ሉቃሳ 24
24
ዬሱሲ ሃይቁዋፔ ዴንዴዳ
(ማት 28፡1-10፤ ማር 16፡1-8፤ ዮህ 20፡1-10)
1ሳሚንታፔ ኮይሮ ጋላሳ፥ ማጫዋንቱ ጊጊሴዳ ሺቱዋ ኦይቂዴ ዳሪ ጉሪዴ ዱፉዋኮ ቤዲኖ። 2ሹቻይካ ዱፉዋ ዶናፔ ጎንዶሬቲና ቤዔዲኖ። 3ኡንቱንቱ ዱፉዋ ጋርሳ ኦላ ጌሎ ዎዴ፥ ጎዳ ዬሱሳ ኣኃ ዴሚቤይኪኖ። 4ማጫዋንቱ ሲዴ ዴዒሺን፥ ዋጪዋጪያ ማዩዋ ማዬዳ ላዑ ኣሳቱ፥ ቆፔናን ኡንቱንቱ ሚዪያን ኤቄዲኖ።
5ማጫዋንቱካ ያሻፔ ዴንዶዋን ሳዓ ፄሊዴ ዴዒሺን፥ ላዑ ኣሳቱ፥ «ዴዑዋን ዴዒያዋ፥ ኣ ኣያው ሃይቆዋንቱ ጊዶፔ ኮዪቴ? 6-7ኢ ዴንዴዳ፤ ሃዋን ባዋ። ቃይካ ጋሊላን ዴዒያ ዎዲያን፥ ‹ኣሳ ናዓይ ናጋራንቻቱዋ ኩሺያን ኣ ኢሜታናዋ፤ ማስቃሊያ ቦላን ካቄታናዋ፥ ሄዜን ጋላሲ ሃይቁዋፔ ዴንዳናዋ› ያጌቶዋ ቆፒቴ» ያጌዲኖ።
8ማጫዋንቱካ ሄ ዎዴ ቃላ ኣኬኬዲኖ። 9ኡንቱንቱካ ዱፉዋፔ ሲሚዴ ሃ ኡባ ዬዉዋ ታማኔ ኢቲ ኪቴቶዋንቶኔ ኡንቱንታ ካሊያዋንቶ ኡባቶ ኦዴዲኖ። 10ሃዋ ዬሱሲ ኪቶዋንቶ ኦዴዳዋንቱ፡ ማግዳላፔ ዬዳ ማይራሞ፥ ዮሃኖ፥ ያዪቆባ ዳዮ ማይራሞኔ ኡንቱንቱና ኢቲፔ ዴዒያ ሃራ ማጫዋንታ። 11ኡንቱንቶ ማጫዋንቱ ኦዲያ ቃላይ ቃጂያዋ ማላቲና ኣማኒቤይኪኖ።
12ሺን ሄ ዎዴ ጴፂሮሲ ዴንዲዴ ዱፉዋኮ ዎፄዳ። ያ ጋኪዴ ሆኪ ፄሊያ ዎዴ፥ ጋርሳን ሞጉዋ ማዮ ፃላላይ ዴዒያዋ ቤዔዳ። ሃኖ ዬዉዋንካ ማላሌቲዴ፥ ጎሌ ሲሜዳ።
ኤማሁሳ ኦጊያን ዬሱሲ ላዑ ኣሳቱዋሲ ቆንጬዳ
(ማር 16፡12፣ 13)
13ሄ ጋላሲ ዬሱሳ ካሊያዋንቱፔ ላዑ ኣሳቱ ዬሩሳላሜፔ ላዑ ሳቲያ ሃኪያ ኤማሁሳ ጌቴቲያ ሄራ ቢዴ፤ 14ኢቱ ኢቱዋና ሃኔዳ ዬዉዋ ኡባ ሃሳይ ዴዒኖ። 15ኡንቱንቱ ሃሳዪዲኔ ዞሬቲዴ ዴዒሺን፥ ዬሱሲ ባሬ ሁጴው ዪዴ ኡንቱንቱ ሚዪያ ሺቂዴ ኡንቱንቱና ቢዴ ዴዔ። 16ሺን ኡንቱንቱ ባሬ ኣይፊያን ፄሊዴ ኣ ጊዲያዋ ሻኪ ኤራናው ዳንዳይቤይኪኖ።
17ዬሱሲ፥ « ሂንቴንቱ ኦጊያ ቦላን ኢቱ ኢቱዋና ሃሳዪያዌ ኣዬ?» ያጊ ኦቼዳ። ኡንቱንቱካ ዳጋማን ሌቹሚዴ ኤቄዲኖ። 18ኡንቱንቱፔ ኢቱ ቄሊዮጳ ጌቴቲያዌ፥ «ሃ ጊዱዋን ዬሩሳላሜን ሃኖ ዬዉዋ ኤሬናዌ ኔ ፃላላይ ሃጋዴው ኢማ?» ያጊ ዛሬዳ።
