San Juan 9

Jesús sana a un ciego de nacimiento

1Ni̱ ngaa gachin Jesús ganꞌanj sij, ni̱ guiniꞌi sij ꞌngo̱ tsínj duri. Ni̱ duri síꞌ asi̱j gaꞌnga síꞌ. 2Ngaa ni̱ nachínj snanꞌanj ni tsínj nicoꞌ Jesús gataj ni síꞌ:

―Maestro, u̱n sin huin ni̱ gaꞌnga duri tsínj nan únj. Asi̱ si-ga̱quinꞌ chrej sij guiꞌyaj níꞌ. Asi̱ si-ga̱quinꞌ manꞌan sij guiꞌyaj sa̱ꞌ. ―Daj gataj ni sij.

3Ngaa ni̱ gataj Jesús:

―Sé xiꞌí si-ga̱quinꞌ sij huin mánj. Ni̱ sé xiꞌí si-ga̱quinꞌ chrej sij nga̱ nni sij huin mánj. Maan si huin ruhua Yanꞌanj sisi̱ gui̱niꞌi ni ngüi̱ da̱j ga̱ꞌue gui̱ꞌyaj sa̱ꞌ Yanꞌanj nga̱ sij. 4Ne̱ꞌ guníꞌyanjan ni̱ hua nia̱n gui̱ꞌyaj néꞌ si-sun si gaꞌníj gaꞌnāj chruhua xungüi̱ nan. Daj si ngaa ꞌna̱ꞌ gui̱ni, ni̱ na̱ꞌue gui̱ꞌyaj sun ni̱ a̱ ꞌngo̱ néꞌ ga̱ mánj. 5Ni̱ ngaa nnēj chruhua xungüi̱ nan, ni̱ da̱j rúnꞌ huin ꞌngo̱ yanꞌa̱n xigui̱n huīnj chruhua xungüi̱ aj. ―Daj gataj Jesús rian ni tsínj nicoꞌ sij.

6Ni̱ ngaa guisíj gaꞌmi Jesús nuguanꞌ daj, ni̱ garáj staꞌnunj sij rian yoꞌój. Ni̱ guiꞌyaj sij do̱j sigeꞌ nga̱ dane staꞌnunj sij. Ni̱ garun sij rian tsínj duri daj. 7Ngaa ni̱ gataj Jesús gunun síꞌ:

―Güi̱j na̱ꞌninꞌ re̱ꞌ rián re̱ꞌ pozo nnee gu̱ꞌnaj Siloé. ―Daj gataj Jesús. (Ni̱ nuguanꞌ Siloé huin ruhuaj gata: Nnee ꞌna̱ꞌ anéj chrej, guiꞌyaj ni sij.) Ngaa ni̱ ganꞌanj na̱ꞌninꞌ tsínj duri daj rian sij chruhua nnee daj. Ni̱ ngaa nanica̱j sij, ni̱ hua gaꞌue niꞌyaj sij.

8Ni̱ hua guiniꞌi ni ngüi̱ huin dugüiꞌ tsínj daj gane tsínj daj gachínj sij caridad. Ngaa ni̱ nachínj snanꞌanj ni sij ni dugüiꞌ ni sij. Ni̱ gataj ni sij:

―Ni̱ sé tsínj nan huin tsínj nne achínj caridad, ruhua á re̱ꞌ a̱ꞌ. ―Daj gataj ni sij.

9Ngaa ni̱:

―Hué sij huin. ―Gataj go̱ꞌngo ni sij.

Ni̱ gataj ango ni sij:

―Sé sij huin nu̱nj si hué daj hua sij. ―Gataj ango ni sij.

Sani̱ gataj manꞌan tsínj daj:

―Huēj huin aj. ―Gataj síꞌ.

10Ngaa ni̱ nachínj snanꞌanj ni sij síꞌ. Ni̱ gataj ni sij:

―Da̱j guiꞌyáj re̱ꞌ ni̱ gaꞌue naxíꞌnij rián re̱ꞌ únj. ―Gataj ni sij.

