Лука 24
24
1Чпи гьязур дапӀнайи аьтрин ниъ хъайи ягъарра хьади, элгьет йигъан, ахсрарихъди, гьадму дишагьлийир хъана накьвдихьна гъягъюру. 2Хъа дурариз майит айи хьарахь гьипнайи гъван гьидипнади рябкъюру, 3накьвдизди учӀвиган, дурариз Агъа Исайин беден гъибихъундар. 4Дурари, мидʼин мюгьтал духьну, фикрар апӀури имиди, сабпну дурарин улихьна вацӀрацӀар апӀру палтар али кьюр жви ачмиш шулу. 5Дурари гучӀбаан ис алахъдариз кӀуру:
– Учву чӀивир гъачӀидарин арайиъ гьаз агурачва? 6Думу мушваъ адар. Думу чӀиви гъахьну. Дугъу, гьеле Галилей уьлкейиъ имиди фици гъапнийиш, кӀваин апӀинай: 7«Инсаниятдин Бай гунагькрарин хилиз тувди, дариз зигиди, хъа шубудпи йигъан чӀиви хьиди». 8Гьадмуган Исайин му гафар дурарин кӀваина гъафи.
9-10Кьяляхъ хътаку дишагьлийири (мурарин арайиъ Магдалайиан вуйи Марʼям, Югьанна, Якьубдин дада Марʼям ва дурарихъди хъади гъаши жарадарра айи) мидкан йицӀисар ученикдиз ва миди вуйидариз хабар дебккру. 11Ученикари, му гафар ичӀидарси гьисаб дапӀну, дурарихъ хъугъундайи. 12Хъа Петр гъудужвну, жаргъну накьвдихьна гъушу ва душваъ ис алахъну гъилигуриз кафнартӀан гъяркъюндар ва, мидʼин мюгьтал духьну, кьяляхъ хътаку.
13Гьадму йигъан ученикарикан кьюр Ерусалимдихьан кьюб сяаьтнан рякъюн манзилнаъ айи Эммаус кӀуру гъулаз гъягъюрайи. 14Дурарра Исайиин улукьу гьядисйирикан улхурайи. 15Чиб-чпихъди улхури фикрар апӀурайи вахтна, багахь духьну, Исара дурарихъди гъягъюз хъюгъю. 16Чпин улар йитӀнайиси, дурариз Иса аьгъю гъахьундар.
17Дугъу дурарихьан гьерху:
– Учву, рякъди фтикан улхурачва?
Дурар пашманди дийигъу. 18Дурарикан Клеоп кӀуру сари Дугъаз жаваб туву:
– Му йигъари Ерусалимдиъ гъабшиб душваз гъафидарикан сар Уву вува аьгъдрур, дарин!
19Исайи дурариз гъапи:
– Фтикан?
Дурари Исайиз кӀуру:
– Аллагьдин ва вари халкьдин улихь, ляхнариъ ва гафнаъ кьувватлу пайгъамбар вуйи Назаретдин Исайикан. 20Думу жугьдарин маллйирина гьюкумдрари тахсиркар дапӀну, хачрак карсну дариз зигуз гъитну. 21Хъа учу, Думу Израилин халкь азад АпӀрур ву кӀури, умуд апӀурайча, хъа гьамус, магьа шубуд йигъ ву гьамциб гьядиса дубхьну. 22Хъа гъи ич дишагьлийирикан сакьюдари учу мюгьтал гъапӀну: дурар гвачӀнин ухди Исайин накьвдихьна гъушиган, 23дурариз Дугъан беден гъибихъундар ва хъадакну гъафидари, Думу чӀиви гъахьну кӀури, хабар дебккрайи, гьадина гъафи малайикарра гъяркъюнчуз кӀури, ктибтура. 24Ичдарикан сакьюдар накьвдихьна гъушиган, дураризра гьадму дишагьлийириз гъяркъдар гъяркъну, амма Дугъан беден гъябкъюндар.
25Гьадмуган Исайи дурариз гъапи:
– Агь, пайгъамбрари гъапидарихъ хътругъру ахмакьар ва кӀван кагьалсузар! 26Месигьди гьацдар аьзабар гъизигхъантӀан, Думу Чан гьяйбатнаъ учӀвидар, дупнадаринхъа?
27Хъасин Исайи, Мусайилан ккебгъну, вари пайгъамбрари Чакан Гирами китабариъ дидикӀнайидарин гьякьнаан дурар гъаври тӀаъру.
