Matìyò 5
5
Yesò shyə̀ʼtə̀ kənyʉ̀ kə Nyìngòŋ a pfen byìʼì saŋlə Nəmwèʼè
1Yesò n-yèn tənòyn tə viʼi ando tə vì, ghə̀ kùʼ a kwi pfen ə shiʼi ŋwʉʼʉ a nsè. Ndzɨ̀mtə̀sə bàm wen sə vì tsèntə̀ a wen a mbyɨ̀. 2Ghə̀ mù sə ziʼì vəwenə gàʼà la, 3“Mbwaʼmə diʼ à viʼi vyi a və zhəʼtə̀ tò a wenə Nyìngòŋ byiʼàndo soʼo fòyn Nyìngòŋ lu ndiʼ à vəwenə. 4Mbwaʼmə dìʼ à viʼi vyi a və dì byiʼàndo Nyìngòŋ lu chɨmsə vəwenə. 5Mbwaʼmə dìʼ a viʼi vyi a və bwaʼmə byiʼàndo vəwenə lu kiʼi fo vyi a Nyìngòŋ ghʉ li. 6Mbwaʼmə dìʼ a viʼi vyi a və ŋwʉʼ jɨŋsə zafə vəwenə, ndòŋ vəwenə be zɨmtə̀ tò la vəwenə ne kənyʉ̀ kì a Nyìngòŋ kəŋə byiʼàndo Nyìngòŋ lu ku kədyòʼ à vəwenə la vəwenə ne nyʉ̀ a vyi. 7Mbwaʼmə dìʼ a viʼi vyi a və kusə̀ nshinsə à viʼi və tsenəvə byiʼàndo Nyìngòŋ lu kusə̀ nshinsə à vəwenə. 8Mbwaʼmə dìʼ a viʼi vyi a tətyɨm tə vəwenə tə laynə byiʼàndo vəwenə lu yen Nyìngòŋ. 9Mbwaʼmə dìʼ a viʼi vyi a və shyə̀ʼ əghʉ mbwaʼmə a viʼi a ntìntìn byiʼàndo və lu dzàŋ vəwenə nə̀ vunə Nyìngòŋ. 10Mbwaʼmə dìʼ a viʼi vyi a və tsuʼu aghʉ vəwenə byiʼàndo vəwenə nè ando Nyìngòŋ kəŋə byiʼàndo soʼo fòyn Nyìngòŋ lu diʼ à vəwenə. 11Mbwaʼmə dìʼ a ghə̀ŋ a viʼi telə ghə̀ŋ tsuʼ aghʉ ghəŋə be zhò tənkyì tə ndzɨ̀ŋsə tò tətsèm byìʼì ghə̀ŋ tò byiʼàndo ghə̀ŋ diʼi viʼi vwomə. 12Və sə nè nyʉ̀ a venə, ghə̀ŋ saŋlə tò saŋlə byiʼàndo mòʼtə̀ ghoʼo ghə̀ kə̀ʼtə̀ ghə̀ŋ a kàŋ. A ndiʼ tò alì a və ntsuʼ aghʉ nshə̀ʼtə̀ sə ghoʼkəsə sə mbìsə.
Yesò ziʼi kùmə̀ fəmbvaŋ nə̀ baynə mbyi
13“Ghə̀ŋ dìʼ tò nə̀ fəmbvaŋ à viʼi mbyì. A sətsèn fəmbvaŋ fə faŋ ke be lyìmə̀, və à nè ghò tsu la fə be mbwènsə̀ lyìmə̀ a? Kə a ndiʼ tò la və chʉtə maʼa, viʼi ntuʼlə. 14Ghə̀ŋ dìʼ tò nə̀ baynə à viʼi mbyì. Ntə̀ʼ a ghə̀ diʼi a kwi pfen zì kò ghə̀ lu lyòmtə̀. 15Wìʼ zì kò ghə̀ lə dyàyn kənkàʼtə̀ ə pfʉsə a tyì nkyè. Ghə̀ diʼi dyàyn ə tom a kəshi kə ŋaŋtə kə ndi kə baynə a ngə̀ŋ no tsèm. 16A diʼ tò ndə̀ŋndəŋ ando ghə̀ŋ diʼi baynə a viʼi ndi viʼi yen nyʉ̀ jùŋ və vyi a ghə̀ŋ nè mù nkuʼsə tiʼi ghə̀ŋ yi a ghə̀ diʼi a kàŋ.”
