ማቶሳ 8

ዬሱሲ ኦሉ ኦይቄዳ ቢታኒያ ፓዳ

(ማር 1፡40-45፤ ሉቅ 5፡12-16)

1ዬሱሲ ዴሪያፔ ዎዳ ዎዴ፥ ጮራ ኣሳይ ኣ ካሌዳ። 2ሄ ዎዴ ኦሉ #8፡2 ኦሉ ኦይቄዳ ኣሳ ቦላይ ቦፄ። ሃዌ ሳኪያ ኣሳይ ሄዎዴ ዴዑዋን ኣሳና ዴዒያ ዎጋ ኡባፔ ሻኬቲዴ ዴዔ። ቃይካ ጌሻ ጊዴና ጌቴቲዴ ሃራ ኣሳን ፄሴቴ። ኦይቄዳ ኢቲ ቢታኒ ዬሱሳኮ ዪ ኣ ሲንን ጉልባቲዴ፥ «ጎዳው፥ ኔ ሼኔ ጊዶፔ፥ ታና ፓዴ ጌሻናው ዳንዳያ» ያጌዳ።

3ዬሱሲ ባሬ ኩሺያ ዬዲ ኣ ቦቺዴ፥ «ታኒ ኮያይ፤ ፓፃዴ ጌያ!» ያጌዳ። ኤሌካ ኦሉ ቢታኒያ ዬዲ ኣጌዳ። 4ዬሱሲ ኣ፥ «ሲሚ ሃዋ ኦሲኔ ኦዶፓ፤ ሺን ቄሳኮ ባዴ ኔ ፓፃዴ ጌዬዳዋ ኣ ቤሳ፤ ኔ ፓፃዴ ጌዬዳዋ ኣሳ ኤሪሳናው ሙሴ ኣዛዜዳ ያርሹዋ ፆሳው ያርሻ» ያጌዳ። #ዎግ 14፡1-32

ዬሱሲ ፄቱዋ ካፑዋ ቆማ ፓዳ

(ሉቅ 7፡1-10)

5-6ዬሱሲ ቂፊሪናሆማ ካታማ ጌሌዳ ዎዴ፥ ኢቲ ሮማ ጋዴ ፄቱዋ ካፑ ኣኮ ዪዴ፥ «ታ ጎዳው፥ ታ ቆማ ቦላይ ጉንዲና፥ ዳሮ ሳኬቲዴ፥ ሶዪን ጊሴዳ፤ ሃያጎዶ ታው ፓሪኪ» ያጊ ዎሴዳ።

7ዬሱሲ፥ «ታኒ ባዴ ኣ ፓና» ያጌዳ።

8ሺን ፄቱዋ ካፑ ዛሪዴ፥ «ታ ጎዳው፥ ኔና ታ ሶይ ጌሊሳናው ታው ቤሴና፤ ሺን ኔኒ ቃላ ፃላላ ሃሳያ፤ ታ ቆማይ ፓፃናዋ። 9ኣዪሲ ጎፔ፥ ታኒ ታፔ ቦላና ዴዒያዋንቶ ኤኖ ጊያ ኣሳ፤ ቃሲ ታፔ ጋርሳና ዎታዳራቱ ዴዒኖ። ታኒ ኢቱዋ፥ ‹ባ!› ጎፔ ቤ፤ ቃሲ ዮኩዋ፥ ‹ሃያ!› ጎፔ ዬ፤ ታ ቆማ፥ ‹ሃዋ ኦ!› ጎፔ ኦ» ያጌዳ።

