Лукаца бицараб Рохалил хабар 19
19
19 бетӏер
Гӏиса Закайихъе гьоболлъухъ уна
1Иерихон шагьаралда жанисан унев вукӏана Гӏиса. 2Магъало бакӏарулел чагӏазул бетӏерлъун тӏамурав Закай абулев цо бечедав чи вукӏана. 3Гьесул гъира букӏана Гӏиса кинав чи вугевали лъазе, гьев вихьизе. Амма халкъалъул руккалида гъорлъ Гӏиса вихьизе бажарулеб букӏинчӏо, – къокъав чи вукӏана Закай. 4Цевегӏанги векерун цо инжиралъул гъотӏотӏе вахана гьев: гьенисан ине кколаан Гӏиса. 5Гьеб гъотӏокье щведал, Гӏиса эхеде валагьана ва Закайида абуна:
– Закай, хехго рокъове а: жакъа дун духъ гьоболлъухъ рещтӏине ккола.
6Хехго гъотӏодаса гъоркьеги лъугьун, вохуца холаго къабул гьавуна гьес Гӏиса. 7Гьеб бихьун киналго зурзудизе лъугьана мунагьазул цӏурав чиясул бакӏалде анин гьев гьоболлъухъилан.
8Вахъун Закайица Тӏадегӏанав Гӏисада абуна:
– Я, Бетӏерчӏахъад! Гьале дирго бечелъиялъул бащдаб дица мискин-пакъирасе садакъаде кьела ва, дица гуккарав чи ватани, гьебги ункъиде бахинабун бецӏила.
9Гӏисаца гьебмехалъ абуна:
– Жакъа гьаб рокъобе хвасарлъи бачӏана, гьавги Ибрагьимил вас вугелъул. 10Рилун ругелазда хадув, гьел ралагьизейин ва гьел хвасар гьаризегийин, вачӏун вугев Гӏадамил Лъимер.
Меседил гъурщазул мисал
11Гьес рицунел харбазухъ гӏенеккун рукӏарал гӏадамазе цоги мисал бачана Гӏисаца. Гьев Иерусалималде щолев вукӏиндал ва гьел Аллагьасул Парччахӏлъи хеккого бачӏинилан божун рукӏиндал, 12гьес бицана:
– Лъикӏаб наслу-тухумалъул цо пуланав чи чияр улкаялде ун вуго гьенив ханлъун чӏезе, цинги нахъвуссун жиндирго халкъалъулги ханлъун лъугьине. 13Жиндирго анцӏго рагьтӏателги ахӏун, щивасухъе цо-цо меседил гъурущ кьун буго, жив тӏадвуссинегӏан гьеб жиндие пайда-хайиралъе хӏалтӏизабеянги абун. 14Амма жиндирго улкаялъул гӏадамазе гьев вокьулев вукӏун гьечӏо. Гьесда хадурго чапарзаби ритӏун руго гьез доб улкаялде, гьев чи жидер ханлъун вукӏине жал рази гьечӏилан лъазабизе.
15Доб улкаялда ханлъиги щун тӏадвуссараб мехалъ, гьес амру гьабун буго жинцаго месед кьурал дол рагьтӏателал ахӏейилан, лъица кигӏанасеб пайда-хайир доб меседалдаса жиндие щвезабун бугебали лъазе.
16Вачӏун цо рагьтӏателас абунила: «Я, бетӏерчӏахъад, дуца кьураб меседалдаса анцӏго месед хайирлъана», – ян. 17«Гьитӏинаб божилъиялъе дуца дида цебе кӏудияб ритӏухълъи бихьизабуна, дир лъикӏав рагьтӏател. Анцӏго шагьаралъул наиблъун тӏамулев вуго дица мун», – ан абун буго ханас гьесда.
18Вачӏун цогидав рагьтӏателас абун буго: «Я, бетӏерчӏахъад, доб цо меседалдаса щуго месед хайирлъана», – ян. 19Гьесдаги ханас абун буго: «Мунги дица щуго шагьаралъул наиблъун тӏамулев вуго», – ян.
20Вачӏун лъабабилев рагьтӏателас абун буго: «Я, бетӏерчӏахъад, гьале дур месед. Квербацӏцӏалда гьоркьоб лъун цӏунун букӏана дица гьаб. 21Дуцаго лъечӏеб бакӏалдаса босулев, дуцаго бекьичӏеб лъилъулев кьварарав чи мун вугелъул, хӏинкъана дун гьелда хъвазе». 22«Гӏай, макирав рагьтӏател! Гьел дуца абурал рагӏаби сабаблъун тамихӏ гьабулеб буго дица дуе. Дуда лъалеб букӏун бугоха дицаго лъечӏеб бакӏалдаса босулев, дицаго бекьичӏеб лъилъулев кьварарав чи дун вукӏин. 23Щай дуца дир месед хайиралъе хӏалтӏизабичӏеб, жакъа тӏадвуссараб мехалъ хайиргун цадахъ нахъе щвелаангури гьеб дихъе?» – ян абун буго ханас гьесда. 24Аскӏор рукӏараздаги абун буго ханас, гьесухъаги босун, гъоб месед анцӏго месед бугесухъе кьейилан.
