Mata 16

Jene hay ta maɗal pas hay

(Mar 8.11-13; Mat 12.38-39; Luk 11.16, 29; 12.54-56)

1Farisa hay va Saaduki hay ac ka ŋgucafa vaw Yesu ka ta ŋgayiya. Ac ka nəkafa e de ŋgə cah masa e ŋguzdek aŋga sə, e dek da vara Zlavay. 2Yesu ke vehecen, gege: [«Ta fakwaɗ masa akwa wala dərgazlav gagaza ana sə, akwa gwaɗa: “Tedew yam a ta slə aabay”. 3Te pərek masa akwa wala dərgazlav magəda ana ɓekɓek sə, akwa gwaɗa: “Pəsana yam a ta slay”. Daha akwa pe ndey kad baymaləvaŋ, akwa sən jə masa e te ŋgey. Amaa jene hay masa ece ŋgə təlam nesey sə, akwa sən ma da yaŋ ana masa aca wal megweɗ bay sə, mafay te mey?] 4Ndah pəsna nesey ac mambəla ana hay aabay, ac ndah maŋga mezlər eve cəvey ana aabay kad Zlavay! Aca nək cahay, amaa aca ŋgat mawala cahay ana aabay, say cah masa ke ŋgə ava Zawnas, nda mehwedek ma.» Ke gərdec faŋga, ka data.

Is ta Farisa hay

(Mar 8.14-21; Luk 12.1-6)

5Dapa medə tec jaka luwa leŋgeɗey te təker mazlakava sə, ndah masasəraka jene ac ka sənafa mahəl peŋ sabay. 6Yesu gege: «Mepə leŋgesl fa is ta Farisa hay va ta Saaduki hay!» 7Dapa ŋgesey ana, ndah masasəraka jene tata aca wulakiya, ece gweɗ dapa taɓa tec, gege: «E gweɗ ara nesey sə, afa andə ka kəsakakwa peŋ aabay.» 8Amaa Yesu ka səna mawulak yaŋ tec avəda, gege: «Akwar ndah masa makəsparav pahata. Akwa gweɗ dapa taɓa takwar, masa “andaw ke kəsek peŋ aabay” sə, mafay te mey? 9Akwar ka cəna ma da yaŋ ana aabay suwar geyey? Akwa sənafa peŋ zlam masa ya ta vəniya kad ndah bakatar zlam sə, biba. Naa akwa həlek mezekey ana waŋ hay manəha ecuwey? 10Kwa peŋ tasəla masa ye te vənecen kad ndah bakatar faɗ, akwa həlek mezekey ana waŋ hay ecuwey? 11Dapa masa ya gwaɗakwar: “Mepə leŋgesl fa is ta Farisa hay va ta Saaduki hay” sə, ŋgesey, ye gweɗ da yaŋ peŋ bay. Naa, akwa cəna bay sə, a ŋgana gwagumaw?» 12Ara nesey, ndah masasəraka jene ac ka cəna masa anjəkar e gweɗec da yaŋ mepə leŋgesl fa is te peŋ hay sə, bay, amaa da yaŋ mesesərek ta Farisa hay va ta Saaduki hay.

Piyer e ŋguzdek Yesu sə, aŋga Wut ta Zlavay

(Mar 8.27-30; Luk 9.18-21)

