ዮሃኒሳ 6
6
ዬሱሲ 5000 ኣሳ ሚዜዳ
(ማት 14፡13-21፤ ማር 6፡30-44፤ ሉቅ 9፡10-17)
1ሄዋፔ ጉዪያን፥ ዬሱሲ ጋሊላ ኣባፔ ዎይ ፂቢሪያዶሳ ኣባፔ ሄፊን ፒኔዳ። 2ኢ ሃርጋንቻቱዋ ቦላ ኦዳ ዎልቃማ ማላታ ቤዔዳ ዲራው፥ ጮራ ኣሳይ ኣ ካሌዳ። 3ዬሱሲ ዴሪያ ኬሲዴ፥ ያኒ ባሬና ካሊያዋንቱና ኢቲፔ ኡቴዳ። 4ኣዪሁዳቱ ቦንቺያ ፓሲጋ ጋላሳይ ጋኬዳ። 5ዬሱሲ ሲንኮ ፄሊዴ፥ ጮራ ኣሳይ ባሬኮ ዪያዋ ቤዒዴ ፒሊጶሳ፥ «ሃ ኣሳ ኡባ ሚዛናው ጊዲያ ቁማ ሃቃፔ ሻማኔ?» ያጌዳ። 6ኢ ሄዋ ፒሊጶሳ ፓጫናው ጌዳ፤ ኣዪሲ ጎፔ፥ ኢ ባሬ ሁጴው ኣያ ኦና ቤሲንቶ ኦናባ ኤሬ።
7ፒሊጶሲ ዛሪዴ ዬሱሳ፥ «ሁጲያን ሁጲያን፥ ሃራይ ኣቶ ኢቲ ኢቲ ባርሱዋ ጋናው፥ ላዑ ፄቱ ዲናሪያን ሻሜዳ ኡኪይካ ጊዴና» ያጌዳ።
8ቃሲ ዬሱሳ ካሊያዋንቱፔ ኢቱ፥ ሲሞኒ ጴፂሮሳ ኢሻይ ኢንዲራሲ፥ 9«ባንጋ ኡኪ ኢቼሹኔ ላዑ ሞሊ ዴዒያ ኢቲ ናዓይ ሃዋን ዴዔ፤ ሺን ሃ ኣሳ ኡባው ሄዌ ዎቲ ጊዳኔ?» ያጌዳ።
10ዬሱሲ ባሬና ካሊያዋንታ፥ «ኣሳይ ኡታናዳን ኡዲቴ» ያጌዳ። ሄ ሳዓን ዳሮ ማታይ ዴዔ። ኣሳይ ኡባይ ኡቴዳ፤ ኣቱማ ኣሳይ ኢቼሹ ሻዓ ጊዲያዋ። 11ዬሱሲ ኡኪ ኣኬዳ፤ ፆሳ ጋላቲዴ፥ ሄዋን ኡቴዳ ኣሳው ጊሼዳ። ሞሊያካ ሄዋዳን ኦና ኣሳይ ባሬ ኮዬዳዋ ኬና ሜዳ። 12ኡንቱንቱ ኡባይ ካሌዳዋፔ ጉዪያን፥ ዬሱሲ ባሬና ካሊያዋንታ «ኢቲባይካ ጮ ባዬና ማላ፥ ኣቴዳ ዶካ ሺሺቴ» ያጌዳ። 13ሄዋ ዲራው፥ ኡንቱንቱ ኡባካ ሺሼዲኖ፤ ኣሳይ ካሊና ኣቴዳ ባንጋ ኡኪ ዶካ ሺሺዴ፥ ታማኔ ላዑ ዛምቤሊያ ኩንዲኖ።
14ኣሳይ ዬሱሲ ኦዳ ዎልቃማ ማላታ ቤዔዳ ዎዴ፥ «ሃዌ ቱሙዋፔ ሃ ሳዓ ያና ጌዳ ናቢያ» ያጌዲኖ። 15ኡንቱንቱ ዪዴ ባሬና ዎልቃን ኦይቂ ካቲያ ኦናው ሃኒያዋ ዬሱሲ ኤሪዴ፥ ባሬካ ዴሪያ ቦላ ሺሬቲዴ ኬሴዳ።
