Лука 22
22
Пасхайин хураг
1ЛичӀван лавшар итӀру Пасха кӀуру машквар багахь шулайи. 2Аьхю маллйирина къанунчйири Иса йикӀуз чарйир агурайи, аммаки дурариз халкьдихьан гучӀурайи. 3Хъа Исайин йицӀикьюр ученикдикан сариъ, Искариот лакӀам хъайи Ягьудайиъ, иблис убчӀвру. 4Думу аьхю маллйирихьна ва гъаравларин аьхюдарихьна, Иса фици дурарин хилиз тувруш, йикьрар апӀуз гъягъюру. 5Дурар, шад духьну, дугъаз пул тувуз рази шулу. 6Ягьудайи гаф тувру: халкь алдру йишваъ Иса дурарин хилиз тувуз гъулай вахт абгури шулу.
7Лавшарин йигъ улубкьуру, ва гьадмуган Пасхайин ччил, гъурбан дапӀну, дубккну ккундийи.
8Исайи Петрна Югьан: «Душну ухьуз пасхайин хураг гьязур апӀинай», – дупну, гьаъру. 9Дурари Дугъхьан гьерхру:
– Учу наан гьязур дапӀну ккундувуз?
10Дугъу дурариз кӀуру:
– Учву шагьриъ учӀвиган, шид айи гажин гъабхурайи сар кас гьахъдичвуз. Гьадгъан кьяляхъди душну, гьадму учӀву хулаъ учӀвай, 11ва хулан эйсийиз йипай: «Мялимди гьерхра: „Узу ученикарихъди пасхайин хураг ипӀру хал набши?“» 12Дугъу, учвуз ккабалгнайи заан аьхю хал улупиди; хураг гьадушваъ гьязур апӀинай.
13Дурар гъушу, ва чпиз гъаписи дибихъну, пасхайин хураг гьязур гъапӀу.
14Хъа вахт гъабшиган, Чан вакиларра хъади, Иса, гъюн йивну, суфрайихъ деънийи. 15Исайи дурариз кӀуру:
– Узу аьзабнакк ккуркьайиз, учвухъди гьаму пасхайин хураг ипӀуз гизаф юкӀв хъайиз. 16КӀуразачвузки, сарун му пасхайин хураг, Аллагьдин Паччагьлугъдиъ гьязур дархьикьан гагьди, ипӀидарза.
17Зах гъадабгъну, Аллагьдиз чухсагъул дупну, Исайи кӀуру:
– Гьаму бисай ва ичв арайиъ пай апӀинай, 18кӀуразачвуз: Узу сарун тӀумтӀарин му чяхир убхъидарза. Узу цӀийи чяхир Аллагьдин Паччагьлугъдиъ убхъидиза.
19Хъасин уьл гъадабгъну, Аллагьдиз чухсагъул дупну, думу гьудубтӀуру ва, дурарихьна тувну, кӀуру:
– Му учвхъанди туврайи Йиз жан ву. Узу кӀваин алаури, гьамци апӀинай.
20Ари гьамци, хябяхъдин хураг ипӀбахъан, Исайи хъанара, зах дибисну, кӀуру:
– Му зах учвхъанди удубзурайи Йиз ифдиинди йитӀурайи цӀийи йикьрар вуйиз. 21Хъа магьа Узу масу тувуз ккайир Узухъди саб суфрайихъ деъна. 22Инсаниятдин Бай Чаз улупнайиганси гъягъюра, вушра Думу масу туврайи касдин гьял пис хьибди!
23Ученикари чиб-чпихьан, гьамци апӀуз ккайир ухькан фуж ву, кӀури, гьерхру.
