San Mateo 3
3
Juan Bautist basule' xtidx Dios loj rebejṉ
(Mr. 1:1‑8; Lc. 3:1‑9, 15‑17; Jn. 1:19‑28)
1Neṉ redxejga biääd Juan Bautist lo reyubijdz xten guedx Judea, ro'c cagulijdxni, 2cayäjpni:
―Coḻgusiechlajztu rextojḻtu sa'csi xcäḻrnibee Dios abidzuṉgajxhni.
3Juan najc nani basä't Isaías, te niguii ni gunii xtidx Dios, cheni bacuaani:
Riejn xse' te ni rbedxa' nez lo reyubijdz:
“Coḻguslii xnezyuj Dad, coḻguslii xnezyulajzni.”
4Najcw Juan xquichlajd cameii. Naliib te duguijd xque'ni. Rajwni guxha't näjza dzujn xten baseerguijxh. 5Riääd rebeṉ guedx Jerusalén näj guiraa rebeṉ Judea näjza rebejṉ ni tre' gajxh nez ro' gueu Jordán, riädcuadiajgreni xtiidxni. 6Che ruxhobdojḻreni xtojḻreni, rutiobnis Juanreni ro' gueu Jordán.
7Che bahuiini siääd xhidajl rebeṉ guidoo ni najc refarisee näjza ni najc resaducee, rlajzreni gutiobnisnireni, räjpni lojreni:
―La'tu beṉguidxduxh, najctu si'c bäḻ. ¿Chu balijdxtu guxuṉtu loj xcäḻrdxe'ch Dios ni siääd? 8Coḻguibaṉsa'c si'cni nungäjḻ te fiipac rebejṉ guliipac abasiechlajztu. 9Na'c litis guntu xhigab naatu: “¡Ni nurnu najcnu rexagdoo toAbram!” Rniliä lojtu, sajc xca' Dios reguijre gunni gacreni rexi'n toAbram. 10Asojb guibyajg lo xlobaa reyajg, luxh guiraa reyajg nani di ninexhsa'c xcaj lojni, sidinni te checni. 11Narä guliicani rustiobnisä con nis si'c te seen cheni abasiechlajztu, abaxhobdojḻtu. Niluxh nani siääd detzä sutiobnisni la'tu con Sprit Dxan xten Dios näjza con guiboo. Rnibeeruni loä. Beṉsacduxhni. Nicla xcura'chni digacdi chanää́. 12Aca'ni xhi cojn gusiani triuu xtenni te chuchee triuuga neṉ ngodx xtenni. Dxejcti guixhtriuuga, suze'cni guijxhga lo guiboo ni rejc par tejpas.
Che gurobnis Jesús
(Mr. 1:9‑11; Lc. 3:21‑22)
13Dxejc birii Jesús nez Galilee, bidzujṉni ro' gueu Jordán cadro yu' Juan te gutiobnis Juanni. 14Niluxh naaddi Juan gutiobnis Jesús. Räjp Juan lojni:
―Luj nanab gutiobnislu narä, niluxh ṉaj alga luj siäädlu loä te gutiobnisälu.
15Dxejc räjp Jesús lojni:
―Basaan gacni si'c ṉaj, sa'csi nanab gusoobnu guiraa ni rlajz Dios gac.
Dxejctiru batiobnis Juan Jesús.
16Cheni gulujx gurobnis Jesús, birigajcni lo nis. Dxejc bixal xhaguibaa, bahuiini siädyäjt Sprit Dxan xten Dios si'c te palom, biäjtni lojni. 17Dxejc xhaguibaali biejn diajgreni te xse' ni räjp:
―Dee najc xi'nä ni sanälazä. Laani rbanälazä.
Actualmente seleccionado:
San Mateo 3: zaw
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2006, Wycliffe Bible Translators, Inc. All rights reserved.