KEYUM KERO 1
1
Among Talengem Pílen Legange
1Pílen-ruulendo delo, kerayalumpe Shédíbí taleng emla amongem pílen geto.#Jn 1:1 2Delo amosi moi-muang atí kamato delokke mílíírupe ito, delokke eerína siyéng teyolo kamoe bííbomto, delokke Shédíke Aide siyéng teyolo gyanggo bomto.
3Delo Shédíbí poto, “Angune kalangka.” Delo arope angune kakai. 4Shédíbí angundem kaala gaipe kaato. Delo bí angundem kaamo delok ipansuto. 5Shédíbí angundem longe emto delokke kaamodem yue emto. Delo yumelang roe ila de kerayalum longepe ikai.
6Delo Shédíbí poto, “Asi aradelo rísuko kalangka delokke de rísude asilok asikonem ipansulangka.” 7Dekepe Shédíbí rísuko píla asidem rísu delokke rumkíng lolang teyonglo duupan sumoto. De dekepe ikai. 8Shédíbí rísudem taleng emto. Delo yumelang roe ila de longede annyinape ikai.
9Delo Shédíbí poto, “Taleng rumkílo duuna aside engkol kolo eedum sulangka delokke moopíe lenlangka.” De dekepe ikai. 10Shédíbí moopídem among emto, eedumsuna asidem bí siyéng emto. Deme Shédíbí kaala gaipe kaato.
11Delo Shédíbí poto, “Amode, among agí rísulo kasuna, agí ségulok atí-atípe ayé éélen suna ayékana esing kídíem lang atí-atípe amí lensuna nesi-neyang kídíem garsa sumolangka.” De dekepe ikai. 12Dekepe ila amongde agí ségulok atí-atípe ayé éésuna esing kídíem lang amí gesuna nesi-neyang kídíem garsa sumoto. Deme Shédí bí kaala gaipe kaato. 13Delo yumelang roe ila de longe angumnape ikai.
14Delo Shédíbí poto, “Talengke rísu delo longem lang yuem ipansudope angun kídíe kalangka. Delokke dekede dítak lokke toodí-yaamo, gédí-ponggo longe kídíem lengkanna iyod kídípe ila, 15talengke rísulokke angun kídípe bulu ila amongeme angun bidope ilangka.” De dekepe ikai. 16Delo Shédíbí angun annyiko: angun bojéyana doonyidem longem ngunbom dope delokke angun améyana poolodem yuem ngunbom dope pílento; bí takar emkom píto. 17Shédí bí angun kídíem talengke rísudelo melíkla, amongem angun bidope delokke, 18longemla yuem ngunbommola kamuemla angunem ipansudope imoto. Deme Shédíbí gaipe kaato. 19Delo yumelang roe ila de longede appinape ikai.
20Delo Shédí bí poto, “Asilo turna atíe bojéko kala asi kídíem bííbom langka delokke talenglo pettang kídíe bííbomla rísu delokke arotkon lokke ila arotkon lope yobgoo bomlangka.” 21Dekepe Shédíbí siyéng lokke bottena ato-siro kídíem pílenla, asilo turla, asi kídíem bííbomla yonggo bomna deddína ato-siro emlang atí-atípe ina pettang kídíem pílento. Deme Shédíbí kaala gaipe kaato. 22Delo Shédí bí buluke teyolo utepooroem rulíkla sipe poto, “Nolu ome-oo ola parlangka delokke asi kídí lolang siyéng kídílo bííbom langka, pettang kídíe parla goobyak langka.” 23Delo yume lang roe ila de longe pilngonape ikai.
24Delo Shédíbí poto, “Amode agí ségulok ilensuna turna ato-siro, simon-sili, eggoona atí-siríelang amongke monkír-tangkír kídíem batlen molangka.” De dekepe ikai. 25Depeila Shédíbí monkír-tangkír kídíem buluke agí ségusupe yésudopelang simon-sili kídíem buluke agí ségusupe delokke amolo eggoona kídíem buluke agí ségusupe yéyinsudope píyinto. Deme Shédíbí kaala gaipe kaato.
26Delo Shédíbí poto, “Kaju, amoso eggoona ato-siro takamke teyololang, simon-sili kídí tabungke teyolo delokke asarlo yobgoona pettang kídí takamke teyololang siyéng kídílo yonggona engo kídí tabungke teyonglo ruutumbomdope, ngolum gesunako, ngoluke mimanglok ngolu taniem pílaju.” 27Depeila Shédíbí agí mimang sulok tanieme pílento. Shédíke mimang sulok bí taniem píto. Milo kolang mimekope bínyim bí pílento.
28Shédíbí bínyike teyolo utepooroem ruulíkdola sipe poto, “Otíng-oyin kala parlangka delokke amosime bííbomla ruutum bomlangka. Siyéng kídílo yégona engo kídí tabungke teyololang asarlo yobgoona pettang kídí takamke teyolo delokke among so yégona turna ato-siro kídí takam teyolo ruutumbomla yébomkalangka. 29Kaatola, nonyike donam-tíínampe idope amí kala ayé ééna esing tabung emlang among so garsana nesi-neyang takamem ngo bidung. 30Delokke amoso eggoona ato-siro kídí takamke legapelang, asarlo yobgoona pettang kídí takamke legape delokke kédéng so yégoona taro tabungke dope-tíípenam legape yayina nesi-neyang tabungem ngo biyinto.” De dekepe ikai. 31Delo Shédíbí bíkke pílensunam ato-siro tabungem kaayinla dekeme gaipe kaato. Delo yumelang roe ila de longe de akkénape ikai.
Currently Selected:
KEYUM KERO 1: adiBSI
Tõsta esile
Share
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.