Naiˍ htangˍ 8
8
1Saˍteˍhpanˍ na saeˍ naeˍ ningˉ na, Sawˉluˆ muiˉ nuing ba ang capˆ yaˇ.
Sawˉluˆ Hkritˆ yanˍ ang muˉ na hkanˍ chuiˍ yaˍ jiˍ
Hingˉ nuing veu tangˍ yao Yeˍruˆsaˍlaemˍ vengˍ veu ca naeˉ Hkritˆ yanˍ ang muˉ uiˉ muiˉ hkanˍ yaˍ chuiˍ yaˍ naeˍ na ya hkamˉ yao, naiˍ htangˍ htiˍ baˍ uiˍ caeˉ laˉ laeˍ yao, yawng hkaˉ hko laˉ hko hpakˍ lang yao Yuˉdaˆ ang meungˉ nae Saˍmaˍriˆ ang meungˉ uiˉ beu hpangˉ nga aengˉ jiˉ. 2Hpaˍcaoˍ na saˍ nyamˉ naeˉ uiˉ changˉ uiˉ aˍ, Saˍteˍhpanˍ na hyang nga lae yao, yang pa nae ungˉ haoˉ jiˉ. 3Caˇ, Sawˉluˆ nawˍ, Hkritˆ yanˍ ang muˉ na tiˍ kangˍ yao ca jiˉ. Yang htiˍ yumˍ peunˉ yao htiˍ yumˍ awngˉ nga cangˉ yao, kaˍ hpaˍ yaˍ hkaˍ ba yaˍ uiˍ na seu aengˉ yao htawngˉ hkaoˉ veu lawngˉ aeˉ jiˉ.
Saˍmaˍriˆ ang meungˉ veu mawnˍ pyawˉ naeˉ uiˉ ang buinˉ tangˍ pya aengˉ jiˉ
4Haeˉ mae yao, hpakˍ ngangˍ lang jiˉ changˉ uiˉ htiˍ tawngˍ peunˉ yao htiˍ tawngˍ aeˉ yao mawnˍ pyawˉ naeˉ uiˉ ang buinˉ tangˍ maˍ biˍ jiˍ. 5Hpiˆliˆpuˆ muiˉ, Saˍmaˍriˆ vengˍ veu aeˉ yao yawng na Hkrit#8:5 Hkritˆ nae ningˉ ngaˍ Meˍsiˆyaˆ ha naeˉ awˍ lawng maˍ biˍ jiˍ. 6Yang maˍ naeˍ na ya kyaˍ yao, yang vaˍ naeˍ manˍ kyaˍ naˍ mek laek hkaˍ naˍ na ya myangˉ yao, changˉ ang muˉ uiˉ aˍ nuing ba paˉ cai nae hkaoˉ veu yang tangˍ na naˉ yuˉ jiˉ. 7Deˍ yaˍ ang haiˉ awngˉ ngangˉ biˍ jiˍ uiˉ changˉ hkaoˉ veu kaˍ haengˍ nae haoˉ yao awkˍ taw aengˉ jiˉ. Laˍ puˍ laˍ hkuiˍ siˉ jiˉ uiˉ changˉ nae, laˍ hkuiˍ hkleuk ngangˉ jiˉ uiˉ changˉ uiˉ na muiˉ taeng pyo biˍ jiˍ. 8Haeˉ mae yao, vengˍ changˍ uiˍ muiˉ ang byaˍ mawnˍ pyawˉ jiˉ.
