Matío 15
15
Yɛɛ́so a á ega mbīŋtɛ aziʼne wɔ maŋgānjʉʼ
(Mlk 7.1-13)
1Á kó ŋgɔ́ amɔ̄ʼ afʉʼ, epuɔ Falísia mbɔɔ wɔ kɛ́ʼte‑mbé Ndém á Yelósalɛm, é tshóte nnɛ̄t mé lezēŋ Yɛɛ́so, ńzɛ́tte á yí ŋ́gɛ: 2«Melaʼ akɔ̄ nnɔ wú é té si nzīŋɛ ánɛ mɛt alāʼ yīi, wɔ maŋgānjʉʼ pímpɛ é le zíʼné ɛ̄? Pɔ́ té si ŋgē epfɛ́t azō, ésōko mbū mɔ́p ɔ́#15.2 Á lɛ ánɛ mɛt alāʼ epuɔ Yúda, pɔ́ ge epfɛ́t azō, ésōk mbū mɔ́p tɛ ŋkúɔ á metswiʼté, ńdɔkɔ efóko epe ánɛ pɔ́p.. » 3Yɛɛ́so á pwɛt á mbū pɔ́p ŋ́gɛ: «Ŋ́gɔ́ mé pɛ azɛ́, mbɔ melaʼ akɔ̄ pɛ te si ŋkúʼtɛ mbé Ndém ɛ́, ḿbiŋɛ ntsēŋnɛ áa ánɛ mɛt alāʼ wɛ ɛ̄? 4Ndém a le ké ndé ŋ́gɛ, ŋiŋ a eghʉ̄ mekuʼ mɔʼɔ́ yi pɔ́ mɛ́ wɔp. Ńzéŋ ndé ŋ́gɛ, ŋiŋ a zɔɔ á mɔʼɔ́ yi kɛ́ mɛ́ wɔp, mɛ́ lɛ nzwhí á ŋgaŋ zwhií. 5Táʼ, pɛ pwɔ̄, pɛ kʉʉ̄ŋ esɛt, ńcʉ́ʼɛ ndʉ́ɛ́ ŋghʉ̄ɛ áa lɛ: “Ŋiŋ a wiɛ ajū mīi, a gɔ elɔ̄ɔk ntswíte á mɔʼɔ́ yi ká á mɛ́ wɔp, ḿbiŋ ndé ŋ́gɛ, á cʉ́ʼ ajūɔ Ndém, 6a á le zók nzéŋɛ ŋghʉ̄ɛ mekuʼ mɔʼɔ́ yi í.” Púp, pɛ elɔ̄ɔk á mɛt alāʼ wɛ yīi, pɛ é si nzíʼnɛ epuɔ, ḿbík ashuŋne Ndém. 7Pɛ megaŋ ŋkɔŋ menēk, Izayi ntswi‑ŋke Ndém a le té njhʉ̄ eshúŋne ánɛ pɛ, páʼ a le lé ŋ́gɛ:
8“Epuɔ alāʼ puɔ, pɔ́ lɔɔ̄k áa mekup nchu,
tɛ́ ŋghʉ̄ mekuʼ má.
Ntē wɔ́p é pú te ánɛ
meŋ tshí léée.
9Pɔ́ é si ŋgūʼtɛ á gá páʼā, á gɔ́ áa ndémndēm.
Anu zīi pɔ́ zíʼnɛ epuɔ, ńtɔ́ŋɔ lɛ anu zá lā,
é gɔ́ áa menu mīi, epuɔ menɔŋ mé le zapáā.”»
