Luka 19
19
Jesũ na Zakayo
1Jesũ agĩtonya Jeriko, agĩkũrũkanĩĩria ku. 2Kũu Jeriko nĩ kwarĩ na muntũ ũmwe mũnene wa arutithia goti, wetagwa Zakayo. Zakayo aarĩ muntũ mũtongu. 3Nĩ ageragia kwona bũrĩa Jesũ akari, ĩndĩ atĩnkĩaũmbire kũmwona nĩũntũ antũ baarĩ baingĩ mũno na arĩ mũkuĩ. 4Kwogu agĩkuthũka arĩ mbere ya antũ, agĩtũa mũtĩ wa mũfigi nĩkenda amwona, nĩũntũ Jesũ arĩ mũkũrũkĩĩri njĩa ĩu. 5Rĩrĩa Jesũ akinyire antũ au akĩraitha ĩgũrũ, akĩĩra Zakayo atĩrĩ, “Zakayo, uma mũtĩni na mpũĩ, nĩũntũ ũmundĩ nĩngũtuĩka mũgeni waku.”
6Zakayo akiuma mũtĩni na mpũĩ na akĩgwata Jesũ ũgeni kwae mũjiĩ akenete mũno. 7Nabo antũ barĩa bonire ũntũ bũu bonde nĩbanugunire bakĩranaga, “Muntũ ũũ akũgwatwa ũgeni nĩ muntũ mwĩyia!” 8Zakayo nĩ arũngamire akĩĩra Mwathani atĩrĩ, “Mwathani, niũ nĩnkũnenkera nkĩa nusu ya into jiakwa, na kethĩrwa kũrĩ na muntũ ndanatunya gĩntũ, nkamũrĩa maita mana ma kĩo.”
9Jesũ akiuga atĩrĩ, “Ũmundĩ wonokio nĩ mũkinyu nyomba ĩno, nĩ tontũ ũũ o nawe nĩ ũmwe wa njiarwa jia Aburahamu. 10Nĩũntũ rĩ, Mwana wa Muntũ ejire gũcũa na kwonokia barĩa baũrĩte.”
Ngerekano ya ntungata ĩkũmi
(Mat 25.14-30)
11O antũ bathikĩĩrĩtie nteto iu Jesũ aberaga, akĩbaa ngerekano. Nĩ ĩndĩ bakuagĩĩria Jerusalemu, na antũ beciragia Ũnene bwa Ngai bwarĩ akuĩ kũonekana. 12Kwogu Jesũ akiuga, “Ĩndĩ ĩmwe muntũ ũmwe warĩ wa mbarĩ ya ũnene nĩ athiĩte ndĩ ya kũraja gũtuĩwa mũnene wa ndĩ yao, na nyuma ya kũnenkerwa acoke mũjiĩ kwao. 13Atanathi, agĩĩta ntungata jiae ĩkũmi, akĩinenkera o ntungata mbeca jietagwa mina#19.13 mina: Mbeca ĩno yarĩ ta mũcaara wa mĩeri ĩthatũ wa mũruti wa wĩra., o ntungata ĩkĩnenkerwa ĩmwe. Akĩjiĩra atĩrĩ, ‘Onjorithagiani mbeca ino nkinya rĩrĩa ngacoka.’ 14Ĩndĩ antũ ba ndĩ ĩu yao batamwendete. Kwogu bagĩtũma akĩama bamume nyuma, bathi kũu athiĩte bauge atĩrĩ, ‘Tũtĩkwenda muntũ ũũ atuĩka mũnene wetũ.’
15“Ĩndĩ muntũ ũu nĩ anenkerwe ũnene na agĩcoka. Agũkinya mũjiĩ nĩ aathanire auga ntungata irĩa anenkerete mbeca jiĩtwe, nĩkenda imwĩra baita ĩrĩa jionete ikwonjorithia mbeca iu. 16Ntungata ya mbere ĩkĩja kĩrĩ mũnene ũu ĩkĩmwĩra, ‘Mwathi wakwa, Mbeca jiaku irĩa wantigĩre nĩ ijiaranĩte maita ĩkumi.’ 17Nawe akĩmĩra, ‘Nĩ ũrũthĩĩte wega, ntungata ĩno mbega! Tontũ nĩũtwĩkĩte mwĩtĩkua na tũinto tũnini rĩ, nĩngũgũtua mũtongoria wa taũni nene ĩkũmi.’ 18Nayo ntungata ya baĩrĩ ĩkĩthi ĩkiuga, ‘Mwathi wakwa, mbeca jiaku nĩijiaranĩte maita matano.’ 19Mũnene akĩmwĩra, ‘Nagwe nĩũgũtuĩka mũtongoria wa taũni nene ĩtano.’ 20Nayo ntungata ĩngĩ ĩkĩja ĩkiuga, ‘Mwathi wakwa, ino mbeca jiaku irĩa wanenkere. Ndajioire na gĩtambaa ndajiga wega. 21Nĩndagũkĩrire nĩũntũ ũrĩ wa nkoro mbũmũ. Ũjũkagia irĩa itĩ jiaku na ũgaketha kũrĩa ũtĩandĩte.’ 22Mũnene agĩcokeria ntungata atĩrĩ, ‘Gwe ntungata ĩno ndũku! Ndĩgũtwĩra na jiugo jia kanyua gaku! Nĩ waijĩ atĩ ndĩ muntũ ũrĩ nkoro mpũmũ, njũkagia irĩa itĩ jiakwa na ngaketha kũrĩa ntĩandĩte. 23Nĩmbi ĩndĩ yagiririe wiga mbeca jiakwa mbanki, nĩkenda rĩrĩa nkeja mbĩthĩra ijiarĩte baita?’ 24Mũnene ũu akĩĩra atetheria barĩa barũngi au, ‘Jũkiani mbeca iu arĩ najio bũnenkere ũrĩa ũjiarithanĩtie maita ĩkũmi.’ 25(Nabo bakĩmwĩra, ‘Mwathi; anga atĩ na ta jio maita ĩkũmi!’) 26Nawe akĩbacokeria, ‘Ndĩbwĩra atĩrĩ, muntũ wonde ũrĩ na into akongerwa jiĩngĩ nyingĩ, ĩndĩ ũrĩa ũtĩ najio agatunywa o na tũrĩa tũnini arĩ natu. 27Nabo anthũ bakwa barĩa batendete ntwĩka mũnene wao rĩ, bareteni aa bũbaũragĩre aa mbere yakwa.’”