Yesò ziʼi kùmə̀ soʼo Mosìs
17“Kə ghə̀ a nkwòʼtə̀ la mà vì ə tsəʼsə soʼ yi a Mosìs nlù kù bènə̀ nyʉ̀ vyi a nshə̀ʼtə̀ sə ghoʼkə sə nlù nyòʼ. Mà ko tə vì ə tsəʼsə nyʉ̀ avyi, mà bòŋsə vì ənè la nyʉ̀ avyi ndiʼ nəmwèʼè. 18Mà gàʼ à ghə̀ŋ nəmwèʼè la kaŋ wenə nsè lu sə mè kenla wìʼ a tsəʼsə tè fənyʉ̀tə̀ fa tyì soʼ ayì. Ghə̀ ko lù chò əzaʼa fa tʉʼ a nyʉ̀ a venə no tsèm lu kwʉ̀ʼ. 19A sətsèn a kwàʼ no ndò kwàʼa soʼ fa ntìntìn təsòʼ a tèn, tè bè tyetə ghə̀, ə bè ziʼi viʼi la və be kwaʼà tò alì, ghə̀ lu ndiʼ wu tyetə a kəshi kə fòyn Nyìngòŋ. A ghʉ no məndo ghʉ soʼ ayi, be ziʼi viʼi vətsen və la və nghʉ tò alì, ghə̀ lə ndiʼ wu ghoʼo a kəshi kə fòyn Nyìngòŋ. 20Ma mù sə gàʼà à ghə̀ŋ la ntsìnə̀ shəŋsə sətsèn dìʼ ke nti a nkàyn ando Nyìngòŋ kəŋə chò sə ndìʼsə̀sə təsoʼ bènə̀ sə viʼi Falàsi, kò ghə̀ŋ lù kwèn a soʼo fòyn Nyìngòŋ.”
Yesò ziʼi kùmə̀ tyin fwi
21“Ghə̀ŋ zhʉ li la à ndìʼ a mbi və gàʼ à viʼi la kə wìʼ à zhwi. Və lu soʼ no ndo yì a ghə̀ zhwì. 22Ma be sə gàʼà à ghə̀ŋ luwen la no ndò a ghə̀ fwisə̀ tyin à lèmə̀ wen və le sòʼ wen, à te no ndò tè lèmə̀ wen la, ‘Kəfo kə maʼa kènkə!’ mu və lu dyʉ̀ nə̀ wen a shɨ ntsèntə̀ viʼi nsoʼ. A be tè no mə ndò tè lèmə̀ wen la, ‘Kəndzɨ̀ŋtə̀ kə kəfo kènkə!’ mu ghə̀ zì ghə̀ pfʉ̀ a zhìʼ byɨ ghə̀. 23Kə mu sə diʼ la wù sətsèn ndyʉ̀ əku kəku a kəbaŋ kə kəku ə kwòʼtə̀ a ji la lèmə̀ wù fwisə̀ tyin à wù, 24wu ghʉsə kəku a kì tò a kəshi ayì bwènə̀ dyʉ̀ shɨ̀tə̀ nyʉ̀ ve wen mibu bwènə̀ vi ku kəku kə a kì à Nyìngòŋ. 25Wìʼ sətsèn nkiʼ kənyʉ̀ wenə wù lyɨ̀ wù dyʉ̀ nə̀ wù a nsoʼ wu zàŋsə̀ shɨ̀tə̀ nyʉ̀ ghə̀ wen ghə̀ŋ bu dyʉ̀ a jì, à bwen alì mu ghə̀ a dyʉ̀ ə ku wù à wù soʼo nsoʼsə ghə̀ chòsə̀ kù wù à wìʼ yi a ghə̀ shwìnə̀ viʼi, ghə̀ wye wù a ngə̀ŋ mfɨŋ. 26Mà gàʼà ghə̀ŋ nəmwèʼè la kə sə tsèn chò alì wù à fàŋ tò a ngə̀ŋ mfɨŋ a yi əzaʼa fa tʉʼ a wù a lòʼ ko wìʼ a yì no tsèm.”
Yesò ziʼi kùmə̀ ə ntsì nə̀ wì wìʼ ko nə̀ lɨm ə wìʼ
27Ma zhʉ li ando və nlù gàʼ la,“Kə wìʼ à tsì nə̀ wi wìʼ ko nə̀ lɨm wìʼ.” 28Ma sə gàʼà à ghə̀ŋ luwen la no ndò a ghə̀ ki wi wìʼ shə̀mtə dìʼ mu ghə̀ tsili nəwen à wen a kwòʼtə̀. 29Shɨ kwoŋ toghə wù sə tsen nè la wù ne mbyɨ, wu tòŋ shìsə̀ màʼà. Kə bòŋ la wù gho shə wèn wù tsen ghə̀ mùʼ əchò la və mòʼ wen wu no tsèm a zhìʼ byɨ ghə̀. 30Kəvu kə kwoŋ toghə wù sə tsen nè la wù nè mbyɨ wù tyin màʼà kə boŋ la wù gho shə wen wù tsen ghə̀ mùʼ əchò la və mòʼ wen wu no tsèm a tì zhìʼ byɨghə.
Yesò ziʼi kùmə̀ kəngə̀sə̀ kə lam
31Və be nlù gàʼ la,“No ndò sə tsèn dzɨ̀m wì wen, ghə̀ diʼ ku ŋwàʼlə̀ à wen a ghə̀ dìʼì la ghə̀ dzɨ̀mə̀ li wen.” 32Ma be sə gàʼà à ghə̀ŋ luwen la no ndò a ghə̀ sə tsèn dzɨ̀m wì wen à bwen tò la wùwì a yì jèʼtə̀, wùwì ayì be dyʉ̀ làm kədyàŋ mu wùlɨm mbì yì ne li la wùwì ayì kwàʼ soʼ lam, bè nè la wìʼ a ghə̀ lamə wùwì ayì tsili nə̀ wì wìʼ.
