Malakaus 14
14
Cov Thawjcoj Nrhiav Kev Ntes Yexus
(Mathais 26:1-5; Lukas 22:1-2; Yauhas 11:45-53)
1Tshuav ob hnub xwb ces txog hnub ua kevcai Hla Dhau thiab ua kevcai Noj Ncuav Tsis Xyaw Keeb. Cov thawj povthawj hlob thiab cov xibhwb uas qhia Kevcai tabtom nrhiav kev twjywm yuav ntes Yexus coj mus tua. #Khiav 12:1-27 2Lawv hais tias, “Peb tsis txhob ntes rau thaum tseem tabtom ua kevcai, nyobtsam tej pejxeem yuav ua kev kubntxhov.”
Muab Roj Tswqab Hliv Rau Yexus Nyob Rau Lub Zos Npethanis
(Mathais 26:6-13; Yauhas 12:1-8)
3Thaum Yexus nyob hauv lub zos Npethanis, Nws so hauv Ximoos tus uas thaum ub mob ruas lub tsev. Thaum Yexus tabtom noj mov, muaj ib tug pojniam nqa ib lub hwj alanpaxataws uas ntim roj tswqab kim heev uas yog muab nroj naludas ua tuaj. Nws muab lub ncauj hwj lov, thiab muab cov roj tswqab ntawd hliv rau saum Yexus taubhau. #Lukas 7:37-38 4Ibtxhia neeg uas nyob ntawd tsis txaussiab thiab hais tias, “Uacas nws yuav muab cov roj tswqab ntawd nkim povtseg? 5Yog muab coj mus muag, yuav tau ntau dua li 300 lub npib nyiaj,#14:5: 300 lub npib nyiaj: Saib 6:37. Phau Kilis sau hais tias 300 denalis. thiab muab cov nyiaj ntawd coj mus pub rau cov neeg pluag kuj zoo dua!” Thiab lawv thuam tus pojniam ntawd hnyav kawg li.
6Tiamsis Yexus hais rau lawv tias, “Cia nws ua nws! Nej ua rau nws ntxhovsiab ua dabtsi? Qhov uas nws ua rau Kuv ntawd yog ib qhov zoo heev. 7Yeej yuav muaj cov neeg pluag nrog nej nyob mus li, nej xav pab lawv thaum twg los yeej tau, tiamsis Kuv yuav tsis nrog nej nyob mus li. #2Kev 15:11 8Tus pojniam no yeej ua kawg nws lub zog lawm. Nws muab roj tswqab hliv ywg Kuv, twb yog nws npaj tu Kuv lub cev uantej uas muab Kuv log. 9Kuv qhia tseeb rau nej hais tias, txhua thaj chaw hauv qabntuj no uas neeg qhia Txoj Moo Zoo mus txog, qhov uas tus pojniam no tau ua, yuav raug muab xyav tawm kom sawvdaws nco txog nws.”
Yudas Pomzoo Ntxeevsiab Rau Yexus
(Mathais 26:14-16; Lukas 22:3-6)
10Dhau ntawd, Yudas Ixakali-aus uas yog ib tug ntawm kaum-ob tug thwjtim txawm mus cuag cov thawj povthawj hlob, thiab xav muab kom tau Yexus mus cob rau lawv. 11Thaum lawv hnov li ntawd lawv zoosiab kawg li, lawv coglus hais tias lawv yuav muab nyiaj rau nws. Yogli ntawd, Yudas txawm pib nrhiav sijhawm muab kom tau Yexus rau lawv.
Yexus Nrog Nws Cov Thwjtim Noj Pluas Mov Ua Kevcai Hla Dhau
(Mathais 26:17-25; Lukas 22:7-14, 21-23; Yauhas 13:21-30)
12Thawj hnub uas ua kevcai Noj Ncuav Tsis Xyaw Keeb, hnub ntawd yog hnub uas sawvdaws tua menyuam yaj noj ua kevcai Hla Dhau. Yexus cov thwjtim nug Nws hais tias, “Koj xav kom peb mus npaj pluas mov ua kevcai Hla Dhau rau Koj qhovtwg?”
13Yexus txawm txib Nws ob tug thwjtim mus thiab qhia nkawd hais tias, “Neb mus rau hauv nroog, yuav muaj ib tug txivneej kwv ib hub dej los ntsib neb. Neb ciali lawv nws qab mus 14rau hauv tsev, thiab hais rau tus tswvtsev tias, ‘Xibhwb hais tias, Chav uas koj muab rau Kuv thiab Kuv cov thwjtim noj pluas mov ua kevcai Hla Dhau nyob qhovtwg?’ 15Thaum ntawd nws yuav coj neb nce mus rau txheej saud, thiab nws yuav qhia ib chav dav-dav uas twb muaj rooj muaj tog txhij lawm rau neb. Neb ciali npaj txhua yam cia rau qhov ntawd tos peb.”