Jesũ gũkũngũĩrwa agĩtonya Jerusalemu
(Mat 21.1-11; Mar 11.1-11; Joh 12.12-19)
28Jesũ akũrĩkia kwaria nteto iu nĩ athiire mbere na rũgendo, erekerete Jerusalemu. 29Na rĩrĩa akinyire Kĩrĩmani kĩa Mĩolĩbu#19.29 Mĩolĩbu: mĩtĩ ĩkari ta mĩthoroma, mpĩndĩ jiayo nĩ irutagwa maguta. , akuĩ na Bethifage na Bethania, agĩtũma arutwa bae baĩrĩ, 30akĩbeera, “Thini ntũũrani ĩrĩa ĩrĩ mbere yenu. Bwatonya ku bũkona njaũ ya ntigiri ĩtanakamata muntũ, ĩrĩ ndaĩke. Mĩthaũreni bũmĩrete aa. 31Muntũ akeja kũbũũria, ‘Bũrĩmĩthaũra nĩkĩ?’ Buge atĩrĩ, ‘Mwathani arĩ na bata nayo.#19.31 Mwathani arĩ na bata nayo. :Kana: Mwene arĩ na bata nayo. ’”
32Arutwa bau bakĩthi bakĩthĩra gũkari o ta bũrĩa Jesũ aberĩte. 33Na rĩrĩa bathaũraga njaũ ĩu, eene yo bakĩbaũria atĩrĩ, “Bũrĩthaũra njaũ ĩu nĩkĩ?”
34Nabo bakĩbacokeria, “Mwathani arĩ na bata nayo.” 35Bakirĩra Jesũ njaũ ĩu, bagĩcoka bakĩmigĩĩra nguo jiao mũgongo na bagĩtũia Jesũ ĩgũrũ rĩayo. 36Akĩthi akamatĩtwe nĩ njaũ ĩu, nabo antũ bakĩthi bakĩaraga nguo jiao njĩrani.
37Na rĩrĩa akuĩrĩrie mũjiĩ mũnene wa Jerusalemu, emanĩrĩte njĩra ya Kĩrĩma kĩa Mĩolĩbu, arutwa bae bonde nĩbambĩrĩrie gũkũngũĩra na gũkumia Ngai na mũgambo mũnene nĩũntũ bwa jiama jionde ssirĩa baarĩ bakwona, 38bakiugaga, “Kũtharimwa nĩ Mũnene ũrĩa wĩjĩte na riĩtwa rĩa Mwathani! Ũkiri bũrogĩa ĩgũrũ matũni, nawe Ngai ajũkie ũkumio!”
39Afarisai bamwe barĩa baarĩ kĩrĩndĩni bakĩĩra Jesũ atĩrĩ, “Mũrutani, ĩra arutwa baku bakire.”
40Jesũ akĩbacokeria akĩbeera, “Ndĩbwĩra atĩrĩ, o na baba bagakira, maiga mama no maugĩĩrie.”
Jesũ kũrĩrĩra Jerusalemu
41Rĩrĩa Jesũ akuĩrĩrie taũni nene akĩwona, nĩ arĩrire nĩũntũ bwa yo, 42akiugaga, “Kethĩrwa atũũri baku o nabo no bamenye ũmundĩ ũũ maũntũ marĩa maretaga ũkiri! Ĩndĩ rĩu nĩ bwithĩtwe, bũtĩgũtaũkĩrwa! 43Atĩrĩ, kwĩna kagiita gagakinya anthũ benu babũcĩgĩrĩrie na ndingo jia nyambo na mĩtaro, babwatĩke mĩena yonde, 44babũthirie amwe na jiana jienu, na gũtĩ ĩiga rĩa nyomba jienu rĩgatigwa ĩgũrũ rĩa rĩrĩa rĩngĩ, nĩ tontũ bũtaũmbire kũmenya rĩrĩa Ngai abũreterete wonokio!”
Jesũ gũtonya Hekarũni
(Mat 21.12-17; Mar 11.15-19; Joh 2.13-22)
45Rĩu Jesũ nĩ atonyire Hekarũni na akĩambĩĩria kũrutũrũra antũ barĩa bendagĩria into ku, 46akĩberaga, “Nĩ kwandĩkĩtwe, ‘Nyomba yakwa ĩgatuĩka nyomba ya kũrombagĩrwa’; ĩndĩ bwiũ bũmĩtuĩte ĩkurungu rĩa atunyani.”
47Jesũ nĩ arutanaga kũu Hekarũni o ntukũ o ntukũ. Nabo athĩnjĩri Ngai barĩa anene na arutani ba Watho na atongoria ba mwingĩ nĩbacũaga bũrĩa bankĩmũũraga. 48Ĩndĩ bakĩaga bwa kũrũtha, nĩũntũ antũ bonde nĩbamũthikĩrĩtie mũno, na batendaga gwĩtũkwa nĩ kiugo o na kĩmwe.
Actualmente seleccionado:
Luka 19: LUKA
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
God's word open for all
©Bible Society of Kenya, 2021
