Лукаца бицараб Рохалил хабар 24
24
24 бетӏер
Гӏиса хабалъ ватичӏо
1Анкьил тӏоцебесеб къоялъ, цӏакъ цудунго рахъун ва цебеккунго хӏадурун букӏараб махӏгьуинаб нахги босун, гьел руччаби Гӏисал хабаде ана. 2Нохъодул хобалъул кӏалтӏа букӏараб гамачӏ нахъе гиризабун батана гьезда. 3Жанире лъугьиндал, Тӏадегӏанав Гӏисал жаназаги батичӏо. 4Гьелда хӏикмалъун, хаган гьел рукӏаго, гьале гьезда цеве чӏана цӏакъго кенчӏолел гӏабаби ретӏарав кӏиго чи. 5Хӏинкъуца холаго, руччаби бутӏрул гӏодоре къулун чӏедал, доз гьазда абуна:
– Хваразда гьоркьов щай нужеца чӏагояв чи валагьулев? 6Гьев гьанив гьечӏо. Гьев хваралъуса вахъана. Ракӏалда бугищ Галилеялда вугеб мехалъго Гӏисаца нужеда абулеб букӏараб: 7Гӏадамил Лъимералъе къадар бугин гьев мунапикъзабазул кверде кьезе, хъанчида ван хвезавизе ва хун лъабабилеб къоялъ чӏаголъизеги.
8Гӏисаца абун рукӏарал гьел рагӏаби ракӏалде щвана руччабазда. 9Хабалалъа тӏадруссун щведал, гьез гьеб хабар бицана Гӏисал анцӏила цо чапарасдаги ва киналго цогидал муридаздаги. 10Гьел руччаби рукӏана: Магдалаялдаса Марямги, Иоаннаги, Якъубил эбел Марямги ва цогидалги – гьезин бицараб гьеб чапарзабазда. 11Чапарзабазда ккана гьез гӏантал жал рицунел ругилан, ва руччабазда гьал божичӏо. 12Амма Пётр гьебсагӏатго векерун ана хабалалъе. Жаниве къулун валагьидал, хӏебтил мусру гурони, щибниги батичӏо гьесда гьениб ва хӏикмалъун тӏадвуссун вачӏана.
Кӏиго муридасдаги вихьула Гӏиса
13Гьебго къоялъ Гӏисал кӏиго мурид унев вукӏана Иерусалималдаса анцӏила цо километралъ рикӏкӏад бугеб Эммаус абулеб росулъе. 14Кинабго лъугьа-бахъаралъул бицунеб букӏана гьез. 15Гаргадулел, дагӏбадулел гьел рукӏаго, вачӏун Гӏиса гьезда цадахъ вилълъине лъугьана. 16Амма гьезда цебе пардав лъугьун букӏана, гьединлъидал Гӏиса гьезда лъачӏо. 17Гьес гьикъана гьезда:
– Сундул бицунаго нуж рачӏунел ругел?
Пашманго рачӏунел рукӏарал гьел кӏиялго лъалхъана. 18Гьезда гьоркьоса Клеопа абун цӏар бугес абуна:
– Гьал къоязда Иерусалималде рачӏаразда гьоркьов цохӏо мун ватила гьениб ккараб ишалъул хӏакъалъулъ рагӏичӏев чи.
19– Сундул хӏакъалъулъ? – ан гьикъана гьес.
– Назареталдаса Гӏисал хӏакъалъулъ, – ан абуна гьез. – Гьев вукӏана Аллагьасдаги тӏолабго халкъалдаги жиндир ишазулги рагӏулги хӏалкӏолъи бихьарав авараг. 20Цинги нилъер чӏахӏиял кашишзабазги чӏухӏби-хӏакимзабазги гьесие чӏвазе къотӏизе хӏукму гьабизабуна, ва гьев хъанчида вазе витӏана. 21Вай, нижерни хьул букӏана гьев Исраилил халкъ тархъан гьабизе вачӏарав чи ватилилан. Амма гьелдалъун лъугӏичӏо иш: гьале лъабабилеб къо буго гьеб лъугьа-бахъин ккаралдаса. 22Нижер цо-цо руччабаз бицараб хабаралъ хагазарун руго ниж. Жакъа радал цудунго рахъун Гӏисал хабаде ун рукӏана гьел. 23Амма гьезда хабалъ Гӏисал жаназа батун гьечӏо. Зодисан рещтӏун гьенир ратарал малаикзабаз гьев чӏаго вугин абунин жидедаян бицине рачӏана гьел руччаби. 24Цо-цо нижералги ун рукӏана хабатӏе, ва руччабазда батухъе батун буго гьездаги хоб. Амма гьев живго вихьун гьечӏо.
25Гьес гьезда абуна:
– Аварагзабаз цебеккунго киналъулго хӏакъалъулъ бицун бугониги, гьелда божизе гӏураб гӏакълуги гьечӏел ракӏалги хӏинцал гӏадамал руго нуж! 26Гьединаб гӏазаб-гӏакъуба гурищ Масихӏица хӏехьезе кколеб букӏараб, гьедин гурищ Масихӏ машгьурлъизе кколев вукӏарав?
