Abatelipuna 9
9
1 #
Aba 1:28
Yaka Yabowaine Nowa ge natunau i ba muloluagil i ba, “Nuku talaabab ge nuku gewi, yaka nuku debalala panayawi nuku pakalaopop. 2Bwasumu gegewel, bolo hi nawanawa, bolo hi youyou, bolo hi yawayawal, ge moti gegewel nihi lovakunagimiu. Iyaka ya telel wami logugui elana ge nuku logugui-agil. 3Bugul gegewel yawaliliya gaganina nuku anan ya. Valila bugul siusiunil enowaliya ge lamwaliya ya pewa amiu, yaa sauga ya bugul gegewena ya pewa eliyamiu aanan kaiwena. 4#Aba 17:10-14; Lib 19:26; Log 12:16,23; 15:23 Yaa bahi bunum salisaliyana nuku an, kaiwena yawal i minaa saliya eliyana. Saliya ga ni lohaba yaka abwe nuku an. 5He ebo bwasumu etega gamagal etega ni tal saliyana ni lau ge yawalina ni mowasi, nau abwe ana lahi na ginol. I ola al ebo gamagal etega alona yawalina ni pwamowasi, nau abwe ana lahi na ginol. 6#Aba 1:26; Tota 20:13 Ebo gamagal etega alona yawalina ni pwamowasi, he iya al yawalina gamagalau nihi pwamowasi, kaiwena nau Yabowaine gamagalau ya ginolil totou kanukanunu elana.
7 #
Aba 1:28
“He nuku talaabab ge nuku gewi, yaka ami boda ni bwata panayawiya.”
8Yaka Yabowaine i baek Nowa alonau natunau eliyalil i ba, 9“Sauga ya no bateli na ginol eliyamiu, tubutubumiyau eliyalil, 10ge bugul gegewel bolo yawaliliya gaganina eliyalil — bwasumu bolo hi youyou, bolo totounuwal, ge bolo bekikil — bolo alomiyau ku tagilem wagaa. 11He ya bateli te nige al na babaa nub ni gagan ge bwasumu gegewel ni pwapwamowasel, nige al nub panayawi ni aapapanak-an.”
12Yaka Yabowaine i ba al i ba, “Bateli toto ya ginol eliyamiu ge bwasumu gegewel eliyalil, iya bateli mihomihotina heyan mulaa gegewel kaiweliya. He bateli o ana etotohi i ola hiwe. 13Liliyal na ginol yaluyalu eliyalil, inoke ni tabwa no bateli ana etotohi, bateli toto ya ginol panayawi elana. 14Sauga ebo yaluyalu na ginol panayawi ni yabom ge liliyal ni masal yaluyaluwa, 15yaka no bateli na nuwahikan, toto ya ginol eliyamiu ge bugul gegewel yawaliliya gaganina eliyalil. He nige al nub ni tutub ge bugul gegewena ni aapapanak-agil. 16Sauga ebo liliyal ni masal yaluyalu eliyalil ge na kite, inoke ni panuwahikagau bateli mihomihotina kaiwena, toto nau Yabowaine ya ginol bugul gegewel yawaliliya gaganina panayawiya eliyalil.”
17He Yabowaine i ba i ola to Nowa elana, i ba, “Liliyal iya no bateli ana etotohi, toto ya ginol bugul gegewel panayawiya eliyalil.”
Nowa Oine I Im Kokona-an
18Nowa natunau bolo hi tagilem wagaa alaliya Semi, Hami ge Yapeta. (He Hami iya Kenani tamana.) 19Nowa natunau ali toto eton ya, heliya gamagalau gegewel panayawiya tubuliyau.
20Nowa iya toeyowa ge iya houwan hot oine ana eyowa i ginol ge i galaumaan. 21Sauga etegana Nowa oine i im kokona-an, yaka i kenu bokaboka wana epanapana gamwanaa. 22Kenani tamana Hami i tuk tamana bobokana i kite, yaka i tagil i lowasawasa-an talinau eluwa elal. 23Yaka Semi ge Yapeta kaliko etega hi ahe hi anal vevelaliyaa ge hi pihikan, yaka eliya hi huwalaan hi na tamaliya hi pahabobu. He mataliya hi ligetoga-an ge bahi tamaliya bobokana nihi kikite.
24Sauga oine wana gasisi i mowasi ge Nowa i lut, yaka wasa i hago natuna toalaalahul Hami wana ginol kaiwena. 25Inoke i ba:
“Sauga ya Kenani ya ba nuwamut-an.
Iya ni totuwalali loloyowan hot talinau elal.”
26Yaka i ba al:
“Yehoba ya tobalan, iya Semi wana Yabowaine!
He Kenani ni totuwalali loloyowan Semi elana.
27Ya awanun Yabowaine Yapeta wana labi ni pwabwata,
i ola al tubutubunau ge Semi tubutubunau nihi mibubun.
He Kenani ni totuwalali loloyowan elana.”
28Nub enaa, Nowa i minamina al baliman 350. 29He Nowa wana baliman gegewena 950 i pwawa, yaka abwe i aliga.
Currently Selected:
Abatelipuna 9: mpx
Tõsta esile
Share
Copy
Want to have your highlights saved across all your devices? Sign up or sign in
Copyright © 2018, Wycliffe Bible Translators, Inc. All rights reserved.