ዬሱሲ ኣባ ቦላን ሃሜቲዴ ቤዳ
(ማት 14፡22-33፤ ማር 6፡45-52)
16ሳዓይ ኦማሪሴዳ ዎዴ፥ ዬሱሳ ካሊያዋንቱ ኣባኮ ቤዲኖ፤ 17ሳዓይ ቃሜዳ፤ ሺን ዬሱሲ ኡንቱንቱኮ ሄ ሳቲ ጋካናው ዪቤና፤ ሄዋሲ ኡንቱንቱ ዎንጊሪያን ጌሊዴ፥ ኣባ ፒኒ ሄፊን ቂፊሪናሆማ ቤዲኖ። 18ዎልቃማ ጫርኩ ጫርኬዳ ዲራው፥ ኣባይ ቃፄዳ፤ 19ኢቲ ሳቲያ ኬና ኡንቱንቱ ኣባ ሻጎዋፔ ጉዪያን፥ ዬሱሲ ኣባ ቦላና ሃሜቲዴ ዪያዋ ቤዒዴ ያዬዲኖ። 20ሺን ኢ፥ «ያዮፒቴ፤ ታናቴ!» ያጌዳ። 21ኡንቱንቱ ዎንጊሪያን ኣ ጌሊሳናው ኮዬዲኖ፤ ዎንጊሪ ኡንቱንቱ ቢያሳ ኣባ ጋፃ ኤሌካ ጋኪ ኣጌዳ።
ዬሱሲ ዴዑዋ ኡኪ
22ዎንቴ ጋላሲ፥ ኣባፔ ሄፊንና ኣቴዳ ጮራ ኣሳይ ኣባ ቦላ ኢቲ ዎንጊሪያ ፃላላይ ዴዒያዋ ቤዔዲኖ፤ ዬሱሲ ባሬና ካሊያዋንቱና ዎንጊሪያን ጌሊዴ፥ ኡንቱንቱና ቤናን፥ ኡንቱንቱ ባሬካ ቤዳዋ ኣኬኬዲኖ። 23ሺን ፂቢሪያዶሳፔ ሃራ ዎንጊራቱ ዬሱሲ ፆሳ ጋላቲና፥ ኣሳይ ኡኪ ሜዳሳ ማታ ዬዲኖ። 24ኣሳይ ዬሱሲ ዎይ ኣ ካሊያዋንቱ ሄዋን ባይናዋ ቤዒዴ፥ ዬሱሳ ኮያናው ዎንጊሪያን ጌሊዴ፥ ቂፊሪናሆማ ቤዲኖ።
25ኣሳይ ዬሱሳ ኣባፔ ሄፊንን ዴሜዳ ዎዴ፥ «ታማሪሲያዎ፥ ሃዋ ኣዉዴ ያዲ?» ያጌዲኖ።
26ዬሱሲ ዛሪዴ፥ «ታኒ ሂንቴንቱሲ ቱሙዋ ኦዳይ፤ ሂንቴንቱ ታና ኮዪያዌ ኡኪ ሜዳ ዲራሳኔ ካሌዳ ዲራሳ ጊዲያዋፔ ኣቲን፥ ዎልቃማ ማላታ ቤዔዳ ዲራሳ ጊዴና። 27ሜና ዴዑዋ ቁማው፥ ታኒ ኣሳ ናዓይ ሂንቴንቱሲ ኢማናዎ፥ ኦቴፔ ኣቲን፥ ሳሚያ ቁማው ኦፒቴ፤ ኣዪሲ ጎፔ፥ ኣዉ ፆሳይ ሄዋ ሺሳናው ማታፋ ኣታሚ ዎዳ» ያጌዳ።
28ሄዋፔ ጉዪያን ኡንቱንቱ፥ «ኑኒ ፆሳ ኦሱዋ ኦናው ኣያ ኦናው ቤሲ?» ያጊዴ ዬሱሳ ኦቼዲኖ።
29ዬሱሲ ዛሪዴ፥ «ሂንቴንቱ ኦና ማላ፥ ፆሳይ ኮዪያ ኪታይ ሃዋ፤ ኢ ኪቴዳዋን ኣማኒቴ» ያጌዳ።
