ማቶሳ 15
15
ኣዋቱዋ ዎጋባ
(ማር 7፡1-13)
1ሄዋፔ ጉዪያን፥ ሂጊያ ታማሪሲያ ኢቲ ኢቲ ኣሳይኔ ፓሪሳዋቱ ዬሩሳላሜፔ ዬሱሳኮ ዪዴ፥ 2«ኔና ካሊያዋንቱ ኣዪሲ ኑ ኣዎቱዋ ዎጋ ባይዚኖ? ኣዪሲ ጎፔ፥ ኡንቱንቱ ቁማ ማናፔ ካሴቲዴ፥ ባሬንቱ ኩሺያ ሜጬቲኪኖ» ያጌዲኖ።
3ዬሱሲ ዛሪዴ፥ ኡንቱንታ ሃዋዳን ያጌዳ፤ «ሂንቴንቱ ሂንቴ ዎጋ ዲራው፥ ፆሳ ኣዛዙዋ ፖሊያዋ ኣዪሲ ኢፂቴ? 4ኣዪሲ ጎፔ ፆሳይ፥ ‹ኔ ኣባኔ ኔ ዳዮ ቦንቻ› ቃሲ፥ ባሬ ኣባ ዎይ ባሬ ዳዮ ቦሪያዌ ሃይቆ ያጌዳ። #ኬስ 20፡12፤ 21፡17፤ ዛር 5፡16፤ ዎግ 20፡9 5-6ሺን ሂንቴንቱ፥ ‹ኢቲ ኣሳይ ባሬ ኣባ ዎይ ባሬ ዳዮ ማዲያባይ ባሬው ዴዒና፥ «ሄዌ ፆሳዋ» ጎፔ፥ ባሬ ኣባ ዎይ ባሬ ዳዮ ቦንቻናው ቤሴና› ያጊታ፤ ያቲዴ ሂንቴንቱ ሂንቴንቱ ዎጋ ፖላናው ፆሳ ቃላው ኣዛዜቲኪታ። 7ሃ ሎዓ ማላቲያ ኢታ ኣሳቶ፥ ኢሲያሲ ባሌናን ሂንቴንቱባው ቲምቢቲያ ኦዲዴ፥
8‹ፆሳይ ሃዋዳን ያጌዳ፤
«ሃዌ ኣሳይ ታና
ባሬ ቦላ ዶናን ቦንቼ፤
ሺን ኡንቱንቱ ዎዛናይ
ታፔ ሃኩዋን ዴዔ።
9ኣሳይ ታው ሜላ ጎዪኔ፤
ኣዪሲ ጎፔ፥ ኣሳይ ኦዳ ኣዛዙዋ
ፆሳ ሂጊያ ማላቲሲዴ
ታማሪሴዲኖ» ጌዳ› »
ያጌዳ። #ኢሳ 29፡13
ኣሳ ቱኒሲያዋንታ
(ማር 7፡14-23)
10ዬሱሲ ዳሮ ኣሳ ባሬኮ ፄሲዴ፥ «ሲሲቴኔ ኣኬኪቴ፤ 11ኣሳ ቱኒሲያዌ ዶና ጊዶ ጌሊያዋ ጊዴና፤ ሺን ኣሳ ቱኒሲያዌ ዶናፔ ኬሲያዋ» ያጌዳ።
12ሄዋፔ ጉዪያን፥ ኣ ካሊያዋንቱ ኣኮ ዪዴ፥ «ፓሪሳዋቱ ኔኒ ሃሳዬዳዋ ሲሲዴ፥ ሃንቄቴዳዋ ኣኬካይ?» ያጌዲኖ።
13ሺን ዬሱሲ ዛሪዴ፥ «ሳሉዋን ዴዒያ ታ ኣቡ ቶኪቤና ሚ ኡባይ ሾዴታናዋ። 14ኡንቱንቶ ሂርጎፒቴ፤ ኡንቱንቱ ቆቃ ካሌያ ቆቃቱዋ፤ ቆቃይ ቆቃ ካሌፔ፥ ላዑካ ኦላን ኩንዴ» ያጌዳ።
