If you have would like a copy of this version please contact info@davaraudiobibles.org

Text: Halbi New Testament, CC-BY-SA-4.0, The Love Fellowship. Audio: Halbi New Testament Audio Biible, CC-BY-SA-4.0, Davar Partners International, The Love Fellowship, 2023

Halbi New Testament

Halbi Bible by The Love Fellowship is licensed under Creative Commons Attribution-ShareAlike 4.0 License.

ऐचो पाचे हुन नंगर-नंगर आउर गाँव-गाँव परचार करते-करते, आउर माहापुरू चो राज चो नगतखबर सुनाते-सुनाते फिरूक मुरयालो, आउर हुनमन बारो हुनचो संगे रवत, आउर खिन्डिक बायले लेकीमन बले रला जोन दुष्टआत्मामन ले आउर बेमारमन ले चेंगा कराय जाऊ रवत, आउर हुनमन ऐ आत मरियम जोन मगदलीनी बलायाजाते रली, जेचो थानले सात दुष्टआत्मामन निकरून रली, आउर हेरोदेस चो भण्डारी खुजा चो बायले योअना, आउर सुसनाह, आउर खुबे असन दुसर बायले लेकीमन। ऐ आपलो सम्पत्ति ले हुनचो सेवा करते रली।

जिदलदाय बड़े भीड़ रूंड़ा होली आउर नंगर-नंगर चो लोग हुनचो लगे ऐते रवत, तेबे हुन कहनी ने बल्लो: “गोटक बुनतो बिता बीज बुनुक निकरलो। बुनते-बुनते खिन्डिक बाट रेटे घसरली, आउर रोमदाय गेली, आउर बादरी चो चड़ीईमन हुनके खादला। खिन्डिक चचरली पकना ने घसरली, आउर अकरली, मान्तर ओल नी मिरलो ले सुकुन गेली। खिन्डिक लाटा-बुटामन चो मंजी ने घसरली, आउर लाटा-बुटामन संगे-संगे बाडुन भाती हुनके चेपान दिला। खिन्डिक नगत भूईं उपरे घसरली, आउर अकरून भाती सव गुना फल आनला।” ऐ बोलुन भाती हुन जोर ले बल्लो, “जेचो सुनतोर कान आसे हुन सुना।”

हुनचो चेलामन हुनचो ले पचारला कि ऐ कहनी चो अरत काय आय? हुन बल्लो, “तुमके माहापुरू चो राज चो भेदमन चो समज दिया गेली से, मान्तर दुसरमन के कहनीमन ने सुनाया जाऊ आय, ऐईकाजे कि
‘हुनमन दकते-दकते बले नी दकोत,
आउर सुनते-सुनते बले नी समजोत।’

“कहनी चो अरत ऐ आय: बीज माहापुरू चो बचन आय। बाट रेटे चो हुनमन आत, जोन मन सुनला; तेबे शयतान ऐऊन भाती हुनमन चो मन ले बचन उठाऊन नेऊ आय कि काहांय असन नी होओ कि हुनमन बिश्वास करून मुक्ति पाओत। पकना उपर चो हुनमन आत कि जिदलदाय सुनु आत, तेबे हरिक ले बचन के गरहन तो करू आत, मान्तर चेर नी धरलो ले हुनमन खिन्डिक समया ले बिश्वास संगाऊ आत आउर परीक्षा चो बेरा बहकुन जाऊ आत। जोन बुटामन ने घसरली, ऐ हुनमन आत जोन सुनु आत, मान्तर पयले जाऊन भाती चिन्ता, आउर धन, आउर जीवना चो सुख बिलास ने फसु आत आउर हुनमन चो फर नी पाके। मान्तर नगत भूईं थानचो हुनमन आत, जोन बचन सुनुन भाती अच्छा आउर उत्तम मन ने सम्भालु रऊ आत, आउर धीरजा ले फल आनु आत।

“कोनी दीया जराऊन भाती बरतन ले नी ढ़ाकोत, आउर ना खटिया चो खाले संगाऊ आत, मान्तर दिवट थाने संगाऊ आय कि भीतरे ऐतो बितामन उजर पाओत। काई लुकलोर निआय जोन उजागर नी होओ, आउर ना काई गुपत आसे जोन जाना नी जाये आउर उजागर नी होओ। ऐईकाजे तिआर राहा कि तुमी कसन रीति ले सुनेसास? कसनबल्लोने जेचो लगे आसे हुनके दिया जाये दे, आउर जेचो लगे निआय हुनचो ले हुन बले धरा जाये दे, जेके हुन आपलो समजु आय।”

