Matfey 18
18
Kim en büük?
1Ozaman üürenicilär yaklaştılar da sordular İisusa: «Kim en büük Gök Padişahlıında?»
2İisus çaardı bir uşak, koydu onu üürenicilerin önünä
3da dedi: «Dooru söleerim sizä: eer dönmärseydiniz Allaha da olmarsaydınız uşak gibi, birtürlü bilä girmeyeceniz Gök Padişahlıına.
4Kim yavaşlanêr, nicä bu uşak, o en büük Gök Padişahlıında olacek.
5Kim dä kableder bölä bir uşak Benim adıma, o Beni kableder.
Günaha düşürmeyin başkasını
6Ama kim günaha düşürärsä birini bu en küçüklerdän, ani Bana inanêrlar, ona taa islää, baalasınnar boynusuna bir büük dermen taşı da atsınnar denizin dibinä.
7Vay dünneyä günah aldangaçlıı için. Zerä yok nasıl gelmesin aldangaçlar, ama vay ona, kimin beterinä aldangaçlık geler.
8Eer elin eki ayaan seni günaha düşürärsä, kes onu da sıbıt. Taa islää sakat eki çolak ömürä giräsin, nekadar iki ayaklan hem iki ellän diveç ateşä atılasın.
9Eer gözün seni günaha düşürärsä, çıkar onu da sıbıt. Taa islää bir gözlän ömürä giräsin, nekadar iki gözlän cendem ateşinä atılasın.
Kayıp koyun
10Bakın, aşaalatmayın birisini bilä bu en küçüklerdän, zerä söleerim sizä, onnarın angilleri göktä herzaman görerlär Benim Gökteki Bobanın üzünü.
/ 11Adam Oolu geldi, aarasın hem kurtarsın o kayıp olannarı./
12Nicä siz sanêrsınız? Varsaydı bir adamın üz koyunu, da onnarın içindän birisi kaybelärseydi, brakmayacek mı o doksan dokuzu bayırlarda da gitmeyecek mi, aarasın o kayıp koyunu?
13Bularsaydı, dooru söleerim sizä, sevinecek onun için taa çok, nekadar o doksan dokuz için, ani kaybelmedilär.
14Hep ölä sizin Gökteki Boba da istämeer, ki birisi bu küçüklerdän kaybelsin.
Baaşlayın kabaatlı olanı
15Eer senin kardaşın sana karşı günah yaparsaydı, git takazala onu salt senin hem onun arasında. Eer seslärseydi seni, sän kazandın kardaşını.
16Ama seslämärseydi seni, al seninnän taa iki yada üç kişi, iki-üç şaat kaavilendirsinnär herbir lafı.
17Onnarı da istämärseydi seslemää, sölä kliseyä. Eer istämärseydi kliseyi seslesin, olsun senin için, nicä bir tayfän hem nicä bir harççı.
18Dooru söleerim sizä: ne baalayacenız erdä, o baalanmış olacek göktä, hem ne çözeceniz erdä, o çözülmüş olacek göktä.
19Enidän sizä söleerim: eer sizdän iki kişi kayıl olarsaydı istemää bişey bu erdä, ozaman ne dä istärseydilär verilecek Gökteki Bobamdan.
20Zerä neredä var iki-üç kişi toplu Benim adıma, Bän dä bulunêrım orada onnarın arasında».
Kaç sıra baaşlayım kardaşımı?
21Ozaman Petri yaklaştı Ona da dedi: «Saabi, kaç sıra var nicä baaşlayım kardaşımı, ani bana karşı günah yapêr? Edi sıra mı?»
22İisus cuvap etti ona: «Bän demeerim sana edi sıra, ama baaşla etmiş sıra edişär.
23Onuştan Gök Padişahlıı benzeer bir padişaha, ani istedi ödeşmää onun çıraklarınnan.
24Açan başladı esap yapmaa, getirdilär ona birisini, angısı ona borçluydu on bin talant#18:24 Bir talant – 6000 dinar. Bir dinar – bir günün hakıydı..
25Çünkü yoktu neylän ödesin, çorbacı sımarladı, satsın kendisini, karısını, uşaklarını hem hepsini, ne var onda, ki borcu ödensin.
26Ozaman çırak düştü üzükoynu erä, baş iiltti çorbacıya da dedi: „Çorbacı, beklä biraz taa, ödeyecäm sana bütün borcumu“.
27Çorbacının canı acıdı o çıraa, baaşladı borcunu da salverdi, gitsin.
28O çırak, açan çıktı dışarı, karşı geldi kafadarlarından birisinnän, angısı borçluydu ona üz dinar. O çırak tuttu onu, sıktı gırtlanını da dedi: „Ödä borcunu!“
29Onun kafadarı düştü erä üzükoynu da yalvarardı: „Dayan biraz da, ödeyecäm bütün borcumu“.
30Ama o kayıl olmadı, götürdü onu da kapadı zındana, borcunu ödesin deyni.
31Kafadarları gördülär bunu da pek gücendilär. Onnar gittilär da söledilär hepsini çorbacıya.
32Ozaman çorbacı çaardı bu kulu kendisinä da dedi ona: „Yaramaz çırak, bän hepsi senin borcunu baaşladım, zerä sän yalvardın.
33Düşmärdi mi, sän dä acıyasın kafadarını, nicä Bän seni acıdım?“
34Çorbacı üfkelendi da verdi onu zeetleyicilerin ellerinä, ödesin bütün borcunu deyni.
35Hep ölä yapacek sizä Gökteki Bobam da, eer siz bütün ürektän baaşlamarsaydınız sizin kardaşınızı».
Currently Selected:
Matfey 18: GagNTL
Tõsta esile
Share
Copy
Want to have your highlights saved across all your devices? Sign up or sign in
© Bіblіyayı çevіrän İnstіtut, Moskva, 2006