Aʼmaal al-Rusul 23

Buulus giddaam al-majlas

1Wa Buulus gaaʼid yichiif naas al-majlas adiil fi uyuunhum wa gaal : «Ya l-akhwaan, kulla hayaati ana ichtaha be niiye mukhlisa giddaam Allah.» 2Wa Hanaaniiya kabiir rujaal al-diin amar al-naas al-waagfiin jamb Buulus achaan waahid minhum yuduggah fi khachmah. 3Wa Buulus gaal leyah : «Allah yuduggak inta ! Inta misil durdur al-tiine al-talasooh be buhya beeda ! Kikkeef tagtaʼ leyi chariiʼa wa taamur naadum achaan yuduggini ? Amrak da mukhaalif le l-chariiʼa ?»

4Wa l-naas al-gaaʼidiin jambah gaalo : «Haay ! Tiʼayyir al-naadum al-Allah khattaah kabiir rujaal al-diin ?» 5Wa Buulus radda leehum wa gaal : «Ya l-akhwaan, ana ma irift kadar hu kabiir rujaal al-diin. Achaan maktuub fi l-Kitaab : <Ma tuguul kalaam fasil fi kabiir chaʼabak.>»#23:5 Al-kalaam da talgooh fi Khuruuj 22:28, hasab al-tarjama al-yuunaaniiye.

6Wa wakit Buulus gaaʼid yichiif naas al-majlas, hu irif waahidiin minhum Sadduukhiyiin wa waahidiin minhum Fariiziyiin. Wa hajja be hiss aali wa gaal : «Ya l-akhwaan, ana Fariizi wileed hana Fariiziyiin ! Yidooru yichaaruʼuuni achaan ana muʼmin be l-cheyy al-narjooh be acham. Ana muʼmin be l-buʼaas.»

7Wa wakit Buulus gaal al-kalaam da, naas al-majlas bado yilkhaalato ambeenaathum. Al-Fariiziyiin wa l-Sadduukhiyiin ankhalafo. 8Al-Sadduukhiyiin ma muʼminiin be l-buʼaas wa la be l-malaaʼika wa la be l-junuun wa laakin al-Fariiziyiin muʼminiin beehum kulluhum. 9Wa l-khilaaf bigi chadiid. Wa ulama waahidiin min al-Fariiziyiin gammo aarado be chidde wa gaalo : «Aniina ma najʼalo al-naadum da khaati. Akuun ruuh waahid walla malak waahid kallam leyah.»

10Wa l-kalaam da jaab barjaal lahaddi l-khaayid al-Roomaani khaaf min al-naas yigattuʼu Buulus lahamaay lahamaay. Wa fi l-akhiir, hu rassal askarah achaan yanzulu yakhtufuuh min usuthum wa yigabbulu beyah fi l-gasir.

11Wa be l-leel, al-Rabb Isa baan le Buulus wa hajja leyah wa gaal : «Chidd heelak ! Inta chahadt leyi fi Madiinat al-Khudus wa waajib tachhad leyi fi madiinat Rooma kula.»

Al-muʼaamara didd Buulus

12Wa wakit al-wata asbahat, Yahuud waahidiin alʼaamaro fi Buulus wa halafo ma yaakulu wa la yacharbo cheyy illa kan katalooh. 13Wa l-naas al-achchaawaro diddah dool adadhum ziyaada min arbaʼiin raajil. 14Wa macho hajjo le kubaaraat rujaal al-diin wa le l-chuyuukh wa gaalo : «Halafna ma naakulu wa la nacharbo illa kan katalna Buulus. 15Achaan da, rassulu le l-khaayid al-Roomaani wa guulu leyah intu wa naas al-majlas tidooru tiʼakkudu min kalaam Buulus. Wa atulbu min al-khaayid hu yiwaddiih leeku. Wa aniina kamaan, jaahiziin. Naktulu Buulus gubbaal ma yaji fi bakaan al-majlas.»