27Мусадасан байбихьун цогидал аварагзабиги ракӏалде щвезарун, Масихӏил хӏакъалъулъ Илагьияб Тӏехьалда хъван бугебщинаб жо бичӏчӏизабуна гьес гьазда. 28Гьанже гьел доб росулъе гӏагарлъулел рукӏана. Жив дагьавги цевехун ине кколеб ххвел гьабуна гьес. 29Бакъги щинкӏулеб бугин, сордоги тӏаде щолеб бугин, жидеда цадахъ чӏайилан тӏаделъана гьел гьесде. Разилъун гьезда цадахъ рокъове жаниве лъугьана Гӏиса. 30Гьенир кваназе байбихьидал, гьес, тӏаде дугӏаги гьабун, бекун чед кьуна гьезухъе. 31Гьебмехалъ борхун ана гьезда цебе букӏараб пардав, ва гьезда Гӏиса лъана. Гьебсагӏат Гӏиса гьезда вихьуларевлъун лъугьана. 32Гьез цинги цоцазда абуна:
– Нухда нилъгун кӏалъалев ва Илагьияб Тӏехьалда бугеб хабар бичӏчӏизабулев гьев вукӏараб мехалъго бухӏулеб-бухӏулеб букӏинчӏищ нилъер ракӏ? – абун.
33Рахъун гьебсагӏатго Иерусалималде тӏадруссун ана гьел. Гьенир ратана анцӏила цо чапарги гьезда цадахъ рукӏаралги. 34Гьез бицунеб бугоан хӏакъикъаталдаги Тӏадегӏанав Гӏиса чӏаголъун вугин ва Симонида гьев вихьунги вугин. 35Гьазги бицана нухда жидеда цадахъ вачӏиналъулги, кванда нахъа бекун чед кьураб мехалъ, жидеда Гӏиса лъараб куцалъулги хӏакъалъулъ.
Цогидал чапарзабаздаги вихьана Гӏиса
36Гьелъул бицунел гьел рукӏаго, тӏаде вачӏун, ракълида хутӏагийилан саламги кьун, рукъ бакьулъ вахъун чӏана Гӏиса. 37Хӏинкъун, хӏал хисун ругел гьезда ракӏалде ккана хваразул рухӏ бугин гьебилан.
38Гӏисаца гьезда абуна:
– Щай нуж рихха-хочулел? Щай нуж щакдарулел? 39Гьанире ралагье: гьале дир кверал, гьале дир хӏатӏал. Дун вуго нужеда цеве вахъун чӏун. Квер хъван хал гьабе нужецаго. Хваразул рухӏалъул рукьбиги рукьбузда гьанги букӏунебищ? Дир черхалда бихьулеб бугогури нужеда гьеб.
40Гьединги абун, жиндирго квералги хӏатӏалги рихьизаруна Гӏисаца гьезда. 41Рохиялъ хаган, хӏикмалъун, божизе захӏмалъун гьел ругеб мехалъ, цо щибниги кваназе жо гьечӏищ гьанибилан гьикъана Гӏисаца. 42Гьез Гӏисахъе бегьана бежараб ччугӏил кесек. 43Босун, гьалги ралагьун, квана Гӏисаца гьеб. 44Гӏисаца гьезда абуна:
– Мусал къануналдаги цогидал аварагзабазул тӏухьдуздагун Туркабазул Хирияб Тӏехьалдаги дир хӏакъалъулъ хъван бугебщинаб ритӏухълъана. Гьедин ккезе бугилан бицун букӏана нужеда цадахъ вугеб мехалъ дица.
45Илагьияб Тӏехьалда хъван бугебаб бичӏчӏуледухъ, гьезул ракӏал кантӏизаруна Гӏисаца цинги.
46-47Гьес абуна:
– Хӏасил, Илагьияб Тӏехьалда хъван буго – Масихӏица гӏазаб-гӏакъуба хӏехьезе ккезе бугилан, хун лъабабилеб къоялъ гьев чӏаголъизе вугилан ва Иерусалималдасан байбихьун киналго халкъазда, мунагьал чурулев Аллагьасде руссайилан, гьесул вакилзабилъун лъугьун, лъазабизеги бугилан. 48Гьелъие нугӏзал руго нуж. 49Дир Инсуца нужее рагӏи кьун букӏарабги битӏизе буго дица нужехъе. Тӏасан бачӏараб хӏалкӏолъиялъ къвалбазегӏан шагьаралда чӏа нуж.
Гӏиса зобалазде восун уна
50Иерусалималдаса Бетаниялде рачана Гӏисаца гьел. Квералги зодирехун ритӏун, баркат лъегиян дугӏа гьабуна гьезие Гӏисаца. 51Дугӏа гьабулаго дагьа-дагьавккун гьездаса рикӏкӏалъизе лъугьана ва зобалазде восун ана. 52Гьесие суждаги гьабун, рохуца холаго Иерусалималде тӏадруссана гьел. 53Цинги, кидаго Мукъадасаб Рокъор чӏун, Аллагьасе рецц гьабулеб букӏана гьез.
Currently Selected:
Лукаца бицараб Рохалил хабар 24: AvrNT
Tõsta esile
Share
Copy
Want to have your highlights saved across all your devices? Sign up or sign in
© Библия таржама гьабиялъул институт Москва 2008