Matfey 15
15
İhtärların adetleri
1Ozaman fariseylär hem bilgiçlär İerusalimdän geldilär İisusa da dedilär:
2«Neçin Senin üürenicilerin çiinerlär ihtärların adetlerini? Zerä imektän ileri yıkamêêrlar ellerini».
3İisus cuvap etti onnara: «Siz neçin çiinersiniz Allahın sımarladıını sizin adetlerinizin beterinä?
4Zerä Allah dedi: „İkramna bobanı hem ananı“ hem „Kim bobasını yada anasını kötüleyecek, ölümnän cezalı olsun“.
5Ama siz deersiniz: „Kim deer anasına yada bobasına: Ne lääzımdı sana vereyim, baaşış Allaha verdim,
6o var nicä ikramnamasın bobasını /hem anasını/“. Butürlü paasızlandırdınız Allahın sözünü kendi adetinizlän.
7İkiüzlülär! Dooru prorokluk etti sizin için İsaya, açan dedi:
8„Bu insan Beni ikramnêêr sade aazınnan, ama üreklerinnän uzak Bendän durêr.
9Naafilä Bana baş iilderlär, zerä adam sımarlamaklarını üürederlär, sansınnar ani Allahın üüretmekleri“».
Hakına ne mındarlêêr adamı?
10İisus çaardı insanı da dedi: «Sesleyin da annayın Beni.
11Mındarlêêr adamı diil o, ne içinä girer, ama ne aazından çıkêr, o mındarlêêr adamı».
12Ozaman üürenicilär yaklaştılar İisusa da dedilär: «Bilersin mi, ani bu lafları işidip, fariseylär gücendilär?»
13İisus cuvap etti onnara: «Herbir rasat, ani diil koyulu Benim Gökteki Bobamdan, köktän yolunacek.
14Brakın onnarı, onnar köörların köör güdücüleri. Açan bir köör güder başka kööru, onnar ikisi dä çukur içinä düşerlär».
15Petri lafetti da Ona dedi: «Açıkla bizä bu örnää».
16İisus dedi: «Ne, siz dä mi ölä zor annêêrsınız?
17Annamêêrsınız mı, ani ne girer adamın aazından, girer şkembesinä, sora dışarı uuradılêr?
18Ama ne adamın aazından çıkêr, o ürektän geler. Te bu mındarlêêr adamı.
19Zerä ürektän çıkêr fena neetlär, öldürmäk, orospuluk, hayırsızlık, hırsızlık, yalancılık, kötülemäk.
20Tä ne adamı mındarlêêr, ama yıkanmadık ellän imää adamı mındarlamaz».
Hanaannı karının inanı
21İisus gitti oradan, uzaklandı Tir hem Sidon erlerinä.
22Tä bir karı hanaannıyka geldi Ona da başladı baarmaa: «Acı beni, Saabi, Davidin Oolu! Benim kızım titsi zeetlener bir fena duhtan».
23İisus cuvap etmedi bir dä laf. Ozaman Onun üürenicileri yaklaştılar Ona da yalvardılar: «Salver onu, zerä baarêr bizim ardımıza».
24İisus cuvap etti: «Bän yollanmışım salt İzrail milletin kayıp koyunnarına».
25Ama bu karı geldi, baş iiltti da dedi: «Saabi, yardım et bana!»
26İisus ona cuvap etti: «Diil islää almaa ekmää uşaklardan da atmaa köpeklerä».
27«Ölä, Saabi, ama köpeklär dä iyerlär kırıntıları, ani düşer çorbacılarının sofrasından», – dedi bu karı.
28Ozaman İisus cuvap etti: «O, karı, büüktür senin inanın. Olsun, nicä sän isteersin». Birdän onun kızı alıştı.
Dört bin adam doyurulêr
29İisus ayırıldı oradan da gitti Galileyaya, gölün yanına. Pindi bir bayır üstünä da oturdu orada.
30Çok insan geldi Ona orayı. Getirdilär kendilerinnän topalları, köörları, mutuları, sakatları hem çok başka hastaları, koydular onnarı Onun ayaklarına, da O onnarı alıştırdı.
31İnsan şaşardı, görüp ani mutular lafederlär, sakatlar alışêrlar, topallar gezerlär, köörlar görerlär. Onuştan metinnärdilär İzrailin Allahını.
32İisus topladı üürenicilerini da dedi: «Canım acıyêr bu insana, zerä üç gün durêrlar yanımda da yok ne isinnär. İstämeerim onnarı salvereyim aaç, aniki bayılmasınnar yolda».
33Üürenicileri dedilär: «Neredän alalım bukadar ekmek bu çol erdä da doyuralım bukadar insan?»
34«Kaç ekmeeniz var?» – sordu İisus. «Edi ekmek hem birkaç balık», – cuvap ettilär onnar.
35Ozaman İisus sımarladı insana, otursunnar erä.
36Aldı edi ekmää hem balıkları, şükür etti Allaha, sora kırıp verdi üürenicilerinä. Onnar da payettilär insana.
37Hepsi idilär da doyundular. Sora topladılar imäk parçalarını, edi sepet dolu.
38Onnar, ani idilär, vardı bir dört bin adam, karılardan hem uşaklardan kaarä.
39Sonda İisus braktı insanı gitsinnär, Kendisi girdi kayık içinä da geçti Magdala#15:39 Magdala: taa geç tekstlerdä «Magadan». erlerinä.
Currently Selected:
Matfey 15: GagNTL
Tõsta esile
Share
Copy
Want to have your highlights saved across all your devices? Sign up or sign in
© Bіblіyayı çevіrän İnstіtut, Moskva, 2006