Iranian Azeri Bible

بئر ده عئسا اونلارا بئر مثل چکدی کی، گؤرسدسئن نجه هر زامان هچ یورولمادان دوعا اتملی‌دئرلر. و ددی:
«بئر شهرده بئر حاکئم وار ائدی کی، نه تاریدان قورخاردی، نه ده آداملاردان اوتاناردی. اله همئن شهرده بئر دول آرواد دا وار ائدی کی، دائم اونون یانینا گلئب دئیردی: ”داعواچی اولدوغوم آدامدان منئم حاقّیمی آل.“
حاکئم بئر مودّت بو ائشی ائستمه‌دی. آمّا نهایت اؤز-اؤزونه ددی: ”گرچی من نه تاریدان قورخورام نه ده آداملاردان اوتانیرام، بو آرواد منه چوخ زحمت ورئر. اونون حاقّینی آلیم کی، بئر داها گلئب باشیمی آغریتماسین.“»
و رب ددی: «عدالتسئز حاکئمئن نه ددئیئنی اشئدئن. مگر تاری اؤز سچدئکلرئنئن، گجه گوندوز اونو ائمدادا چاغیرانلارین دادینا چاتماز؟ مگر اونلار اوچون چوخ یوبادار؟ سئزه دیئرم کی، اونلارین دادینا تزلئکله چاتاجاق. لاکئن ائنسان اوغلو، گلدئیی زامان، آیا یر اوزونده ائمان تاپاجاقدیر؟»

عئسا اؤزلرئنئن صالح آداملار اولدوغونا بل باغلایان و آیری آداملارا حقارتله باخان بعضئلری اوچون ده بله بئر مثل چکدی:
«ائکی نفر دوعا اتمک اوچون معبده گئردئلر؛ بئرئسی فرئسی و او بئرئسی باج ییغان ائدی. فرئسی آیاق اوسته دوروب اؤز-اؤزونه بله دوعا ادئردی: ”ای تاری! سنه شوکور ادئرم کی، اؤزگه آداملار کئمی تالان ادن، حاقسیز، زئناکار، یا دا بو باج ییغان آدام کئمی دیئلم. هفته‌ده ائکی دفه اوروج توتورام و قازاندیغیمین اوندا-بئرئنی ورئرم.“
آمّا باج ییغان آدام اوزاقدا دوروب گؤزلرئنی گؤیه قالدیرماغا بله جسارت اتمئردی. لاکئن سئنه‌سئنه دؤیوب دیئردی: ”ای تاری! من گوناهکارا رحم ات.“
سئزه دیئرم کی، فرئسی یوخ، باج ییغان آدام تارینین گؤزونده تمئزه چیخیب اِوئنه گتدی. چونکی اؤزونو اوجالدان هر کس آلچالاجاق، لاکئن اؤزونو آلچالدان آدام اوجالیلاجاقدیر.»


کئچئک اوشاقلاری عئسانین یانینا گتئردئلر کی، او، اونلارا ال قویسون. آمّا شاگئردلر بونو گؤرن واخت اونلارا آجیقلاندیلار. آمّا عئسا اونلاری یانینا چاغیریب ددی: «قویون اوشاقلار منئم یانیما گلسئنلر! اونلارا مانع اولمایین. چونکی تارینین پادشاهلیغی بله‌لرئنکئدئر. دوغروسونو سئزه دیئرم؛ کئم تارینین پادشاهلیغینی کؤرپه بئر اوشاق کئمی قبول اتمسه، اورایا اصلا گئره بئلمز.»