Ajū mīi á tseŋɛ á ŋiŋ
(Mlk 7.14-23)
10Yɛɛ́so á ghʉ ntɔ́ŋ alāʼ, ńdé á mbū pɔ́p ŋ́gɛ: «Pɛ etéŋɛ metuúŋ mɛ́, ńdɔk njúʼ á mbɔŋɔ́. 11Ajū mīi á kó á nchu ŋiŋ, aziɛ́ mé té lɛ ŋghʉ̄, ŋgaŋ á cʉ́ʼ ŋgaŋ epe ɛ́. Ajū mīi á tó á nchu ŋiŋ, aziɛ́ mé ghʉʉ̄ á cʉ́ʼ á ŋgaŋ epe. » 12Nnɔ yí é tshóte nnɛ̄t mé lezēŋ tsí, ńdé á mbū yí ŋ́gɛ: «Tɛ o ó zhɛ́ á légɛ, epuɔ Falísia é júʼ anu zīi o ó lé lā, á pék á wɔ́p tɛʼ e?» 13Á pwɛt ŋ́gɛ: «Ajūɔ ntsem zīi, Mɔʼɔ́ ga yīi a á athʉ́ lephū, a lɛ te phīi, a fú egɔ́ ntsɔ́ʼ tsɔʼé. 14Pɛ etshī á wɔ́p nnéŋ. Pɔ́ é si ŋgɔ́ wɔ efʉʉ́‑menēk pīi, pɔ́ tsaŋa emɔ̄ʼ. Afʉʉ́‑menēk á piŋɛ ntsāŋ amɔ̄ʼ, mbɔ pɔ́ mémpīa é pú ewhʉ á ntē lephʉ̄. » 15Piɛ á tswí ashuŋne, ńdé mé yí ŋ́gɛ: «Lɛ ŋkɛ́ʼtɛ ashuŋne lepúʼ jʉɔ, éshúŋ á wék. » 16Yɛɛ́so á pwɛt á mbū pɔ́p ŋ́gɛ: «Ńdɔkɔ ŋ́gɛ, pɛ azɛ́, pɛ zɛɛ́t áa te wɛ leghi á lelɔk njúʼ anu jʉɔ mɛ́t lɛ́? 17Pɛ ka zhɛ́ á légɛ, ajūɔ tsem zīi, á kó á nchu ŋiŋ, á tɔ́k ŋkó á levem yí, ŋ́kó ntó ŋ́gwhʉ̄ á akwɛt lɛ́? 18Ajū mīi, á piīŋ ntó á nchu ŋiŋ, á fhó á ntē yí. Aziɛ́ mé ghʉ̄ʉ, ŋgaŋ á cʉ́ʼ á ŋgaŋ epe. 19Akwaŋte tepɔŋ mé fhoó á ntē ŋiŋ, ńtshóne á yí, á lezwhīte epuɔ, á lecʉ̄ʼ á ŋgaŋ agā, á lewɛ á mɛgap, á lejʉ, á leyhī mela, á lezɔ epuɔ. 20Ecʉɔ etsō mɛ́t mé ghʉ̄ʉ, ŋiŋ á cʉ́ʼ á ŋgaŋ epe. Táʼ, lepiŋ mpfɛ́t etsō té sok mbū, a te ghʉ̄, ŋiŋ á cʉ́ʼ á ŋgaŋ epe ɛ́. »
Lefɛ̄ nnɛ̄t menzwí yīi, a lɛ te ŋiŋ Yúda á
(Mlk 7.24-30)
21Yɛɛ́so á ghʉ efhó á ajʉʼ mɛ́t, ŋgʉ̄ɔ mé eshhʉ̄ apak ŋgɔŋ Tíi pɔ́ Sidɔŋ. 22Ńdɛ ŋgē ekó éwú, mmɔʼ menzwí, ŋ́gɔ́ á mɔ́ Kánaŋ, á lɛ nzī á legaʼte ndé ŋ́gɛ: «Ndi, méŋ Efɔ Ndavít, lɛ ntsá mezeŋɛ má. Méŋ ga eyi menzwí a á mba, mbɔ mmɔʼ esī e lē ŋgɔ á yí, ḿbú nnɔŋ ŋgēnɛ á yí tɛʼ. » 23Yɛɛ́so á pú te anu á mbū yí pwɛt. Nnɔ yí é tshóte nnɛ̄t mé lezēŋ tsí, éswíŋte á yí ŋ́gɛ, a elɛ̄ ŋghʉ̄ menzwí mɛ́t, a egʉ̄ɔ#15.23 Emɔ̄ʼ epuɔ é júʼ á légɛ, a ejūŋ á menzwí mɛ́t, emɔ̄ʼ epuɔ é júʼ á légɛ, a eghʉ̄ ajū mīi menzwí mɛ́t, a á si ŋkɔ̄ŋɔ., melaʼ mīi, a á si mbáknɛ á wɔ́p. 24Yɛɛ́so á pwɛt á mbū pɔ́p ŋ́gɛ: «Ndém a le tó á gá áa mbū epuɔ Islaɛl. Pɔ́ é si ŋgɔ́ páʼ memvhō Ndém, mbɔ pɔ́ lē mbíte. »
25Menzwí mɛ́t á ké eshʉ̄ʼ shʉʼe, ńtswíʼte á mvhɔ Yɛɛ́so, ńdé ŋ́gɛ: «Ndi, lɛ ntsá mezeŋɛ má. » 26Á pwɛt ŋ́gɛ: «Á té mbɔŋ ŋ́gɛ, mɛ́ epɛ́ etsō ewɔŋkhʉ̄, ḿmāʼ á mbū epɔ̄ mbhʉ̄ ɛ́. » 27Menzwí mɛ́t á gɛ: «Annuúnē me Ndi. Táʼ, epɔ̄ mbhʉ̄ é ké mpfɛ́t azɔ́p mesa ecū mīi, mɔʼɔ́ wɔp a á nnɔŋ mpfɛ́tɛ, é whʉte á esī. » 28Yɛɛ́so á pwɛt á mbū yí ŋ́gɛ: «Maá, lefɛ̄ nnɛ̄t wu ŋgyá á mbū meŋ, a te fáŋ ŋ? Ndém a elɛ̄ ŋghʉ̄ ajū mīi o ó si ntsáa, á mbū wu. » Ńdé épúp, méŋ yí á lɛ ntē efʉʼ mɛ́t efʉʼ mɛ́t.