19ዬሱሲ፥ «ኢ ኣዬ?» ያጊና፥ ኡንቱንቱካ፥ «ፆሳ ሲንኒኔ ኣሳ ኡባ ሲንን ቃላኒኔ ኪታን ሚኖ ናቢያ ጊዴዳ ናዚሬቲያ ዬሱሳባ ሃሳዬቶ። 20ኣካ ቄሳቱዋ ካፓቱኔ ኑና ሞዲያዋንቱ ሃይቁዋ ፒርዳው ኣ ኢሜዲኖ፤ ማስቃሊያ ቦላን ዎዲኖ። 21ኑኒ ካሴና፥ ‹ኢስራዔሊያ ኣሳ ዎዛናዋ› ያጊ ሂዶቶዌ ኣ፤ ሺን ሃ ዬዉ ሃኔቲዴ ኣዴፔ ሄዙ ቃማ ጊዴዳ። 22ኑ ጊዶፔ ኢቲ ኢቲ ማጫዋንቱ ኑና ማላሊሴዲኖ። ኡንቱንቱ ጉራን ሂኒ ዱፉዋ ቤዲኖ፥ 23ሺን ዬሱሳ ኣኃ ኡንቱንቱ ዮ ዎዴ ሺሬቲ ሲሚዴ፥ «ኢ ዴንዴዳ፤ ያጊያዋ ኪታንቻቱ ኦዲሺን ቤዔዶ» ያጊ ኦዴዲኖ። 24ኑ ጊዶፔካ ኢቲ ኢቲ ኣሳይ ዱፉዋ ቢዴ ኡንቱንቱ ጎዋዳን ሃኒና ቤዔዲኖ፤ ሺን ዬሱሳ ኣኃ ዴሚቤይኪኖ» ያጌዲኖ።
25ዬሱሲ ኡንቱንቶ፥ «ሂንቴኖ፥ ኣኬኬና ኣሳቶ፥ ሂንቴንቱ ዎዛናን ናባቱ ኦዶዋ ኡባ ኤሌ ኣማኔናዋንቶ፤ 26ኪሪስቶሲ ሃ ሜቱዋ ኣካናዉኔ ባሬ ቦንቹዋኮ ጌላናው ቤሴኔ?» ያጌዳ። 27ሄዋፔ ሲሚዴ ዬሱሲ ሙሴ ማፃፋቱዋፔኔ ናባቱ ፃፌዳ ማፃፋቱዋፔ ዶሚዴ፥ ፆሳ ማፃፋቱዋ ኡባን ፃፌቴዳ ባሬባ ኡንቱንቶ ቢሊዴ ኦዴዳ።
28ኡንቱንቱ ቢዴዒያ ሄራ ማቴዳ ዎዴ፥ ዬሱሲ ሃራሳ ቢያዋ ማላቴዳ። 29ሄ ዎዴ ኡንቱንቱ ኣ፥ «ጋላሳይ ቃሚዴ ዴዒያ ዲራው፥ ኦማርሳይ ማቴዳ፤ ኑናና ኢቲፔ ኣቃ!» ያጊ ሚኒሲ ዎሴዲኖ። ሃዋ ዲራው፥ ኢካ ኡንቱንቱና ኢቲፔ ኣቃናው ጌሌዳ። 30ኡንቱንቱ ኢቲፔ ጋዪታን ኡቴዳ ዎዴ፥ ዳቡዋ ዴንዴ ኣንጄዳ፤ ሜንዴ ኡንቱንቶ ኢሜዳ። 31ኡንቱንቱ ኣይፊካ ኣ ኣኬካና ማላ ዶዬቲና፥ ዬሱሳ ጊዲያዋ ኤሬዲኖ። ኢካ ኡንቱንቱ ሲንፔ ጌሜዳ። 32ኡንቱንቱካ ኢቱ ኢቱዋ፥ «ቃን ኢቲፔ ኑ ዴዒሺን፥ ኑና ኢ ሃሳዪሲያ ዎዲያኒኔ ፆሳ ማፃፋቱዋካ ኑሲ ቆንጪሲዴ ኢ ኦዲያ ዎዲያን፥ ኑ ዎዛና ጊዶን ታማዳን ሴሌ ጊዴኔ?» ጌቴቴዲኖ።
33-34ሄ ዎዲያንካ ዴንዲዴ ዬሩሳላሜ ሲሜዲኖ። ዬሱሲ ኪቶ ታማኔ ኢታቶኔ ኡንቱንቱና ኢቲፔ ዴዒያዋንቶ፥ «ጎዳይ ቱሙዋካ ዴንዴዳ፥ ሲሞናዉካ ቤቴዳ» ያጊዴ ሄዋን ኢቲፔ ሺቂ ኡቴዳዋንታ ዴሜዲኖ።
35ሄ ላዓቱ፥ ቃን ሃኔዳዋኔ ዬሱሲ ዳቡዋ ሜንያ ዎዴ ዎቲ ኣ ኤሬዲኖንቶ ኡንቱንቶ ኦዴዲኖ።
ዬሱሲ ባሬና ካሊያዋንቶ ቤቴዳ
(ማት 28፡16-20፤ ማር 16፡14-18፤ ዮህ 20፡19-23፤ ኪት 1፡6-8)
