उत्पत्ति 6
6
नोआए पलोर्बै नाँ बाडि
1लिउँइँ ह्युलर म्हिमैं ल्हें तदै ह्यामा चमैंल च्हमिमैं फिइ। 2झाइले परमेश्वरए च्हमैंइ म्हिमैंए च्हमिमैं छ्याँब् म्रोंसि ह्रों-ह्रोंसइ खोबै प्ह्रेंस्योमैं पखइ। 3छतमा याहवेहजी बिइ, “ङइ म्हिमैंलाइ खोंयोंन् बिलै सोल् पिंरिब् आरे, तलेबिस्याँ म्हि सिल् त्हुब्मुँ। तारेसेरो चमैं प्रसे ङ्हिस्यु बर्ष मत्त्रे सोब्मुँ।”
4च त्हेर नेरो लिउँज्यै या पृथ्बीरि नेफिलिममैं मुँल। परमेश्वरए च्हमैं म्हिमैंए च्हमिमैं ङाँर ह्याब्रें लसि प्हसेमैं फिइ। चमैंन् स्योंम्बै भोंब्मैं-खाँब्मैं नेरो मिं कालिदिब्मैं मुँल।#अयू १:६; २:१#गन्ती १३:३३
5पृथ्बीरि म्हिमैंइ ल्हें आछ्याँबै केमैं लब्रें लइ। धै खोंयोंन् बिलै चमैंइ आछ्याँबै ताँमैं मत्त्रे मैंरिब याहवेहजी म्रोंइ। 6छतमा “ङइ तले म्हिमैं बनेसि पृथ्बीर थेंगे?” बिसि याहवेहजी पछुत लसि बेल्ले सैं नइ। 7छतसि याहवेहजी बिइ, “ङइ बनेबै म्हिमैं, सर क्ल्याँसि प्रबै प्हँलाँ-प्हुँलुमैं, क्ह्योंर टिबै खेदोमैं नेरो मुर्बै नमेमैं ताँन् पृथ्बीउँइँले नास लवाब्मुँ। तलेबिस्याँ चुमैं बनेबइले ङए सैं नइमुँ।”
8दिलेया नोआलाइ बिस्याँ याहवेहजी छ्याँब म्रोंइ।#मत्ती २४:३७; लूक १७:२६; १ पत्र ३:२०
नोआए ताँमैं
9नोआए ताँमैं चुन् ग। चए पलोर नोआ मत्त्रे छ्याँबै के लबै म्हि मुँल। च परमेश्वरने बा-बालुन् प्रमल। 10नोआइ शेम, हाम नेरो येपेत बिबै च्ह सौंलो योंइ।#२ पत्र २:५ 11दिलेया पृथ्बीर खन्तोंदोंन् सैब् म्लोब् लब नेरो आछ्याँबै सैइ प्लिंब परमेश्वरजी म्रोंइ। 12छले पृथ्बीर्बै म्हिमैं सैब् म्लोब् नेरो आछ्याँबै के लब परमेश्वरजी म्रोंइ। तलेबिस्याँ पृथ्बीर्बै ताँन् म्हिमैंए सैं दुष्ट तल् खाँल।
13छतसि परमेश्वरजी नोआने बिइ, “ङइ ताँन् म्हिमैं नास लवाबै सैं लल् खाँइमुँ। तलेबिस्याँ चमैंइ लबै आछ्याँबै केमैंइ पृथ्बी प्लिंइमुँ। छतसि ङइ चमैंलाइ पृथ्बीउँइँले नास लवाम्। 14छतसि क्हिइ गोपेर बिबै सिंए क्यु झाज घ्रि बनेद्। झाजर कोठा-कोठा लसि च न्होंर नेरो फिर अलकत्राइ स्यालद्। 15क्हिइ च झाज छले बनेदु: झाज प्रसे प्लिच्यु मिटर ह्रिंब, ङ्हिस्युसे सों मिटर प्ल्हाब नेरो च्युसे ङ्हिं मिटर नुब लद्। 16झाजर मि म्रोंरिगे बिसि तिउरु वाथेंसि स्युद्। झाज तल सोंबै बनेद्। चए रेर म्रा घ्रि थेंन्।”
17“मु न्होंर्बै ताँन् सो प्ह्याबै सैमैं नास लवाबर ङइ पृथ्बीर नाँ बाडि कुलब्मुँ, धै पृथ्बीर मुँबै ताँन् सो प्ह्याबै सैमैं सियाब्मुँ। 18दिलेया ङइ क्हिने बाछा फैब्मुँ। क्हि, क्हिए प्ह्रेंस्यो नेरो क्हिए च्ह-चोंमैं ताँन् क्यु झाज न्होंर होंब्मुँ।
19“झाइले सो प्ह्याबै ताँन् खालर्बै त्होब नेरो मोंमा क्हिने बालुन् सोरिगे बिसि तिजोर-तिजोर क्यु झाजए न्होंर पखो। 20ताँन् खालर्बै नमेमैं, खेदोमैं नेरो सर क्ल्याँसि प्रबै ताँन् प्हँलाँ-प्हुँलुँमैं तिजोर-तिजोर क्हिने बालुन् सोरिगे बिसि झाजर न्होंर पखो। 21ह्रोंसए ल्हागिर नेरो ताँन् खालर्बै सो प्ह्याबै सैमैंइ चबै ल्हागिर ताँन् खालर्बै चबै सै पसि क्हिने बालु थेंन्।” 22परमेश्वरजी बिब् धोंले नोआइ ताँन् लइ।#हिब्रू ११:७
Actualmente seleccionado:
उत्पत्ति 6: GCMB
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2020, Wycliffe Bible Translators, Inc. All rights reserved.
