मत्ती 6
6
1पेओ काम्लम् जाङ्ह्सापाय् जाङ्ह्नु जाङ्ह्तोक्हाङः लयःकोः नेह्रो ओर्ताक्साकायः अरु मान्ताकोः मीक्हाङः छ्यानःसाकायः ह ओउः काम्लम् जाङ्ह्लाम् उया परमेस्वर्कःसै दोह्मा दोःतेःइली। 2ओउःत झ्यान्ते अरु दोह्मा नाःमालो मान्तालम्कायः बयःतोक्हाङः ‘लौ इमयःकायः ङाइजा पेतोलेः बयःआलाङः’ त सबैकायः ल्हाक्ती तोलाम्। ओउःतलेः लयःकोः नेह्रो ओर्ताक्सा बोङःओलम्इ हायःनानी। ओउःमयःइ थनःओ कीम्हाङःमा ल्याम्हाङःमा ‘अरुइ ताङ्ह्ताक्पाःताङः’ त दाय्ह्ती म्हर्ती पैसा बयःनानी। दोङ्सी दाय्ह्भनाङ् ओउःमयःखे लयः झाक्ओ द्याह्लेः दोःओआः बा अरु दोःइली। 3नीङ्खेइ बयःतोक्हाङः सुकायःमा छ्यानःलाम्। ओहाङःसैको अरु मान्तालम्खेइ नीङ्इ बयःओ चीःनीली। 4अरुखे चीःनीली नीङ्कोः परमेस्वर् आपाखेइ सबै चीःनौ ओउःइ नीङ्कायः द्यानःतीलेः बयःतेःनै।
5ओहाङःसै लयःकोः नेह्रो ओर्ताक्सा बोङःओलम् थनःओ कीम्हाङःमा ल्याम्हाङःमा चीङ्ती परमेस्वर्कायः आन तोसा झाक्नै अरुइ च्यवःताक्साकायः इत जवती हायःनानी। ओउःमयःलो लेखा हायःलाम्। दोङ्सी दाय्ह्भनाङ् ओउःमयःखे लयः झाक्ओपाय् द्याह्लेः दोःओआः बा। 6नीङ्खेइ परमेस्वर्कायः तोओ बेलाहाङः लयःकोः कीम्हाङः पोक्ती धोका राक्आक्तीको अरुइ चीःताक्माःत ओउःकायः तोनु दा। ओहाङःसैको नीङ्कोः परमेस्वर् आपाइ चीःती झ्यान्ते नाङ्कायः बयःतेःनै। 7फेरी परमेस्वर्कायः तय्ह्मालो मान्तालम्लो लेखा गुक्कोः त्यावःअलेः तोतेःचानी। ‘ङीइ परमेस्वर्कायः नाःतो तोती झ्यान्ते ओउःइ सायःनाःतय्ही’ त दाय्ह्ती ओउः चीःमालोलम्इ आह्रे म्हर्नै। 8ओउःमयःलो लेखा गुक्कोः त्यावःअलेः नोःसा परल नीङ्इ तेओकोः ङ्हासै नीङ्कायः दोह् दोह् बयःसा खेःतो त परमेस्वर्इ चीःनौ। 9परमेस्वर्कायः तोतोक्हाङः इलो लेखालेः तोसा स्याव्नाः दा ‘अ ङीकोः लाङ्काहाङः मुओ परमेस्वर् आपाय नाङ्कोः मय्ङ् ताङ्ह्ओमा छय्ङ्ओमा स्याव्पाः दा। 10नाङ्कोः राजी वाङ्पानाः ओहाङःसैको लाङ्काहाङःलो लेखालेः इ ल्हाव्ह्दैबाङ्हाङः नाङ् झाक्ओ काम् ह जाङ्ह्पानाः। 11लौ ङीकायः दीन्का दीन् जेःगा दोःताक्ताङी दै। 12ओहाङःसैको ङीकायः पेमालो हायःओ मान्ताकः ङीकोः ल्हुङ् मल्ह्ओ स्याक्लेःआ ओउःत खेःओ ङीकः नाङ्कोः ल्हुङ् मल्ह्ओमा स्याक्तेःपाः दा। 13ङीकायः सैतान्सै दल्ताक्ती रेव्तो जाङ्ह्साकायः ताक्तेःचाःताङी’ त दाय्ह्ती परमेस्वर्कायः तोसाआः। 14अरुइ नीङ्कायः पेमालो जाङ्ह्तोक्हाङः नीङ् ओउःकः ल्हुङ् मल्ह्तेःल त खेःया नीङ्कः परमेस्वर् ल्हुङ् मल्ह्माःतोलेः मुनाः। 15अरुकः नीङ् ल्हुङ् मल्ह्ती मुतेःचनै त खेःया नीङ्कः परमेस्वर् ल्हुङ् मल्ह्तीलेः मुनाः।
16ओहाङःसैको ओउः लयःकोः नेह्रो ओर्ताक्सा बोङःओलम्इ उपाङ् काःतोक्हाङः लयःकोः खेन् भाम्ताक्नाःइसी ‘ङा उपाङ् काःनाङ्स’ त अरुकायः छ्यानःसाकायः इत हायःनाःइसी। ओउःमयःलो लेखा हायःलाम् दोङ्सीलेः ओउःमयःखे लयः झाक्ओ द्याह्लेः दोःओआः बा। 17नाङ्खे उपाङ् काःतोक्हाङः खेन् जेस्ती म्याङ्हाङः साती ल्यानःती वाह्अ 18ओउःत हायःआक्तीको नाङ्कायः उपाङ् काःती मुओ त अरुइ चीःनीली नाङ्कोः परमेस्वर् आपाइ ह चीःती झ्यान्ते नाङ्कायः बयःतेःनाः।
