MATHAYO 8
8
Yiesû ooria muntû aayîîtue mûtigiri
(Mko. 1:40-45; Ruka 5:12-16)
1Yiesû akûgûrûka kuuma karîmaani kara baarî, antû baingî mûno bamûthingata. 2Muntû ûmwe aayîîtue mûtigiri aaya amûturîria maru. Amwîra, “Mwathani, weegua wenda kûmboria, mboria nthere.”
3Yiesû aatambûrûkia njara yake amûringithia. Amwîra, “Inkwenda, thera!” Warîru muntû ûyu oora mûtigiri! 4Yiesû amwîra, “Menyeera ûtikeere muntû. Îndî îthi wonwe i mûthînjîri wa Ngai ûrute kîewa kîra Musa augire kîrutagwe kîrî ûkûûyî kîrî antû.”
Yiesû ooria mûruti ngûgî wa mûtongoria wa njûûrî
(Ruka 7:1-10)
5Yiesû agûkinya Kaperinaumu, mûtongoria ûmwe wa njûûrî ya acikaarî îgana aaya kîrî we. Amwereka 6akîmwîraga, “Mwathani, mûruti ngûgî wakwa n'ûmwayie ndwari ya wonje. Namaami na nakûnyamaara mûno.”
7Yiesû amwîra, “Nkaaya kûmworia.”
8Mûtongoria ûyu eera Yiesû, “Mwathani, ntikwona ndî mûganu ûntû ûûmba kûthûngîra nyomba yakwa. Uga mûgambo ûmwe akî na mûruti ngûgî wakwa akoora. 9Niû ningwa ndî na mûnene ûra aambathaga. Naani ndî na acikaarî bara mbathaga. Na nkeera ûmwe, ‘Îthi!’ nathiyaga. Na nkeera ûngî ‘Ncû!’ naayaga. Na nkeera nkombo yakwa n'yo nîrûthe ûntû bûna, nîrûthaga.”
10Yiesû aarigara mûno eegua ûgu. Eera bara baamûthingatîîte, “I mma ga nkûbwîra, ntoona muntû arî na wîtîgio bûûnene ta bûbû. Wana Isiraeri ationeka nwa ûmwe. 11Ka mbwîreeni, antû baingî bakauma nteere cionthe cia nthîgûrû barîyanîre meethaani îmwe na Îburaîmu, Isaka na Njakubu ûneneeni bwa îgûrû. 12Îndî bara babatîîrue wîgua i bo bakaathi ûneneeni, bakaagerwa nja mwinduuni barîre barî na kîeba kîînene mûno.”#8:12 Kîîngiriki kiugîîte: bagîkabakabaga magego.
13Yiesû eera mûtongoria ûyu, “Înûka, na igûkarîke ûgu wîtîgîîtie.” Thaa wa inu mûruti ngûgî wake oora.
Kworua kwa mûthoni wa Peterû na antû bangî baingî mûno
(Mko. 1:29-34; Ruka 4:38-41)
14Yiesû agûkinya mûciî kwa baPeterû, oona mûthoni wa Peterû wa mûka amaami ûrîrî aayîîtue kûbîîyanîra mwîrî. 15Aathi kîrî we amûringithia njara, oora. Aûkîîra aanjîîria kûbagaagûra.
16Na kîûgoro riûa rîkûthûa, antû bara baarî na irundu biithûûku baareetwa kîrî we. Yiesû abiîngatia na mûgambo ûmwe akî biauma. Na bonthe bara baayîîtue abooria. 17Mantû mamu maatuîkîkire kaingo mantû mara kîroria Isaaya aaroriirie maûyûra, rîra augire, “We mwene naathûkiirie wonje bwetû na ndwari cietû.”#Isaaya 53:4
Bara beendaga kûthingata Yiesû
(Ruka 9:57-62)
18Rîra Yiesû oonire ntundu înene ya antû îmûcereereete, eera arutwa baake baringanîrie amwe n'we bathi rûgongo rûra rûngî rwa îria. 19Mwarimû ûmwe wa watho aaya eera Yiesû, “Mwarimû, ngakûthingataga kunthe kûra ûkaathiyaga.”
20Yiesû amûcookeria amwîra, “Mbwe irî mîrinya na nyoni irî ntara, îndî Mwana wa Muntû atirî kîmaamo.”
21Ûmwe wa arutwa baake amwîra, “Mwathani, nwanga ndamba kûthika baaba.”#8:21 Îthe ataarî agûkua. Naugaga eeteere akue rîru athûgaanie oone kana agaatuîka mûrutwa wa Yiesû.
22Yiesû amwîra, “Nthingata! Tigana na ntungu ithike ntungu cia cio.”
Yiesû aakiria kîbuubani îriani
(Mko. 4:35-41; Ruka 8:22-25)
23Yiesû bagûtwa îtarûûni, arutwa baake bamûthingata. 24Bathiîte, nthûti îmwe kwagîa kîbuubani kîînene îriani, makûmbî ma rûûyî makûûmba gatarû akubî magakunîkania cwe. Yiesû naarî akûmaama. 25Arutwa baake baathi bamûûkia bakîmwîraga, “Mwathani, twonokie itûkûthira!”
26Yiesû abaûria, “I mbi îkûbûmakia, biû antû ba wîtîgio bûûkai?” Aûkîîra aagondokera kîbuubani na makûmbî ma rûûyî, gwakirîîria kûrû.
27Antû babu baarigara. Baûrania, “Ika muntû ûyû akari ata? N'ûntû wana ruuo, wana makumbî ma rûûyî i makûmwathîkîra!”
Yiesû ooria antû baîrî barî na irundu biithûûku
(Mko. 5:1-20; Ruka 8:26-39)
28Bagûkinya rûgongo rûra rûngî rwa nthîgûrû ya Agandaara#8:28 Mabuku mamwe ma Kîîngiriki maugîîte: Angeraca baakomana na antû baîrî barî na irundu biithûûku. Antû babu baumîîte bwa makurungu kûra antû baakuû baathikagwa. Baarî baang'entu mûno na bataarekaga muntû akûrûkîîra njîraani înu. 29Bakwona Yiesû baanjîîria gûkaya mûno bakiugaga, “N'ata ûkwenda naati, woû Mwana wa Ngai? Ika waya gûtûnyamaaria kagiita kongwa gatarî gakinyu?” 30Gataaria mma kuuma agu baarî ikwarî na ngûrwe inyingî ciarîîthîîtue.
31Irundu bibu biereka Yiesû biamwîra, “Itû watûruta kîrî antû baba twîtîgîîrie tûthi ngûrweeni iira.”
32Yiesû abiîra, “Îthiini!” Irundu bibu biauma antûûni babu biathi biathûngîra ngûrweeni inu. Ngûrwe cionthe ciaugia ciîndamîîte na mpara, ciemina îriani ciaûra na rûûyî.
33Antû bara bairîîthîîtie bakwona ûgu baugia rwîro baathi. Baatambia ntheto inu taûni yonthe. Bauga kinya bûra gwakarîkire kîrî antû babu baarî na irundu bibu. 34Antû bonthe bara baarî taûni bakwîgua ûgu bauma baathi gûcûa Yiesû naara aarî. Bakûmwona bamwereka bamwîra athi aume kwao.
Currently Selected:
MATHAYO 8: thk
Tõsta esile
Share
Copy
Want to have your highlights saved across all your devices? Sign up or sign in
© 2019, Bible Translation and Literacy