9Siˉmunˍ nae maengˉ jiˉ changˉ htiˍ hu maˇ, caeˉ langˉ saˍ jiˍ beu vengˍ hingˍ hkaoˉ veu maenˍ bawˍ bawˍ yao, Saˍmaˍriˆ changˉ uiˉ na ang byaˍ manˍ kyaˍ piˉ hu saˍ jiˍ. Gaˇ changˉ ang huiˍ htiˍ hu yaˇ nae yang ciˍ jiˍ. 10Changˉ ang hkawˍ ang iˉ uiˉ muiˉ, Changˉ niˇ maˇ, laˍ htiˍ tanˉ hkoˇ ang huiˍ nae haoˉ naeˉ Hpaˍcaoˍ beu tanˉ hkoˇ mangˉ yaˇ nae yawng ciˍ lang yao, yang beu ciˍ tangˍ na nuing ba paˉ cai nae naˉ yuˉ jiˉ. 11Changˉ hiˉ maˇ ang mangˍ maenˍ bawˍ bawˍ yao piˉ hu nae, yawng na piˉ kuitˆ manˍ laeˍ yao, yawng muiˉ yang tangˍ na naˉ jiˉ. 12Hta yao muiˉ, Hpaˍcaoˍ beu ang meungˉ hingˉ ngaˍ Yeˍsuˆ Hkritˆ beu ang maengˉ na chaˍ lang naeˉ mawnˍ pyawˉ naeˉ uiˉ ang buinˉ tangˍ awˍ lawng Hpiˆliˆpuˆ maˍ naeˍ na yawng yumˉ nga langˉ yao, kaˍ hpaˍ yaˍ hkaˍ ba yaˍ baˆtiˆsamˍ hkamˉ yuˉ jiˉ. 13Siˉmunˍ yang ang to muiˉ yumˉ yao, baˆtiˆsamˍ hkamˉ yuˉ peunˉ yao, Hpiˆliˆpuˆ nawngˍ veu hkeˍ yao lae jiˉ. Naˍ mek laek hkaˍ naˍ uiˍ nae manˍ kyaˍ htiˍ baˍ uiˍ ya myangˉ beu yang kuitˆ manˍ laeˍ jiˍ.
14Saˍmaˍriˆ changˉ uiˉ Hpaˍcaoˍ beu ciˍ tangˍ na hap yuˉ naeˉ awˍ lawng Yeˍruˆsaˍlaemˍ vengˍ hkaoˍ veu ca naeˉ naiˍ htangˍ uiˍ ya kyaˍ yao, yawng Peˍtruˆ nae Yoˉhanˍ na hingˉ keung veu piˉ lae jiˉ. 15Yaˉ yetˍ hingˉ keung veu hkeu aeˉ yao, changˉ htiˍ baˍ hingˍ uiˉ Ang hkawˍ laˉ ang seungˍ sangˉ ya naeˉ uiˉ saˍ laiˍ, yawng saˍ laiˍ ang buinˉ paˉ biˍ jiˍ. 16Aˉ mae yao nae baoˇ, yawng hkaoˉ veu changˉ htiˍ hu htaˍ veu muiˉ, Ang hkawˍ laˉ ang seungˍ sangˉ baˍ lungˍ luingˍ suing. Yawng ngaˍ, Ang suingˉ Yeˍsuˆ ang maengˉ hkaoˉ veu baˆtiˆsamˍ hkamˉ yuˉ naeˉ hingˉ naˇ. 17Haeˉ mae beu, naiˍ htangˍ nyiˍ hu yawng htaˍ veu laˍ puˍ boeˉ yao, yawng Ang hkawˍ laˉ ang seungˍ sangˉ ya jiˉ.
18Naiˍ htangˍ nyiˍ hu yaˉ yetˍ hao htaˍ veu laˍ puˍ boeˉ yao Ang hkawˍ laˉ ang seungˍ sangˉ ya naeˉ na, Siˉmunˍ ya myangˉ jiˉ. Haeˉ mae yao yaˇ hpuˉ ang huˍ yuˉ ngaeˉ laˍ nae ciˍ jiˍ. 19Aˉ mangˉ beu htaˍ veu na baˍ upˍ, ga laˍ puˍ boeˉ beu yang Ang hkawˍ laˉ ang seungˍ sangˉ ya naeˉ uiˉ saˍ laiˍ tanˉ hkoˉ ningˉ ga na muiˉ piˍ lao nae paˉ jiˉ. 20Peˍtruˆ yang na ha biˍ jiˍ yang, Hpaˍcaoˍ beu lapˍ sawngˍ na hpuˉ piˍ yao ya naeˉ nae nang kuitˆ naeˉ pa nae, nang beu hpuˉ hingˉ nang kawngˉ htuˍ yaˍ laˉ mae kangˍ nga aengˉ bu. 21Hpaˍcaoˍ tawngˍ naˍ veu nang beu nuing ba baˍ sui baˍ pawng nae kanˉ ningˉ ngaˍ nang kawngˉ iˉ yaˍ nae muiˉ baˍ chaˍ lang. 22Hingˉ pa nae, nang hkaoˉ veu haiˉ naeˉ ningˉ na kuitˆ puiˉ laeˍ bao, hpeuˍ taw baoˉ vaˍ, nang beu nuing ba hkamˍ kuit Ang suingˉ Hpaˍcaoˍ poiˉ lao nae yang na paˉ vo. 23Aˉ mae yao nae baoˉ vaˍ, naˇ hkoiˉ naeˉ uiˉ nuing ba nae naˍ hokˍ nang na hpui yao chiˉ laˍ jiˍ na ga ya myangˉ ngaeˉ yaˇ nae yang na ha biˍ jiˍ. 24Haeˉ mae beu, Siˉmunˍ ha biˍ jiˍ yang, Naˉ yetˍ hkaˉ ciˍ naeˍ hingˉ, htiˍ ceuˍ nae muiˉ ga ang tuˍ htaˍ veu baˍ yaˍ hkeu lui naeˉ uiˉ saˍ laiˍ Ang suingˉ Hpaˍcaoˍ kawngˉ paˉ lao nae ciˍ jiˍ. 25Haeˉ mae yao, Peˍtruˆ nae Yoˉhanˍ yawng ngaˍ sak seˍ hkamˉ yao, Ang suingˉ Hpaˍcaoˍ beu ang tangˍ maˍ peunˍ naeˉ nawngˍ veu, Yeˍruˆsaˍlaemˍ vengˍ veu aeˉ laeˍ jiˍ. Aeˉ laeˍ beu, Saˍmaˍriˆ hkawngˍ lai hkawngˍ hkaoˍ veu mawnˍ pyawˉ naeˉ uiˉ ang buinˉ tangˍ maˍ biˍ jiˍ.