36ሃዋ ኡንቱንቱ ሃሳይ ዴዒሺን፥ ዬሱሲ ኡንቱንቱ ጊዶን ኤቂዴ፥ «ሳሮቴይ ሂንቴው ጊዶ» ያጌዳ። 37ኡንቱንቶ ሞይቲሊያ ቤዖዋ ማላቲና ዳጋሚዴ፥ ያሻን ኩሜዲኖ። 38ኢካ ኡንቱንታ፥ «ኣያው ዳጋሚቴ? ኣያ ዲራው ሂንቴንቱ ዎዛናይ ሲ? 39ታኒ ዬሱሳ ጊዲያዋ ኤራናው፥ ኣኔ ታ ኩሺያኔ ታ ጌዲያ ቤዒቴ፤ ታናን ሂንቴንቱ ቤዒያዋዳን፥ ሞይቲሌው ኣሹኔ ሜቄይ ባዋ። ኣኔ ታና ሂንቴንቱ ኩሺያን ኦይቂ ቤዒቴ» ያጌዳ።
40ሃዋ ያጊ ሲሚዴ፥ ባሬ ኩሺያኔ ባሬ ጌዲያ ቤሴዳ። 41ኡንቱንቱካ ናሼቻፔ ዴንዶዋን፥ ኣማኔናን ማላሌቲ ዴዒሺን ኢ፥ «ሃዋን ሜቴቲያዌ ሂንቴንቶ ዴዒ?» ያጊ ኡንቱንታ ኦቼዳ። 42ኡንቱንቱካ፥ ፂፄቴዳ ሞሊያፔ ላፋ ፑሩዋ ኣው ኢሜዲኖ። 43ኢካ ኣኪዴ ኡንቱንቱ ሲንን ሜዳ።
44ኢካ፥ «ታኒ ሂንቴንቱና ኢቲፔ ዴዓዴ፥ ‹ሙሴ ማፃፋን፥ ናባቱዋ ማፃፋኒኔ ቃላን ፃፌቶ ማዚሙራቱን ታ ዲራው ፃፌቴዳ ኡባይ ፖሌታናው ቤሴ› ያጋዴ ሂንቴንቶ ኦዴዳ ዬዉ ሃዋ» ያጌዳ።
45ሄ ዎዲያንካ ፆሳ ማፃፋቱዋን ጌቴቶዋ ኣኬካና ማላ፥ ኡንቱንቱ ዎዛና ዶዬዳ። 46ኡንቱንቶ፥ « ‹ኪሪስቶሳ ሜቱ ጋካናዋ፤ ሄዜንያ ጋላሲ ሃይቁዋፔ ዴንዳናዋ። 47ኣ ኣሱንን ናጋራ ፓፄይኔ ማሮታ ዴሙሳይ ዬሩሳላሜፔ ዶሚዴ ኣሳው ኡባው ኦዴታናዋ› ያጌቲዴ ፃፌቴዳ።
48«ሂንቴንቱካ ሃዎ ማርካቱዋ። 49ታ ሂንቴንቶ፥ ታ ኣቡ ቃላ ጌሌዳ ሂዶታ ዬዳና፤ ሄዌ ጋካናዉኔ ሂንቴንቶ ዎልቃይ ሳሉዋፔ ኢሜታና ጋካናው፥ ዬሩሳላሜ ካታማን ናጊሺቴ» ያጌዳ።
ዬሱሲ ሳሉዋ ሲሚዴ ቤዳ
(ማር 16፡19፣ 20፤ ኪት 1፡9-11)
50ሃዋፔ ጉዪያን፥ ቢታኒያ ጌቴቲያ ካታማ ጋካናው፥ ኡንቱንታ ኣፌዳ፤ ባሬ ኩሺያ ሚጪዴ ኡንቱንታ ኣንጄዳ። 51ኡንቱንቱፔ ሻኬቲዴ፥ ሳሉዋ ቤዳ። 52ኡንቱንቱ ኣው ጎዪኒዴ፥ ዳሮ ናሼቻን ዬሩሳላሜ ሲሜዲኖ። 53ቃሲ ፓጬናን ፆሳ ጋላቲዴ፥ ጌሻ ጎሊያን ዴዔዲኖ።
Actualmente seleccionado:
ሉቃሳ 24: dwrENT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2011, Wycliffe Bible Translators, Inc. All rights reserved.
Aprende más sobre Ooratha Caaquwaa