हुनचो आया आउर हुनचो भाई हुनचो लगे ईला, मान्तर भीड़ चो लागुन हुनचो ले भेट नी होऊक सकला। हुनके सांगला, “तुचो आया आउर तुचो भाई बाहरे उबा होऊन, तुचो ले मिलुक चाहाय सोत।” हुन ऐचो जबाप ने हुनमन ले बल्लो, “मोचो आया आउर मोचो भाई ऐईचीमन आत, जोन माहापुरू चो बचन सुनु आउर मानु आत।”

फेर गोटक दिने हुन आउर हुनचो चेलामन ड़ोंगा थाने चेगला, आउर हुन हुनमन ले बल्लो, “ईआ, झील चो हुनपाट जो।” आउर हुनमन डोंगा खोलुन दिला। मान्तर जिदलदाय डोंगा चलते रली, तेबे हुन सोऊन गेलो: आउर झील थाने लेहरा धुका ईली, आउर ड़ोंगा पानी ले भरूक मुरयाली आउर हुनमन खतरा ने रवत। तेबे हुनमन लगे ऐऊन भाती हुनके उठाला, आउर बल्ला, “स्वामी! स्वामी! आमी नाश होऊ से।” तेबे हुन उठून भाती लेहरा धुका के आउर पानी चो हुरलामन के खिजलो आउर हुनमन ठेबला आउर शान्त होली। तेबे हुन हुनमन ले बल्लो, “तुमचो बिश्वास काहां रये?” मान्तर हुनमन डरला आउर भक्यान भाती आपस ने बोलुक मुरयाला, “ऐ कोन आय जोन लेहरा धुका आउर पानी के बले हुकुम देऊ आय, आउर हुनमन हुनचो मानु आत?”

फेर हुनमन गिरासेनीमन चो देश ने अमरला, जोन हुनपाट गलील चो पुरे आसे। जिदलदाय हुन खंडी थाने उतर लो तेबे हुन नंगर चो गोटक माने हुनके भेटलो जेचो थाने दुष्टआत्मामन रली। हुन खुबे दिन ले ना फटीई पिंदते रलो आउर ना घरे रते रये मान्तर कबरमन ने रते रलो। हुन ईशु के दकुन भाती चिचयालो आउर हुनचो पुरे घसरुन भाती जोर ले बल्लो, “हे परमपरधान माहापुरू चो बेटा ईशु! मोके तुचो ले काय काम? मय तुचो ले गुहार करें से, मोके दुक नी देस।” कसनबल्लोने हुन-हुन अशुद्ध आत्मा के हुन माने थानले निकरतोर हुकुम देते रलो, ऐईकाजे कि हुन हुनचो उपरे घन-घन भिड़ते रली। आउर बल्लोने लोग हुनके सिकरामन आउर बेड़ीमन ले बांदते रवत तेबले बले हुन बांदनमन के टुटाते रलो, आउर दुष्टआत्मा हुनके रान ने खेदुन फिरते रली। ईशु हुनचो ले पचारलो, “तुचो काय नाव आय?” हुन बल्लो, “सेना,” कसनबल्लोने खुबे दुष्टआत्मामन हुनचो थाने भिडुन रली। हुनमन हुनचो ले गुहारला कि आमके अन्दकुप खोदरा ने जातोर हुकुम नी देस। हुता डोंगरी उपरे बराहांमन चो गोटक बड़े गोअड़ी चरते रये, ऐईकाजे हुनमन हुनचो ले गुहारला कि आमके हुनमन भितरे भिडुक देस। हुन हुनमन के जाऊक दिलो। तेबे दुष्टआत्मामन हुन माने ले निकरून भाती बराहांमन ने गेला आउर हुन गोअड़ी डोंगरी ऊपर ले झंझाड़ी होऊन भाती झील ने जाऊन घसरला आउर बुडून मरला।
चरातो बितामन ऐ जोन होऊ रली दकुन भाती पराला, आउर नंगर ने आउर गाँव ने जाऊन भाती हुनचो खबर दिला। लोग ऐ जोन होऊ रली हुनके दकुक लाय निकरला, आउर ईशु चो लगे ऐऊन भाती जोन माने ले दुष्टआत्मामन निकरू रली, हुनके ईशु चो पाँयमन चो लगे फटीई पिन्दलोर आउर चेत ने बसलोर दकुन भाती डरला; आउर दकतो बितामन हुनमन के सांगला कि हुन दुष्टआत्मा चो कन्दरालो माने कसन परकार चेंगा होलो। तेबे गिरासेनीमन चो लगे-लगे चो सपाय लोगमन ईशु के गुहारला कि आमचो ऐथा ले जा; कसनबल्लोने हुनमन उपरे बड़े भय छाऊन रली। आउर हुन ड़ोंगा थाने चेगुन भाती बाहडून गेलो। जोन माने थानले दुष्टआत्मामन निकरली हुन हुनचो ले गुहार करूक मुरयालो कि मोके आपलो संगे रऊक देस, मान्तर ईशु हुनके बिदा करून बल्लो, “आपलो घरे बाहडून जा आउर लोगमन के सांग कि माहापुरू तुचो काजे कसन बड़े-बड़े काम करलो से।” हुन जाऊन भाती सपाय नंगर ने परचार करूक मुरयालो कि ईशु मोचो काजे कसन बड़े-बड़े काम करलो।