24Дурарин арайиъ, чпикан фуж аьхюр вуш, гьюжатра абхънийи. 25Исайи дурариз гъапи:
– Паччгьари чпин халкьариин агъавал апӀура, хъа халкьди, чпи хилиъ дючӀюркьнайидариз: «халкьдиз ужʼвал апӀрудар» кӀура. 26Учву дицдар дарчва: учвкан фуж аьхюр вуш, варитӀан бицӀи гъуллугъчиси йихь ва, гьюкумдарвал апӀрур гъаравашси йихь. 27Фицики, фуж зиина ву: суфрайихъ гъюн йивну дахънайир, дарш дугъаз гъуллугъ апӀурайир? Суфрайихъ дахънайир зиина даринхъа? Хъа Узу ичв арайиъ суфрайихъ гъуллугъ апӀурайирси аза.
28Учву гьарган Йиз вари дарвалариъ Узухъди гъахьунчва. 29Узуз Йиз Адашди Паччагьвал фици табшурмиш гьапӀнуш, гьаци Узура учвуз Паччагьвал табшурмиш апӀураза. 30Йиз Паччагьлугъдиъ Йиз суфрайихъ ипӀури-убхъидичва ва, тахтниин деъну, Израилин йицӀикьюб тухмин суд апӀидичва.
31Симон, я Симон! Магьа иблисдиз учву, сифккан дапӀнайи дяхинна харукси, ужур-харжир жара дапӀну ккунди а. 32Хъа Узу, яв хъугъвал дурубгри пну, ккарагунза. Узухьна хътакиган, уву яв чвйирин хъугъувал мюгькам апӀин.
33Дугъу Исайиз жаваб туву:
– Я Агъа! Увухъди узу дустагъдизра, аьжалназра гъягъюз гьязур вуза.
34Хъа Исайи дугъаз гъапи:
– КӀуразавуз, Петр, гъи даттли уьъйир дапӀну ккудубкӀайиз, Узу шубубан аьгъюр дарзуз пидива.
35Исайи давам апӀуру:
– Узу учву я пул, я тавра, я шаламар хьадарди гьаъруган, учвуз фукӀа гьудрубкӀуб гъабхьунчвуз?
Дурари: «Ваъ» пну, жаваб тувру. 36Исайи дурариз гъапи:
– Хъа гьамус, шлиз пул аш, гьадму гъадабгъри, гьаци – таврара, хъа шлиз адарш, чан палтар масу тувну, ханжал гъадабгъри.
37КӀуразачвузки, Узʼин гьамци дибикӀнайибра улубкьиди: «къанунсузарикан вуди гьисаб апӀиди». Гьацира Узкан фу дибикӀнаш, дурар вари тамам хьиди, ва магьа аьхирихънара гъюра.
38Дурари гъапи:
– Я Агъа! Лиг, магьа мушваъ кьюб ханжал а.
Исайи дурариз: «ЧӀяаьн ву» кӀуру.
39Хъа хулʼан удучӀвну, Иса, Чан аьдат вуйиганси, Елион дагъдиина гъягъюру. Дугъан кьяляхъди ученикарра гъушнийи. 40Йишвʼина гъафиган, Исайи дурариз гъапи:
– Тямягьвалариъ адрахьбан бадали ккарагай.
41Хъа Учвра, душвхьан хил хъапӀну гатӀабхьру кӀекӀлин манзилиъ кьамкьариина ис духьну, гьамци ккарагуз хъюгъру:
42-44– Адаш! Эгер Увуз ккундуш, Узхьан гьаму аьзабнан зах гьадабгъ! Вушра Йиз ният ваъ, хъа Явуб гъит ибшри.
45Ккарагбахъан ученикарихьна гъафиган, Исайиз дурар хажалатнаан даахнади рякъюру. 46Ва дурариз кӀуру:
– Гьаз даахначва? Гъудужвну, тямягьвалариъ адрахьбан бадали ккарагай.
Иса дисуб
47Дугъу гьамци кӀури имиди, адмийирин саб аьхю гъварч гъюру. Дурарин улихь йицӀикьюр ученикдикан сар Ягьуда хьади шулу. Думу Исайиз мак апӀуз Дугъаз багахь гъахьи. 48Исайи дугъаз кӀуру:
– Ягьуда! Мак апӀбиинди Инсаниятдин Бай масу тувранахъа?