11Ngaa ni̱ gataj tsínj daj:

―Tsínj gu̱ꞌnaj Jesús ni̱ guiꞌyaj síꞌ sigeꞌ. Ni̱ garun síꞌ riānj. Ni̱ gataj sij gunūn: “Ga̱nꞌanj na̱ꞌnij re̱ꞌ pozo nnee gu̱ꞌnaj Siloé.” Daj gataj sij gunūn. Ngaa ni̱ ngaa guisíj ganꞌanj naꞌníj riānj chruhua nnee daj, ngaa ni̱ naxíꞌnij riānj aj. ―Gataj tsínj daj gunun ni sij.

12Ngaa ni̱ nachínj snanꞌanj ni sij síꞌ. Ni̱ gataj ni sij:

―Ni̱ a̱ nne tsínj daj únj. ―Gataj ni sij.

―Nun niꞌīnj ni̱ a̱ nne síꞌ. ―Gataj tsínj daj.

Los fariseos interrogan al ciego sanado

13Hué dan ni̱ nicaj ni sij tsínj ga duri daj ganꞌanj ni sij rian ni tsínj fariseo. 14Ni̱ güi naránj ruhua ni ngüi̱ israelita huin ngaa guiꞌyaj Jesús sigeꞌ, ni̱ ganahuin tsínj duri daj. 15Ni̱ nachínj snanꞌanj ni síꞌ da̱j guiꞌyaj sij nahuin rian sij. Ngaa ni̱ gataj sij:

―Garun ꞌngo̱ tsínj daj sigeꞌ riānj. Ni̱ ganꞌanj na̱ꞌnij riānj. Ni̱ yya̱j ni̱ xigui̱n niꞌyā nánj. ―Daj gataj sij.

16Ngaa ni̱ gataj go̱ꞌngo ni tsínj fariseo:

―Tsínj guiꞌyaj nan ni̱ sé rian Yanꞌanj ꞌna̱ꞌ sij mánj. Daj si nitaj si níꞌyanj sij nga̱ güi naránj ruhua néꞌ mánj. ―Daj gataj go̱ꞌngo ni sij.

Sani̱ gataj ango ni sij:

―Si̱ gaꞌue gui̱ꞌyaj sij si sa̱ꞌ nico da sisi̱ huin sij tsínj daꞌui gaquinꞌ mánj. ―Daj gataj ango ni sij.

Ngaa ni̱ gaꞌmi guitsi manꞌan ni sij xiꞌí Jesús. 17Yuꞌuj daj gataj ru̱huaꞌ yún ni sij rian tsínj daj:

―Da̱j ga̱taj manꞌán re̱ꞌ xiꞌí tsínj guiꞌyaj naxiꞌníj rián re̱ꞌ únj. ―Daj gataj ni sij.

Ngaa ni̱:

―Güendāj ni̱ hué sij huin ꞌngo̱ tsínj aꞌmi si-nu̱guanꞌ Yanꞌanj, ruhuāj aj. ―Gataj tsínj daj xiꞌí Jesús.

18Sani̱ nun gu̱xuman ruhua ni tsínj israelita sisi̱ hua yya ga duri tsínj daj, ni̱ naxiꞌníj rian sij. Yuꞌuj daj ni̱ gaquínj ni síꞌ chrej sij nej, nni sij nej, ga̱ꞌnaꞌ nu̱ngüej nica̱ sij rian ni síꞌ. 19Ni̱ nachínj snanꞌanj ni síꞌ. Ni̱ gataj ni síꞌ:

―Xa̱ngaꞌ daꞌníj nu̱ngüej é re̱ꞌ huin tsínj nan níꞌ. Ni̱ xa̱ngaꞌ gaꞌnga duri sij níꞌ. Asa̱ꞌ ga̱ꞌue ni̱ꞌyaj sa̱ꞌ sij, ruhua nu̱ngüej é re̱ꞌ únj. ―Daj gataj ni síꞌ.