Hpiˆliˆpuˆ nae Aeˉtaˍyoˉpiˆ a mat
26Haeˉ mae beu, ang suingˉ Hpaˍcaoˍ beu buingˍ htaˍ naiˍ htangˍ Hpiˆliˆpuˆ na ha biˍ jiˍ yang, Nang hta laˉ yao, ang awˍ kaˍ seu aeˉ voˍ. Yeˍruˆsaˍlaemˍ vengˍ veu tang yao Gaˍsaˍ veu aeˉ naeˉ kaˉ ba hingˉ aeˉ voˍ nae ha biˍ jiˍ. Kaˉ ba hingˉ ngaˍ saiˍ taeˍ changˍ kawngˍ veu lae naeˉ kaˉ ba yaˇ. 27Haeˉ mae yao, yang hta laˉ yao aeˉ jiˉ. Haeˉ mae beu, Aeˉtaˍyoˉpiˆ changˉ puˍ mae htiˍ hu maˇ, Yeˍruˆsaˍlaemˍ vengˍ veu ang tuˍ mawt jiˉ. Yaˇ Aeˉtaˍyoˉpiˆ ang meungˉ na upˆ peungˍ naeˍ Kanˍdaˍkeˍ nae maengˉ jiˉ nangˉ hawˉ hkamˉ awˍ veu ang suingˉ hpeuˍ naeˍ mangˉ yaˇ. Changˉ hiˉ maˇ nangˉ hawˉ hkamˉ mangˉ beu hkamˍ hpuˉ ang keungˍ kawˉ hkaˉ hko laˉ hko na hak sa naeˉ mangˉ yaˇ. 28Yang yumˉ veu laˉ laeˍ beu, yang beu aˍ mawngˍ lawˍ lawˍ htaˍ veu ta yao pa rawˉ hpaet Iˉsaˍyaˆ beu ang laiˍ hingˍ na hpatˆ yao ca jiˉ. 29Haeˉ mae beu, Hpiˆliˆpuˆ na Ang hkawˍ laˉ mangˉ ciˍ sangˍ jiˍ. Aˍ mawngˍ lawˍ lawˍ hingˍ mangˉ kawngˉ htuˍ yaˍ laˉ mae aeˉ voˍ nae. 30Haeˉ mae yao, Hpiˆliˆpuˆ huinˍ na aengˉ yao, pa rawˉ hpaet Iˉsaˍyaˆ beu ang laiˍ hkaoˍ veu a mat mangˉ hingˉ na hpatˆ yao ca naeˉ na yang ya kyaˍ jiˍ. Haeˉ mae beu nang hpatˆ yao ca naeˉ awˍ lawng hingˉ na nang ang bae laˍ nae yang na naˉ jiˉ. 31Yang ha biˍ jiˍ yang, Hao ga na a tekˆ paeˍ baˍ hkai laˍ nae baoˉ vaˍ, aˉ mae ga bae taw naeˇ nae ciˍ jiˍ. Yang kawngˉ htuˍ yaˍ laˉ mae ta laoˉ voˍ nae Hpiˆliˆpuˆ na haoˉ jiˉ. 32Yang hpatˆ yao ca naeˉ Camˉ chak hingˉ ngaˍ ningˉ tawnˍ yaˇ.