Yesò ziʼi kùmə̀ məkàyn
33“Ghə̀ŋ be zhʉ ando à ndiʼ a mbì və gàʼ à viʼi la, ‘Wù ghʉ kənyʉ̀ ghə̀ Nyìngòŋ kə wù à fàŋ ke nè.’ 34Alì mà gàʼ à ghə̀ŋ luwen la, kə wìʼ à kàyn a zhʉ a ghə̀ ghʉ kənyʉ̀ no fa mpfen. Kə wìʼ à kàyn a zhiʼi Nyìngòŋ a kàŋ byiʼàndo kàŋə diʼ kəfoyn kə fòyn Nyìngòŋ. 35Kə wìʼ à kàyn a nsè byiʼàndo à kiʼ kəshi kì a Nyìngòŋ tomtə̀ aghʉ wen tsu. Kə wìʼ lu kàyn a Jelusalèm byiʼàndo à diʼ ntə̀ʼ Nyìngòŋ a diʼì fòyn ghoʼo, 36Kə wìʼ à kàyn tè bè a kətʉ kə wen byiʼàndo ghə̀ zì kò ghə̀ lə nè la nyɨ̀ŋ muʼ fa tsu fɨf kò la ghə̀ fen. 37Kənyʉ̀ kə ndiʼ wù byɨmə, wù byɨmə tò byɨmə, ndiʼ wù tènsə, wù tènsə tò tènsə. A sətsèn wu be nkwʉʼsə kənyʉ̀ à yì a kətʉ mu kə lù fà Deblə̀.”
Yesò ziʼi la kə viʼi shəmə nyʉ̀
38“Ghə̀ŋ be nzhʉ̀ ando və bè gàʼà la, ‘Wìʼ tòs ə shɨ wu, wù bè tòs ghə̀ wenə, ghə̀ tsuʼu soŋ wu, wù boŋ tsuʼ ghə̀ wenə.’ 39Alì mà sə gàʼ à ghə̀ŋ luwen la, Kə wìʼ lù shəmə kənyʉ̀ a wìʼ nè shwe à wù. Wìʼ ghòm kəgə̀ʼ kə kwoŋ toghə wù, wu bwènsə̀ diʼ kə kwoŋ nànkwè ghə̀ be ghòm.” 40Wìʼ kəŋə somə wù əshi ndisə shì a wù mòʼò a tyin, wù ku boʼsə wenə kəgwʉ̀nə̀ kə̀ʼ. 41Wìʼ ghaʼ wù a kədyòʼ la wù byèʼè kəmbò kə wen ə jèʼ mal muʼ, wù byèʼè wu jèʼè və mal və bò. 42Wìʼ loyn kəfo fà wù, wù ku, kò ghə̀ choʼo tè choʼo wù ku tò ku.
Yesò ziʼi la viʼi nkòŋə̀ viʼi kəbàyn vəwenə
43“Ghə̀ŋ be nzhʉ̀ ando və nlù gàʼ la ‘Kòŋə viʼi ndoŋsə wù ə bàyn viʼi kəbàyn wù.’ 44Alì mà gàʼà ghə̀ŋ luwen la ghə̀ŋ kòŋ viʼi kəbàyn ghə̀ŋ ə jɨ̀m à viʼi vyi a və tsuʼu aghʉ ghəŋə. 45Ghə̀ŋ nè tò alì ndi ne ndiʼ vunə Tìʼ ghə̀ŋ yì a ghə̀ diʼì a kaŋ byiʼàndo ghə̀ŋ nè chwìchwì baynə a kətʉ viʼi və byɨvə bènə̀ viʼi və jùŋ və be nè ghʉ vì a kətʉ viʼi a və nè njùŋ be vì a kətʉ viʼi a və nè mbyɨ. 46Ghə̀ŋ sətsèn kòŋə̀ tò viʼi vyi a və kòŋə̀ ghə̀ŋ, Nyìngòŋ lu ku mòʼtə̀ jùŋ ghə̀ à ghə̀ŋ byìʼì ghò? Gàʼ a kò viʼi vyi a və tinə kənsè nè tò ndə̀ŋndəŋ? 47Ghə̀ŋ sətsèn toŋtə̀ tò ndoŋ shəŋsə, nə̀ nkwoŋ tsu à ndiʼ ghò? Gàʼ a kò tè viʼi vyi a və ko kɨ Nyìngòŋ be nè tò ndə̀ŋndəŋ kənyʉ̀? 48Ntsìnə̀ shəŋsə diʼ ŋwòʼə̀ ando ntsìnə̀ Tiʼi ghə̀ŋ a kàŋ ŋwòʼə̀.”
Currently Selected:
Matìyò 5: bbkDBLnt
Tõsta esile
Share
Copy
Want to have your highlights saved across all your devices? Sign up or sign in