Susumo 1
1
Pɛrɛ yông jey
1Jeng de Dagwi à kana susu yông jey na lagwi,#1:1 Jeng de Dagwi à kana susu yông jey na lagwi: kɛ: E susu mo, Dagwi à yong jey na lagwi. 2jey o yà sè wiin zɔng, vit a pyɛ e ji yɛ. Lwīl gwà kyiri gwogbɔng gworep gwociwil, ko gabik Dagwi ha rini e ra nshi.
3Ko Dagwi a hanat, a ye, “Tik na negbey ne hwo!” Ko negbey na hwo. 4A di negbey o na sé nerat, ko a gas negbey o yi na lwīl. 5A yila negbey, à Gwi, ko lwīl a yâng gwɛ, à Turuk. Nagwi na sé, ko naturuk na sé,#1:5 Nagwi na sé, ko naturuk na sé: E lêm BeIbrani yɛn e tanga yila naturuk, ko e bama mo nagwi. pɔlɔ hê yel a hane.
6Dagwi a to hanat, a ye, “Tik na pyɛ sede ragyip ye hwo e tê nshi, na ye bin gas nshi mo zang ba.” 7A yong pyɛ mo, ko ya gas nshi de na sé e nɛ̂n yɛ, na nemo de na sé e ra rak yɛ. Ko a tɛ́ ɛ ano. 8A yila pyɛ yane mo, à Larwak. Nagwi na sé, ko naturuk na sé, pɔlɔ hê ba a hane.
9Dagwi a to hanat, a ye, “Tik na nshi de na sé e nɛ̂n larwak ne tula hɛn e kwɔn hining, na vwel he nusu e jey.” Ko a tɛ́ ɛ ano. 10A yila hɛ, à Vwel, ko kwɔn de nshi na tula hɛn ɛ̀, a yâng hɛ, à Gwogbɔng Gworep. Ko a di pyɛ́ de a yong ya sé ryat. 11E bama mo a hanat, a ye, “Tik na vwel he tabas na nedirî pyɛ́, yemo de ya vɔk yeneng, tanga cɔ́gɔt de ye tɔs nèy, kayiyɛ mo e ra yerê yɛ.” Ko a tɛ́ ɛ ano. 12Ko vwel ha tabas na nedirî pyɛ́ detidetu, kayɛ yere de ye mara yeneng, na kayɛ yerê cɔ́gɔt de ye tɔs nèy de na vɔk yeneng. Ko Dagwi a di pyɛ́ de a yong ya sé ryat. 13Nagwi na sé, ko naturuk na sé, pɔlɔ hê tat a hane.
14Dagwi a to hanat, a ye, “Tik na nezap negbey ne hwo e larwak o, na ne gas nagwi yi e naturuk, na ne dura nepɔlɔ, na neshey, na jeng arɔng. 15Tik na negbey o ne sè e larwak, na ne nɔ̂ng jey negbey.” Ko a tɛ́ ɛ ano. 16Ano de a yong gbɔng negbey neba de na dal na nerey. Ninde na dal na nerey nê vɔk reto e ra wosho, ko ninde na raa na nerey nê vɔk reto e ra turuk. A to yong netangacɛn arɔng. 17A tɛ̀ ɛn mwa e larwak, na be nɔ̂ng jey negbey; 18a nɔng ɛn reto e ra nagwi na naturuk, na be to gas tê negbey yi na lwīl. Ko Dagwi a di pyɛ́ de a yong ya sé ryat. 19Nagwi na sé, ko naturuk na sé, pɔlɔ hê naas a hane.
20Dagwi a to hanat, a ye, “Tik na berep be ye ship na bagyɛng pyɛ́ cen detidetu, ko benon be kyě ra fifɛ e larwak.” 21Ano de a yong bètagbɔk ngyāma nshi, na mwa yére pyɛ́ cen detidetu de ye kyě kyè e ji nshi, tanga mwa yére benon. Ko Dagwi a di pyɛ́ de a yong ya sé ryat. 22Dagwi a tɛ̀ a yɛ̄ nerat, ko a yâng pyɛ́ de ya sé e ji nshi: “Tɔs in nèy, karak hin, na yin ye ship a berep.” A yâng benon arɔng, “Karak hin e ji jey.” 23Nagwi na sé, ko naturuk na sé, pɔlɔ hê tungun a hane.
24Dagwi a to hanat, a ye, “Tik na jey ye hwo na pyɛ́ cen detidetu e ra yére yɛ: yas, na ngyāma, na pyɛ̂ gabaga.” Ko a tɛ́ ɛ ano. 25Ano de a yong ngyāma lɔ na yê hey, ryey o na shɛl o e ra yére yɛ. Ko a di pyɛ́ de a yong ya sé ryat.
26Dagwi a to hanat, a ye, “Tik na wot yong mwasi sede wot. A rɔda vɔk reto e ra betɔk, na e ra benon, na e ra yas, na e ra jey mwa, tanga e ra mwa pyɛ̂ gabaga arɔng.” 27Ano de Dagwi a yong mwat sede yɛ, a yong ɛn rwas na hwā. 28Ko a tɛ̀ nerat e ra yɛn, a yang ɛn, “Tɔs in nèy, karak hin, na yere min ye ye ship a jey, na yin re negwɔm e ra yɛ. Ma sé nɔ́ng in reto e ra betɔk, na e ra benon, tanga e ra mwa pyɛ́ cen de ye kyě kyè e jey.”
29Ko Dagwi a ye, “Di in, ma sé nɔng in mwa pyɛ́ de ye mara yeneng, na mwa cɔ́gɔt de ye tɔs nèy, na ye tɛ́ ɛ pyɛ̂ re min. 30Ko yaga ngyāma mwa tanga mwa benon ma sé nɔng sɔng na berang yaga pyɛ̂ re mɛn.” Ko a tɛ́ ɛ ano. 31Dagwi a di pyɛ́ mwa de a yong ya sé a yɛ ryat sizɔng. Nagwi na sé, ko naturuk na sé, pɔlɔ hê tyiimin a hane.
Currently Selected:
Susumo 1: bomBI
Tõsta esile
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust