قْلّ 4

كَبِلَ نُن هَبِلَ

1عَدَ مَ نُن مَهَوَ تٌ كَقُ، مَهَوَ نَشَ تّيفّ. عٍ نَشَ دِ سْتْ نَشَن شِلِ كَبِلَ. مَهَوَ نَشّ، «عَلَتَلَ بَرَ ﭑ مَلِ دِ شّمّ سْتْقٍ رَ.» 2نَ شَنبِ مَهَوَ نَشَ كَبِلَ شَنبِرَتٌي شّمّمَ سْتْ نَشَن شِلِ هَبِلَ. شُرُ سٍ دّ مَدٌنيِ نَن نُ هَبِلَ رَ. بْشِ رَوَلِ نَن نُ كَبِلَ رَ.

3نَ تّمُي تٌ دَنفِ، كَبِلَ نَشَ قَ سَنسِ بٌفِ قَنفَدَ مَ رَ سّرّشّ بَدٍ عَلَتَلَ بّ. 4كْنْ هَبِلَ نَشَ قَ شُرُ سٍ دِ سِنفٍيٍ رَ نُن عٍ تُرٍ. هَبِلَ نُن عَ شَ سّرّشّ نَشَ رَقَن عَلَتَلَ مَ، 5كْنْ كَبِلَ نُن عَ شَ سّرّشّ مُ نُ رَقَن عَلَتَلَ مَ. عَلَتَلَ مُ عَ يَ تِ كَبِلَ شَ سّرّشّ رَ. نَ نَ عَ رَ، كَبِلَ نَشَ شْنْ، عَ يَتَفِ نَشَ مَسَرَ.

6نَ شَنبِ عَلَتَلَ نَشَ كَبِلَ مَشْرِن، «عِ شْنْشِ مُنقٍ رَ؟ عِ يَتَفِ مَسَرَشِ مُنقٍ رَ؟ 7شَ عِ قٍ قَنيِ رَبَ، ﭑ نَ تٌنفٌمَ نّ، كْنْ شَ عِ قٍ حَاشِ رَبَ، سٍنتَنّ عِ رَتَنتَنمَ نّ. عِ كَتَ، عِ شَ عِ يّتّ بَ عَ يِ رَ.»

8كَبِلَ نَشَ عَ قَلَ عَ شُنيَ بّ، «وٌن شّي شّ مَ.» عٍ تٌ سٌ شّ مَ، كَبِلَ نَشَ عَ شُنيَ هَبِلَ سُشُ، عَ نَشَ عَ قَشَ. 9نَ شَنبِ عَلَتَلَ نَشَ كَبِلَ مَشْرِن، «عِ شُنيَ هَبِلَ نَ مِندٍن؟» عَ نَشَ عَ يَابِ، «ﭑ مُ عَ كٌلٌن. قٌ ﭑ شَ مّينِ ﭑ شُنيَ مَ؟» 10عَلَتَلَ نَشَ عَ قَلَ، «عِ مُنسٍ رَبَشِ؟ ﭑ نَ عِ شُنيَ وُلِ فبٍلٍفبٍلٍ شُي مّقٍ كٍلِ بْشِ مَ. 11ﭑ بَرَ عِ دَنكَ بَرِ مَ عِ بَرَ عِ شُنيَ قَشَ. ﭑ عِ كٍرِ مَ نّ يِ بْشِ مَ عِ شُنيَ وُلِ نَ دّننَشّ. 12عِ نَ بْشِ رَوَلِ، عِ مُ بَلٌي سْتْمَ. عِ قِندِ مَ حّرّتِ نَن نَ.»

13كَبِلَ نَشَ عَلَتَلَ يَابِ، «نَ حَشَنكَتّ فبٌ ﭑ تَن بّ. 14شَ عِ بَرَ ﭑ كٍرِ يِ بْشِ مَ تٌ، وٌن تَفِ عِكُيَمَ نّ. ﭑ قِندِ مَ حّرّتِ نَن نَ. مِشِ نَشَن نَ سَ ﭑ تٌ، عَ ﭑ قَشَمَ نّ.» 15عَلَتَلَ نَشَ عَ يَابِ، «عَدٍ، شَ مِشِ يٌ عِ قَشَ، ﭑ عِ فبٍحْشْمَ نّ دْشْ سٌلٌقٍرٍ.» عَلَتَلَ نَشَ تْنشُمَ سَ كَبِلَ مَ عَلَكٌ شَ نَشَن سَ عَ تٌ عَ نَشَ نْ عَ فٍرٍدٍ.

16نَ تّمُي كَبِلَ نَشَ عَ مَكُيَ عَلَتَلَ رَ. عَ نَشَ سَبَتِ نٌدِ بْشِ مَ عٍدٍن قُفٍ رَ. 17كَبِلَ نُن عَ شَ فِنّ نَشَ كَقُ. عَ شَ فِنّ نَشَ تّيفّ، عَ نَشَ دِ سْتْ نَشَن شِلِ عٍنٌكِ. كَبِلَ نُ نَ تَا تِقٍ. عَ نَشَ عَ شَ دِ شِلِ سَ نَ تَا شُن مَ.

18عٍنٌكِ نَشَ عِرَدِ سْتْ. عِرَدِ، مٍشُيَيٍلِ بَبَ نَ عَ رَ. مٍشُيَيٍلِ، مٍتُسَيٍلِ بَبَ نَ عَ رَ. مٍتُسَيٍلِ، لَمٍكِ بَبَ نَ عَ رَ. 19لَمٍكِ نَشَ فِنّ قِرِن سْتْ، كٍرٍن شِلِ عَدَ، بٌورٍ شِلِ سِلَهِ. 20عَدَ نَشَ يَبَلَ سْتْ. يَبَلَ، شُرُ سٍ دّ مَدٌنيِيٍ نُن كِرِ بَنشِ كَنيِيٍ بَبَ نَ عَ رَ. 21يَبَلَ شُنيَ شِلِ يُبَلِ. يُبَلِ، كْرَ بْنبْييٍ نُن شُلٍ قٍيٍ بَبَ نَ عَ رَ.

22سِلَهِ قَن نَشَ دِ سْتْ. عَ شِلِ تُبَلِ كَبِلَ. شَبُي نَن نُ عَ تَن نَ. وَلِسٍ وُرٍ فبٍيلِ نُن وُرٍ دَاشِ مْولِ بِرِن شَبُي نَن نُ عَ رَ. تُبَلِ كَيِنِ شُنيَ فِنّمَ شِلِ نَمَ.

23لَمٍكِ نَشَ عَ قَلَ عَ شَ فِنّيٍ بّ، «عَدَ نُن سِلَهِ وٌ شَ وٌ هَاكّ تٌ ﭑ بّ. لَمٍكِ شَ فِنّيٍ، وٌ شَ وٌ تُلِ مَتِ ﭑ مَ وْيّنيِ رَ.

ﭑ بَرَ شّمّ ندٍ قَشَ فبٍحْشْي رَ.

ﭑ بَرَ نَ سّفّتَلَ قَشَ بَرِ مَ عَ بَرَ ﭑ مَشْنْ.

24شَ مِشِ سٌلٌقٍرٍ نَن قَشَمَ كَبِلَ فبٍحْشْقٍ رَ،

مِشِ تٌنفٌ سٌلٌقٍرٍ نُن سٌلٌقٍرٍ نَن قَشَمَ ﭑ تَن لَمٍكِ فبٍحْشْقٍ رَ.»

25عَدَ مَ نُن عَ شَ فِنّ نَشَ كَقُ. مَهَوَ نَشَ دِ سْتْ نَشَن شِلِ سٍتِ. عَ بَرَ نَ شِلِ سَ عَ شَ دِ شُن مَ بَرِ مَ عَلَ بَرَ عَ شَ دِ هَبِلَ حْشْي سٌ عَ يِ رَ كَبِلَ نَشَن قَشَ. 26سٍتِ قَن نَشَ دِ سْتْ نَشَن شِلِ عٍنٌسِ.

نَ وَشَتِ مِشِيٍ نَشَ عَلَتَلَ مَشَندِ قْلْ.

Actualmente seleccionado:

قْلّ 4: Soso

Destacar

Copiar