ފެށުން 7
7
ދުނިޔޭގައި ފެންބޮޑުވުން
1ދެން މާތްރަސްކަލާނގެ ނޫޙުގެފާނަށް ވަޙީކުރެއްވިއެވެ. ”ތިބާއާއި ތިބާގެ އާއިލާ ނަވަށް އަރާ. އެއީ ތިމަންކަލާނގެ މިޒަމާނުގެ މީހުންގެ ތެރެއިން ރުހިވޮޑިގެންވާ މީހަކީ ހަމައެކަނި ތިބާ ކަމުގައި ދެކެވޮޑިގެންވާތީ. 2ޤުރުބާން ކުރުމަށް ކަމުދާ ޖަނަވާރުތަކުގެ ތެރޭން ވައްތަރަކުން ހަތް ޖޯޑު ގެންދޭ. އެނޫން އެއްޗެހީގެ ވައްތަރަކުން ޖޯޑެއް ގެންދޭ. 3ދޫނިތަކުގެ ތެރޭން ވައްތަރަކުން ހަތް ދޫނިޖޯޑު ގެންދޭ. ކޮންމެ ބާވަތެއްގެ ވެސް އަންހެން ފިރިހެން ޖޯޑެއް ގެންދޭ. އެއީ ތޫފާނުގެ ތެރޭގައި އެއެއްޗެހި ނެތިދިޔަ ނުދިނުމަށްޓަކައި. 4މިއަދުން ފެށިގެން ހަތްވަނައަށް ވާ ދުވަހު ތިމަންކަލާނގެ ދުނިޔެއަށް ސާޅީސް ރެއާއި ސާޅީސް ދުވަސް ވަންދެން ވާރޭ ފޮނުއްވާނަން. އަދި ތިމަންކަލާނގެ އުފެއްދެވި ދިރުންހުރި ހުރިހާ އެއްޗެއް ދުނިޔެއިން މުޅިން ފޮހެލައްވާނަން.“
5ދެން ނޫޙުގެފާނު މާތްރަސްކަލާނގެ އެންގެވި ހުރިހާ ކަމެއް އެ އެންގެވި ގޮތަށް ކުރެއްވިއެވެ.
6ދުނިޔެއަށް ފެނުގެ ތޫފާން މާތްރަސްކަލާނގެ ފޮނުއްވީ ނޫޙުގެފާނުގެ އުމުރުފުޅުން ހަ ސަތޭކަ ވަނަ އަހަރުގައެވެ. 7ނޫޙުގެފާނާއި އެކަލޭގެފާނުގެ ތިން ދަރިކަލުންނާއި އެކަލޭގެފާނުގެ އަނބިކަނބަލުންނާއި އެކަލޭގެފާނުގެ ތިން ދަރިކަލުންގެ އަނބިން އެ ފެންބޮޑުވުމުން ސަލާމަތްވުމަށްޓަކައި ނައުކޮޅަށް އަރާވަޑައިގެންނެވިއެވެ. 8-9ޤުރުބާން ކުރުމަށް ހުއްދަ އޮތް ޖަނަވާރާއި އަދި ޤުރުބާން ކުރުމަށް ހުއްދަނޫން ޖަނަވާރުތަކާއި ހުރިހާ ވައްތަރެއްގެ ދޫނިސޫފާސޫތްޕާއި އެހެން ވެސް ދުނިޔޭގެ ބިމުގައި ވީ ހުރިހާ ވައްތަރެއްގެ ދިރޭ އެއްޗެއް ޖޯޑުޖޯޑަށް ނޫޙުގެފާނުގެ އަރިހަށް އައިސް މާތްކަލާނގެ އަމުރުފުޅުކުރެއްވި ފަދައިން ނައުކޮޅަށް އެރިއެވެ. 10ދެން ހަތްވަނަ ދުވަސް ނިމުމާއި އެކު ފެނުގެ ތޫފާން ދުނިޔެއަށް ކުރިމަތިކުރެއްވިއެވެ.
11ނޫޙުގެފާނުގެ އުމުރުފުޅުން ހަސަތޭކަ އަހަރުގެ ދެވަނަ މަހުގެ ސަތާރަވަނަ ދުވަހު ބިމުގެ އަޑީގައިވާ އެންމެފުން ފެންއާރުތަކުގެ ފެންފަށަލަތައް ފަޅަފަޅައިގެން ދިޔައެވެ. އަދި އުޑުގައި ފެން ހިފަހައްޓައިދޭ ހުރިހާ ދޮރާށިތަކެއް ހުޅުވިގެން ދިޔައެވެ. 12އަދި ސާޅީސް ރެއާއި ސާޅީސް ދުވަސް ވަންދެން ދުނިޔެއަށް މެދުކެނޑުމެއްނެތި ވާރޭ ވެހުނެވެ.