Saeˍ naeˍ uiˉ saˍ laiˍ soˉ laˉ mae yang na chuingˉ nga aengˉ jiˉ. Soˉ ang muiˍ htanˍ naeˍ mangˉ tawngˍ naˍ veu soˉ mangˉ chuiˉ nae ca naeˉ laˉ mae, yang muiˉ hkaˍ muˍ baˍ hkai nae a chuiˉ ca jiˉ. 33Chu si jiˉ na ya hkamˉ beu, hao yang na baˍ sui baˍ pawng nae hkaoˉ veu aˉ muˍ tatˆ biˍ jiˍ. Yang beu a ceuˉ ang canˉ uiˉ na aˍ sangˍ hkai yao kaˍ naeˇ. Aˉ mae yao nae baoˇ, nuingˉ chaˍ htaˍ veu yang beu a sak hingˉ hao paek taw naeˉ yaˇ nae taemˉ yao chiˉ jiˉ.
34A mat ang huiˍ maˇ, Hpiˆliˆpuˆ na naˉ hu jiˉ. Hpaˍcaoˍ beu pa rawˉ hpaet ningˉ htiˍ hu ningˉ maˇ aˍ sangˍ beu awˍ lawng na ciˍ yao ca ngaeˉ. Yang beu ang to awˍ lawng na ciˍ laeˍ ngaeˉ laˍ. Baˍ baoˇ, awˍ htaˍ veu htiˍ hu hu awˍ lawng na ciˍ ngaeˉ laˍ, ga nang na iˉ yaˍ naˉ laˍ siˍ naeˉ nae ha biˍ jiˍ. 35Haeˉ mae beu Hpiˆliˆpuˆ, Camˉ chak ningˉ tawnˍ na tangˍ yao, Yeˍsuˆ beu awˍ lawng mawnˍ pyawˉ naeˉ uiˉ ang tangˍ yang na maˍ biˍ jiˍ. 36Yawng kaˉ ba veu aeˉ yao ca beu, langˉ ca naeˉ htiˍ tawnˍ veu hkeu aeˉ yao a mat huiˍ mangˍ ciˍ jiˍ. Hu bao, ningˉ keung langˉ ang ca jaˇ. Ga baˆtiˆsamˍ baˍ ya hkamˉ nae, ba ceuˇ haenˉ yao ca laˍ suiˍ naeˇ nae ciˍ jiˍ. 37(Haeˉ mae beu Hpiˆliˆpuˆ maˇ nang nuing ba ang to hkaˉ hko laˉ hko yumˉ saˉ baoˉ vaˍ, baˆtiˆsamˍ hkamˉ yuˉ yao ang kaˍ yaˇ nae ciˍ beu, a mat maˇ Yeˍsuˆ Hkritˆ nawˍ Hpaˍcaoˍ beu Ang yaˍ mangˍ yaˇ nae ga ang yumˉ ngaˇ nae ha biˍ jiˍ). 38Haeˉ mae yao, yang beu aˍ mawngˍ lawˍ lawˍ hingˍ na piˉ saoˍ nga yao yaˉ yetˍ nyiˍ hu yaˍ yetˍ langˉ hkaoˉ veu awngˉ nga aengˉ yao, Hpiˆliˆpuˆ nawˍ a mat mangˉ na baˆtiˆsamˍ biˍ jiˍ. 39Yaˇ yetˍ langˉ hkaoˉ veu awkˍ taw laˍ beu, Hpaˍcaoˍ beu Ang hkawˍ laˉ Hpiˆliˆpuˆ na tiˍ hkaoˍ suiˍ aengˉ yao, a mat mangˉ yang na kaˉ nawngˍ veu htiˍ cangˍ baˍ myangˍ lae laˇ. A mat huiˍ maˇ, mawnˍ pyawˉ yao kaˉ huˍ veu lae lang jiˉ. 40Haeˉ mae beu, Aˍcoˆ vengˍ hkaoˍ veu Hpiˆliˆpuˆ na hao ya myangˉ jiˉ. Yang kaˉ huˍ veu lae yao Kaeˉsaˍriˆ vengˍ veu tiˍ hkeu, vengˍ hkawngˍ hkaoˍ uiˍ beu ang buinˉ tangˍ maˍ biˍ jiˍ.
Actualmente seleccionado:
Naiˍ htangˍ 8: pyy
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2022, Wycliffe Bible Translators, Inc. All rights reserved.