Yɛɛ́so a á ega ŋghʉ̄ɛ, megaŋ agɔ tɛ nzá, é tʉɛ
(Mlk 7.31)
29Yɛɛ́so á ghʉ efhó á ajʉʼ mɛ́t, ŋgʉ̄ɔ mé akʉŋɛ́ mía ntshi Ŋgaliléa. Ḿbē mé ndo lekwɛ̄t, ńnáŋ éwú. 30Atʉtʉ epuɔ á shʉʼ njʉ́ɔ á yí, ŋ́gē eshʉʼe, ŋ́gwɛ̄ wɔ ŋiíʼ‑akhu, mbɔɔ wɔ efʉʉ́‑menēk, ŋ́ghʉ̄ megaŋ alɔʼ mbɔɔ wɔ mbúʼ‑nchu, ŋ́ghʉ̄ emɔ̄ʼ megaŋ agɔ tɛ nzáne. Ńdɔ̄k á wɔ́p mbú eshʉ̄ʼ ńnɔ̄ŋ á mekhu Yɛɛ́so, á ghʉ pɔ́ te. 31Alāʼ á jʉ́ɔ páʼ wɔ mbúʼ‑nchu é si eshúŋnɛ. Ńjʉ́ɔ páʼ megaŋ alɔʼ, é te. Ńzéŋ njʉ́ɔ páʼ wɔ ŋiíʼ‑akhu, é ziŋ á mbɔŋɔ́. Ńjʉ́ɔ páʼ wɔ efʉʉ́‑menēk, é zéŋ njʉ́ɔ ejʉʼ, á pú ŋkʉ̄ʼne á wɔ́p tɛ́ʼ. Pɔ́ zi á lewuʼte Ndém epuɔ Islaɛl.
Yɛɛ́so a á ega nzɛ́kɛ á ŋiŋnɔŋ ntsāʼ lekua
(Mlk 8.1-10)
32Yɛɛ́so á ghʉ ntɔ́ŋ megaŋ nnɔ pí, ńdé á mbū pɔ́p ŋ́gɛ: «Meŋ á si mbúu ntsáa atʉtʉ epuɔ jʉɔ tɛʼ. Á ayáʼa eleʼé tɛ́t, páʼ pɔ́ é nzem meŋ. Pɔ́ piīŋ te zɛ́t ŋgwɛ̄ ajū mīi, pɔ́ gɔ epfɛ́t ɛ́. Meŋ te si ŋkɔ̄ŋɔ á gá á leghʉ, pɔ́ gʉɔ nzi í, mbɔ pɔ́ e kó á mɛnzhɛ, ewhʉte nzi. » 33Nnɔ yí é lé á mbū yí ŋ́gɛ: «Ḿpɛ gɔ eké ndɔ̄k mblɛ egɔ́, á késáatswɛt, tɛ é kuʼ á lelɔk nzék alāʼ páʼa, tɛ pɔ́ pfɛ́t tɛ nzwɛ́t é?» 34Yɛɛ́so á pwɛt á mbū pɔ́p ŋ́gɛ: «Pɛ wɛɛ̄ mblɛ egā ntāʼ shɔ́ʼɔ́?» Pɔ́ gɛ: «Ntāʼ esambīa, ńzéŋ ŋghʉ̄ mesōh tsɔ ntāʼ shɔ́ʼɔ́ lɛ́. » 35Yɛɛ́so á tswi á mbū alāʼ ŋ́gɛ, pɔ́ enáŋte á aláŋ esī. 36Ńdé épúp, ńdɛ ntswí mblɛ jɔ̄ ntāʼ esambīa mbɔɔ mesōh, ésyákne á Ndém, ńnɔŋ mbwɔ́ʼtɛ ŋgyáa á mbū nnɔ yí. pɔ́ tswíi ŋgāptɛ á mbū alāʼ. 37Pɔ́ metsem é tswí mpfɛ́t tɛ nzwɛ́t. Nnɔ yí é lakte epwɔ̄ʼ tsīi é vuʼu, é pɔ́ metúŋ akelaʼ esambīa. 38Epuɔ pīi pɔ́ le pfɛ́t etsō mɛ́t, a lɛ ŋiŋnɔŋ ajūɔ ntsāʼ lekua, té sáŋ wɔnzwí mbɔɔ ewɔŋkhʉ̄. 39Yɛɛ́so á tswi, alāʼ á gʉɔ, á kɔ́ʼ ŋkó á ntē akɛnūʼ, ŋgʉ̄ɔ mé alāʼ epuɔ Magadaŋ.
Actualmente seleccionado:
Matío 15: ybb
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© CABTAL
