Juan 19
19
1Mãpai Pilatopa Jesús wɨpiji soldaorãmaa. 2Soldaorãpa poro jɨ̃ra pakꞌuru jua ne–ɨɨrɨ–idaa bɨdee oodapꞌeda, Jesús porode jɨ̃ bɨjida mãikꞌaapa pꞌaru pꞌoree teesoo, kꞌĩra pꞌãimapꞌãimaa bɨ, jɨ̃ bɨjida. 3Maapꞌeda irumaa chejida mãikꞌaapa mãgajida:
—¡Akꞌɨ́tɨ Judiorã Rey!
mãikꞌaapa kꞌĩramaa sĩpachida.
4Pilato waya tedeepa uchiakꞌãri, mãgaji:
—Akꞌɨ́tɨ. Mɨa iru nama aneeru parã taide. Kꞌawapi kꞌinia bɨ parãmaa mɨa maarepida ne–inaa kꞌachia unu–e na eperãde.
5Jesús uchiakꞌãri, ma poro jɨ̃ra jɨ̃ baji mãikꞌaapa pꞌaru teesoo. Mãpai Pilatopa mãgaji:
—¡Nama bɨ chi eperã!
6Jesús unu atadakꞌãri, pꞌaareerã poroorãpa mãikꞌaapa Tachi Akꞌõre te waibɨa jɨ̃apataarãpa biapachida:
—¡Kurusode peepitꞌáaji! ¡Kurusode peepitꞌáaji!
Mamĩda Pilatopa mãgaji:
—Mãgara pãchia atadaidapáde aji, mãikꞌaapa peetꞌaanadapáde aji. Mɨa maarepida unu–e bɨ ne–inaa kꞌachia ooda ma kꞌaurepa peepiitꞌee.
7Mamĩda ma judiorã poro waibɨarãpa pꞌanaujida:
—Tai ũraade jara bɨ eperãpa ichi Tachi Akꞌõre Warrada aru pɨrã, piupia bɨ. Mãga ooji jãgɨ́ eperãpa.
8Mãga ũrikꞌãri, Pilato waapɨara pꞌeradachi. 9Waya ichi palaciode tꞌĩuji mãikꞌaapa Jesumaa iidiji:
—¿Pɨ, sãpemama? aji.
Mamĩda Jesupa maarepida pꞌanaukꞌaa paji. 10Mãpai Pilatopa mãgaji:
—¿Mɨ pedee pꞌanau–ekꞌã? aji. ¿Kꞌawa–e bɨkꞌã aji, mɨa pɨ kurusode peepi kꞌinia baitꞌeera peepitꞌaai, maa–e pɨrã peepi kꞌinia–e baitꞌeera kꞌena pëi?
11Mãpai Jesupa pꞌanauji:
—Pɨa mɨmaa maarepida oo–e pakꞌaji, ɨtꞌari baparipa pɨ eperãarã poro waibɨa papi–e pada paara. Maperã chi eperã mɨ nama pëidapa ne–inaa kꞌachiara oo bɨda aji, pɨ kꞌãyaara.
12Maadakꞌãriipa Pilatopa kꞌĩsiapachi sãga Jesús kꞌena pëii. Mamĩda judiorãpa biapachida:
—¡Jãgɨ́ eperã peepi–e pɨrã, pɨ César kꞌõpꞌãyo–eda! apachida. ¡Eperãpa ichi reyda a bɨ pɨrã, mãgɨpa César kꞌĩra unuamaa iru bɨda! ajida.
13Pilatopa mãga ũrikꞌãri, Jesús taawaa ateepiji mãikꞌaapa ichi su–akꞌɨ beeji charra su–akꞌɨ beeparimãi, hebreo pedeede Gabatá apatapꞌedaa, griego pedeede “Mãu Choma Pꞌepꞌedee Bɨmãi”. 14Mãgɨ́ ewate Pascua fiesta norema paji. Imatꞌɨpa Pilatopa mãgaji ma judiorã poro waibɨarãmaa:
—¡Akꞌɨ́tɨ! ¡Nama bɨda aji, pãchi rey!