16Ob tug thwjtim txawm mus hauv lub nroog, thiab pom txhua yam rawsli Yexus qhia rau nkawd; ces nkawd thiaj npaj pluas mov ua kevcai Hla Dhau rau qhov ntawd.
17Thaum tsausntuj, Yexus thiab kaum-ob tug thwjtim los txog. 18Thaum lawv tabtom noj mov ntawm rooj, Yexus hais tias, “Kuv qhia tseeb rau nej hais tias, nej cov ko muaj ib tug yuav ntxeevsiab rau Kuv, nws yog tus uas tabtom nrog Kuv noj uake.” #Nnkauj 41:9
19Thaum cov thwjtim hnov li ntawd, lawv nyuajsiab heev, lawv nyias taus nyias nug Yexus hais tias, “Koj hais li ko puas yog kuv?”
20Yexus teb tias, “Yeej yog ib tug ntawm nej kaum-ob leeg no ntag, tus ntawd yog tus uas nrog Kuv koom muab ncuav ntsw hauv ib lub tais. 21Neeg Leejtub yeej yuav tuag rawsli Vajtswv tej Lus sau hais txog Nws lawm, tiamsis tus uas ntxeevsiab rau Neeg Leejtub, nws yuav raug kev puastsuaj loj heev! Yog nws tsis txhob yug los kuj yuav zoo dua!”
Tus Tswv Rooj Mov
(Mathais 26:26-30; Lukas 22:14-20; 1 Kauleethaus 11:23-25)
22Thaum lawv tseem tabtom noj mov, Yexus muab ib lub ncuav los ua Vajtswv tsaug, muab ntais thiab cev rau Nws cov thwjtim, thiab hais tias, “Lub ncuav no yog Kuv lub cev, nej ciali txais mus noj.”
23Ces Nws muab ib khob cawv txivhmab los ua Vajtswv tsaug, Nws muab cev rau lawv, thiab lawv txhua tus txais haus. 24Yexus hais rau lawv tias, “No yog Kuv cov ntshav uas ntws los rau ntau leej. Kuv cov ntshav, uas yog Vajtswv lolus cogtseg. #Khiav 24:8; Yelemi 31:31-34 25Kuv qhia tseeb rau nej hais tias, Kuv yuav tsis haus cov cawv txivhmab no ntxiv, mus txog hnub uas Kuv haus cov cawv txivhmab tshiab hauv Vajtswv lub Tebchaws.”
26Ces lawv hu ib zaj nkauj qhuas Vajtswv thiab txawm tawm mus rau pem Roob Txiv Ntoo-Roj lawm.
Yexus Qhia Uantej Txog Qhov Uas Petus Yuav Tsis Lees Paub Nws
(Mathais 26:31-35; Lukas 22:31-34; Yauhas 13:36-38)
27Yexus hais rau lawv tias, “Nej txhua tus yuav khiav tas thiab tso Kuv tseg, rauqhov Vajtswv Txojlus sau cia hais tias, ‘Vajtswv yuav tua tus tswv yug yaj, thiab pab yaj yuav tawg uasab uasua mus.’ #Xekhali 13:7 28Tiamsis tomqab Kuv sawv hauv qhovtuag rovqab los muaj txojsia lawm, Kuv yuav ua nej ntej mus rau pem Kalilais.” #Math 28:16
29Petus teb tias, “Txawm yog sawvdaws tso Koj tseg los kuv yuav tsis tso Koj tseg ib zaug li!”
30Yexus hais rau Petus tias, “Kuv qhia tseeb rau koj hais tias, hmo no uantej qaib qua ob tsig, koj yuav tsis lees paub Kuv txog peb zaug.”
31Petus teb tawv qhawv hais tias, “Txawm yog kuv yuav nrog Koj tuag uake los kuv yuav tsis hais tias kuv tsis paub Koj ib zaug li!”
Thiab cov thwjtim txhua tus puavleej hais ib yam li ntawd.
Yexus Thov Vajtswv Hauv Lub Vaj Khexemanes
(Mathais 26:36-46; Lukas 22:39-46)
32Lawv mus txog rau ntawm ib qhov chaw uas hu ua Khexemanes, Yexus hais rau Nws cov thwjtim tias, “Nej nyob ntawm no, Kuv yuav mus thov Vajtswv lawm tod.” 33Nws coj Petus, Yakaunpaus, thiab Yauhas nrog Nws mus. Nws nyuajsiab thiab hnyavsiab kawg li. 34Nws hais rau lawv tias, “Kuv nyuajsiab tshuav tuag lawm xwb, nej ciali nrog Kuv nyob ntawm no thiab zov tos.”
