Mata 15

Kwakwas ta papaŋ ta papaŋ hay

(Mar 7.1-13)

1Farisa hay va ndah mesesərekecen ma majawa kad ndana hay, medek de Zeruzelem kad vara Yesu, ac ka nəkafa, gege: 2«Ndah masasərak jene takaa aca nah yaŋ kad pa kwakwas ta papaŋ ta papaŋ tandakwa hay aabay. Eve metehwe ana, aca ndə ɗaf ava ha mapana aabay sə, mafay te mey?» 3Yesu ke vehecen, gege: Akwar may, akwa gal yaŋ fəma ta ma hay ta ma majawa ta Zlavay ka ta nah yaŋ kad pa kwakwas takwar hay sə, mafay te mey? 4Eve metehwe ana, Zlav ke gweɗ, gege: Nahda yaŋ kad papakw va mmakw. Ke gweɗ saya, gege: Nda magwaɗa ma masa e teh bay kad papaŋ daha aabay kad mamaŋ sə, aca ra kəɗa avəda ka macəhwandaw. 5Amaa takwar sə, akwa gweɗey: «Nda masa a gwaɗa papaŋ, daha aabay kad mamaŋ: “Jə masa ya ta jənakaa ava aŋga nesey sə, təlam nesey ya ka van kad Zlavay” sə, 6nda ŋga ka nahan yaŋ kad papaŋ la geyey?» Ara nesey, akwar ka vavəsa ma ta Zlav avəda ava macəp kwakwas takwar. 7Akwar ndah masa neneŋ dapa ma ecew! Izay nda mehwedek ma ke gweɗ mambəla ana da yaŋ akwar, gege:

8Zlav ke gweɗ, gege: Ndah nesey ece hahəlawa yaŋ sə, ava ɗaf ta ma taambəla,

amaa rav tec aŋga dereŋ eve yey.

9Ece kekəred ke te kəɗiyey ha sə, taambəla,

afa kwakwas hay masa ece sesərekecen kad ndana hay sə, ece dek dapa mawulak yaŋ ta ndana hay.

Jə mapana va jə masa a ndara nda

(Mar 7.14-23)

10Yesu ke zelekec miya, gege: «Macak zləmay, macəna mambəla ana! 11Jə masa e də jaka pa ma kad hwaɗ sə, a təra nda ana ka ta ndara nda sə, aabay. Amaa jə masa e dek kad a vəda jaka pa ma sə, a təra nda ana avəda ka ndara nda.» 12Ndah masasəraka jene ac ka ŋgucafa vaw, ac ka gwaɗa, gege: «Ka sən masa ma takaa ana nesey ke ɓəlec Farisa hay sə, bay geyey?» 13Yesu ke vehecen, gege: «Wudez wula wula fakwan masa Papa da baymaləvaŋ ta ŋgayiya bay sə, ac ta ŋgəɗa avəda. 14Megərdeceŋ! Eceŋ sə, ac mahazlaw hay matəraŋga mahazlaw hay. Daha nda mahazlaw a təraŋgə nda mahazlaw caliya sə, ec cuweeney ece təɗec pe veɗ!» 15Piyer ka gwaɗa, gege: «Ŋguzdandan ma da yaŋ ma maɗəva ana nesey.» 16Yesu gege: «Akwar may, akwar eve leŋgesl aabay geyey? 17Akwa sən masa jene fakwanay masa e sehw jaka pa ma kad hwaɗ, ava dəɓa ana, a kazlata pe wuleŋ sə, bay geyey? 18Amaa jə masa e dek jaka pa ma kad a vəda sə, e dek dapa rav. Jeŋ ana ŋgesey, a təra nda ka ndara nda. 19Eve metehwe ana, medek dapa rav sə, mawulak yaŋ masa mambəla ana aabay. A hwad nda ana ka ta kəɗa nda ka macəhwandaw, ka ta ŋgə madama, ka ta kəs vaw fa zaŋ ana, ke te kərey, ka ta tə yaw ava maŋgal ma va majaɓ nda. 20Matəra ndana ka ndara nda sə, tərsam te jeŋ ana hay ara nesey. Amaa, mandə jene ava ha mapana bay sə, a təra nda ka ndara nda sə, aabay.»

