N'KANGULU WUMOONË

Mu ntaangu be yiinë, baatu bëkukumë biveefi-biveefi, bisë ke lyatësënaangë cibilë babë bëmpaapë. Yeesu wusë kaambë ntetë bilaanzi byaandi : « Keelaanu mu m'bweeli Sifalisyaanu : “bumpilë-mpiipi bwaawu. Liswaamë likeeli ko lin'kaambu kumonikë, kaambofo mësweeci mëkeeli ko mën'kaambu kuzabëkënë. Bwaawu, lyosuku lin'tubu yi bwiilu, lin'kuwukunu fë bwiisi-bucya, i lyosuku lim'bokëtu ku kati ku n'zo, bë lilosulu fë yilu myaanzë.” »


« Miinu yilukaambë, beeno sindiku syaami : lubacyaanu boomë ko ke banë bën'voondë n'nyitu i kumanoofo bën'kaambu kube vaangë cyosuku cin'viipë. Miinu yakululeesi wunë lufwenikini kutiinë boomë. Tiinaanu Nzaambi, wunë, fë mbusë lufwa wuke yi lutumu lu kululakë ku buluunji bu mbaasu. Cibeeni, miinu yilukaambë, naandi na lufwenikini kutiinë boomë! »
« Bisë n'sumbisyaangë mëvyoodo më taanu mu mëkutu mwaali mu mboongo kwe? Cibilë, Nzaambi kusë n'zimbëkënë ko wumweekë. N'lembuko mileenjiinu yooso yi ntaangu. Keelaanu lulë ba yi boomë : beeno luvyokili bukaalu yi mpaapë mëvyoodo! »


« Miinu yilukaambë : wosuku wun'vitikë fë ciyalëlë ti naandi cilaanzi cyaami kukeeli, Mwaanë muutu yivaandi mba wukun'vitikë fë meeso më siyaanzi si Nzaambi ti naandi waandi kukeeli. Kasi wunë wukun'tunë fë meeso më baatu, Mwaanë Muutu wukun'tunë yivaandi fë meeso më siyaanzi si Nzaambi. Wosuku wun'tubë libuungu libi mu nyitu si Mwaanë muutu, naandyoowo bëkun'lenvukilë, kasi wunë wun'safulë Ciluunzi ci Saantu, naandyoowo kusë n'tambulë lobukulu ko. »
« Mooti bëbëlunatë mu kulufundisi mu bizutununu, kaambofo fë ntwaalë mikwa-lwaangu, lwe bacyaanu lusweenu ko mu bo lufwenikini kuyikakulilë kaambofo mu manë lufwenikini kutubë. Cibilë, Ciluunzi ci Saantu mba wululoongë mu ntaangu be yiinë manë lufwenikini kutubë. »

Wun'viipë mu nkoongë, wusë kaambë Yeesu : « A N'loonji, kaambë mwanaami nguli wukabulë yimunë miinu lifwa linë tatiitu wutubikilë. » Yeesu wusë n'vutulilë : « A wayaami, nani wakum'byaasi mu kufundisi maambu miinu kaambofo mu kukabulë lifwa liinwe? » Tee naandi wusë kaambë bakë booso : « Kebaanu lulë ba luzolo mu businë. Cibilë luziingu lu muutu lusë n'kalilë ko mu businë bwaandi, bosuku kubeeli mpaapë businë. »
Naandi wusë bëteelë sasafë ayi : « Cisinë cin'viipë cyabë yi mitoto yiluvaanaangë bikunu biboti. Naandi wulëbiilaangë i wulëkuyiyufulaangë: “Buni miinu yifwenikini kusiilë? Miinu yikeeli ko faamë mu kukucikë bikunu byaami byooso.” Tee naandi wusë be tubooso: “Tala linë yake n'vaangë : Miinu yake n'tyamunë tusuungu twaami, yin'tuungë to tuvyokilili kwangilë. Miinu yin'kucikë singeenzë syaami syooso yimunë businë bwaami bumesë. Kumanë ofo, miinu yakuyitubilë mu miveekë : A ndikwaami, njeeyi ke yi businë bumpaapë, mu mivu yimpaapë. Vuundë kwaaku, nwa, lya i wusangililë mu luziingu.” Kasi Nzaambi wusë n'kaambë : “Njeeyi ciyimbu! Mu bwiilu be buubu, njeeyi wun'siitë kuziingë. Bwaawu, byakë byooso wakucikë bim'ba bi nanye?” » Yeesu wusë be bweelë : « Boobo bwa bum'beelë mu wunë wun'kucikë businë mu naveekë, kasi nani wukaambusu cisinë fë meeso më Nzaambi. »


