GÉNESIS 11

Babel torreta shayachishcamanta

1Cai pachapi causaccunaca shuclla rimaitami rimac carca. 2Inti llucshina llactamanta llucshishpaca, Sinar llactapimi shuc jatun pambata tarishpa, chaipi causai callarirca. 3Paicuna yuyarinacushpaca: «Jacuchic, ladrillota ruhuashpa, ninapi cusashunchic» ninacurca. Chashnami paicunaca rumipac randica ladrillohuan, turupac randica asfaltohuan ruhuarca. 4Chai quipaca: «Cunanca, shuc pueblotapish, jahua pachaman alto shuc torretapish chayachingapac jacuchic. Shina ruhuashpami, mana caita chaita rishpa, cai pachapica tucui gentecunapac alli nishca causashun» ninacurca.

5Chaimantami Mandac Diosca runacuna ruhuacuc pueblotapish, jatun torretapish ricungapac urai shamurca. 6Mandac Diosca: «Paicunaca shuc shinalla tucushpami shuc rimaillata charincuna. Chaimantami caita ruhuanata callarishca. Cai ruhuaitaca imapish mana jarcai pudingachu. 7Cunanca, paicunapac rimaita chican chicanta ruhuangapac urai rishunchic. Shina ruhuacpimi, caishuc chaishuc imata rimacushcata mana entendingacuna» nirca.

8Chashnami Mandac Diosca paicunata cai pachapi caita chaita cachashpa, chai llactata ruhuanata saquichirca. 9Mandac Diosca paicunapac rimaita chican chicanta ruhuashpami, chai llactataca Babelta shutichirca. Chai llactamantami tucui cai pachata shic-huarishpa causagrirca.

Sempac huahua huahuacunamanta

(1 Cr 1.24-27)

10Caicunami Sempac huahua huahuacunaca. Semca yacu juizhu tucurishca ishcai huata quipa, patsac huatayuc cashpami, Arfaxad churita charirca. 11Semca Arfaxad churita charishca quipaca, pichca patsac huatata causashpami churicunatapish, ushicunatapish charirca.

12Arfaxadca quimsa chunga pichca huatayuc cashpami, Sela churita charirca. 13Arfaxadca Sela churita charishca quipaca, chuscu patsac quimsa huatata causashpami churicunatapish, ushicunatapish charirca.

14Salaca quimsa chunga huatayuc cashpami Heber churita charirca. 15Salaca Heber churita charishca quipaca, chuscu patsac quimsa huatata causashpami churicunatapish, ushicunatapish charirca.

16Heberca quimsa chunga chuscu huatayuc cashpami, Peleg churita charirca. 17Heberca Peleg churita charishca quipaca, chuscu patsac quimsa chunga huatata causashpami churicunatapish, ushicunatapish charirca.

18Pelegca quimsa chunga huatayuc cashpami, Reu churita charirca. 19Pelegca Reu churita charishca quipaca, ishcai patsac iscun huatata causashpami churicunatapish, ushicunatapish charirca.

20Reuca quimsa chunga ishcai huatayuc cashpami, Serug churita charirca. 21Reuca Serug churita charishca quipaca, ishcai patsac canchis huatata causashpami churicunatapish, ushicunatapish charirca.

22Serugca quimsa chunga huatayuc cashpami, Nacor churita charirca. 23Serugca Nacor churita charishca quipaca, ishcai patsac huatata causashpami churicunatapish, ushicunatapish charirca.

24Nacorca ishcai chunga iscun huatayuc cashpami, Taré churita charirca. 25Nacorca Taré churita charishca quipaca, patsac chunga iscun huatata causashpami churicunatapish, ushicunatapish charirca.

26Tareca canchis chunga huatayuc cashpami Abram, Nacor, Harán churicunata charirca.

Tarepac huahua huahuacunamanta

27Tarepac huahua huahuacunaca: Abram, Nacor, Haranmi carca. Haranca Lot churitami charirca.

28Haranca paipac taita Taré manarac huañucpimi, pai huacharishca caldeocuna causana Ur llactapi huañurca.

29Abrampish, Nacorpish cazararcami. Abrampac huarmica Saraimi carca. Cutin Nacorpac huarmica Milcami carca. Haranca Milcapacpish, Iscapacpish taitami carca. 30Saraica mana huahuata chari pudic cashpami, mana huahuayuc carca.

31Tareca paipac churi Abramtapish, paipac nieto Lottapish, paipac nuera Saraitapish pushashpami, caldeocuna causana Ur llactamanta llucshirca. Shinami Harán llactaman chayashpa, chaipi causai callarirca. 32Tareca ishcai patsac pichca huatata causashpami, Harán llactapi huañurca.

Actualmente seleccionado:

GÉNESIS 11: QCA10

Destacar

Copiar