25Гьез гьесда абун буго: «Я, бетӏерчӏахъад, гъосухъ гьадинги анцӏго месед бугогури», – ян. 26«Дица нужеда абулеб буго: кодолъи бугевщинасе кьезе буго, кодолъи гьечӏесухъа бугебги бахъизе буго. 27Дун жидер ханлъун ккезе бокьун букӏинчӏел дол дир тушбабийин абуни, гьанире дида цереги рачун, чӏвай!»
28Гьеб хабарги бицун, Гӏиса Иерусалималдехун валагьун ана.
Гӏиса Иерусалим шагьаралде лъугьунев вуго
29Зайтуналъул магӏарда аскӏор ругел Бетфагиялде ва Бетаниялде гӏагарлъидал, кӏиго муридги аскӏове ахӏун, Гӏисаца гьезда абуна:
30– Гьудуб нилъеда цебе бугеб росулъе а нуж. Росулъе лъугьаралго, цо бакӏалда бухьун батила жеги чи тӏад рекӏинчӏеб кӏудияб кӏерт. Рухьадасаги бичун, гьебги бачун рачӏа. 31Щай гьеб бачунебан абулев чи ккани, Тӏадегӏанав Гӏисае къваригӏун бугин абе.
32Гьедин ритӏун аразда, Гӏисаца абухъе, гьениб батана кӏудияб кӏерт. 33Гьеб рухьадаса бичулеб бихьараб мехалъ, гьелъул бетӏергьабаз гьазда гьикъана щай гьеб бичулеб бугебилан. 34Тӏадегӏанав Гӏисае къваригӏун бугилан жаваб кьуна гьаз.
35Кӏерт Гӏисахъе бачун бачӏана. Гьелъул гьодиде рехана жидерго партал ва гьез гьев кӏартида рекӏинавуна. 36Гьев унеб нухда, тӏаса бахъун, жидерго ретӏел тӏибитӏулеб букӏана гӏадамаз. 37Зайтуналъул магӏардаса гӏодоре лъугьунеб бакӏалде гӏагарлъидал, цадахъ рукӏарал тӏолалго муридал роха-хинлъун ва ахӏунго ахӏун Аллагьасе рецц гьабизе лъугьана, гьес рихьизарурал мугӏжизатазухъ. 38Гьез турки ахӏулеб букӏана:
– Бетӏергьанас витӏун вачӏарав Парччахӏасда баркат лъеги!
Зобалазда рекъел букӏаги!
Тӏадегӏанав Аллагьасе рецц!
39Халкъалъул руккалилъ рукӏарал цо-цо фарисеяз абуна Гӏисада:
– Я, Насихӏатчи! Руцӏцӏун чӏезаре гьал дурго муридал!
40Гӏисаца гьезие жаваб кьуна:
– Дица нужеда абулеб буго: гьел руцӏцӏун чӏани, ганчӏал ахӏдела.
Гӏисаца Иерусалималъухъ магӏу гьабула
41Иерусалим бихьулеб бакӏалде щведал, гӏодана Гӏиса. Шагьаралъухъ магӏу гьабун, 42гьес абуна:
– Жакъа, гьаб къоялъгӏаги,
лъалебаниха дуда
дур саламалъиялъе
щиб къваригӏунебали!
Гьанжего дур беразда
гьеб бихьизе рес гьечӏо.
43Дуде цо къо бачӏина,
чӏахӏиял хъулбиги ран,
тушбабаз кисанго мун
данде къан сверун ккураб.
44Ракь лъугьинабила дур
Ва дур гӏадамазулги.
Ганчӏида лъураб гамачӏ
хутӏиларо кибниги.
Щайгурелъул Аллагьас
Дуй хвасарлъи битӏараб
Заман дуда лъачӏелъул.
Гӏисаца даранчагӏи Мукъадасаб Рокъоса къватӏире гъола
45Цинги Мукъадасаб Рокъове жаниве лъугьун, гьенир ричарулел рукӏаралги босулел рукӏаралги гӏадамал къватӏире гъезе лъугьана Гӏиса. 46Гьес гьезда абуна:
– Тӏехьалда хъван буго: «Гьаб Дир рукъалда цӏар букӏине буго как-диналъул рукъ» абун. Нужецайин абуни гьаб хъачагъазул нохъоялде сверизабун буго.
47Гӏисаца щибаб къойил гьеб Мукъадасаб Рокъоб гӏадамазе вагӏза гьабулеб букӏана. Чӏахӏиял кашишзабаз, диниял гӏалимзабаз ва чӏухӏби-хӏакимзабаз хӏаракат бахъулеб букӏана гьев тӏагӏинавизе рес ккелародайилан. 48Гьезда гьабизе кӏолеб жоги букӏинчӏо, тӏолабго халкъ Гӏисада сверухъ гъункун, гьесухъ гӏенеккун букӏиндал.
Currently Selected:
Лукаца бицараб Рохалил хабар 19: AvrNT
Tõsta esile
Share
Copy
Want to have your highlights saved across all your devices? Sign up or sign in
© Библия таржама гьабиялъул институт Москва 2008