YAM JAH 15

Gumlox Tawx Siyiex Ka Abram

1Khaix hoik ceu inkix khawmuik, gumlox Simiang Siyiex lih hoek ka Abram ka daux riang susai ah nin, “Abram eue, paw lhat graung. Aux mawh pa tiebtie son maix heue. Bwanson hoik ting lhaong son maix heue.” 2Viang mawh nan, Abram deeh ah nin, “Simiang Siyiex eue, Maix tak sang tawx ceu patix ka aux lie? aux hoik yaox ang kawn tix lai chix koe, sinngao nyiex ma aux khankix, tak yaox ti hu ka Eliza pui veng Damase ang mawh lie?” 3Abram baox ah nin, “Jhak heue, maix ang nyang tawx doeh ru son aux pie tix kaux kawx. Mawh kheu kawn pa keh daux nyiex ma aux tix kaux caw ti mawh pui pa plud sinngao aux heue.” 4Jhak heue, gumlox Simiang Siyiex deeh hoek ka nawh ah nin, “Pui in tak ang pon ti mawh pa plud sinngao maix heue. Viang mawh nan, pui pa kaoh khaing daux tokaux maix, tak sang mawh pui pa plud sinngao maix heue.” 5Nawh Cao kok Abram lih hu plak praix ah nin, “Maong ti jhak raoma, simin ti yaox ka simuing khankix heue.” Nawh Cao baox ah nin ka nawh, “Doeh ru maix tak sang awm ankix heue.”#Ro 4:18; He 11:12 6Abram koe krax yum rhawm ka Simiang Siyiex, Nawh Cao deuh krax yum rhawm nawh mawh pa rahsee heue.#Ro 4:3; Ka 3:6; Yak 2:23 7Nawh Cao deeh ah nin ka nawh, “Aux mawh Simiang Siyiex pa viex maix lih khaing veng Urax dee ot pui ceu Kaladie, sonsang tawx Aux haktiex in mawh sinngao son maix heue.” 8Nawh ah nin, “Simiang Siyiex eue, aux tak sang tawng ka pon tix sinngao an yuh ka mawx?” 9Mawh kheu nan, Nawh Cao deeh ah nin ka nawh, “Viex kawn mawie shiang pa koe loe num tix mu, kawn pex shiang pa koe loe num tix mu, kawn yung mhaing pa koe loe num tix mu mai sikaux tix mu mai keukie pa awn ju tix mu, hoek ka Aux heue.” 10Nawh tom viex ceu in khawmuik hoek ka Nawh Cao mai lug greung ra plak mai nawh deuh kix tang tiah khaing paox tix plak mawx plak an heue. Viang mawh nan, nawh ang lug nex sim khankix koe ra plak heue. 11Yam hoek klang preng khankix lih tum piang totiag pa yum ankix, Abram grheu kix hu dee singai heue. 12Yam hoik klip singaix, Abram hoik kied lhiak it mai krax lhat graung mai pa faik lih koe piang nawh heue. 13Khaix an Nawh Cao ah nin ka Abram, “Een maix tawng, ru maix khawmuik tak mawh nyo sinie ka daux haktiex pui tang ceu mai yuh kaing siliex mai kha rhawm, been pon yieh num ka pui haktiex an heue.#Lih 1:1-14; Cau 7:6 14Aux tak sang prawng ca ka pui pa hoik cau ka kix khawmuik. Khaix hoik an sax, kix tak yaox ti lih hu tau mai kraung khrai tix tom nie heue.”#Lih 12:40-41; Cau 7:7 15“Phan mawh maix, maix tak yaox ti hu ka keeing maix khankix ka daux pa yiien yawg heue. Maix tak yaox krax sipaung mhawm yam hoik kuad ju maix heue.” 16“Khaix hoik luan baux ju ru maix pon ju, kix tak sang deeh yaox ti hoek tin. Mawh kheu phimap pa yuh pui ceu Amawrix khankix ang nyang bax grum naog ka heue.” 17Yam hoek bawg yam klip singaix mai yam faik praix jhak heue, taox ngu lih khaing glah ngu mai kawk ngu pa riang tix mu, lailing sinax khik nex pa hoik lug nawh ti deuh khankix heue. 18Ka daux singaix an, Simiang Siyiex yuh sijax mukheu tau mai Abram ah nin, “Son doeh ru maix, Aux hoik tawx haktiex in, #Cau 7:5 jah ka mee rawm klawng meung Ejiptux tom hoek ka rawm klawng ting Uparat, 19mai ceu pui Kenix, ceu pui Kenizix, ceu pui Kadamawnix, 20ceu pui Hittix, ceu pui Pherazix, ceu pui Rephen, 21ceu pui Amawrix, ceu pui Khanan, ceu pui Giragazit mai ceu pui Yebutix khankix khawmuik, Aux hoik ap nawh ka ru maix heue.”

Actualmente seleccionado:

YAM JAH 15: WCL

Destacar

Copiar