SAN MATEO 14
14
In imiquilis in Juan Tlacuatequiyani
1Ipan inon tonalten in Herodes, yehhua in hueyixtoc den Galilea, huan oquinonotzque ica in Jesús. 2Huan oquiniluic in aquin inuan ocahcatca:
―Yehhuatl in Juan Tlacuatequiyani oihsac den mijcamen, huan ic inon quipiya in chicahualistli mahuestic.
3In Herodes ijcon oquihto tleca otlatequiuti maquihuicac in Juan tlalpili ipan in telpiloyan. Ijcon oquichiu ipampa in Herodías, yeh in aquin achto isihuau in Felipe, icniu in Herodes. Huan oquisihuacuili inon Herodes. 4In Juan oquiluihtoya in Herodes:
―Ahmo mitzcahuilihtoque ticpiyas quen mosihuau.
5In Herodes quimictisquiyani in Juan, huan omomouti ica in tlacamen. Tleca nochten oquinehnehuilihque in Juan noyojqui se tetlayolchicaucau in Dios. 6Huan ihcuac in itonal isanto in Herodes, in ichpocau inon sihuatl Herodías oya mihtohtiya inixpa in itetlatlautiluan, huan tequin oquipacti in Herodes. 7Huan in ichpocatl oquicaquilti quimacas quen itetlocolil in tlen quitlahtlanilis. 8Huan quen oquitequiuti in inana, oquiluic in Herodes:
―Nicnequi matlatequiutilo maquimictican in Juan Tlacuatequiyani. Nicmatis tla nele oquimictihque, nechualiquilisque itzonteco ipan se plato.
9Oncan otlocox in Herodes, huan quen yoquicaquiltihtoya inon ichpocatl huan noyojqui oquicajque itetlatlautiluan in hueyixtoc, oncan otlatequiuti maquimacacan. 10Otlatequiuti in hueyixtoc maquiquechtzontequican in Juan ipan in telpiloyan. 11Niman ocualiquilihque inon itzonteco Juan ipan se plato huan oquimacaque in ichpocatl. Huan yehhuatl oquimacti in inana.
12Oncan oahsitohque in itlamachticahuan in Juan huan oquihuicaque in itlacayo huan oquitlaltocaque. Huan satepa otenahuatihque in Jesús.
In Jesús quintlamacalo in macuili mil tlacatl
13Ihcuac in Jesús omomat in tlen oquinehnehuili in Herodes ica Yehhuatzin, oquixohuac de ompa huan ohuilohuac ipan se barco. Huan oahxihuac ipan in acahualtlahtli. Huan in tlacamen niman oquimatque huan ohualquisque den altepemen huan ohualnehnenque teixnamiquitohque canin oahxihuato. 14Huan ic oquixohuac in Jesús ipan in barco, omotac miyac tlacamen huan inca otlocoyaloc. Huan omopahtihque in cocoxcamen tlen otehualiquilihque. 15Huan quen yotlapoyautaya, tehhuan titetlamachticahuan otitenahuatihque in Jesús:
―Yitiotlac huan ahmo aquin chanti nican. Xiquinnahuati in tlacamen mayacan ipan in altepemen huan maquicohuacan tlen quicuasque.
16In Jesús otechiluiloc:
―Ahmo mayacan. Xiquintlamacacan namehhuan.
17Tehhuan otiteiluihque:
―Ahmo ocachi tlen ticpiyahque san macuili pantzin huan ome michten.
18In Jesús otechiluiloc:
―Xinechualiquilican nican.
19Oncan omonahuatihque in tlacamen mamotlalican ipan sacatl. Niman omoan in macuili pantzin huan in ome michten. Huan oahcotlachiyaloc huan omotlasohcamatiloc ica in Dios huan omoxeluihque tehhuan titetlamachticahuan matiquinxeluican ica nochin tlacamen. 20Nochten otlacuahque huan opachiuque huan satepa otiquintemiltihque in mahtlactli huan ome canastas ihuan in cohcotonque tlen omocau. 21In aquin otlacuahque ocatcahque cana macuili mil tlacatl, huan ahmo pohuihque in sihuamen huan in cocone.
In Jesús nehnemohua iixco in atl
22Niman in Jesús otechtequiutiloc tehhuan titetlamachticahuan matitlehcocan ipan in barco huan matiteyecanacan ic sentlapal, huan Yehhuatzin monahuatiyahque in tlacamen. 23Huan queman omonahuatihque in tlacamen, in Jesús otlehcoloc ipan in tepetl ic moyolmachtilo tesel. Ic otlayohuac in Jesús ompa omocahualoc tesel. 24Huan ic oyahtaya inon barco inepanco in atl, ipan ohualmixuitecticatca in atl ipan in barco, tleca in yehyecatl oquixnamicticatca. 25Inon huehca sancuel, in Jesús omohualpacholoc inahuac, nehnemohuatihuitz iixco in atl. 26Huan ihcuac tehhuan titetlamachticahuan otiteitaque nehnemohuatiu iixco in atl, otitzahtzihque ica moucayotl:
―Inon san se nemohmoutilistli.
27Huan Jesús otechnotzalo huan otechiluiloc:
―¡Ximoyolchichuacan huan ahmo ximomoutican! Nehhuatl niJesús.
28Oncan in Pedro otenotz huan oteiluic:
―Notecohtzin, in tla Tehhuatzin, manechtequiutilo niyas iixco in atl hasta canin ilohuac.
29Huan Jesús omoluic:
―Tel, xihualau.
Oncan Pedro otemoc ipan in barco huan opeu nehnemi iixco in atl ic oteahsitaya in Jesús. 30Huan ic oquichiu cuenta ica in chicahualoca in yehyecatl, omomouti, huan quen yopeu moatoca, otzahtzic:
―¡Manechmaquixtilo, Notecohtzin!
31Niman in Jesús omomaquitzqui huan omoluic:
―¡Tequin chihton motlaneltoquilis ticpiya! ¿Tleca ahmo otinechneltocac?
32Ihcuac yehhuan otlehcohque ipan in barco niman omosehui in yehyecatl. 33Oncan tehhuan aquin oticatcahque ipan in barco otimotlancuaquetzque teixpa in Jesús huan otiteiluihque:
―Ic nele Tehhuatzin tiTeconetzin in Dios.
In Jesús mopahtiyahque in cocoxcamen ipan in tlali Genesaret
34Oticcholuihque in atl huan otiahsitohque ipan in tlali Genesaret. 35Ihcuac in tlacamen de inon tlali oteixmatque in Jesús, oquinnahuatihque in tlacamen nohuiyan, huan oquinualicaque nochin cocoxcamen canin oilohuaya. 36Otetlatlautihque mamocahuilican quimachilisque tetlaquen. Huan opahtihque nochten in aquin oquimachilihque.
Actualmente seleccionado:
SAN MATEO 14: ncj
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 1979, Wycliffe Bible Translators, Inc. All rights reserved.