13Mahusa te Yesu pa vavara ta Sizarey Fəlep. Ke nəkefec ndah masasəraka jene tata, gege: «Ndana hay aca pə Wut ta nda sə, ka wa?» 14Ac ka vahan, gege: «Ndana hay aca pakaa ka Zaŋ Baatis, ndah dərziya aca pakaa ka Eli. Ndah mekele, aca pakaa ka Zeremi, daha aabay, ndah mekele saya aca pakaa ka nda amta deveŋ ndah mehwedek ma hay.» 15Ke gweɗec, gege: «Naa akwar may, akwa piyey sə, ka wa?» 16Simaŋw Piyer ka kəs ma, ka gwaɗa, gege: «Ka Kəristi, Wut ta Zlav masa aŋga eve ndey.» 17Yesu ka kəs ma, ke gweɗ, gege: «Mapəsma ɓa da yaŋ kaa Simaŋw, wut ta Zawnas, afa ma masa ke gweɗ nesey sə, ndana dapa slaw ta vaw ta ŋguzdakaɗ bay, amaa Papa masa aŋga da baymaləvaŋ. 18Taaɗaw sə, ya gwaɗakaa eve metehwe ana, kaa sə, ka Piyer, ara megweɗey pəra. Da yaŋ pəra ana nesey, ya ta lam Macam yaŋ ta makəsparav aɗaw hay fətiya. Ara nesey, gədaŋ mazlakava ta maməcay sə, a ta ŋgana jene kwa kusetke aabay. 19Ya ta vakaa kəle ta Wunam ta bay da baymaləvaŋ hay. Jə masa ka ta jawiya fakwanay dapa vavara nesey, a ta jawata ara aŋga ana da baymaləvaŋ may. Jə masa ka ta pəliya fakwanay dapa vavara nesey, a ta pəlata ara aŋga ana da baymaləvaŋ may.» 20Ara nesey, ke ɓeɓəcec ndah masasəraka jene tata, ac ta ŋguzda masa aŋga Kəristi sə, kad ndana hay bay.

Yesu a slaf maməc tata va mepərek tata dapa maməcay

(Mar 8.31-33; Luk 9.22)

21E zler dapa pəsaŋga ana ŋgesey, Yesu Kəristi ka zlar ŋguzdecen kad ndah masasəraka jene tata, gege: «A lada ye dey e Zeruzelem, ye te ɓəsek marga te mesnendə hay te Zuwef hay, ta mazlakava hay ta ndaakwas hay va ta ndah mesesərekecen ma majawa kad ndana hay, ec de kəɗiyey avəda cukw cukw ka macəhwandaw. Amaa dapa manah mamahkar ana sə, ya ta pərakata dapa maməcay. 22Piyer, gujahw! A zala ava zlalav, a ɓaɓəciya, gege: Away, Bay Mazlakava, Zlav da raɓdakaa, jeŋ ana ara na da ŋgatafakaa bay! 23Amaa Yesu pəla! A ŋgwadafa ma a gwaɗa, gege: Ŋgəliyey vaw fana da cak taaɗaw, kaa Saadan. Kaa sə, ka yah cəv te mezlekdeyey, afa mawulak yaŋ takaa nesey sə, e dek da vara Zlav bay, amaa mawulak yaŋ ta ndana hay.»

Cəv hay ta macəp Yesu

(Mar 8.34; 9.1; Luk 9.23-27)

24Yesu ke gweɗec ndah masasəraka jene tata, gege: «Daha nda masa a wal mecəpiyey, a ta wulak yaŋ sə, fa yaŋ tata bay, a da zaɓ hap mazləlawa tata, e de cəpiyey, 25afa kwa waawa masa a wal maraɓaɗ mesfen tata ha sə, a zana avəda, amaa nda mazana mesfen tata mafay taaɗaw sə, a ta ŋgata avəda. 26Daha ndana ka ŋgat zleley hay ta vavara fakwanay, amaa ka zana mesfen tata avəda sə, zleley ana hay ac ta jəniya eve mey? Daha aabay jene mey masa ndana da viya te meyembeɗek mesfen tata avəda ava aŋga? 27Aŋga, Wut ta nda e te vehek ava maskəla tata hay dapa mehehəm ta Papaŋ. Pas ana ŋgesey, a ta pal meyəv te mezlər ta kwa waawa təɗe fe mezlər ta nda ana. 28Ya gwaɗakwar, deveŋ ndah masa ac fana, dərziya hay ac ta macə aabay, say ac ta wala Wut ta nda e te dek ara bay.»

Actualmente seleccionado:

Mata 16: CUVnt

Destacar

Copiar