30ኡንቱንቱ ዛሪዴ፥ «ኑኒ ቤዒዴ፥ ኔናን ኣማናና ማላ፥ ኣይ ዎልቃማ ማላታ ኦኒ? ኣያ ኪቴታኒ? 31ፆሳ ማፃፋን፥ ‹ኡንቱንቱ ማና #6፡31 ማና፡ ኢስራዔሊያ ኣሳይ ጊብፄ ጋዲያፔ ኬሲ ካናኔ ቢዴ ሜላ ቢታን ሃሜቲዴ ቢያ ዎዴ፥ ኡንቱንቱ ማናዳን ፆሳይ ኢሜዳ ማልዒያ ቁማ። ማና ጉሳይ ኢብራዪስፂያ ቃላን «ሃዌ ኣዬ?» ጊያዋ። ማላ ሳሉዋፔ ኡኪ ኢሜዳ› ያጌቲ ፃፌቶዋዳን፥ ኑ ኣዋቱ ሜላ ቢታን ማና ሜዲኖ» ያጌዲኖ። #ኬስ 16፡4፣ 15፤ ማዝ 78፡24
32ዬሱሲ፥ «ታኒ ሂንቴንቱሲ ቱሙዋ ኦዳይ፤ ሂንቴንቱሲ ሳሉዋፔ ቱሙ ኡኪ ኢሚያዌ ታ ኣባፔ ኣቲን፥ ሂንቴንቱሲ ሳሉዋፔ ኡኪ ኢሜዳዌ ሙሳ ጊዴና። 33ኣዪሲ ጎፔ፥ ቱማ ጊዴዳ ፆሳ ኡኪይ፥ ሳሉዋፔ ዎያዌ ሃ ኣላሚያ ኣሳው ዴዑዋ ኢሜ» ያጌዳ።
34ኡንቱንቱ ዛሪዴ፥ «ጎዳው፥ ኑካ ሄ ኡኪ ኡባ ዎዴ ኢማ» ያጌዲኖ።
35ዬሱሲ፥ «ታኒ ዴዑዋ ኡኪ፤ ታኮ ዪያ ኡራይ ኡባካ ኮሻቴና። ቃሲ ታና ኣማኒያ ኡራይ ኣይኔ ሳሜቴና። 36ሺን ታኒ ሂንቴንቱሲ ኦዴዳዋዳን፥ ሂንቴንቱ ታና ቤዔዲታ፤ ሺን ኣማኒኪታ። 37ታ ኣቡ ታው ኢሚያ ኡባይ ታኮ ያናዋ፤ ቃሲ ታኮ ዪያ ኦናኔ ኡባካ ታኒ ካሬ ዬዲኬ። 38ኣዪሲ ጎፔ፥ ታኒ ታና ኪቴዳዋ ሼኒያ ፖላናው ሳሉዋፔ ያዲፔ ኣቲን፥ ታ ሼኒያ ፖላናው ያቤይኬ። 39ታና ኪቴዳዌ ኮዪያዌ ሃዋ፤ ታኒ ኢ ታው ኢሜዳ ኡባቱዋካ ዉርሴ ጋላሲ ዴንናፔ ኣቲን፥ ኢቱዋካ ባዪዛና ማላ ኮዬና። 40ኣዪሲ ጎፔ፥ ታ ኣቡ ኮዪያዌ ሃዋ፤ ታና ናዓ ቤዒዴ፥ ኣማኒያ ኡባቱ ሜና ዴዑዋ ኣካናዋንታ፤ ታኒካ ሄ ኡባቱዋ ዉርሴ ጋላሲ ዴንና» ያጌዳ።
41ዬሱሲ፥ «ታኒ ሳሉዋፔ ዎዳ ኡኪ» ጌዳ ዲራው፥ ኣዪሁዳቱ ኣ ቦላ ዙዙሜዲኖ። 42ኡንቱንቱ፥ «ሃዌ ኑኒ ኣ ኣዉዋኔ ኣ ኣቶ ኤሪያ ዮሴፎ ናዓ ዬሱሳ ጊዴኔ? ያቲና፥ ኢ ዋጊዴ፥ ‹ታኒ ሳሉዋፔ ዎዲ› ጋናው ዳንዳዪ?» ያጌዲኖ።
