Mateo 14
14
Yalguth chaan Juan
(Mr. 6:14‑29; Lc. 9:7‑9)
1Re wiza lee Herodes kuu mnabee dita yezlyu Galilea, mbin re kuu mtsow Jesús. 2Tsa nzhab rey Herodes lo re zha kuu nke tsiin lo rey:
―Juan kuu mtsowleyy re men nak zhaʼa; mroban zha xid re zha nguth; kona nap zha yalnabee ntsow zha re kuu thoz.
3Tata nzhab Herodes, tak lee Herodes mnabee mzhen zha Juan ne mloo zha Juan tsib, kwent chaan Herodías tsaal Lip kuu nak wets Herodes. 4Tak lee Juan nzhab lo rey Herodes:
―Went kenoʼa tsaal wetsa.
5Ne ngwalaaz Herodes aguth Juan, per nzeb rey ne re men yez, tak reta men nyelaaz lee Juan nak profet.
6Ne leettsa mzaal rey liin, tsa mtsow rey thib ani, ne lee rtsaap Herodías mkani lo re zha kuu nzi tya, ne kwathoz myow leettsoo rey xa mkani nzaa, 7tsa mtselo rey kruz lo nzaa ne nzhab rey:
―Naab loka kuu nlaaza lon, na taay.
8Tsa mnaabdiz nzaa lo xnaa nzaa, tsa naa kwan ndoblo naab nzaa, tsaraa nzhab nzaa lo rey:
―Taa yek Juan kuu ntsowleyy lon, leen thib yann.
9Tsa kwathoz nabil ngoo leettsoo rey; per tak kwathoz men nzi or mtselo rey kruz, ne reta zhaʼa mbin kuu nzhab rey, kona nzhab rey lo thib soldad, tsa taa zha yek Juan lo nzaa. 10Tsa mtaal rey soldad mchuug yek Juan leen tsib. 11Ne mbe soldad yek Juan leen thib yann, ne mndaa soldade lo nzaa, ne lee nzaa mndaay lo xnaa nzaa. 12Tsa mzin re zha kuu ngeteed lo Juan, ne mbe zha kwerp Juan mkaats zha. Bluz tsaraa nzhab zhay lo Jesús.
Jesús mndaa kuu ndow gaay mil men
(Mr. 6:30‑44; Lc. 9:10‑17; Jn.6 :1‑14)
13Leettsa mbin Jesús lee Juan nguth, tsa ngoo Jesús leen thib kano ne mroo Jesús tya, nda Jesús thib ta yubiz. Ne mbin re men lee Jesús nda, tsa mroo re men yez ne nda nii re men, mndeke re men dits Jesús. 14Ne leettsa mla Jesús leen kano, mwii Jesús kwathoz men ndeke dits Jesús. Tsa mlat leettsoo Jesús mne re men, ne mtegwe Jesús re mbyiz kuu ndyaadno re men. 15Ne leettsa mziʼa yezlyu, tsa lee re zha kuu ngeteed lo Jesús mzin lo Jesús, mbig zha ne nzhab zha lo Jesús:
―Mziʼa yezlyu, ne yent men gax nzhee. Bchaats re men tsa ya zha re ranch kuu nzi gaxta nzhee, tsa tii zha lut kuu wu zha.
16Tsa mkab Jesús lo re zha:
―Ndoblot bi re zha. Taa goo kuu wu zha.
17Per lee re zha nzhab lo Jesús:
―Napt nee kuu taa nee wu re zha, beeta gaay pan ne chopka mbel nap nee.
18Tsa nzhab Jesús lo re zha:
―Deno gooy nzhee.
19Tsa mnabee Jesús tob re men lo yizhwan. Ne mzhen Jesús re gaay pan ne rop mbel, tsa mwii Jesús lobee ne mndaa Jesús texkix lo Diox, ne mtsow rol Jesús re pan ne rop mbel ne mndaa Jesúse lo re zha kuu ngeteed lo Jesús, tsa kiid zhay lo re men. 20Reta men ndow asta plotha mze leettsoo re men. Ne tsiibchop chekwit pan byu myaan or ngwalo ndow reta men. 21Ne thib gaay mil mbyi nak kuu ndow, ne mtsowt zha kwent re ngot ne re ndyeen bzhizh.
Jesús mnde lo nitdoo
(Mr. 6:45‑52; Jn.6 :16‑21)
22Bluz leettsa ngwalo mriid koree, tsa mtaal Jesús re zha kuu ngeteed lo Jesús, tsa kendab zha leen kano, par rid zha tedib lad nitdoo. Per lee Jesús myaanka chaats re men. 23Or ngwalo mchaats Jesús re men, tsa mkendab thita Jesús yek yii par tediz Jesús lo Diox. Ne or mkow yezlyu thita Jesús ndo tya. 24Ne lee kano kuu nzo re zha kuu ngeteed lo Jesús ndaʼa tith lo nitdoo. Ne lee nitdoo kwathoz nkwin kano, tak par ta nda re zha ndyaad mbi. 25Tsa lee Jesús zhaaraa ndyaad lo nitdoo mbig lo re zha. 26Per or mwii re zha lee Jesús ndyaad lo nitdoo, tsa dib gan mrez re zha, tak kwathoz mzeb re zha, ne nzhab zha:
―¡Kuu fyera!
27Per lee Jesús nzhab lo re zha:
―Tsebt goo, bloney goo leettsoo goo nay.
28Tsa lee Pey nzhab lo Jesús:
―Zha Nabee, os luy, btsow tsa no na te lo nitdoo, tsa tsin na ta ndoʼa.
29Tsa nzhab Jesús lo Pey:
―De nzhee.
Tsa lee Pey mla leen kano ne mnde lo nitdoo nda lo Jesús. 30Per or myeen Pey kwathoz nax mbi, tsa mzeb Pey, ne lee Pey ndalowgwa leen nit, tsa mretsyath Pey, ne nzhab Pey:
―Zha Nabee, laata lowʼn.
31Oraaka mzhen Jesús yaa Pey, ne nzhab Jesús lo Pey:
―¿Chebee lutta nyelaaza na? ¿Chebee ngok chop xgaba?
32Leeka or kuu mke rop zha leen kano, lee mbi mlet. 33Tsa lee re zha kuu nzo leen kano mtobxub lo Jesús, ne mbil zha lo Jesús nzhab zha:
―Wlipaa lee lu nak Xgann Diox.
Jesús mtegwe re mbyiz zha yez Genesaret
(Mr. 6:53‑56)
34Tsa mriid re zha tedib lad roo nitdoo, ne mzin zha thib yez kuu le Genesaret. 35Or mlebee re men yeza Jesús, dita lo yezlyuʼa mchaats zha diize, tsa myaadno re zha re mbyiz ta ndo Jesús. 36Ne mnaab re zha lo Jesús tsa taa Jesús diiz diinn re mbyiz xab Jesús; ne reta zha kuu ndiinn xab Jesús ngwe zha.
Actualmente seleccionado:
Mateo 14: zao
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2007, Wycliffe Bible Translators, Inc. All rights reserved.