Geenesis 21
21
Isaac rasacari
1Naajuhuaj, majaari Pueyaso niyajetanu quiquiaari seetanujuanaa na sequesano Sara. Nojuajanaari na cumaquiquiaari na manajenura taa na sequequiaaricuajano. 2Naacuatej, Saraari manajequiaari. Neyacara raquiaari neyanuuri tariucua jiyanohua saaquiano Abraham quishacari. Mueyari naa rasaaquiaari seetanu jiyacarijianaatej taa Pueyaso sequequiaari na rasanuracuajani. 3Abrahamri nera necocua Sara muetusano jiyaniquiquiaari Isaac. 4Abrahamri neyanu sapiquianacoocua jiyataquiaari ocho juuca na rasaanu nuhuaji. Pueyasojuanaacuajaari naa sequequiaari nojori miiniuria pueyaracaanutej. 5Neyanu Isaac jaara rasaaquiaaritij, Abrahamri jiyacari tariucua cien marijia shocotejonu quiriquiaa. 6Saraari naa tama niishiriojoreejaacujua. Cunora naa sequereeri: “Pueyasoori cua puenucuareeni, janiyari cunora sorequejiyani. Pueya jaara cucuaji tojiniuuri, nojoriiri cua cojitiniutianiya cua timiniutia cua sorequejosacari. Naa nojori niishiriojosacari, ‘¿casaateeri motajaacua shipiniyariquiohua mueyaniuhuaj?’ 7Majaari quenaaja niquiriyatu pueyano jiyaniniu quiquiaari motajaari na naata neyacara muetunu. Quiarijiani, janiyari cua niyacara raree neyanuni, naajaa nojuajaari tariucua jiyanohua saaquiano.”
Abraham taanuusacari Agar neyanu Ismaeltaja
8Isaacri maashiquiaari, shipiyatasaareeri. Na shipiyatesacari, saaquiano Abrahamri neyanu shipiyatasaanu queranacutaquiaari. 9Naa nojori queranacutasacari mueya shipiyatanutej, Saraari jiyacari niquirii nera pueraquena niyanuuri neyanuniyojua macaatiriquiaa, na rerequeteriquiaajaariuhuaj. 10Nojuajaari cunora naa neyaca Abraham sequeree:
—Quiria pueraquena Agar cuaara niiquiji quiaara neyanutaja. Maja cutaraari cua paniniu quiyany Isaac raquiriatanura puetunu pa jiitiasano casamijianaa cuno seru niyanuta.
11Naa Abraham tojishacari necocua sequesano nojuajatej, jiyanohua taraajeree neyanu Ismaelcuaari Ismael quiniuucua neyanujuhuaj. 12Pueyasoori jiyacari naa Abraham sequereequij:
—Majaari mashajaacua taraajenu quia seruucuajaajanio. Puetunu quia niquiocua Sara sequesanojuanaa quia miiri. Quia niyanu Isaaccuajinio caneriquianoori quia pueyapuerano. 13Quia seru niyanu saniniuujia, janiyari nocuaji caneno pueya canijiariquiano jiyanohua queraatia pueyarajuhuaj. Nojoriiri niquiriyatu jiyanohua puereetuuca jiya camarucua quiriquiano. Janiyari naa na miiriquianoni, quia niyanu na quiniuucuajuhuaj.
Actualmente seleccionado:
Geenesis 21: arl
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 1986, 2008, Wycliffe Bible Translators, Inc. All rights reserved.