KEYUM KERO 7
7
Puumue
1 Ruutum bí Noahme poto, “Nolang nok erang takame etkunglo aalangka, kapeila so siirumso, no ngok keralo deena amikope yédung. 2Nokkíng mime-milope pumsu kínídko deena simon-sili takamlok lang deemana pumsu kínídko simon-sililok bomtak sulangka. 3Delokke pettang lokte pumsu kínídko, bulum turmola amoso ali kadope bomlangka. 4Kapeila longe kíníd nalo looying appi kolang yoying appikope ngo pedongem omoyé; delokke ngokke pítonam turna takamem ngo amosok nyokyin moyéku.” 5Ruutum ke pokampe Noah tabungem iruuto. 6Tani amongso puumue engaabomdodelo Noah bí dítak língko akkénape yédo. 7Delo puumu legape Noah lang bík mime, bík oo kídíe lang nyameng kídíe etkung delo aato. 8Delokke deemana simon-silie lang pettang kídíe delokke amongso eggoona ato-siro takamlok, 9milo-mime pumsupe, Shédíke Noahme pokampe Noah kelo etkung delo lekope aamín geto. 10Delo longe kínídko irongem tani amoso asi puumue engaabomto.
Tani Among Sim Puumu Eebomname
11Noahke dítak língko akké kolang poolo annyinana lokke looying kolang longe kínídko idoem, eerína siyéng takamke sirungem buklenmola taleng telokke puumu gípeko kídíke yabgo kídíem taayato. 12Delo tani amoso looying appi kolang yoying appikope pedonge obomto. 13Delo longepak delo Noah lang bík oo kídí; Shem, Ham delokke Japheth lang buluke mime angum delang Noahke mime etkung delo aato. 14Bulu lang atí-atípe ina monkír-tangkír, simon-sili delokke amoso eggoona kídar delokke atí-atípe ina pettang kídíe, 15pumsu-pumsupe amíl-amo gela ngakína kídíe Noah kíng etkung delo aamín geto. 16Depeila Shédíke pokampe amíl-amo gekína kídíe milo-mimepe aarongem, Noahke méélamlo Ruutum bí eyabem sittumlíkto.
17Tani amoso puumude looying appiko eebomla, aside bojémomo ila etkungdem saabomla, amosokke kedonpe asi eeríe ibomkai. 18Amoso asie yagorupe eeríe ila etkungdem asi teyolo yutgoomoto. 19Asie yagorupe eeríe ila taleng rumkíng sokke kedonna dííte kídíemte pulumbomto. 20Aside eeríe isaala dííte ponyuk kídíem mitar kíníd kokai eebong saato. 21Takam tanie, simon-silie, pettange delokke turna tabunge siyinkai. 22Ngakína tabunge nyokyinkai. 23Kebung-pettang, simon-sili, tani kídí delokke turna tabungem Ruutum bí amosok nyokyinmoto. Noah lang bíkkíng etkung delo duumín gena kídí petomde turto. 24Tani amoso asie língko kolang looying pilngoko eebomto.
Currently Selected:
KEYUM KERO 7: adiBSI
Tõsta esile
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fet.png&w=128&q=75)
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.