19लौ ल्हाव्ह्दैबाङ्खेहाङः माल् सामान् त्युम्ह्ती रेती गम्लाम्। इहाङःकोः माल् सामान्पाय् खय्इमा घुन्इमा जेःमानौ चोर्लम्इमा कुःमानानी। 20लाङ्काखेहाङः लयःकायः रेती गम्नीङ्सी ओहाङः खय्इमा घुन्इमा जेःमाउलु चोर्इमा पोक्ती कुःसा खाय्नीली। 21गाःहाङःलो नाङ्कोः माल् सामान् मुचाः ओहाङःलेः नाङ्इमा ल्हुङ् झाह्ती छ्युप्तेःनौ। 22ल्हुङ्कायः थोङ्ताक्ओपाय् मीक् लेःआः बा। नाङ्कोः मीक्पाय् धेस्तेःनाः त खेःया नाङ्कोः ल्हुङ् थोङ्तोलेः स्याव्नाः। 23नाङ्कोः मीक्पाय् धेस्तेःल त खेःया नाङ्कोः ल्हुङ् च्याक्तोलेः स्याव्नाः। ओहाङःसैको मीक्इ थोङ्ताक्ल त खेःया नाङ्कोः ल्हुङ्पाय् गुच्युक् च्याक्तोलेः स्याव्आनाः।
24सु खेःयामा यातै बेलाहाङः नीस्चाक् मालीक्कायः काम् पेतो जाङ्ह्सा खाय्नीली। ओउःपाय् यात्चाक् मालीक्खेकः झाक्ती अरुखेकः झाक्माःत काम् जाङ्ह्नौ बा। यात्चाक्खेकुस् ब्राङ्नाः अरुखेकुस् ब्लाय्क्नाः। ओउःलो लेखा नाङ् पैसा दोःसा झाक्तेःनाः त खेःया परमेस्वर्कः झाह्सा खाय्तेःउलु। 25‘लौ उया ङाइ स्याङ्ह्पाय् दोह् जेःगा जेःचाङः दोह् नाय्इ लावचाङःस’ त दाय्ह्ती ल्हुङ् रुःतेःचनै। जेःगासै नीङ्कोः जीङः ताङ्ह्तो लेःआः नाय्सै नीङ्कोः आङ् ताङ्ह्तोलेः मुनाः माःदै। 26लौ ओउः अलवःहाङः स्युङ्ती वाह्ओ वाःलम्कायः योनु दा। ओउःमयःइ दोह्मा सुक्मानीली दोह्मा राःती त्युम्ह्मानीली ओउःमयःकायः नीङ्कोः परमेस्वर् आपाइ जेःगा दोःताक्नौ बा। दोङ्सीलेः वाःसै नीङ्खेपाय् ताङ्ह्तोलेः खेःतेःनै माःदै 27नीङ्कःगन सुइमा ल्हुङ्हाङः म्हर्ती लयःकोः आङ्कायः यात् क्रुच्युक्कायः च्योनःताक्सा खाय्तेःनीली। 28नीङ् दोह् हायःतीतेः ‘लौ ङा दोह्इ लावचाङःस’ त म्हर्ती ल्हुङ् रुःती मुतेःनै। जङ्गल्हाङः मुओ रोलम्मा योनु दा। ओउः रोलम्पाय् लयःलेः दुङ्नाः दुङ्आक्तीको काम् जाङ्ह्मामाःत नाय् क्याह्माःत लयःलेः पेतो ओर्लेःनाः। दोङ्सीलेः ओउः रोच्युक्मा ओउः आन मुह्ओ सुलेमान् राजाकोः नाय्लम् योसा पेआक्ल बा। 29ओउः यात् दीन्च्युक्कायः ओर्ओ यात् दीन्हाङः झ्योम्ह्ओ रोखेकायः परमेस्वर्इ आन पेतोलेः लावताक्नौ त खेःया 30नीङ् मान्तालम्खेकायः परमेस्वर्इ जुगाङ् न्हाङ्तोलेः बयःतेःनै बा। दोह् हायःतीतेः पेतो ङ्हाम्तेःधाङ्तेःनीली। नीङ् ङ्हाम्चोःचाक्तेः इ। पेतोलेः ङ्हाम्नु दा। 31लौ उया ‘स्याङ्ह्पाय् दोह् जेःचाङः दोह् लावचाङःस’ त ल्हुङ् र्याङःतीलेः म्हर्लाम्। 32इ थोक्लम्कायः परमेस्वर्कायः तय्ह्मालोलम्खे ल्हुङ् र्याङःतीलेः बोङःनानी नीङ्खे ओउःत र्याङःसा परल। इ थोक्लम्पाय् नीङ्कायःमा चाहनाः त नीङ्कोः परमेस्वर् आपाइ चीःलेःनौ बा। 33ङ्हापाय् परमेस्वर्कोः काम् जाङ्ह्ती ओउःकोः राजी पोक्सा बोङःनु दा ओहाङःसै इ अरु थोक्लम्मा नीङ् सबै दोःतेःनै। 34लौ उया स्याङ्ह्कायः ल्हुङ् र्याङःती मुलाम् तेन्कोः लीह्सीःओकायः ह ल्हुङ् रुःतो स्याव्तेःपै।
Actualmente seleccionado:
मत्ती 6: CDM93
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 1993 Wycliffe Bible Translators Inc., All Rights Reserved.