10ዬሱሲ ሄዋ ሲሴዳ ዎዴ ማላሌቲዴ፥ ባሬና ካሊያ ኣሳ፥ «ታኒ ሂንቴው ቱሙዋ ኦዳይ፤ ታኒ ሃዋ ማላ ኣማኑዋ ሃራይ ኣቶ፥ ኢስራዔሊያ ጋዲያንካ ቤዓቤይኬ። 11ጮራ ኣሳይ ኣዋይፊ ዶሊያ ባጋፔኔ ዉሊያ ባጋፔ ዪዴ፥ ኣብራሃሞና፥ ዪሳቃናኔ ያዪቆባና ሳሉዋ ካዉቴ ጋዪታን ኢቲፔ ኡታናዋንታ ያጋይ። 12ሺን ካዉቴን ዴዓናው ቤሲያ ኣሳይ ዎልቃማ ማ ጋርሳ ካሬ ኦሌታና፤ ሄዋን ኡንቱንቱ ዬካናኔ ባሬንቱ ኣቻ ቃናዋንታ» ያጌዳ።

13ሄዋፔ ካላ ዬሱሲ ፄቱዋ ካፑዋ፥ «ኔ ሶይ ባ፤ ኔኒ ኣማኔዳዋዳን ኔው ሃኖ» ያጌዳ፤ ፄቱዋ ካፑዋ ቆማይ ሄ ሳቲያንካ ፓፂ ኣጌዳ።

ዬሱሲ ጮራ ኣሳቱዋ ኡንቱንቱ ሃርጊያፔ ፓዳ

(ማር 1፡29-34፤ ሉቅ 4፡38-41)

14ዬሱሲ ጴፂሮሳ ሶይ ቢዴ፥ ኣ ቦሎታታ ቆፁዋ ሃርጋዴ ጊሴዳዉኖ ቤዔዳ። 15ኢዚ ኩሺያ ዬሱሲ ቦቺና፥ ቆፁ ኢዞ ባሺ ኣጌዳ፤ ኢዛካ ዴንዳዴ ኣው ሚያባ ጊጊሳዱ።

16-17ሳዓይ ኦማርሴዳ ዎዴ፥ ኣሳይ ኢታ ኣያናቱ ኦይቄዳ ጮራ ኣሳ ዬሱሳኮ ኣሄዳ፤ ናቢያ ኢሲያሲ፥ «ኢ ኑ ዳቡራ ባሬው ኣኬዳ፤ ቃሲ ኑ ሃርጊያካ ቶኬዳ» ያጌዳዌ ፖሌታና ማላ፥ ዬሱሲ ኢታ ኣያናቱዋ ባሬ ቃላን ኬሲዴ፥ ሃርጌዳ ኣሳ ኡባካ ፓዳ። #ኢሳ 53፡4

ዬሱሳ ካሊያዋንታ ጋኪያ ሜቱዋ

(ሉቅ 9፡57-62)

18ዬሱሲ ጮራ ኣሳይ ባሬ ዩሹዋን ዴዒያዋንታ ቤዒዴ፥ ኣባፔ ሄፊን ፒናና ማላ፥ ባሬና ካሊያዋንታ ኣዛዜዳ። 19ሄዋፔ ጉዪያን ሙሴ ሂጊያ ታማሪሲያ ኢቱ ኣኮ ዪዴ፥ «ታማሪሲያዎ፥ ኔኒ ቢያሳ ኡባ ታኒ ኔና ካላና» ያጌዳ።

20ዬሱሲ ኣ፥ «ዎራካናቱዋሲ ኦላይ ዴዔ፤ ካፋቱዋሲካ ኬይ ዴዔ፤ ሺን ታው፥ ኣሳ ናዓው፥ ሼምፓ ኣኪያሳይካ ባዋ» ያጌዳ።

21ቃሲ ካሊያዋንቱፔ ኢቱ ዬሱሳ፥ «ጎዳው፥ ታኒ ሲንታ ባዴ ታ ኣባ ሞጋናው ባ ያጋሪኪ» ያጌዳ።

22ሺን ዬሱሲ ኣ፥ «ኔኒ ታና ካላ፤ ሃይቄዳዋንቱ ባሬንቱ ኣኃ ሞጊኖ» ያጌዳ።

ዬሱሲ ጎቱዋኔ ቤታ ጮዑ ኦዳ

(ማር 4፡35-41፤ ሉቅ 8፡22-25)