49Исайихъ хъайидариз, му гьял наанди илтӀибкӀураш дябкъну, Дугъаз кӀуру:
– Агъа! Ханжал йивидикӀан?
50Дурарикан сари жугьдарин аьхю маллайин гъаравшиз йивну, арччул иб ктабтӀуру. 51Гьадмуган Исайи гъапи: «Гъибтай, чӀяаьн ву!» ва лукӀран ибак хил кучну, думу сагъ апӀуру.
52Учв дисуз дуфнайи жугьдарин аьхюну маллйириз, Аллагьдин хулан гъаравларин аьхюдариз ва агъсакълариз Исайи гъапи:
– Узу дисбан бадали, учву, гъачгъиинаси, ханжларна маргъар хьади удучӀвначва! 53Узу учвухъди гьар йигъан Аллагьдин хулаъ шуйза, учву Узʼина хил за гъапӀундайчва. Хъа гьамус, мучӀушну гьюкум апӀурайи вахт ичв вахт ву.
Петр инкар хьуб
54Иса, дидисну, жугьдарин аьхюну маллайин хулаз хуру. Петр ярхла-ярхлади дугъан кьяляхъди гъягъюру. 55Гьяятдиъ уч духьнайидар, цӀа алапӀну, вари сатӀиди деиган, Петрра дурарин арайиъ деъру. 56Сар гъараваш дишагьлийи, думу цӀихъ деънади дяркъну, дугъаз уччвуйи дилигну, гъапи:
– Гьамура Исайихъ хъайидарикан ву.
57Амма Петри: «Узуз Думу аьгъюр дарзуз» дупну, кӀул ккадабгъуру. 58Саб бицӀи арайилан, Петр дяркъну, дугъаз сар жарарира: «Увура гьадрарикан вува», – кӀуру. Петр, му касдизра: «Ваъ, дарза» пну, инкар шулу.
59Саб сяаьткьан вахт улдубчӀвиган, хъана сари ижмишнаан кӀуру:
– Якьин гьамура Исайихъ хъайир ву, фицики му Галилей уьлкейиан ву.
60Хъа Петри думу касдиз кӀуру:
– Уву фу кӀурашра, аьгъдарзуз.
Дугъу му гафар кӀури имиди, даттли уьъйир гъапӀу. 61Гьадмуган Агъа, илдицну, Петрихьинди гъилигу, ва Петрин Агъайи чаз гъапи гьаму гафар кӀваина гъюру: «Гъи даттли уьъйир дапӀну ккудубкӀайиз, шубубан Узу аьгъюр дарзуз пидива!» 62Гьадмуган Петр, гьяятдиан удучӀвну, дердлуди гъишу.
63Иса дидиснайи адмийир, Дугъʼин аьлхъюри, Дугъаз йивури гъахьну. 64Дугъан улар гьеркри: «Увуз шли гъивнуш, йипа, эгер Уву пайгъамбар вуш!» кӀури, йивури гъахьну. 65Гьацира Исайиз хъанара жара аьрвалар апӀури гъахьну.
66Хъайигъан гвачӀинган агъсакълар, жугьдарин аьхю маллйир ва къанунчйир уч духьну, Иса заан диванханайиз гъахуру. 67Дугъхьан гьерхру:
– Эгер Уву Месигь вуш, йип учуз?
Дугъу дурариз кӀуру:
– Узу учвуз гъапишра, хъугъидарчва; 68Хъа Узу учвуз суал тувишра, Узуз жаваб тувидарчва; 69Гьамусдихъантина Инсаниятдин Бай кьудратлу Аллагьдин арччул гъвалахъ деъди.
70Хъа вардари Дугъаз кӀуру:
– Яна Уву Аллагьдин Бай вува, сарун?
Исайи дурариз жаваб тувру:
– Учву кӀурайиси ву.
71Дурари кӀуруки:
– Ухьуз сарун фициб шагьидвал лазим вухъа, фицики му гафар ухьуз Мугъан Чан мелзналан гъеерхьунхьуз!
Currently Selected:
Лука 22: ТабГК
Tõsta esile
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023