35Yexus mus tomntej mentsis, ces Nws txawm txhoscaug ntua rau hauv av thiab thov Vajtswv tias, yog ua tau, thov kom lub sijhawm uas yuav raug txoj kev txomnyem no dhau ntawm Nws mus. 36Nws thiaj thov hais tias, “Anpas, Txiv! Koj yeej ua tau ibpuas tsavyam huv tibsi, thov Koj muab lub khob iab khob daw no tshem ntawm Kuv mus. Txawm licas los thov tsis txhob ua rawsli Kuv lub siab nyiam, tiamsis cia ua rawsli koj lub siab nyiam xwb.”
37Thaum Yexus rovqab los, Nws pom lawv peb tug thwjtim tsaugzog tas lawm. Nws hais rau Petus tias, “Ximoos, koj tsaugzog lawm lov? Koj twb yoo tsis taus dabntub txog ib nyuag txoosteev li lov?” 38Thiab Nws hais rau lawv tias, “Nej yuavtsum ceevfaj thiab thov Vajtswv pab, nej thiaj tsis poob rau kev simsiab. Lub siab yeej txaussiab hlo, tiamsis lub cev qaugzog zis.”
39Yexus rovqab mus thov Vajtswv dua ib zaug ntxiv, thiab hais tibyam li qub. 40Thaum Nws rovqab los, Nws pom cov thwjtim tsaugzog tas lawm; lawv rua tsis taus qhovmuag li, thiab lawv tsis paub yuav hais licas rau Nws.
41Thaum Nws rovqab los zaum thib peb, Nws hais rau lawv tias, “Nej tseem yuav tsaugzog thiab so kom txaus tso lov? Txaus lawm! Twb txog lub sijhawm lawm! Nej saib seb, Neeg Leejtub samsim raug luag ntes coj mus rau cov neeg txhaum txhais tes lawm. 42Ciali sawv es peb mus. Nej saib maj, tus neeg uas ntxeevsiab rau Kuv twb tuaj txog no lawm!”
Yexus Raug Ntes
(Mathais 26:47-56; Lukas 22:47-53; Yauhas 18:3-12)
43Thaum Yexus tseem tabtom hais li ntawd, ces Yudas uas yog ib tug ntawm kaum-ob tug thwjtim txawm tuaj txog. Muaj ib pab neeg coob-coob nqa ntaj nqa qws nrog nws tuaj. Lawv yog cov uas cov thawj povthawj hlob thiab cov xibhwb uas qhia Kevcai thiab cov txwjlaug tso tuaj. 44Tus uas ntxeevsiab ntawd twb xub qhia rau cov neeg ntawd lawm hais tias, “Kuv nwj tus twg, ces yog tus ntawd ntag. Nej ciali ntes Nws thiab coj Nws mus ceev tibzoo.”
45Thaum Yudas tuaj txog ntua, nws txawm ncajnraim mus rau ntawm Yexus thiab hais tias, “Xibhwb!” ces nws txawm nwj kiag Yexus. 46Lawv thiaj los ntes kiag Yexus thiab tuav Nws ruaj-ruaj. 47Muaj ib tug uas sawv ze ntawd txawm rho hlo nws rab ntaj los tib ntag rau tus Tuam Povthawj Hlob tus tubqhe ib sab nploojntseg tunrho. 48Thaum ntawd, Yexus hais rau lawv tias, “Nej nqa ntaj nqa qws tuaj ntes Kuv ib yam li Kuv yog tubsab no lov? 49Kuv niajhnub qhia nej hauv lub Tuamtsev, tiamsis nej ho tsis ntes Kuv. Tiamsis yeej yog yuav muaj li no, thiaj tiav rawsli Vajtswv tej Lus.” #Lukas 19:47; 21:37
50Ces cov thwjtim txawm khiav tas lawm tso Yexus tseg.
51Muaj ib tug tub hluas lawv Yexus qab, nws tsis hnav ristsho, nws npua ib daim ntaub mag xwb. Lawv npajsiab yuav ntes nws thiab, 52tiamsis nws ciali khiav liabqab tsuas thiab tso daim ntaub ntawd tseg rau tomqab.
Cov Nomtswv Taug Yexus Zaj
(Mathais 26:57-68; Lukas 22:54-55, 63-71; Yauhas 18:13-14, 19-24)
53Lawv txawm coj Yexus mus rau tom tus Tuam Povthawj Hlob lub tsev, uas yog tagnrho cov thawj povthawj hlob, cov txwjlaug, thiab cov xibhwb uas qhia Kevcai tuaj txoos uake sablaj. 54Petus lawv Yexus qab nrug deb tsawv, thiab nws mus rau hauv lub tshavloog ntawm tus Tuam Povthawj Hlob lub tsev. Nws txawm nkag mus nrog cov fajxwm nte taws uake. 55Cov thawj povthawj hlob thiab tagnrho cov thawjcoj hauv Koomhaum qibsiab txawm nrhiav qeeyam puavpheej los nkaug Yexus, kom lawv thiaj tau cai muab Yexus tua, tiamsis lawv nrhiav tsis tau ib qho li. 56Muaj ntau leej tuaj ua timkhawv dag tawmtsam Yexus, tiamsis tej lus uas lawv hais tsis sibtim.