15ጴፂሮሲ ዛሪዴ፥ «ሃ ሌሚሱዋ ቢሌ ኑሲ ኦዳሪኪ» ያጌዳ።
16ዬሱሲ ኡንቱንታ ሃዋዳን ያጌዳ፤ «ሂንቴንቶ ቃሲ ሃዒ ጋካናዉካ ጌሊቤኔ? 17ዶናና ጌሊያ ኡባይ ኡሉዋ ጊዶ ቢዴ፥ ቃሲ ኡሉዋፔ ካሬ ኬሲያዋ ኤሪኪቴ? 18ሺን ዶናፔ ኬሲያዌ ዎዛናፔ ኬሴ፤ ኣሳ ቱኒሲያዌ ሄዋ ማላ። 19ኣዪሲ ጎፔ፥ ዎዛና ጊዶፔ ኢታ ቆፋይ፥ ዎያዌ፥ ዎሹሚያዌ፥ ቃሲ ዎሹማናው ካጄሊያዌ ኡባይ፥ ዉዒያዌ፥ ዎርዱዋን ማርካቲያዌ፥ ቦሪ ኬሴ። 20ሄዋ ማላቲያዌ ኣሳ ቱኒሲያዋፔ ኣቲን፥ ሜጪቤና ኩሺያን ሚያዌ ኣሳ ቱኒሴና» ያጌዳ።
ካናኔ ኣሳ ጊዴዳ ኢቲ ማጫዉኒ ኣማኑዋ
(ማር 7፡24-30)
21ሄዋፔ ጉዪያን፥ ዬሱሲ ሄዋፔ ኣጊዴ፥ ፂሮሳኔ ሲዶና ጌቴቲያ ካታማቱ ዴዒያ ጋዲያ ቤዳ። 22ካናኔ ጌቴቲያ ጋዲያ ማጫዉና ኢቲና ሄዋፔ ዬሱሳኮ ያዴ፥ ባሬ ኮሻ ቁ ኦዴ፥ «ታ ጎዳው፥ ዳዊታ ናዓው፥ ታው ቃሬታሪኪ፤ ታ ናቶ ኢታ ኣያናይ ሎዔና ኦይ ኦይቄዳ» ያጋዱ።
23ሺን ዬሱሲ ኢዚው ኣይ ቃላኔ ቃቲቤና፤ ኣ ካሊያዋንቱ ኣኮ ዪዴ፥ «ሃ ሚሺራታ ኑ ጌዱዋ ካላ ካላዴ፥ ባሬ ኮሻ ቁ ኦዴ ኦዳው፤ ሄዋ ዲራው፥ ኔኒ ኢዞ ዬዳርኪ» ያጊዴ ዎሴዲኖ።
24ዬሱሲ ዛሪዴ፥ «ታኒ ባዬዳ ዶርሳው፥ ኢስራዔሊያ ኣሳ ፃላላው ኪቴታዲ» ያጌዳ።
25ሺን ኢዛ ያዴ፥ «ታ ጎዳው፥ ታና ማዳሪኪ!» ያጋዴ ኣው ጎዪናዱ።
26ቃሲ ኢ ዛሪዴ፥ «ናና ቁማ ኣኪዴ፥ ካና ማራው ኦሊያዌ ሎዓ ጊዴና» ያጌዳ።
27ሚሺራታ፥ «ኤ ታ ጎዳው፥ ሄዌ ቱማ፤ ሺን ሃራይ ኣቶ ካና ማራቱ ባሬንቱ ጎዳቱ ሚና፥ ሳምፓፔ ላሌቴዳ ሱፓ ሚኖቴኔ» ያጋዱ።
28ዬሱሲ ዛሪዴ ኢዞ፥ «ሃ ሚሺራቴ፥ ኔ ኣማኑ ዎልቃማ፤ ኔኒ ኮዬዳዋዳን ኔው ሃኖ» ያጌዳ። ኢዚ ናታ ኤሌካ ፓፃ ኣጋዱ።
ዬሱሲ ጮራ ሃርጋንቻቱዋ ፓዳ