15Mamĩda ãchia biapachida:
—¡Ãyaa ateepíji! ¡Ãyaa ateepíji! ¡Kurusode peepitꞌáaji!
Pilatopa iidiji:
—¿Kꞌinia pꞌanɨkꞌã aji, mɨa pãchi rey peepimerã?
Pꞌaareerã poroorãpa pꞌanaujida:
—¡Taipa rey awaraa wẽe pꞌanɨda ajida, César kꞌãyaara!
16Mãpai Pilatopa Jesús teeji ichi soldaorãmaa kurusode peetꞌaanadamerã.
Jesús peetꞌaadapꞌedaa
(Mateo 27.32-44; Marcos 15.21-32; Lucas 23.26-43)
17Jesumaa kuruso ateepidapꞌeda, uchiajida pꞌuurudeepa taawaa wãdaitꞌee “Tachi Poro Bɨɨrɨ” apatapꞌedaamaa. (Hebreo pedeede Gólgota apachida.) 18Mama merapꞌedapꞌeda, ma kurusode baijira bɨjida piumerã. Iru ikꞌaawa bɨjida awaraarã omé, aba juaraare, aba juabi eere.
19Pilatopa letrero pꞌãji Jesús kurusode bɨdamerã. Nãga pꞌãji: Jesús Nazaretdepema, Judiorã Rey. 20Judiorã chokꞌaraarãpa leejida ma pꞌãda, Jesús peedapꞌedaamãi pꞌuuru kꞌaitꞌa bada perã. Ma pꞌãda pꞌã baji hebreo pedeede, latín pedeede mãikꞌaapa griego pedeede. 21Ma pꞌãda leedakꞌãri, pꞌaareerã poroorãpa mãgajida Pilatomaa:
—Pꞌãnáaji Judiorã Rey. Ma kꞌãyaara nãga pꞌãpáde ajida. Na eperãpa jaraji ichita Judiorã Rey.
22Mamĩda Pilatopa pꞌanauji:
—Mɨa pꞌãda perã jãgá pꞌã beeitꞌeeda aji.
23Soldaorãpa Jesús kurusode baijira bɨdapꞌeda mãikꞌaapa iru pꞌaru atadapꞌeda, ãchi kꞌĩmariirãmaa jedetꞌaajida. Mamĩda chi edupema pꞌaru teesoo baji, kꞌaatꞌɨ–ee; jĩpꞌa kꞌa baji. 24Mapa mãgajida:
—Jẽnaadáma. Ma kꞌãyaara suerte jemenedáma kꞌawaadaitꞌee kꞌaipata ataitꞌee.
Mãga oojida uchiamerã Tachi Akꞌõre Ũraa pꞌãdade jara bɨkꞌa:
‘Mɨchi pꞌaru jedejida mãikꞌaapa suerte jemenedapꞌeda, mɨchi pꞌaru jitajida’. (Salmos 22.18)
25Soldaorãpa mãga oo pꞌanɨ misa, kuruso kꞌaitꞌa bainɨ̃ pꞌanajida Jesús nawe chi nawe ɨ̃pewẽra ome, awaraa María, mãgɨ́ Cleofás wẽra pada, mãikꞌaapa María Magdalena. 26Jesupa unukꞌãri chi nawe kꞌaitꞌa bainɨ̃ bɨ mɨ, chi kꞌõpꞌãyo kꞌinia iru bada ome, chi nawemaa mãgaji:
—Nawe, jã pɨchi warrapɨ.
27Maapꞌeda mɨmaa mãgaji:
—Jã pɨchi nawepɨ.
Maadakꞌãriipa mɨa María iru bapachi mɨ tede mɨchi nawekꞌa.
Jesús jai–idaada
(Mateo 27.45-56; Marcos 15.33-41; Lucas 23.44-49)
28Ma tꞌẽepai Jesupa kꞌawaakꞌãri jõmaweda ichia ooitꞌee bada auparu, mãgaji:
—‘Opisia nɨ̃bɨda aji.’ (Salmos 69.21)
Mãga jaraji uchiamerã Tachi Akꞌõre Ũraa pꞌãdade jara bɨkꞌa. 29Mama iru pꞌanajida vino achuchua chokꞌode. Aɨde esponjakꞌa pꞌẽesapꞌẽesaa bɨ topa atadapꞌeda, jõi bɨjida hisopo kꞌɨ̃de mãikꞌaapa itꞌaimãi tꞌɨ atajida. 30Sõpꞌeda, Jesupa mãgaji:
—Ɨ̃rá jõma aupajida aji,
mãikꞌaapa ichi poro ɨ̃jaabaipꞌeda, jai–idaaji.
