San Juan 3
3
Jesús y Nicodemo
1Ni̱ hua ꞌngo̱ tsínj fariseo gu̱ꞌnaj Nicodemo huin síꞌ ꞌngo̱ tsínj huin achij rian ni tsínj israelita. 2Hué dan ni̱ ne̱ꞌ ni̱, ni̱ gaꞌna̱ꞌ Nicodemo rian Jesús. Ni̱ gataj sij:
―Maestro, niꞌi ni únj sisi̱ gaꞌníj Yanꞌanj gaꞌna̱ꞌ re̱ꞌ digyán re̱ꞌ rian ni ngüi̱. Daj si ni̱ a̱ ꞌngo̱ tsínj si̱ gaꞌue ga̱huin nucuaj gui̱ꞌyaj sa̱ꞌ da̱j rúnꞌ ꞌyáj re̱ꞌ sisi̱ nitaj Yanꞌanj chracuij sij mánj. ―Daj gataj Nicodemo gunun Jesús.
3Ngaa ni̱ gataj Jesús gunun síꞌ:
―Xa̱ngaꞌ yya atā gu̱nun re̱ꞌ sisi̱ tsínj si̱ gaꞌnga na̱ca ru̱huaꞌ yún, ni̱ si̱ gaꞌue ga̱huin nucuaj sij gui̱niꞌi sij rian nicaj sun Yanꞌanj mánj. ―Daj gataj Jesús.
4Ngaa ni̱ nachínj snanꞌanj Nicodemo Jesús. Ni̱ gataj sij:
―Sani̱ da̱j ga̱ꞌue gui̱ꞌyaj ꞌngo̱ tsínj achij na̱nicaj ru̱huaꞌ yún sij ga̱ꞌnga na̱ca sij únj. Asa̱ꞌ ga̱ꞌue na̱tu ru̱huaꞌ yún sij riqui nni sij, ni̱ ga̱ꞌnga ru̱huaꞌ yún sij únj. ―Gataj Nicodemo.
5Ngaa ni̱ gataj Jesús:
―Xa̱ngaꞌ atā gu̱nun re̱ꞌ sisi̱ si̱ gaꞌnga ꞌngo̱ tsínj daj, gui̱ꞌyaj nnee nga̱ Espíritu Santo, ni̱ si̱ gaꞌue ga̱tu sij rian nicaj sun Yanꞌanj mánj. 6Gaꞌnga néꞌ nga̱ nnee̱ cúj néꞌ, guiꞌyaj nni néꞌ nga̱ chrej néꞌ. Sani̱ sisi̱ ga̱ꞌnga néꞌ, gui̱ꞌyaj Espíritu Santo, ni̱ hua ni̱ꞌnaꞌ niman néꞌ. 7Si̱ garáj yanꞌanj ruhuá re̱ꞌ si gatā gunún re̱ꞌ: “Hua nia̱n ga̱ꞌnga na̱ca ru̱huaꞌ yún a ni é re̱ꞌ.” Daj gatā gunún re̱ꞌ. 8Ni̱ aꞌuiꞌ nane̱ niaj diaj. Ni̱ nu̱nj si unún re̱ꞌ aꞌuiꞌ nane̱, sani̱ nun niꞌí re̱ꞌ ni̱ a̱ ꞌnaj ni̱ a̱ huanꞌan mánj. Ni̱ hué daj huin nga̱ daranꞌ ni ngüi̱ ga̱ꞌnga na̱ca ru̱huaꞌ yún, guiꞌyaj Espíritu Santo aj. ―Daj gataj Jesús.
9Ngaa ni̱:
―Asa̱ꞌ ga̱ꞌue ga̱huin nan únj. ―Gataj Nicodemo.
10Ngaa ni̱ gataj Jesús:
―Hué re̱ꞌ huin tsínj digyán rian ni tsínj israelita, ni̱ u̱n sin huin ni̱ nunún re̱ꞌ nuguanꞌ nan únj. 11Xa̱ngaꞌ atā gu̱nun re̱ꞌ sisi̱ aꞌmi ni únj nuguanꞌ niꞌi ni únj. Ni̱ hué ni únj nataꞌ rian ni ngüi̱ xiꞌí si guiniꞌi únj nej. Sani̱ nun xu̱man ruhua ni é re̱ꞌ nuguanꞌ aꞌmi ni únj mánj. 12Ni̱ sisi̱ nun xu̱man ruhua á re̱ꞌ ngaa aꞌmī xiꞌí ni nuguanꞌ hua chruhua xungüi̱ nan, ni̱ da̱j ga̱ꞌue gu̱xuman ruhua ni é re̱ꞌ ngaa ga̱ꞌmī xiꞌí ni nuguanꞌ ꞌna̱ꞌ xataꞌ únj. 13Ni̱ a̱ ꞌngo̱ ni tsínj nun gahui ganꞌanj xataꞌ. Urīnj huin tsínj gane xataꞌ. Ni̱ nanij manꞌānj xataꞌ gaꞌnāj chruhua xungüi̱ nan huīnj daꞌníj ni ngüi̱. Ni̱ xānj huin xataꞌ nej. 14Ni̱ da̱j rúnꞌ guiꞌyaj tsínj gu̱ꞌnaj Moisés docoꞌ síꞌ xucuáj chra̱ chrun quij quiꞌyanj na̱co, ni̱ hué daj hua nia̱n gui̱ꞌyaj ni sij do̱coꞌ ni sij manꞌānj chra̱ ꞌngo̱ chrun huīnj daꞌníj ni ngüi̱. 15Ngaa ni̱ daranꞌ ni ngüi̱ xuman ruhua niꞌyaj manꞌānj, ni̱ ga̱ne ni̱ganj ni sij nga̱ Yanꞌanj. Ni̱ si̱ ganꞌanj niꞌya ni sij mánj. ―Daj gataj Jesús gunun tsínj gu̱ꞌnaj Nicodemo.