16Wa laakin wileed hana akhut Buulus simiʼ choorithum wa macha fi gasir al-askar wa oora Buulus. 17Wa Buulus naada masʼuul waahid hana l-askar wa gaal leyah : «Waddi al-sabi da le l-khaayid achaan indah kalaam yidoor yiʼooriih.» 18Wa l-masʼuul wadda al-sabi le l-khaayid wa gaal : «Buulus al-makruub naadaani wa talab minni achaan nijiib leek al-sabi da. Hu indah khabar yidoor yiʼooriih leek.»

19Wa l-khaayid karab al-sabi min iidah wa waddaah taraf wa saʼalah wa gaal : «Chunu al-khabar al-tidoor tiʼooriini beyah ?» 20Wa l-sabi radda leyah wa gaal : «Al-Yahuud alʼaamaro fi Buulus wa ambaakir yatulbu minnak tigaddimah le l-majlas achaan yiʼakkudu al-kalaam al-khattooh foogah. 21Ma tasmaʼ kalaamhum. Ziyaada min arbaʼiin raajil yidooru yakursu leyah. Humman halafo ma yaakulu wa la yacharbo cheyy illa kan katalooh. Wa hassaʼ humman jaahiziin wa yarjo lahaddi tikhassid be talabhum.» 22Wa l-khaayid gaal leyah : «Ma tuguul le ayyi naadum inta ooreetni be l-kalaam da.»

Wa khalla al-sabi gabbal beetah. 23Wa baʼad da, al-khaayid naada itneen min masaaʼiil al-askar. Wa antaahum amur wa gaal : «Limmu miiteen askar achaan yijahhuzu nufuushum le yamchu fi Geesariiya al-saaʼa tisʼa be l-leel. Wa chiilu maʼaaku 70 askar siyaad kheel wa 200 askar musallahiin be huraab. 24Wa chiilu kheel achaan Buulus kula yarkab maʼaaku wa wadduuh be l-aafe le Fiiliks al-waali.»

25Wa l-khaayid katab jawaab le l-waali wa gaal :

26Jawaab min Kuluudi Liisiyaas le l-sayyid al-waali Fiiliks al-muhtaram, al-salaam aleekum.

27Al-naadum da, al-Yahuud karabooh wa dawwaro yaktuluuh. Wa ana simiʼt hu indah jinsiiya roomaaniye wa macheet be l-askar wa najjeetah minhum. 28Dawwart naʼarif sabab chakwithum foogah wa waddeetah le majlas al-Yahuud. 29Wa wakit simiʼt kalaamhum, ana fihimt tuhmithum foogah muchkila hana gawaaniin diinhum bas wa hu ma sawwa cheyy fasil achaan waajib leyah al-moot wa la l-sijin. 30Wa naadum ooraani kadar naas waahidiin achchaawaro achaan yaktuluuh. Wa be da, waddeetah leek tawwaali. Wa anteet izin le l-naas al-tahamooh achaan yigaddumu chakwithum fi bakaanak.

31Wa l-askar tabbago awaamir al-khaayid wa be leel waddo Buulus fi hillit Antiibaatris. 32Wa be fajur, al-askar gabbalo fi bakaanhum wa khallo siyaad al-kheel wiheedhum yiwaddu Buulus lahaddi Geesariiya. 33Wa wakit wislo fi Geesariiya, al-askar sallamo Buulus wa l-jawaab le l-waali. 34Wa l-waali gara al-jawaab wa saʼal Buulus wa gaal : «Baladak ween ?» Wa wakit simiʼ kadar Buulus min Kilikiiya, 35hu gaal leyah : «Wakit al-naas al-tahamook yaju hini, nasmaʼ chakwithum foogak.» Wa amar askarah achaan yaharsu Buulus fi l-gasir al-zamaan Hiruudus banaah.

Actualmente seleccionado:

Aʼmaal al-Rusul 23: ADT19

Destacar

Copiar