ریئسلردن بئری عئسادان سوروشوب ددی: «یاخشی اوستاد! نه ادئم کی، ابدی حیاتی مئراث آلیم؟»
عئسا اونا ددی: «نه اوچون منی یاخشی چاغیریرسان؟ واحئد تاریدان باشقا هچ کس یاخشی دیئل. احکامی بئلئرسن؛ زئنا اتمه، قتل اتمه، اوغورلوق اتمه، یالاندان شهادت ورمه، آتا و آنانا حؤرمت ات.»
آدام ددی: «بونلارین هامیسینا اوشاقلیغیمدان عمل ادئرم.»
عئسا، بونو اشئدن واخت اونا ددی: «داها بئر زادین اسکئکدئر؛ نه‌یئن وارسا، سات، مؤحتاج آداملارا ور و گؤیده خزئنَن اولاجاق. سونرا منئم دالیمجا گل.»
آدام بو سؤزلری اشئدن واخت قمگئن اولدو چونکی چوخ وارلی ائدی. عئسا اونون قمگئن اولدوغونو گؤرَ‌نده ددی: «وارلی اولانلار تارینین پادشاهلیغینا نه چتئنلئکله گئرئرلر! چونکی دوه‌نئن ائینه دِشئیئندن کچمه‌سی، وارلی آدامین تارینین پادشاهلیغینا گئرمه‌سئندن داها آساندیر.»
بو سؤزلری اشئدنلر ددئلر: «بس کئم نئجات تاپا بئلر؟»
عئسا ددی: «ائنسانلار اوچون قیری‌‌مومکون اولان ائشلر، تاری اوچون مومکوندور.»
او زامان پطروس ددی: «باخ، بئز هر شیی آتیب سنئن دالینجا گلمئشئک.»
عئسا اونلارا ددی: «دوغروسونو سئزه دیئرم؛ اله بئر آدام یوخدور کی، تارینین پادشاهلیغی اوچون اِوئنی یا دا آروادینی، قارداشلارینی یا دا آتا-آناسینی و یا اوشاقلارینی آتمیش اولسون، و بو زاماندا داها آرتیق و گله‌جک عصرده ده ابدی حیاتی آلماسین.»


عئسا اون‌ائکی شاگئردئنی یانینا چاغیریب اونلارا ددی: «باخین، بئز اورشلئمه چیخیریق و ائنسان اوغلو اوچون پیغمبرلر واسئطه‌سئله نه‌لر یازیلیب، هامیسی یرئنه یتئرئله‌جک. او، قیری‌یهودئلرئن الئنه تسلئم ادئله‌جک. اونلار اونو ائستهزا اده‌جکلر و اونو تحقئر ادئب اوزونه توپوره‌جکلر. اونا شالّاق ووروب اؤلدوره‌جکلر. لاکئن اوچونجو گون او، دئرئله‌جک.»
شاگئردلر بو سؤزلردن هچ بئر شی باشا دوشمه‌دئلر؛ بو سؤزلر اونلار اوچون اؤرتولو ائدی و دِیئلَنلری آنلامادیلار.


عئسا ارئحایا یاخینلاشدیغی زامان، بئر کور یول قیراغیندا اوتوروب یولچولوق ادئردی. یانیندان چوخلو آدامین کچدئیئنی اشئدنده سوروشدو: «بو نه‌دئر؟»
اونا ددئلر کی، ناصئره‌لی عئسا بورادان کچئر. او واخت کور آدام قیشقیردی: «داوود اوغلو عئسا، منه یازیغین گلسئن.»
قاباقدا گدنلر اونا آجیقلانیب ساکئت اتمه‌یه چالیشدیلار، لاکئن او، داها برک قیشقیردی: «داوود اوغلو عئسا، منه یازیغین گلسئن.»
عئسا دایانیب امر اتدی کی، اونو یانینا گتئرسئنلر. کور آدام یاخینلاشاندا عئسا اوندان سوروشدو: «نه ائسته‌یئرسن کی، سنه ادئم؟»
کور آدام ددی: «یارب، گؤزلرئم گئنه گؤرسون.»
عئسا اونا ددی: «گؤزلرئن گؤرسون. ائمانین سنی صاغالتدی.»
او آندا آدامین گؤزلری آچیلدی و او، تارییا شوکور اده-اده عئسانین دالینجا گتدی. و بونو گؤرن بوتون خالق تارییا حمد و ثنا اتدی.

Listen to لوقا 18