Tee Yeesu wusë kaambë bilaanzi byaandi : « Mu lyaawu, miinu yilukaambilë : Lubaanu lusweenu ko mu cibilë ci ndiiwu yinë beeno luke yi tesu mu kuzingilë, kaambofo mu cibilë cin'vwaatu wunë beeno luke yi tesu mu nyitwiinu. Cibilë luziingu lwiinji bunenë yi ndiiwiinu i nyitu mwiinji yi n'vwaatu. Monaanu sinkafaangë : baawu bisë n'kunaangë ko i bisë n'velaangë, baawu bëkeeli ko yi ciswekulu ci ndiiwu kaambofo lusuungu, Kasi Nzaambi wulë mu kubëlikilë! Beeno biinji yi sinuni! Nani mu beeno, mu lusweenu lwaandi wum'podi kubweelë mwa bilumbu mu luziingu lwaandi? Ningë ti beeno lusë podi ko mu mo mëcyeeci, cibilë-mbici beeno lum'beelë lusweenu mu biimë bin'ka? Talaanu bunë bun'kulilaangë biteekë mu solë: byaawu bisë n'salaangë ko, i bisë n'tuungaangë binkuutu ko. Kasi miinu yilë mu kulukaambë, n'lembuko Salomoonë yimunë businë booso bwabë yaandi, wusye bakë kuve n'vwaatu wuvyokili kunyeefë mu cimweekë mu biteekë abi. Nzaambi wuvwiikë bitiiti bi n'situ bike mu solë binë bim'monikë bubwayi i binë mbasi bim'bumu ku mbaasu : buni naandi wukaambu kuluvwiikë benuveekë! Bo lufyaatu lwiinu luke lucyeeci mu naandi! Nunyotëkënyaanu ko mu ke toombaangë ntaangu syakë syooso, binë beeno lufwenikini kulya i kunwa. Mati sipayi si buloongo be buubu babë ke toombaangë sintaangu syakë syooso biimë byooso obyo. Kasi beeno luke yi Taatë wuzabisi ti beeno luke yi tesu mu byaawu. Tekë toombaanu ntetë Lwaangu lu Nzaambi i Nzaambi wuluvaanë yivaandi bimesi. »


Kebë kuba yi boomë, mwa n'kaangë mëmemë! Cibilë Tatiinu wamonë ti liboti mu kuluvaanë Lwaangu. Sumbisyaanu byo bike yiinu i vaanaanu simboongo ke biyeembi. Lwe boonji sisaaku simboongo sin'kaambu kutobukë i kucikaanu businë bwiinu ku yilu kunë bwaawu bun'kaambu kunyambëkënë: biifi kupodi ve kubibakë, keti selëlë kupodi ve kubitokumunë. Cibilë, fanë fëke businë bwaaku, faawu yivaandi fëke n'timaaku.

« Lwe belëminaanu mu kusalë, yimunë likaanji bëfyeetë mu lucyeto i miindiinu yitatëmë. Lwe baanu bo buke biseelu bëlë mu kuciingë fumwaawu fë luvutukulu lu n'saangu mëkweelë, bwiinji mu kun'zibulilë fanë naandi kun'tukilë i kun'dodumunë. Nyeenzi mu biseelu, binë fumu fë nyisulwaandi wukuzakënë bëlë mu kuzungululë. Licyelikë, miinu yilukaambë naandi wum'boongë n'vwaatu wu cisalu, wubëvangisi kukalë fë meesë i wun'kwisë mu kubësalilë. Ningë ti naandi bëvutukënë fë kati kubwiisi kaambofo fë mëcyecyelu më bwiisi i kubëzakënë bëtyemunë, nyeenzi mu baawu! »
« Yuwaano buboti lyaliili: Ningë fumu n'zo wun'zaabaangë zoolë yinë mwiifi wufwenikini kwisilë, nkanë naandi wusë kum'biikë ko mu kukotë mu n'zo. Lwe belëminaanu, beeno yiviinu, cibilë Mwaanë muutu wun'kwisë mu zoolë yinë beeno lun'kaambusu kuzaabë. »