20Ngaa ni̱ gataj nu̱ngüej nica̱ sij:

―Niꞌi yya únj sisi̱ daꞌníj únj huin síꞌ. Ni̱ niꞌi yya únj sisi̱ gaꞌnga duri síꞌ nej. 21Sani̱ nun niꞌi únj u̱n sin guiꞌyaj, ni̱ niꞌyaj sa̱ꞌ sij yya̱j. Ni̱ nun niꞌi únj u̱n tsínj guiꞌyaj, ni̱ naxiꞌníj rian sij. Na̱chinj snanꞌanj ni é re̱ꞌ sij si achij sij. Ni̱ ga̱ꞌmi sij xiꞌí manꞌan sij. ―Daj gataj nu̱ngüej nica̱ sij.

22Hué daj gaꞌmi nu̱ngüej sij si xuꞌuiꞌ sij niꞌyaj sij ni tsínj israelita. Daj si uyan hua gaꞌmi ni tsínj israelita sisi̱ gui̱ri ni síꞌ ne̱ꞌ chrej xe̱ꞌ go̱ꞌngo tsínj ma̱n chruhua nuhui ga̱taj sisi̱ Jesús huin Cristo. 23Xiꞌí daj gataj chrej sij nga̱ nni sij:

―Na̱chinꞌ snanꞌanj ni é re̱ꞌ sij si hua achij sij. ―Daj gataj nu̱ngüej sij.

24Ngaa ni̱ naquínj ru̱huaꞌ yún ni tsínj israelita tsínj gahuin duri daj. Ni̱ gataj ni sij:

―Ga̱taj ni̱ca yyá re̱ꞌ rian Yanꞌanj da̱j guiránꞌ re̱ꞌ. Daj si niꞌi ni únj sisi̱ tsínj daj huin ꞌngo̱ tsínj daꞌui gaquinꞌ. ―Daj gataj ni sij.

25Ngaa ni̱ gataj tsínj gahuin duri daj:

―Nun niꞌīnj sisi̱ daꞌui sij gaquinꞌ. Urin si niꞌīnj sisi̱ durīj, ni̱ hua aꞌue niꞌyā ruhuāj nánj. ―Daj gataj sij.

26Ngaa ni̱ nachínj snanꞌanj ru̱huaꞌ yún ni sij. Ni̱ gataj ni sij:

―Da̱j guiꞌyaj sij, ni̱ naxiꞌníj rián re̱ꞌ, guiꞌyaj sij únj. ―Daj gataj ni sij.

27Ni̱ gataj sij:

―Hua gatā gunun ni é re̱ꞌ, sani̱ naꞌue gu̱nun ni é re̱ꞌ mánj. Ni̱ u̱n sin huin ruhua ni é re̱ꞌ, ni̱ na̱taꞌ ru̱huaꞌ yūnj gu̱nun a ni é re̱ꞌ, ruhua á re̱ꞌ únj. Ni̱ gui̱nicoꞌ ni é re̱ꞌ manꞌan sij, ruhua á re̱ꞌ níꞌ. ―Daj gataj tsínj daj.

28Ngaa ni̱ gaꞌmi quij ni sij gataj ni sij gunun tsínj daj:

―Manꞌán re̱ꞌ nicoꞌ tsínj daj, sani̱ nicoꞌ ni únj Moisés. 29Niꞌi ni únj sisi̱ gaꞌmi Yanꞌanj nga̱ Moisés. Sani̱ nun niꞌi ni únj ni̱ a̱ ꞌna̱ꞌ tsínj da mánj. ―Daj gataj ni sij.

30Ngaa ni̱ gataj tsínj gahuin duri daj:

―Gahuin yanꞌanj ruhuāj niꞌyā si-nu̱guanꞌ ni é re̱ꞌ. Daj si nun niꞌi ni é re̱ꞌ ni̱ a̱ ꞌna̱ꞌ sij. Ni̱ hué sij guiꞌyaj naxiꞌníj riānj. 31Niꞌi sa̱ꞌ néꞌ sisi̱ nitaj si unun Yanꞌanj nuguanꞌ achínj jniꞌyaj ni ngüi̱ daꞌui gaquinꞌ rian Yanꞌanj mánj. Sani̱ sisi̱ nu̱n yanꞌanj néꞌ rian Yanꞌanj, ni̱ sisi̱ ꞌyaj néꞌ si huin ruhua Yanꞌanj, ni̱ unun Yanꞌanj si achínj jniꞌyaj néꞌ rian Yanꞌanj anj. 32Nitaj a̱man gunun néꞌ nuguanꞌ sisi̱ naxiꞌníj rian ꞌngo̱ tsínj gaꞌnga duri, guiꞌyaj ꞌngo̱ tsínj da mánj. 33Ni̱ a̱ ꞌngo̱ rasu̱n sa̱ꞌ si̱ gaꞌue gui̱ꞌyaj tsínj daj sisi̱ sé rian Yanꞌanj ꞌna̱ꞌ sij mánj. ―Daj gataj tsínj ga duri daj.