13ފެންބޮޑުވުމުގެ ހަތްދުވަސްކުރިން ނޫޙުގެފާނު އެކަލޭގެފާނުގެ ތިން ދަރިކަލުން ސާމާ އާއި ޙާމާ އާއި ޔާފަޘު އާއި އެކަލޭގެފާނުގެ އަނބިކަނބަލުންނާއި އަދި އެކަލޭގެފާނުގެ ތިން ދަރިކަލުންގެ އަނބިންނާއި އެކު ނައުކޮޅަށް އަރާވަޑައިގެންނެވިއެވެ. 14އަދި އެބޭކަލުންނާއެކު ހުރިހާ ވައްތަރެއްގެ ވަލުޖަނަވާރަކާއި އޮޅުޖަނަވާރަކާއި އަދި ބިންމަތީގައި ދިރިއުޅޭ ހުރިހާ ވައްތަރެއްގެ ދިރޭ ތަކެއްޗަކާއި ހުރިހާ ވައްތަރެއްގެ ދޫންޏަކާއި އެހެން ވެސް ހުރިހާ ވައްތަރެއްގެ ފިޔަހުރި އެއްޗެއް ވިއެވެ. 15ދިރުމުގެ ނޭވައެއްލާ އެއްޗެއް ވާނަމަ އެހުރިހާ ދިރޭއެއްޗެއް ޖޯޑުޖޯޑަށް ނޫޙުގެފާނުގެ އަރިހަށް އައިސް ނައުކޮޅަށް އެރިއެވެ. 16މާތްކަލާނގެ އަމުރުފުޅު ކުރެއްވި ފަދައިން ހުރިހާ ވައްތަރެއްގެ އަންހެން ތަކެއްޗާއި ފިރިހެން ތަކެތި ނައުކޮޅަށް އެރިއެވެ. ދެން މާތްރަސްކަލާނގެ އެނައުކޮޅުގެ ދޮރުލެއްޕެވިއެވެ.
17އެއަށް ފަހު ސާޅީސް ދުވަސް ވަންދެން ދުނިޔެއަށް ވާރޭ ވެހެމުން ދިޔައެވެ. ފެންގަނޑު ބޮޑުވަމުން ދިޔަ ވަރަކަށް އެނައުކޮޅު ބިމުން މައްޗަށް އުފުލެމުން ދިޔައެވެ. 18އަދި މުޅި ބިމުގައި ފެންގަނޑު ބޮޑުވެ ފެތުރެމުން ދިޔައެވެ. ނަމަވެސް ނައުކޮޅު ފެންމަތީގައި އޮތެވެ. 19ފެންގަނޑު ދުނިޔޭގައި ދުވަހެއް ދުވަހަކަށް ބޮޑުވަމުން އިތުރުވަމުން ދިޔައެވެ. ދުނިޔޭގެ އެންމެ އުސް ފަރުބަދަތައް ވެސް ފެންގަނޑުގެ އަޑިއަށް ދިޔައެވެ. 20ދުނިޔޭގައި ވާނަމަ ވާހައި ފަރުބަދަތަކެއް ތޭވީސް ފޫޓަށް އެފެންގަނޑުގެ އަޑިއަށް ދިޔައެވެ.
21އެއާއެކު ދުނިޔޭގައިވާ ދިރުންހުރި ހުރިހާ އެއްޗެއް ނެތިގެން ހިނގައްޖެއެވެ. ދޫނިސޫފާސޫތްޕާއި އޮޅުޖަނަވާރުތަކާއި ވަލުޖަނަވާރުތަކާއި ބިންމަތީގައި ދިރިއުޅޭ ހުރިހާ ވައްތަރެއްގެ ދިރޭ ތަކެއްޗަކާއި އިންސާނުން ވެސް ނެތިދިޔައީއެވެ. 22އަދި ދުނިޔޭގައި ލެއްވި ދިރުންހުރި ހުރިހާ އެއްޗެއް މަރުވީއެވެ. 23މާތްރަސްކަލާނގެ ދުނިޔޭގައި ވީ ހުރިހާ އެއްޗެއް ދުނިޔޭގެ ބިމުން ނެތިކޮށް ފޮހެލެއްވިއެވެ.
ނޫޙުގެފާނާއި އެކަލޭގެފާނުގެ އާއިލާއާއި އެމީހުންނާއި އެކު ނައުކޮޅުގައި ވީތަކެތި ފިޔަވާ ހުރިހާ އެއްޗެއް ނެތިވެ ދިޔައީއެވެ.
24ދުނިޔޭގައި ސަތޭކަ ފަންސާސް ދުވަސް ވަންދެން ފެންބޮޑުވެފައި އޮތެވެ.
Currently Selected:
ފެށުން 7: ކމ
Tõsta esile
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.