Pyeelë wusë kufulë : « A Fumu, mu beeso vwiili mwa wateelë sasafë be yiiyi voo mu bakë booso? »
Fumu wusë vutulë : « Nani ciseelu cisulëmë i ci mëlyeelë? Talo wumweekë wunë fumu kun'vaanë n'funë mu kuzungululë mu n'zo i kuvaanë ke bisasi bin'ka cikuuku cyaawu ci ndiiwu mu ntaangu yifwenikini. Nyeenzi ke ciseelu ocyo cinë fumu, mu luvutukulu ku n'zwaandi, wukun'takini fë cisalu cyo kum'bikilë! Miinu yilukaambë, licyelikë: Fumu wukun'vaanë n'funë wu businë bwaandi booso. Kasi, ningë ciseelu be yitubilë naveekë : fumwaami wusë lengë kwiisë ko, mooti naandi wun'siimbë li kubulë bisasi bi bëbakëlë i bicyeetu, i bunë kun'lya, kunwa i kukolu mëlafu, bwaawu fumu wun'vutukënë cilumbu cinë ciseelu wun'kaambu kuzaabë, i mu zoolë yinë naandi wun'kaambusu kuzaabë. Naandi wun'kulë ciseelu i wukun'kabilë liseembu li biseelu bikaambu kuta maanë. Ciseelu cizabisi n'vwiilu fumwaandi, kasi wun'kaambu kubëliminë mu kulivaangë, wun'tambulë mpaapë sikoti. Tiilyoko, ciseelu cyo cibëziimbu n'vwiilu fumwaandi i wun'vangilë katiboobo, naandi wufwenikini kubulu, i wun'tambulë mwa sikoti. Mu wunë bën'vaanë mpaapë, bëkun'loombë mpaapë. Ke wunë bën'vaanë mpaapë, bëkun'loombë mpaapë. »


« Miinu yiyisë mu kutwaalë mbaasu fë moongo butoto, i buni miinu yin'tombilë ti yaawu yiba yitatëmë! Miinu yifwenikini kutambulë lubatizyaalu, i mpilë mbi lusweenu mu miinu tee yi fanë lyaawu lin'vangininë! Beeno lum'balë ti miinu yakwisilë mu kutwaalë n'sikë fë moongu butoto? Moniko, Miinu beeno yikaambë, kasi n'tyatyamu. Buyifanwabu, cifuumbë ci baatu bëtaanu cin'kabukë, bë tatu bën'leendë bë bwaali i bë bwaali bën'leendë bëtatu. Taatë wun'leendë mwaanë i mwaanë n'leendë taatë, nguli wun'leendë mwaanë wu n'cyeetu i mwaanë wu n'cyeetu wun'leendë nguli, n'kwekisi wun'leendë n'kasi mwaanë wu bakëlë i n'kasi wu mwaanë wu bakëlë wun'leendë n'kwekisi. »


Yeesu wukaambooso nkoongë baatu: « Buni beeno lum'monë liduungë lin'selukë kumësindulu më bwiisi, beeno lun'lengë tubë : “N'vulë mulookë yinokë” i lyaawu lin'vangënaangë. I bunë beeno lum'biilë mpeemu yi waandë yapukë, beeno lun'tubaangë: “Libabëlë lim'ba,” i lyaawu lin'vangënaangë. Bimpilë-mpiipi! Beeno luke yi mëkanë më kubakulilë biliimbu bi n'toto i bi yilu. Buni beeno, lun'kaambu kubakulilë suundu yi ntaangu be yiiyi? »


« Mbici lun'kambulu kufundisi benuveekë linë lisulëmë lufwenikini kusalilë? Ningë ti wukë lufundusu yimunë muutu mweekë i lulë mu kweendë fë cimweekë ku cinzonzi, njeeyi vaangë buumë, mu kuwusënë yaandi ntaangu yo luke mu nzilë sikwendë. Boobo, wun'kwakënë yimunë mbeenyaaku mu kumaangë naandi kukunatë fë ntwaalë cinzonzi, nzoonzi wun'leembu kukuvakulë ke mësodaadi, i mësodaadi mën'leembu kukulakë mu buloko. Njeeyi wusë basikë kwaawu ko, miinu nje yin'kaambë kukaambu kufutë n'kanwaaku tee likutë li siitu. »

Listen to Liikë 12