34Ngaa ni̱ gataj ni sij:

―Asi̱j gaꞌngá re̱ꞌ, ni̱ daꞌuí re̱ꞌ gaquinꞌ anj. Ngaa ni̱ huin ruhuá re̱ꞌ di̱gyán re̱ꞌ rian ni únj níꞌ. ―Daj gataj ni sij.

Ngaa ni̱ guiri ni sij síꞌ chruhua nuhui.

Ceguera espiritual

35Ngaa ni̱ gunun Jesús nuguanꞌ sisi̱ guiri ni sij tsínj daj chruhua nuhui. Ni̱ ngaa nacaj dugüiꞌ sij nga̱ síꞌ, ni̱ nachínj snanꞌanj sij síꞌ. Ni̱ gataj sij:

―Xuman ruhuá re̱ꞌ niꞌyáj re̱ꞌ daꞌníj Yanꞌanj níꞌ. ―Daj gataj Jesús.

36Ngaa ni̱ gataj síꞌ:

―Señor, ga̱taj re̱ꞌ u̱n tsínj huin daꞌníj Yanꞌanj, ngaa ni̱ gu̱xuman ruhuāj ni̱ꞌyā manꞌan síꞌ. ―Daj gataj tsínj daj.

37Ngaa ni̱ gataj Jesús:

―Hua guiniꞌí re̱ꞌ síꞌ si huēj huin síꞌ aꞌmī nga̱ re̱ꞌ aj. ―Daj gataj Jesús.

38Ngaa ni̱ gataj tsínj daj:

―Xuman ruhuāj niꞌīnj so̱ꞌ, Señor. ―Daj gataj sij ni̱ ganiquinꞌ ráj da̱coj sij rian Jesús.

39Ngaa ni̱ gataj Jesús:

―Gaꞌna̱ꞌ manꞌānj chruhua xungüi̱ nan sisi̱ na̱guiꞌyaj yyāj si-ga̱quinꞌ ni ngüi̱. Ni̱ xiꞌí ni tsínj nun niꞌi, ni̱ gui̱ꞌyā sisi̱ gui̱niꞌi ni sij. Daj si xacaj ni sij cuenta sisi̱ nun niꞌi ni sij. Ni̱ xiꞌí ni tsínj ataj sisi̱ niꞌi ni sij, sani̱ gui̱ꞌyā sisi̱ ga̱ránj rian ni sij. ―Daj gataj Jesús gunun ni sij.

40Ni̱ ngaa gunun go̱ꞌngo ni tsínj fariseo niquinꞌ yuꞌuj daj si gataj Jesús, ni̱ nachínj snanꞌanj ni sij síꞌ. Ni̱ gataj ni sij:

―Da̱j rúnꞌ hua tsínj aránj rian hua ni únj, ruhuá re̱ꞌ níꞌ. ―Gataj ni sij.

41Ngaa ni̱ gataj Jesús:

―Sisi̱ nun niꞌi a ni é re̱ꞌ, ni̱ nitaj gaquinꞌ daꞌui a ni é re̱ꞌ mánj. Sani̱ ri̱an ataj ni é re̱ꞌ yya̱j sisi̱ niꞌi ni é re̱ꞌ, xiꞌí daj ꞌngo̱ daꞌui ni é re̱ꞌ gaquinꞌ. ―Daj gataj Jesús gunun ni tsínj fariseo.

Actualmente seleccionado:

San Juan 9: trqNT

Destacar

Copiar