De tal manera amó Dios al mundo
16Ni̱ gataj ru̱huaꞌ yún Jesús gunun Nicodemo:
―Hué dan ni̱ ducu gahuin ꞌi̱ ruhua Yanꞌanj niꞌya ni ngüi̱ ma̱n chruhua xungüi̱. Ngaa ni̱ riqui Yanꞌanj urin daꞌni gaꞌna̱ꞌ síꞌ chruhua xungüi̱ nan. Ngaa ni̱ daranꞌ ni ngüi̱ guxuman ruhua niꞌyaj daꞌníj Yanꞌanj, ni̱ si̱ ga niꞌya ni sij mánj. Sani̱ ga̱ne ni̱ganj ni sij nga̱ Yanꞌanj. 17Daj si nun ga̱ꞌnij Yanꞌanj daꞌni gaꞌna̱ꞌ chruhua xungüi̱ sisi̱ gu̱taꞌ sij gaquinꞌ xiráj ni ngüi̱ mánj. Sani̱ gaꞌna̱ꞌ síꞌ si na̱caj síꞌ ni ngüi̱ aj. 18Ni̱ ngüi̱ guxuman ruhua niꞌyaj daꞌníj Yanꞌanj, ni̱ nitaj castigo ga̱huin ni sij mánj. Sani̱ ni ngüi̱ nun xu̱man ruhua ni̱ꞌyaj síꞌ, ni̱ hua gahuin ni sij castigo, guiꞌyaj Yanꞌanj xiꞌí si nun xu̱man ruhua ni sij ni̱ꞌyaj ni sij tsínj huin urin daꞌníj Yanꞌanj.
19’Ni̱ ni ngüi̱ nun xu̱man ruhua daj, ni̱ ga̱huin ni sij castigo xiꞌí nuguanꞌ nan: Ngaa gaꞌna̱ꞌ yanꞌa̱n huin manꞌānj guixigui̱n chruhua xungüi̱, ni̱ garanꞌ ruhua ni sij ga̱che ni sij rian ru̱miꞌ. Ni̱ nun ga̱ranꞌ ruhua ni sij ga̱huin ni̱chrunꞌ ni sij rian yanꞌa̱n xigui̱n daj. Daj si quij ꞌyaj ni sij. 20Hué dan ni̱ daranꞌ ni ngüi̱ ꞌyaj quij, ni̱ nun huin xa̱nꞌ ruhua ni sij niꞌyaj ni sij yanꞌa̱n xigui̱n daj. Ni̱ nun ga̱huin ni̱chrunꞌ ni sij rian yanꞌa̱n si naꞌuej ruhua ni sij gu̱rugüiꞌ si quij ꞌyaj ni sij mánj. 21Sani̱ ni ngüi̱ ꞌyaj xa̱ngaꞌ, ni̱ huin ni̱chrunꞌ ni sij rian yanꞌa̱n xigui̱n daj. Ngaa ni̱ rugüiꞌ si ꞌyaj sa̱ꞌ ni sij. Ngaa ni̱ xacaj ango ni ngüi̱ cuenta sisi̱ ꞌyaj sa̱ꞌ ni sij, ꞌyaj Yanꞌanj anj. ―Daj gataj Jesús.