Miasupa Jesús orro sudapꞌedaa
31Ma ewate Pascua fiesta ɨ̃ipata ewate norema paji. Judiorãpa mãgɨ́ ewate ɨapata perã, kꞌiniada–e pꞌanajida piuda kꞌapꞌɨa kurusode pꞌaneedamerã. Maperã iidijida Pilatomaa kurusode pꞌanadapꞌedaarã jĩru kꞌõrapikꞌoomerã, mãgá isapai piudamerã. Mãgá chi piuda kꞌapꞌɨa kurusodeepa ɨrabai atapidai. 32Pilatopa ooji ãchia iididapꞌedaakꞌa. Romadepema soldaorã wãdapꞌeda, Jesús ikꞌaawa baijira pꞌanadapꞌedaarã jĩru kꞌõrakꞌoonajida, waide piuda–e pꞌanadapꞌedaa perã. 33Mamĩda Jesús kꞌaitꞌa panadakꞌãri, piu bɨ unujida. Maperã iru jĩru kꞌõrada–e paji.
34Ma kꞌãyaara soldaopa Jesús orrode miasupa sutꞌaaji. Aramata uchiaji waa pania ome. 35Mɨ, chi mãga unudapa nepɨrɨmaa bɨ mɨa unuda. Mɨa kꞌawa bɨ wãarata jara bɨ, mɨa mãga unuda perã. Mɨa nãga jara bɨ parãpa pida ichiaba ijãadamerã. 36Mãga pꞌasaji uchiamerã Akꞌõre Ũraa pꞌãdade jara bɨkꞌa:
‘Iru bɨɨrɨ apida bɨada–e paji’.#19.36 Éxodo 12.46; Números 9.12. (Salmos 34.20)
37Ichiaba mãga pꞌasaji uchiamerã pedee awaraa Akꞌõre Ũraa pꞌãdade jara bɨkꞌa:
‘Akꞌɨdaitꞌee eperã ãchia sutꞌaadapꞌedaa’. (Zacarías 12.10)
Jesús ɨadapꞌedaa
(Mateo 27.57-61; Marcos 15.42-47; Lucas 23.50-56)
38Ma tꞌẽepai Josepa Pilatomaa Jesús kꞌapꞌɨa iidinaji, ichimaa ɨapimerã. Ichi Arimatea pꞌuurudepema paji mãikꞌaapa Jesude ijãa bapachi. Mamĩda judiorã poro waibɨarã waidoopa, awaraarãmaa kꞌawapi–e paji. Pilatopa Josemaa jaraji Jesús kꞌapꞌɨa atanamerã. 39José ome cheji Nicodemo, chi naaweda Jesús ome pꞌãrikꞌua pedeenada. Mãgɨpa aneeji treinta kilos mirra kꞌera áloe kꞌera ome pꞌoirada Jesús piuda kꞌapꞌɨa ɨ̃rɨ pꞌodaitꞌee. 40Judiorãpa oopatakꞌa piuda ɨadakꞌãri, ãchia Jesús kꞌapꞌɨa ma kꞌera ome pi–ia pɨratꞌaajida lienzode. 41Jesús peedapꞌedaamãi ne–uu eujã kꞌaitꞌa baji. Mama baji mãu te uria ewaa kꞌorodapꞌedaa piuda ɨadaitꞌee. Mamĩda waide apida ɨada–e pꞌanajida. 42Jesús kꞌapꞌɨa mama bɨnajida, ma mãu te uria kꞌaitꞌa bada perã mãikꞌaapa judiorã ɨ̃ipata ewate ɨ̃rɨ bada perã.
Currently Selected:
Juan 19: sjaB
Tõsta esile
Share
Kopeeri
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.