Makəsparav ta ŋgwa Kanana ana

(Mar 7.24-30)

21Yesu pərtakaɗ! E zleftek dapa slam ana, a daɓa kad pa vavara ta Tir va ta Sidaŋw. 22Ŋgwa Kanana ana faŋga ɓa, ka cə lalaw, gege: «Mbahw ŋgefiyey metekweney Bay Mazlakava, Wut te Deevet! Dəm aɗaw ɓa damkwaw a ŋgada hahar mabay.» 23Amaa Yesu ka gumana pa aabay. Ndah masasəraka jene tata ac ka ŋguca vaw, ac ka gwaɗa, gege: «Mbasana ŋgwaz ana, afa a cəpandakwa fa dar fa dar ava macə lalaw.» 24Yesu ke vehecen, gege: «Zlav e zlərekiyey sə, kad vara Isreyel hay babəla, afa eceŋ sə, ac ara təmak hay masa ec ke zeceŋ.» 25Amaa, ŋgwaz sə, kwerjejekw! E kekəred fəma tata, a gwaɗa, gege: «Bay Mazlakava, mbahw jəniyey!» 26Yesu ka vahan, gege: «Makəs ɗaf te wude hey ke te kezl kad wut ta gəda hay sə, mambəla ana aabay.» 27Ŋgwaz ana, ka gwaɗa saya, gege: «Ma takaa təɗe Bay Mazlakava. Naa wut ta gəda hay sə, aca ndə mepepəs ta ɗaf masa e kezl fa taabəla ta mandə ɗaf ta bay ta way teceŋ sə, aabay geyey?» 28Ara nesey, Yesu ka vahan, gege: Ŋgwaz, makəsparav takaa macəkuma bay! E de ŋgə ara masa ka ta waya! Faŋga faŋga ana, daŋgwaya sə, ka mbəlata.

Membəl dapa mehecey hay da ma te təker mazlakava

(Mar 7.31)

29Yesu ka data faŋga dapa slam ana kad ma te təker mazlakava te Gelile. Ke tep kad pə yaŋ ta ŋguɗa ɓa, cəkum! A njah maanjahay. 30Miya ta ndana hay mabay, ec ke kwesek vaw kad vara vaw, ec ke hwedek ndah mahahalɓa hay, mahazlaw hay, ndah masa gəva ta vaw tec maməca, ndah ɓaɓa hay va ndah masa ac eve mehecey hay mekele mekele mabay. Ec ke njeheɗec fəma te Yesu, ke mbəlec avəda fakwanay. 31Miya ta ndah makwasa sə, ec ke wesl mabay mafay ta masa ac ka wala ndah ɓaɓa hay ece gweɗey, ndah masa gəva ta vaw tec maməca ac mapəla paɗ, ndah mahahalɓa hay ece də nduwak nduwak, mahazlaw hay ece wele ndey. Ac ka hahəm Zlav te Isreyel hay.

Yesu e vec jə ta manday kad ndah bakatar faɗ

(Mar 8.1-10; Mat 14.13-21)

32Yesu ke zelec ndah masasəraka jene tata, gege: «Metekwen e ŋgiyey fa miya ta ndah makwasa nesey, afa aŋga na manah mahkar ac da cak taaɗaw fana, ac eve jene ta mandə aabay. Ya wal mevehədec ava mayə bay sə, afa ac ta ŋgat gədaŋ dapa cəv aabay.» 33Ndah masasəraka jene sə, ac ka vahan, gege: «Andə ta ŋgatakakwa jə ta manday ana dapa səɓak fana kad miya nesey masa aca ra ndiya mban sə, dama?» 34Yesu ke nəkefec, gege: «Akwar eve peŋ ecuwey?» Ac ka vahan, gege: «Peŋ tasəla va kəlef hay kusetke.» 35Yesu ke gweɗec kad miya sə, aca ra njah maanjahay fa vara, 36ka hal peŋ tasəla va kəlef sə, ka ŋgana wasay kad Zlavay. Ava dəɓa ana, ka waca, ke vecen kad ndah masasəraka jene, ece re vənecen kad miya. 37Ac fakwanay ac ka ndaw mban. Ec ke ɓəcek mezekey ana hay waŋ hay manəha tasəla. 38Ndah mandana peŋ va kəlef ana sə, ece ŋgə mawulah bakatar faɗ, ŋgwaza hay va wudeh maŋgəfa bay. 39Ava dəɓa te mevehdec miya hay sə, Yesu ke tep pa kaslkaslah, ka data kad pa vavara ta Magadan.

Actualmente seleccionado:

Mata 15: CUVnt

Destacar

Copiar