El amigo del esposo
22Daꞌ síj ni̱ ganꞌanj Jesús nga̱ ni tsínj nicoꞌ sij estado Judea. Ni̱ gane ni sij nga̱ ni tsínj mán yuꞌuj daj. Ni̱ duguataꞌ nnee ni sij ni ngüi̱ daj. 23Ni̱ hué daj duguataꞌ nnee Juan ni ngüi̱ xumanꞌ Enón. Ni̱ ni̱chrunꞌ ngaj xumanꞌ Esrón nga̱ xumanꞌ Salim. Ni̱ hua nico nnee yuꞌuj daj. Ni̱ huaj ni ngüi̱ gataꞌ nnee ni sij. 24Ni̱ hué nan gahuin ngaa nun huin gahuin garij ni sij Juan ducuaga̱ꞌ. 25Hué dan ni̱ gaxi̱ꞌi gaꞌmi guitsi go̱ꞌngo ni tsínj nicoꞌ Juan nga̱ ni tsínj israelita xiꞌí da̱j ga̱huin sa̱ꞌ ni ngüi̱ rian Yanꞌanj. 26Ngaa ni̱ gaꞌna̱ꞌ ni sij rian manꞌan Juan. Ni̱ gataj ni sij:
―Rabí, ni̱ꞌyaj re̱ꞌ sisi̱ tsínj gachéj nga̱ re̱ꞌ anéj chrej xinéj gu̱ꞌnaj Jordán, huin tsínj xi̱ꞌi gaꞌmí re̱ꞌ cuanj. Ni̱ yya̱j ni̱ ataꞌ nnee sij ni ngüi̱. Ni̱ huaj daranꞌ ni ngüi̱ rian sij. ―Daj gataj ni sij gunun Juan.
27Ngaa ni̱ gataj Juan:
―Ni̱ a̱ ꞌngo̱ tsínj si̱ gaꞌue na̱huin raꞌa ꞌngo̱ rasu̱n sisi̱ nitaj riqui Yanꞌanj mánj. 28Hua gunun a ni é re̱ꞌ nuguanꞌ gatā gunun a ni é re̱ꞌ: Sēj huin Cristo mánj. Sani̱ gaꞌníj Yanꞌanj ga̱ꞌnaꞌ sinīj rian síꞌ. 29Ni̱ ngaa huin ꞌngo̱ guiꞌyanj xacaj ꞌngo̱ tsínj daj ꞌngo̱ yunꞌunj xa̱na, ni̱ hué síꞌ gahuin nica̱ únꞌ. Ni̱ niquinꞌ ꞌngo̱ tsínj nicaj dugüiꞌ nga̱ tsínj xacaj yunꞌunj xa̱na daj. Ni̱ ducu huin nia̱ꞌ ruhua síꞌ ngaa gunun síꞌ gaꞌmi tsínj xa̱caj yunꞌunj xa̱na daj. Ni̱ da̱j rúnꞌ ꞌyaj tsínj niquinꞌ nga̱ dugüiꞌ síꞌ, ni̱ daꞌngaꞌ daj ꞌyaj manꞌānj nej. Ni̱ huin nia̱ꞌ ruhuāj xiꞌí Cristo. 30Ni̱ hua nia̱n si ga̱huin achij Cristo. Sani̱ manꞌānj gu̱na gui̱nicoꞌ ne̱ꞌ ru̱cu nánj. ―Daj gataj Juan gunun ni sij.
El que viene de arriba
31Ni̱ gataj ru̱huaꞌ yún Juan gunun ni sij:
―Tsínj ꞌna̱ꞌ xataꞌ, ni̱ huin rian sij rian daranꞌ rasu̱n. Ni̱ tsínj ꞌna̱ꞌ chruhua xungüi̱, ni̱ ni̱nanj aꞌmi sij nuguanꞌ ma̱n chruhua xungüi̱ xiꞌí si gaꞌnga sij xungüi̱ nan. Sani̱ tsínj ꞌna̱ꞌ xataꞌ, ni̱ huin achij sij rian daranꞌ anj. 32Ni̱ aꞌmi sij xiꞌí nuguanꞌ guiniꞌi sij nga̱ nuguanꞌ gunun sij xataꞌ. Sani̱ naꞌue gu̱xuman ruhua ni ngüi̱ si ataj sij mánj. 33Sani̱ tsínj guxuman ruhua si-nu̱guanꞌ sij, ni̱ ataj síꞌ sisi̱ xa̱ngaꞌ si-nu̱guanꞌ Yanꞌanj. 34Tsínj gaꞌníj Yanꞌanj ga̱ꞌnaꞌ, ni̱ aꞌmi sij si-nu̱guanꞌ Yanꞌanj. Daj si aꞌuiꞌ ꞌueé Yanꞌanj Espíritu Santo rian sij. 35Ni̱ ꞌi̱ ruhua Yanꞌanj niꞌya daꞌni. Ni̱ nagaꞌuiꞌ Yanꞌanj daranꞌ rasu̱n rian daꞌni nej. 36Ni̱ ngüi̱ guxuman ruhua niꞌyaj daꞌníj Yanꞌanj, ni̱ ga̱ne ni̱ganj ni sij nga̱ Yanꞌanj. Sani̱ ni ngüi̱ naꞌuej ruhua gu̱nun si ataj daꞌníj Yanꞌanj, ni̱ si̱ gane ni sij nga̱ Yanꞌanj mánj. Sani̱ ꞌngo̱ gaꞌman ruhua Yanꞌanj niꞌya ni sij. ―Daj gataj Juan.
Currently Selected:
San Juan 3: trqNT
Tõsta esile
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.