जिदलदाय ईशु बाहडून ईलो तेबे लोग हुनके हरिक संगे मिलला, कसनबल्लोने हुनमन सपाय हुनचो बाट दकते रवत। ईतलो ने याईर नाव चो गोटक माने जोन आराधना घर चो सरदार रलो, ईलो आउर ईशु चो पाँयमन थाने घसरुन भाती हुनचो ले गुहारुक मुरयालो कि मोचो घरे जो, कसनबल्लोने हुनचो बारा बरक चो गोटक ऐकला बेटी रली, आउर हुन मरतो थाने रली। जिदलदाय हुन जाते रलो, तेबे लोग हुनचो उपरे घसरुन पड़ते रवत। गोटक बायले लेकी जोन के बारा बरक ले लऊ जातोर बेमार रली, आउर जोन आपलो पुईतराय जीवना बईदमन चो पाटकुती खरचा करू रली, तेबले बले कोचीई हाथ ले चेंगा होऊक नी सकु रली, पाटकुती ले ऐऊन भाती हुनचो फटीई चो आंचर के छिंवली, आउर तुरते हुनचो लऊ जातोर बंद होली। ऐ थाने ईशु बल्लो, “मोके कोन छिंवलो?” जिदलदाय सपाय मुकरूक मुरयाला, तेबे पतरस आउर हुनचो संगवारीमन बल्ला, “हे मालिक, तुके तो भीड़ चेपा ये से आउर तुचो उपरे घसरुन पड़े सोत।” मान्तर ईशु बल्लो, “कोनी मोके छिंवलो से, कसनबल्लोने मय जानले से कि मोचो थानले सामरत निकरली से।” जिदलदाय बायले लेकी दकली कि मय लुकुक नी सकें, तेबे थरथरते ईली आउर हुनचो पाँयमन थाने घसरुन भाती सपाय लोगमन चो पुरे सांगली कि हुन काय कारन हुनके छिंवली, आउर कसन तुरते चेंगा होली। हुन हुनचो ले बल्लो, “बेटी, तुचो बिश्वास तुके चेंगा करली से, हरिक ने जा।” हुन ऐ बोलते रलो कि कोनी आराधना घर चो सरदार थानले ऐऊन भाती बल्लो, “तुचो बेटी मरली: गुरू के दुक नी देस।” ईशु ऐ सुनुन भाती हुनके जबाप दिलो, “नी डर; मात्र बिश्वास संगाव, तेबे हुन बाचे दे।” घर ने ऐऊन भाती हुन पतरस, यूहन्ना, याकूब आउर लेकी चो आया-बुआ के छांडुन दुसर कोनी के आपलो संगे भीतरे ऐऊक नी दिलो। सपाय हुनचो काजे गागते बिलकते रवत, मान्तर हुन बल्लो, “नी गागा; हुन नाजुन मरे मान्तर सोये से।” हुनमन ऐ जानुन भाती कि हुन मरली से हुनचो मजाक उड़ाला। मान्तर हुन हुनचो हाथ धरलो, आउर हाग देऊन भाती बल्लो, “हे लेकी, उठ!” तेबे हुनचो जीव आपस ईली आउर हुन तुरते उठून बसली। फेर हुन हुकुम दिलो कि हुनके काई खातो काजे दिआस। हुनचो आया-बुआ भक्याला, मान्तर हुन हुनमन के जनालो कि ऐ जोन होली से कोनी के नी बल्ला।

Listen to लूका 8