Mata 17

Maŋgwad vaw te Yesu

(Mar 9.2-9; Luk 9.28-36)

1Manah makwa ava dəɓa ana, Yesu ka kəs Piyer, Zak va malamaŋ Zaŋ, ke hwedeɗec ava zlalav pə yaŋ ta wudam mazambəla ana ɓa. 2Yesu pəla! A ŋgwada vaw fəma teceŋ, ndey tata a kəs ndey ara pas, rəkwat tata hay ka tərata məsle ana ndeɗ ndeɗ ara gagəmay. 3Faŋga faŋga ana, Muyiz va Eli ec ke ŋguzdek vaw, ac ka kar maɗay ava Yesu. 4Dapa ŋgesey ana, Piyer ka gwaɗa Yesu, gege: «Bay Mazlakava, mambəla sə, anda njahakwa fana cay. Daha ka waya sə, ya kara slam hay mahkar, amta kad kaa, amta kad Muyiz, amta kad Eli.» 5Dapa masa e gweɗ heley, ma ta wala sə, magwabagwaba mendeɗndeɗ ana səretenec avəda. Ma ta wala saya, uway e gweɗek dapa magwabagwaba ana, gege: «Nda nesey sə, aŋga Wat aɗaw masa ya waya elehey. Aŋga masa ke wefiyey mabay ta mayahaɗha, macənan ma tata!» 6Masa ndah masasəraka jene aca cəna ara nesey sə, ece teɗ ta ma ta ma, kad fa vara, ece ŋgə zidaw macəkuma bay. 7Yesu ke ŋgucefec vaw, ke pefec ha, gege: «Mezleftek, akwa ŋgə zidaw bay.» 8Ec te beŋgeɗek ndey sə, aca wala ndana mekele ɓasabay, say Yesu aŋga amta. 9Dapa masa ece bəreŋgek dapa wudam sə, Yesu ke ɓeɓəcec, gege: «Jə masa akwar ta wala nesey sə, akwar ta ŋguzda kad ndana bay, kasl pas masa Wut ta nda ta pərakata dapa maməcay.»

Makər maɗay da yaŋ Eli

(Mar 9.10-13)

10Ndah masasəraka jene ac ka nəkafa Yesu, gege: «Naa ndah mesesərekecen ma majawa kad ndana hay ece gweɗ, gege: “A lada Eli da dakata ɗagay sə, mafay te mey?”» 11Ke vehecen, gege: «Aŋga, eve metehwe ana, Eli a dakata ɗagay, a da ləmada jene hay avəda fakwanay, 12yey sə, ya gwaɗakwar, Eli sə, ka dakata cay, amaa ndana hay ac ka sənaw aabay, ac ka ŋgana jene mambəla ana aabay ara ac ta waya. Ara aŋga ana, Wut ta nda may, ndah ana ŋgesey, ac ta ŋgada marga hay.» 13Dapa ŋgesey ana, ndah masasəraka jene ac ka səna vəda, anjəkar Yesu e gweɗec sə, da yaŋ Zaŋ Baatis.

Yesu a mbəl wat masa e ɓərezl meɓərezley

(Mar 9.14-29; Luk 9.37-43)

14Masa Yesu va ndah masasəraka jene tata mahkar aca husa a cak ta miya makwasa sə, ndana ɓa ka ŋgucafa vaw, ka gwaɗa ava makakəradana, gege: 15«Bay Mazlakava, mbahw ŋgafa metekwen wat aɗaw nesey, afa aŋga eve mehecey te meɓərezley, a ŋgada hahar mabay. Pas mekele a kazlaɗ pa kwakwaw, daha aabay pa yam. 16Ya ka hwadaɗ vara ndah masasəraka jene takaa, amaa ac ka zlafa mambəliya aabay.» 17Yesu ke gweɗ, gege: «Hay! Akwar ndah masa makəsparav pahata, ndah maŋga jə mambəla ana hay aabay. Ya da njah ava akwar sə, kasl ewey? Ya da ɓəsafakwar marga hay sə, kasl ewey? Mehwedek wat ana kad fana!» 18Yesu ka payafa damkwaw, damkwaw sə, paf! A daɓa dapa wat ana. Faŋga faŋga ana, wat sə, pəleŋ! Ka mbalata. 19Ava dəɓa ana, ndah masasəraka jene ac ka ŋgucafa vaw babəla teceŋ, aca nəkafa, gege: «Na taciya andə ka zlafa mambasana aabay sə, mafay te meŋgəɗemey?» 20Yesu ke vehecen, gege: «Akwa zlafa bay sə, afa makəsparav takwar aŋga kusetke. Ya gwaɗakwar eve metehwe ana, pas amta daha akwar ava makəsparav ɓa kwa kusetke ara wut te venjeh, akwar ta zlafa magwaɗa wudam nesey: “Zleftek fana, daɗ fatay”, e te zleftek, afa jene masa a da fənakwar sə, aabay. [21Amaa ta mambas tərsam ta damkwaw ana ara nesey sə, say ava macə mbahw va meŋgə dalyama.»]

Yesu a slaf maməc tata va mepərek tata dapa maməcay meecew ana

(Mar 9.30-32; Luk 9.43-45)

22Pas mekele, Yesu va ndah masasəraka jene tata fakwanay ac ka cama vaw de Gelile, gege: «Wut ta nda sə, ac ta paɗ pa ha ta ndana hay, 23ac ta kəɗa avəda cukw cukw. Amaa dapa manah mamahkar ana sə, a ta pərakata dapa maməcay.» Ma ana nesey, ke məcecen vaw avəda mabay.

Yesu va Piyer aca pal budaw

24Masa Yesu va ndah masasəraka jene tata aca husa a Kafarnahum, ndah macəkala budaw ta Way ta kwakwas ac faŋga, ac ka ŋgucafa vaw Piyer, ac ka nəkafa, gege: «Bay takwar ana a pəl budaw ta Way ta kwakwas#17.24 budaw ta Way ta kwakwas Dapa kwakwas te Zuwef hay sə, budaw ana ŋgesey, aca zaliya didərasma a wal megweɗ yam ta səlay hay ecew masa ac mapa kad yaŋ Isreyel mawulah fakwanay te mepel budaw da hwaɗ ta mavay. ta Zlav aabay geyey?» 25Piyer ke vehecen, gege: «A pəliya.» Masa Piyer a husa pə way masa Yesu aŋga dapa, Yesu ka gwaɗa kama kama, gege: «Mawulak yaŋ takaa gwagumaw Simaŋw? Ma da pəla budaw va səlay majawa da yaŋ jene hay kad bay hay ta vavara sə, wa hay wa? Wudeh ta wunam ana geyey, məlaŋ hay?» 26Piyer ka vahan, gege: «Məlaŋ hay.» Yesu ka gwaɗa, gege: «Daha ara nesey sə, wudeh ta wunam ana aca pəliya ɓasabay. 27Amaa daha rav de hecec bay sə, daɗ pa yam mafayakfayak ana, kazlaɗ jəra pa, təhezek kəlef macaaca ana mandana jəra ana, wunan ma, ka ta ŋgat səlay mezel sətater#17.27 sətater A wal megweɗ yam ta səlay hay faɗ. dapa. Kəsekey, ke re te veceney pa slam taciya cuweeney.»

Actualmente seleccionado:

Mata 17: CUVnt

Destacar

Copiar