28Дурар чпи гъягъюрайи гъулаз багахь гъашиган, Исайи Чаз дилинтина гъягъюз ккунди айиганси улупури гъахьну. 29Хъа дурари Дугъаз гъапи:
– Учухъди дерг, йигъ хябяхъ шула.
Исара гьадму гъулаъ дурарихъди гъузру.
30Дурарихъди суфрайихъ гъюн йивну деънайиган, Исайи, уьл гъадабгъну, Аллагьдиз баркаллагь дупну, гьудубтӀуру ва дурариз пай апӀуру. 31Гьадмуган дурарин улар ачмиш шулу ва дурариз Думу Иса вуйиб аьгъю шулу, хъа Думу дурарин улариккан дургру.
32Хъа дурари чпи-чпиз кӀуру:
– Дугъу рякъюъди ухьухъди улхруган ва Гирами китабариъ дибикӀнайибдин гъаврикк ккаъруган, ихь юкӀвар ургури гъахьундайинхъа?
33Гьадму сяаьт гъудужвну, дурар Ерусалимдиз хътакуру ва йицӀисар вакиларна имбудар сатӀиди ади дихъуру. 34Дурари: «Агъа дугъриданра чӀиви гъахьну ва Симондиз ачмиш гъахьну», кӀурайи. 35Хъа мурарира, рякъюъ чпиин улуркьдар ва, уьл гьудубтӀруган, чпиз Думу фици аьгъю гъахьнуш, ктитуру.
36Мурар мидкан улхури имиди, Иса Учв дурарин арайиъ ачмиш шулу ва Дугъу: «Учвуз мясляаьт ибшри!» кӀуру. 37Дурари, аьжайиб духьну ва гучӀ кабхъну, чпиз рюгь рябкъюра пну, хиял гъапӀу. 38Хъа Исайи дурариз гъапи:
– Гьаз аьжайиб духьначва ва дицдар хиялар ичв юкӀвариъ гьаз учӀвра? 39Йиз хиларизна ликариз лигай: Му Узу вуза, хил кучри ва лигури Узу ахтармиш апӀинай, рюгь жан хъайиб ва кӀурбар айиб шулдар.
40Гьамци дупну, Исайи дурариз чан хилар ва ликар улупуру. 41Хъа дурар шадвалиан мегьел хътругъри ва мюгьтал шули айиган, Дугъу дурариз гъапи:
– Мушваъ фициб-вушра ипӀруб аничв?
42Дурари Исайихьна гъубжу балугъин пай гьачӀабккуру. 43Исайи, дурариз рябкъюри, ипӀуру 44ва кӀуру:
– Узу учвухъди хъимиди, учвуз гъаписи, Узкан Мусайин къанундиъ, Пайгъамбрарин китабдиъ ва гьацира Мяълийирин китабдиъ дибикӀнайиси, Йиз кӀулʼина гъюз ккайидар вари тамам духьну ккундийи.
45Гьадмуган Дугъу Гирами китабариъ дибикӀнайибдин гъаври ахъбан бадали, дурарин фагьум ачмиш апӀуру. 46Хъасин дурариз гъапи:
– Гирами китабариъ дибикӀнаки, Месигь аьзабарикк ккуркьди ва, дукӀну, шубудпи йигъан чӀиви хьиди 47ва, вардари чпин гунгьар гардандиъ дисруси, Аллагьди чпилан хил алдабгъруси, Ерусалимдилан ккебгъну варишвариъ Йиз ччвурнахъан Ужувлан хабар рабгъиди. 48Магьа гьаци хьузра гъабшибдин учву шагьидар вучва. 49Хъа Узу Йиз Адашди учвуз тувурза дупнайиб гьамус тувдизачвуз. Учву, аьршариан учвухьна кьувват рубкьайиз, Ерусалим шагьриъ гъузай.
50Хъасин Исайи дурар шагьриан адаъну, Вифанияйихьнакьан хъади гъюру ва, Чан хилар за дапӀну, дурариз ужувлар ккун апӀуру. 51Дурариз ужувлар ккун апӀури айи арайиъ, Иса, ученикарихьан гьудучӀвури, завуз за шулу. 52Дурари, жилиина ахьну, Дугъаз икрам апӀуру, хъасин зурба шадвалиинди Ерусалимдиз хътакуру 53ва, гьаммишан Аллагьдин ад за апӀури, Аллагьдин хулаъ гъузру.
Currently Selected:
Лука 24: ТабГК
Tõsta esile
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023