingsuv Ta Abyi Pakha Saacapaa A Patluo Sa
46Cakhutaata Zingsuv ca tiy kha mingsuv tiy ta a za pacuo sa napa Galilee pe Kaanaa khy luo kha a si pakhaa. Capa lieca cuzaa byi pakha aw te a saacapaapa ca Kapernaum khy lie kha a pasa. 47Zingsuv na Judea ruo taata Galilee luo a vaw tapa kha a thyi tiyta, ama'a luo kha vaa te, Kapernaum khy luo kha vaa pata vuotaa a thiy'a nangpa a saacapaa kha patluo sa riypata paa a kie. 48Zingsuv ta, “Pamangsana kharuehaa hmang nama hmung li kieca zang'a va ungciy,” a ta yi. 49Cuzaa byipa cata, “Abyipa, i saata a thiy hluo hingta a vaw tie,” a ta. 50Zingsuv ta, “Cakuo tie, na saacapaa ca a hring aa,” a ta. Capapaa cata Zingsuv bie kha zang te a cakuo. 51A kaa luo, luopuv lie kha a sii tie ta vya daw yite, “Na saacapaa ca a tluo tli,” ama ta. 52Ama ta, “Khaapa cuo taakhata ma a saacapaa ca a tluo vie? tapata a hiehriy tiy yi ta, iema ta, “Azuochaning ningchung, siymaluo pakha lie khana a ngelingpa a cakaa,” ama ta. 53Capa cuo ca Zingsuv ta, ‘Na saacapaa ca a tluo aa,” a za tapa cuo ta a cuopa kha a paa ca a kya thyi pakhaa. Cacuonakawta ama hne a ingchungkhue tie bangkhuo ta ama zang. 54Hingpa hing Zingsuv ta Judea ruo taata Galilee ruo luo aa vaw khu taata a tuepa kharuehaa hmang a suohningnapa ta a cuo.
Currently Selected:
Johan 4: LNT1
Tõsta esile
Share
Copy
Want to have your highlights saved across all your devices? Sign up or sign in
New Testament in Chin Lautu © Bible Society of Myanmar, 2015.