57Muaj qeeleej sawv ua timkhawv tsis tseeb tawmtsam Yexus li no: 58“Peb hnov Nws hais tias, ‘Kuv yuav muab lub Tuamtsev uas yog neeg txhais tes ua no rhuav povtseg, thiab peb hnub tomqab ntawd, Kuv yuav ua dua ib lub tshiab uas tsis yog neeg txhais tes ua.’ ” #Yauh 2:19 59Txawm li ntawd los lawv cov lus timkhawv yeej tseem tsis sibtim li thiab.
60Tus Tuam Povthawj Hlob txawm sawvtsees tabmeeg sawvdaws thiab nug Yexus hais tias, “Lawv kom Koj li ntawd, Koj tsis muaj lus teb lawv li lov?”
61Tiamsis Yexus ua twjywm tsis teb ib los li. Tus Tuam Povthawj Hlob rov nug Yexus hais tias, “Koj puas yog tus Mexiyas uas yog Vajtswv uas Dawbhuv tus Tub?”
62Yexus teb tias, “Kuv yog! Thiab nej yuav pom Neeg Leejtub nyob ntawm Vajtswv tus uas muaj Hwjchim Loj Kawg Nkaus sab xis, thiab nrog huab nrog cua los saum ntuj los!” #Teshl 7:13
63Tus Tuam Povthawj Hlob txawm dua rhe nws lub tsho thiab hais tias, “Tsis tas peb yuav mus nrhiav timkhawv ntxiv lawm! 64Nej twb hnov Nws tej lus thuam Vajtswv ntawd lawm. Nej xav licas?” #Levi 24:16
Lawv sawvdaws thiaj txiavtxim hais tias, Nws ua txhaum lawm, tsimnyog Nws yuavtsum tuag.
65Cov neeg ntawd muaj qeeleej ciali nto qaubncaug rau Yexus, lawv muab phuam pav Nws qhovmuag thiab ntaus Nws. Lawv hais rau Nws tias, “Koj sim twv seb yog leejtwg ntaus Koj?”
Cov fajxwm txawm coj Yexus mus thiab xuas tawgncuav rau Yexus.
Petus Tsis Lees Paub Yexus
(Mathais 26:69-75; Lukas 22:56-62; Yauhas 18:15-18, 25-27)
66Petus tseem nyob ntawm tshavloog, tus Tuam Povthawj Hlob ib tug ntxhais qhev tuaj txog ntawd. 67Thaum nws pom Petus zaum nte taws, nws ntsiantsoov Petus thiab hais tias, “Koj yog ib tug uas txeev nrog Yexus uas yog neeg Naxalev uake los sav.”
68Tiamsis Petus tsis lees li. Petus teb tias, “Kuv tsis paub thiab tsis totaub txog tej uas koj hais ko,” ces nws txawm mus rau tom roojvag lawm. Tamsim ntawd qaib txawm qua.#14:68: Tej phau ntawv qub uas xuas tes sau tsis muaj Tamsim ntawd qaib txawm qua.
69Thaum tus ntxhais qhev pom Petus nyob ntawd, nws txawm rov hais rau cov neeg uas sawv ntawd tias, “Tus no yog Yexus lawv cov ib tug tiag!” 70Tiamsis Petus rov tsis lees dua thiab.
Tomqab ntawd mentsis, cov neeg uas sawv ntawd hais rau Petus tias, “Koj yeej yog lawv cov ntawd ib tug xwb, rauqhov koj yog neeg Kalilais.”
71Petus txawm twv hais tias, “Kuv twv lub ntuj hais tias kuv hais qhov tseeb xwb! Yog kuv dag, thov Vajtswv rautxim rau kuv. Kuv yeej tsis paub tus txivneej uas nej hais ntawd li!”
72Tamsim ntawd qaib txawm qua zaum thib ob. Petus ncodheev txog tej lus uas Yexus hais rau Petus tias, “Uantej qaib qua ob tsig, koj yuav tsis lees paub Kuv txog peb zaug.” Petus txawm quaj tusiab kawg li.
Currently Selected:
Malakaus 14: MWW2022
Tõsta esile
Share
Kopeeri
Want to have your highlights saved across all your devices? Sign up or sign in
© 2022 United Bible Societies. All rights reserved.