29ዬሱሲ ሄዋፔ ዴንዲዴ፥ ጋሊላ ኣባ ማታ ቤዳ፤ ቃሲ ኢቲ ዴሪያ ቦላ ኬሲዴ፥ ሄዋን ኡቴዳ። 30ዳሮ ኣሳይ ዎባቱዋ፥ ቆቃቱዋ፥ ቁናቱዋኔ ዱዴቱዋ፥ ቃሲ ሃራ ጮራቱዋ ኣኮ ኣሂዴ፥ ኣ ማታን ዎዳ። ዬሱሲ ኡንቱንታ ፓዳ። 31ሄዋ ዲራው፥ ኣሳይ ዱዳቱ ሃሳዪሺን፥ ቁናቱ ሱሪሺን ዎባቱ ሃሜቲሺን፥ ቆቃቱ ፄሊሺን ቤዒ ማላሌቲዴ፥ ኢስራዔሊያ ፆሳ ጋላቴዲኖ።
ዬሱሲ ኦይዱ ሻዓ ኣሳ ሚዜዳ
(ማር 8፡1-10)
32ዬሱሲ ባሬና ካሊያዋንታ ባሬኮ ፄሲዴ፥ «ሃ ጮራ ኣሳይ ታናና ሄዙ ጋላሳይ ጋካናው ጋሚዔዳ ዲራው፥ ታኒ ሃ ኣሳው ቃሬታይ፤ ኡንቱንቶ ሃዒ ሚያዌ ባዋ። ቃሲ ኡንቱንቱ ኦጊያን ዳቡሪዴ ኩንዴና ማላ፥ ቁማ ሚዜናን ኡንቱንታ ሜላ ዬዳናዉካ ኮዪኬ» ያጌዳ።
33ኣ ካሊያዋንቱ ዛሪዴ ዬሱሳ፥ «ኑኒ ሃ ባዙዋን ሃዋ ኬና ኣሳ ካሊሲያ ቁማ ሃቃፔ ዴማኔ?» ያጌዲኖ።
34ቃሲ ዬሱሲ ኡንቱንታ፥ «ሂንቴንቶ ኣፑን ኡኪይ ዴዒ?» ያጊዴ ኦቼዳ።
ኡንቱንቱ፥ «ላፑ ኡኪይኔ ሞሌቱዋፔ ኣማሬዳዋንቱ ዴዒኖ» ያጌዲኖ።
35ዬሱሲ ኣሳ፥ «ሳዓን ኡቲቴ» ያጌዳ። 36ሄ ላፑ ኡኪኔ ሞሊያ ኦይቂዴ፥ ፆሳ ጋላቴዳ፤ ሜንሬዴ ባሬና ካሊያዋንቱሲ ኢሜዳ፤ ቃሲ ኡንቱንቱ ጮራ ኣሳሲ ኢሜዲኖ።
37ኣሳይ ኡባይ ሚዴ ካሌዳ፤ ሚና ኣቴዳ ላፑ ዛምቤሊያ ኩሜዳ ሱፓ ኣ ካሊያዋንቱ ዴንዲኖ። 38ሜዳ ኣሳይ ማጫ ኣሳኔ ናና ፓይዴናን፥ ኦይዱ ሻዓ ኣቱማ ኣሳ። 39ዬሱሲ ኣሳ ዬዶዋፔ ጉዪያን፥ ዎንጊሪያን ጌሊዴ፥ ሜጌዶኔ ጌቴቲያ ጋዲያ ቤዳ።
Actualmente seleccionado:
ማቶሳ 15: dwrENT
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2011, Wycliffe Bible Translators, Inc. All rights reserved.
Más información sobre Ooratha Caaquwaa