43ዬሱሲ ዛሪዴ፥ «ኢቱ ኢቱዋና ዙዙሚያዋ ኣጊቴ። 44ታና ኪቴዳ ታ ኣቡ ታኮ ኣሄዳ ኣሳፔ ኣቲን፥ ታኮ ያናው ዳንዳዪያ ኣሳይ ባዋ፤ ታኒካ ዉርሴ ጋላሲ ኣ ዴንና። 45ናባቱ ‹ፆሳይ ኣሳ ኡባ ታማሪሳና› ያጊዴ ፃፌዲኖ፤ ኣዉ ጊያዋ ሲሲያዌኔ ኣዉዋፔ ታማሪያዌ ኦኒኔ ታኮ ዬ። #ኢሳ 54፡13 46ፆሳ ማታፔ ዬዳዋፔ ኣቲን፥ ፆሳ ቤዔዳ ኣሳይ ባዋ፤ ኣ ፃላላይ ፆሳ ቤዔዳ።
47«ታኒ ሂንቴንቱሲ ቱሙዋ ኦዳይ፤ ታና ኣማኒያ ኡራው ሜና ዴዑ ዴዔ። 48ታኒ ዴዑዋ ኡኪ። 49ሂንቴንቱ ኣዋቱ ሜላ ቢታን ማና ሜዲኖ፤ ሺን ሃይቄዲኖ። 50ኣሳይ ኣፔ ሚዴ ሃይቄና ኡኪይ ሳሉዋፔ ዪያዌ ሃዋ። 51ሳሉዋፔ ዎዳ ዴዑዋ ኡኪይ ታና፤ ኦኒኔ ሃ ኡኪፔ ሞፔ፥ ሜናው ዴዓናዋ፤ ቃሲ ሃ ኣላሚያ ኣሳው ዴዖ ጊዳና ማላ፥ ታኒ ኢማና ኡኪይ ታ ኣሹዋ» ያጌዳ።
52ኣዪሁዳቱ፥ «ሃ ቢታኒ ባሬ ኣሹዋ ኑኒ ማና ማላ፥ ኑሲ ዎቲዴ ኢማናው ዳንዳዪ?» ያጊዴ ባሬንቱ ጊዱዋን ፓሉሜቴዲኖ።
53ሄዋ ዲራው፥ ዬሱሲ ኡንቱንታ፥ «ታኒ ሂንቴንቱሲ ቱሙዋ ኦዳይ፤ ታ ኣሹዋ፥ ኣሳ ናዓ ኣሹዋ፥ ሂንቴንቱ ማና ዮፔ፥ ቃሲ ታ ሱካ ኡሻና ዮፔ፥ ሂንቴው ዴዑ ባዋ። 54ታ ኣሹዋ ሚያ ኡራዉኔ፥ ታ ሱ ኡሺያ ኡራው ሜና ዴዑ ዴዔ። ታኒ ዉርሴ ጋላሲ ኡንቱንታ ዴንና። 55ኣዪሲ ጎፔ፥ ታ ኣሹ ቱሙ ቁማ፤ ታ ሱይካ ቱሙ ኡሻ። 56ታ ኣሹዋ ሚያ ኡራይኔ ታ ሱ ኡሺያ ኡራይ ታናን ዴዔ፤ ታኒካ ኣናኒ ዴዓይ። 57ዴዑዋ ኣዉ ታና ኪቲና፥ ታኒ ኣ ጋሱዋን ዴዒያዋዳን፥ ታና ሚያ ኡራይካ ታ ጋሱዋን ዴዓና። 58ሳሉዋፔ ዎዳ ኡኪይ ሃዋ፤ ሂንቴንቱ ኣዋቱ ሚዴ ሃይቄዳ ማና ማላ ጊዴና፤ ሃ ኡኪ ሚያ ኡራይ ሜናው ዴዓና» ያጌዳ።
59ዬሱሲ ቂፊሪናሆማ ካታማን ኣዪሁዳ ዎሳ ጎሌን ታማሪሲዴ፥ ሃዋ ኦዴዳ።
