YAM JAH 16

Hagarax Mai Ishamelax

1Yam in moeng Abram Sarai ang nyang koe kawn tix kaux kawx son nawh mai nawh koe kawncau bun pui ceu Ejiptux tix kaux pa kok ceu kaux nawh mawh Hagarax, 2Mai Sarai ah nin ka Abram, “Jhak yam in, Simiang Siyiex ang nyang bax tawx aux koe kawn, maix hu ka kawncau bun aux mai aux tak pon kawn khaing nawh heue.” Abram nghiet ka lox moeng tix Sarai heue. 3Khaix an moeng Abram Sarai teei bun siliex Hagarax bun Ejiptux mai nawh tawx ka Abram sonsang mawh moeng nawh heue. Yam an Abram hoik ot daux haktiex Khanan kao num heue. 4Mawh kheu nan, nawh hu ka Hagarax mai Hagarax koe kaux heue. Yam yaox nawh hoik koe kaux tix nawh ang lai koe krax nab yam ka sivoe ngai Sarai heue. 5Sarai tom ah nin ka Abram, “Krax pa lud aux kieh koe piang maix heue. Aux hoik tawx kawncau bun tix ka daux tawm taix maix mai nawh ang lai koe krax nab yam ka sivoe ngai aux, jao hoik koe kaux tix heue. Kieh Simiang Siyiex prawng ca ka sinax aux mai maix heue.” 6Mawh kheu nan, Abram ah nin ka Sarai, “Bun siliex in koe daux tawm taix maix. Maix simie ti yuh ka mawx kawx, koe ka rhawm maix heue.” Yam yuh Sarai krax kha rhawm ka nawh, Hagarax to tix hu khaing nawh heue. 7Kawncau Simiang Siyiex yaox ka Hagarax hawt rawm daux daux tiag tu, plak krax hu veng Shurax heue. 8Nawh ah nin, “Bun siliex Sarai, Hagarax eue, kaoh maix khaing dee mawx mai maix sang deeh hu plak mawx?” Mai nawh pawk lox ah nin, “Aux hoik to khaing cao tix Sarai heue.” 9Kawncau Simiang Siyiex ah nin ka nawh, “Deeh ing ka cao maix mai ap tix ka daux tawm taix nawh heue.” 10Kawncau Simiang Siyiex baox deeh ah nin ka nawh, “Aux tak kieh doeh ru ceucad maix lih koe haoh hun tom ang pui khankix pon uik simin ka heue.” 11Kawncau Siyiex ah nin ka nawh, “Jhak heue, maix hoik koe kaux maix tak sang keh kawn simex tix kaux. Maix tak kok ceu kaux nawh mawh Ishamelax, kheu hoik mhong Simiang Siyiex ka krax kha rhawm maix heue.” 12“Nawh tak mawh pui maung praix, nawh tak yuh krax simah ka pui ku kaux mai pui ku kaux tak deeh yuh simah ka nawh heue. Nawh tak yaox ti ot tau mai puxaik kawn keeing tix khankix heue.” 13Khaix an nawh kok yo ka ceu kaux Simiang Siyiex pa hoik sikah ka nawh, Maix mawh Siyiex Cao pa yaox ka aux, mai nawh ah nin, “Aux hoik yaox Nawh Cao tin, ka kaw pa hoik kia ngien ka aux heue.” 14Mawh kheu nan, nawh kok rawm daux an mawh Beralahieraw, rawm daux an, koe sinax veng Kadeshax mai veng Beret heue. 15Mawh kheu nan, Hagarax keh kawn simex tix kaux son Abram mai Abram kok ceu kaux nawh mawh Ishamelax, pa keh khaing Hagarax heue. 16Abram koe ju tixdaix liah num yam keh Hagarax ka Ishamelax pa mawh kawn Abram heue.

Actualmente seleccionado:

YAM JAH 16: WCL

Destacar

Copiar