Matyu 3
3
Yoona A̱tyu Nyia̱ Ba̱ptisman Jhyi Vak Bai Yesu
(Ma̱r 1:1-8; Luk 3:1-18; Yon 1:19-28)
1Mi̱ mam a̱nia, Yoona a̱tyu nyia̱ ba̱ptisman si̱ bai a̱ shei A̱lyiat A̱gwaza mi̱ tswa a̱yit mi̱ fam a̱byin Yahudiya nyia̱, 2“Nyi ghwon a̱ka̱tuk nyia̱ wu nyi khwi A̱gwaza, mat Tyok Ma A̱gwaza tswazwa hu bai kpa̱mkpaan!” 3Yoona wa nang Ishaya a̱ta̱m a̱kwonu A̱gwaza gbangbang ku lyiat nang gu ku ntak nyia̱,
“A̱yin shya̱ mi̱ tswa a̱yit,
a̱ yei mi̱ chet,
‘Nyi jhyi vak A̱tyoli hu,
ku nat cha̱chaat!’ ”#3:3 Ish 40:3.
4Yoona ma̱ a̱pyia̱ nggu ku khwi a̱yaatoot nang á̱ nok ma̱ng chat a̱lakumi a̱ni. A̱ si̱ vwuoi dyang nggu ji ma̱ng kwa. A̱wot nkyayak nggu na si̱ yet á̱ga̱u bya ma̱ng tong a̱yit. 5Á̱niet si̱ bai da̱ a̱vwuo gu neet Urusha̱lima, ma̱ng a̱mgba̱m fam a̱byin Yahudiya ma̱ng a̱ka̱keang na̱ hyia̱k a̱ghyui Urdun ka a̱ni. 6Nang ba̱ ntyai a̱ka̱tuk nyia̱ mba wu kpa̱sai a̱ni, a̱ si̱ nyia̱ mba ba̱ptisman ji ma̱ a̱ghyui Urdun ka.
7Nang Yoona ndi susot A̱fa̱risawa ma̱ng A̱sa̱ndukiyawa ba̱ chobai da̱ a̱vwuo ba̱ptisman nggu ka a̱ni, a̱ si̱ ta̱gba̱k ba nyia̱, “Nyin a̱ka̱sorong mman tsuup a̱byin, nyi fa nyi na shot mwai lyen A̱gwaza hu ku chobai a̱ni mat ba̱ptisman ji a?#3:7 Lyuut cha̱chaat: “A̱nyan wa gba nyin nyi tyong mwai lyen A̱gwaza ku chobai a̱ni?” 8Nyi nyia̱ á̱tsatsak nta̱m na̱ na tak kpa̱sai nang nyi nghwon a̱ka̱tuk nyia̱ nyin wu, nyi si̱ khwi A̱gwaza a̱ni. 9A̱wot nyi yok laai pyipyia̱ nyin nyia̱, ‘Zi̱ shya̱ san, mat#3:9 Lyuut cha̱chaat: “Ibrahim wa yet a̱tyia̱ a̱khwop nzi̱t wu!” Luk 3:8. Ibrahim wa yet a̱tyia̱ a̱khwop nzi̱t wu!’ Mat n shei nyin nang A̱gwaza mbyia̱ chet a̱ tyia̱ nfang nani na̱ yet mman kwai Ibrahim. 10A̱wot ku ma̱ninika, á̱ ka̱n sak a̱khwon ka da̱ á̱ni̱nan a̱ka̱kwon ba á̱ nfwuong á̱ tyam a̱ka̱kwon na. Huhwa kuzang a̱kwon ka, ka̱ lak tyia̱ a̱tsatsak nsum a̱ni, á̱ na tyam á̱ni̱nan ba ka̱ kwa a̱byin, a̱wot á̱ ta nka mi̱ ndong!
11“Nung, n nyia̱ nyin ba̱ptisman ma̱ng a̱sa̱khwot nia, jija tak nang nyi nghwon a̱ka̱tuk nyia̱ nyin wu. A̱wot a̱yin chobai, a̱tyu a̱ swak nung mi̱ chet a̱ni, n maai mi̱ maai n ti̱n á̱kwatak nggu ba bah. Nggu, a̱ na nyia̱ nyin ba̱ptisman ji ma̱ng A̱za̱za̱rak Ntswa wa ma̱ng long.
12“A̱ shya̱ ma̱ng bibyia̱ nggu hu mbwak, nang gu na nchyok yak hu a̱ni, gu lyang a̱vwuo tsot yak ka. A̱ na ti̱n tswá yak ji, a̱ tyia̱ ma̱ a̱gban. A̱wot a̱sunsong wu, a̱ na fwui nggu ma̱ a̱nga̱ngak ndong sang sangba̱p, nang á̱ si̱ mi̱n nyiip a̱ni bah.”
Yoona Nyia̱ Yesu Ba̱ptisman
(Ma̱r 9‒11; Luk 3:21-22; Yon 1:31-34)
13A̱wot Yesu si̱ neet mi̱ fam a̱byin Ga̱lili, a̱ si̱ bai da̱ a̱vwuo Yoona ma̱ a̱ghyui Urdun gu ka nyia̱ gu ba̱ptisman. 14Huhwa Yoona si̱ chat lak nyia̱ Yesu ba̱ptisman ji, a̱ si̱ nyia̱, “Nung gwa myim a nyia̱ nung ba̱ptisman ji! A̱wot nwan wa sii wa chobai da̱ a̱vwuo nung a?”
15A̱wot Yesu si̱ nwuak gu shim nyia̱, “Ma̱ninika, yok ku li a̱nia. Da̱nian a̱nia wa nang zi̱ na nnyia̱ a̱mgba̱m kyang ku yet tsotswat a̱ni.#3:15 Lyuut cha̱chaat: “Ku yet ta hwa zi̱ nyia̱ kuzang kyang ku myim tsotswat.”” Huhwa Yoona si̱ shim a̱ si̱ nyia̱ Yesu ba̱ptisman ji.
16Nang Yoona ntyak nyia̱ Yesu ba̱ptisman ji a̱ni, mi̱ di̱ ghwut Yesu hu ma̱ a̱sa̱khwot na, Ma A̱gwaza tswazwa ka si̱ kin khwuk, a̱ si̱ li A̱za̱za̱rak Ntswa A̱gwaza wu gu chorop a̱ neet tswazwa nang a̱bwa a̱ni, a̱ ba̱ swan da̱ Yesu. 17A̱nwuat si̱ kin ghwut a̱ neet Ma A̱gwaza tswazwa ka nyia̱, “Nggwon nung kya ka nang n chat a̱ni. N fwuong nyinyang ka ba̱t!”
Currently Selected:
Matyu 3: TyapNT
Tõsta esile
Share
Copy
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.