ሜና ዴዑዋ ቃላ
60ዬሱሳ ካሊያዋንቱፔ ዳሪያ ባጋይ ሄዋ ሲሴዳ ዎዴ፥ «ሃዌ ጌሌና ቲሚርቲያ፤ ሃዋ ኦኒ ኣካናዌ?» ያጌዲኖ።
61ሺን ዬሱሲ ባሬና ካሊያዋንቱ ሄዎ ዙዙሜዳዋ ኤሪዴ፥ «ሃዌ ሂንቴንታ ቢ? 62ሲሚ ታኒ፥ ኣሳ ናዓይ፥ ካሴ ዴዒያሳ ፑዴ ኬሲሺን ቤዒንቶ ኣያ ጋኒቴ? 63ጌሻ ኣያናይ ዴዑዋ ኢሜ፤ ኣሳ ሚኖታይ ኣይኔ ጎዔና። ታኒ ሂንቴንቱሲ ኦዴዳ ቃላይ ኣያናኔ ዴዑዋ። 64ሺን ሂንቴንቱ ጊዱዋን ኣማኔናዋንቱ ዴዒኖ» ያጌዳ፤ ኣዪሲ ጎፔ፥ ኣማኔናዋንቱ ሃቃዋንቴንቶኔ ባሬና ኣ ኢማናዌ ኦኔንቶ ዬሱሲ ኮይሮፔ ዶሚዴ ኤሬዳ። 65ቃሲካ ዬሱሲ፥ «ታ ኣቡፔ ጊዳና ዮፔ ኦኒኔ ታኮ ያናው ዳንዳዬና ያጋዴ ታ ኦዴዳዌ ሄዋ ዲራሳ» ያጌዳ።
66ሄዋ ጋሱዋን፥ ዬሱሳ ካሊያዋንቱፔ ጮራቱ ኣ ኣጊዴ፥ ጉዬ ሲሜዲኖ፤ ላዔን ኣ ካሊቤይኪኖ። 67ዬሱሲ ቃሲ ታማኔ ላዑ ባሬና ካሊያዋንታ፥ «ሂንቴካ ኣጊዴ ባናው ኮዪቴ?» ያጌዳ።
68ሲሞኒ ጴፂሮሴ ዛሪዴ፥ «ጎዳው፥ ኑኒ ኦኮ ባኔ? ኔው ሜና ዴዑዋ ቃላይ ዴዔ። 69ኔኒ ፆሳ ጌሻ ጊዲያዋ ኑኒ ኣማኔቶኔ ኤሬቶ» ያጌዳ።
70ዬሱሲ ኡንቱንታ፥ «ታኒ ሂንቴንታ ታማኔ ላዓቱዋ ዶራቤይኪታ? ቃሲ ሂንቴፔ ኢቱ ፃላሂያ» ያጌዳ። 71ዬሱሲ ሄዋ ሲሞና ናዓ ዪሁዳ ኣስቆሮታ #6፡71 ኣስቆሮታ፡ ሃ ቃላ ቢሌይ፥ «ዎሬቲያ ቢታኒያ» ዎይ «ሃይቆ ኣ ኢሚያ ቢታኒያ» ጊያዋ። ጌ፤ ኣዪሲ ጎፔ፥ ዪሁዳይ ዬሱሳ ካሊያ ታማኔ ላዓቱዋፔ ኢቱዋ፤ ኢ ዬሱሳ ኣ ኢማናዋ።
Actualmente seleccionado:
ዮሃኒሳ 6: dwrENT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2011, Wycliffe Bible Translators, Inc. All rights reserved.
Aprende más sobre Ooratha Caaquwaa