23ዬሱሲ ዎንጊሪያን ጌሎዴ፥ ኣ ካሊያዋንቱ ኣናና ቤዲኖ። 24ቤታይ ዎንጊሪያ ሚታና ጋካናው፥ ኣባን ዎልቃማ ሆቢ ዴንዴዳ፤ ሺን ዬሱሲ ጌሚዒሼዳ። 25ኣ ካሊያዋንቱ ኣኮ ቢዴ፥ ጌሚዒሹዋፔ ዴንዲኖ፤ ሄዋፔ ሲሚዴ ኣ፥ «ጎዳው፥ ኑኒ ዬቶ፤ ኑና ኣሻሪኪ» ያጌዲኖ።

26ዬሱሲ ኡንቱንታ፥ «ሃ ኣማኑ ፓጬዳዋንቶ፥ ኣዪሲ ያዪቴ?» ያጌዳ። ሄዋፔ ጉዪያን ዴንዲዴ፥ ጎቱዋኔ ቤታ ኣጊቴ ጊና፥ ጎቱኔ ቤታይ ጮዑ ጌዳ።

27ኣሳይ ማላሌቲዴ፥ «ሃዌ ላ ሃራይ ኣቶ፥ ጎቱኔ ቤታይ ኣዛዜቲያዌ ኣይባ ኣሴ?» ያጌዲኖ።

ዬሱሲ ኢታ ኣያናይ ኦይቄዳ ላዑ ኣሳቱዋ ፓዳ

(ማር 5፡1-20፤ ሉቅ 8፡26-39)

28ዬሱሲ ጋሊላ ኣባፔ ሄፊንን ዴዒያ ጌርጌሴኖና ጌቴቲያ ጋዲያ ፒኔዳ፤ ኢታ ኣያናቱ ኦይቄዳ ላዑ ኣሳቱ ሄ ጋዲያን ዴዒያዋንቱ ዱፉዋፔ ኬሲዴ፥ ኣናና ጋኬቴዲኖ። ኡንቱንቱ ዳሮ ኢታ ጊዲያ ዲራው፥ ኦኒኔ ሄ ኦጊያና ኣናው ዳንዳዪቤና። 29ኡንቱንቱ ባሬንቱ ቃላ ቁ ኦዴ፥ «ፆሳ ናዓው፥ ኑናና ኔው ኣዪ ኣላሊ ዴዒ? ዎዲ ጋኬናን ኑና ሙራናው ያዲ?» ያጌዲኖ።

30ኡንቱንቱፔ ላፋ ሃኪያሳን ጉዱን ዉዲ ሄሜቴ። 31ኢታ ኣያናቱ ዬሱሳ፥ «ኔኒ ኑና ኬሲያዋ ጊዶፔ፥ ሂኒ ጉዱን ዉዲያ ጊዶ ዬዳርኪ» ያጊዴ ዎሴዲኖ።

32ዬሱሲ ኡንቱንታ፥ «ቢቴ!» ጊና ኡንቱንቱ ቢታናቱዋፔ ኬሲ ቢዴ፥ ጉዱንቱዋን ጌሌዲኖ። ጉዱን ዉዲ ኡባይ ካካ ላንቂያና ካጆቲዴ፥ ኣባን ጌሊዴ፥ ሚቴቲ ኣጌዲኖ።

33ጉዱን ዉዲያ ሄሚያዋንቱ ባቃቲዴ ካታማ ቢ ኣጌዲኖ፤ ቤዳሳን ኢታ ኣያናቱ ኦይቄዳ ኣሳቱ ሃኔዳባ ኡባ ኦዴዲኖ። 34ሄዋ ሲሴዳ ካታማን ዴዒያ ኣሳይ ኡባይ ዬሱሳና ጋኬታናው ኬሴዲኖ፤ ኣ ቤዔዳ ዎዴ፥ ባሬንቱ ጋዲያፔ ባና ማላ ዎሴዲኖ።

Actualmente seleccionado:

ማቶሳ 8: dwrENT

Destacar

Copiar