MATIYO 3
3
Haɓari ijudziwao na Yahaya Muɓaĩshizi
(Mar 1:1-8; Luk 3:1-18; Yuh 1:19-28)
1Ɗe hari mwa wakati uwo, ɗe Yahaya Muɓaĩshizi andra padzaju Yudeya, akoĩdhia 2ha urongoa: «Namwendre toɓa, mana Utawalizi wa Monyewe ziMbingu, ukuruɓia.» 3Yahaya ɗe mutru alio amba mutrume Izaya akomurongoa hari mwa marongozi yahe yanu ashukidziwayo:
«Tsilini liji la mutru ashelemedzao padzaju:
‹Namutayarishe indzia ya Mola,
muondzowe wana ndzia wahe!› »
4Yahaya akana nguo ya madzivuzi ya ngamia, na mukandra wa ngwezi trengaju. Akoɗya maɗatra na ngizi ya nyoshi. 5Wakazi wa Yerusalemu, na piya itsi ya Yudeya, na wa piya liɓavu la umuro wa Jurdani, wakomujilia. 6Wakov̄enua madhambi yawo, na waye akowaɓaĩsha|uɓaĩsha moni na umuro wa Jurdani.
7Uona yahe amba watru wengi wa ishama ya Mafarisayo na ya Masadukayo wakomujilia waɓaĩshiwe, awaambia: «Wanyu wanafiki, udjama wa nyoha za peu! Mbani ɗe amujudzani amba mutsoshindra mutrale ihadhaɓu ijao? 8Ɓasi namutowe mavuna yaonesao amba kweli mwendre toɓa, 9wala musufikiri udziambia amba: ‹Wasi, ɓaɓatru ɗe Iɓrahima.› Mana nisumujudzani amba ha mawe yanu, ne Mungu ushindra atowe wana wa Iɓrahima! 10liSoha madza lihetsiwa miziju mwa yimiri. Kula muri kaudza mbia ndjema utsokatrwa, uvutswe moroju.
11Wami nisumuɓaĩshani ha maji, ike udhiɓitifu amba mwendre toɓa. Ɓadi uwo ajao unyuma hangu, ana ushindzi rahana wami: tsastahiki ata uv̄inga#3:11 uv̄inga: Au: uɓulia kaɓwa zahe. kaɓwa zahe. Waye atsomuɓaĩshani ha iRoho Ndzitwaharifu, na ha moro. 12Asiki utseo wahe muhononi, atsorahatsa ɓandza lahe arwao, atenge liguru na zitrundra, agamise mele yahe moni na kanya; ɓadi atsovudza liguru moni na moro kauzimiha.»
Muɓaĩsho wa Insa
(Mar 1:9-11; Luk 3:21-22)
13Ɓas Insa alawa Galilaya, amujilia Yahaya|Yahaya Muɓaĩshizi muroni Jurdani ile amuɓaĩshe. 14Ɓadi Yahaya akohara ha urongoa: «Wami ɗe nalazimu niɓaĩshiwe na wawe, na v̄anu usuja unipare ɗe wami!»
15Ɓadi Insa amudjiɓu: «Lisha tu ike namuna iyo av̄asa. Mana ɗe ha inamuna iyo ɗe yastahiki ritsimidze piya izo zilio za haki.» Ɓas, v̄ale Yahaya akuɓali.
16Amohisoɓaĩshiwa, Insa alawa majini. Sa ɗe wiyo ile kamwe zimbingu ziɓuha, aono iRoho ya Mungu iv̄o yakomushukia mufano wa shukuru. 17Sa ile v̄ulawa ji mbinguni, lirongoa: «Unu ɗe uMwana muv̄endzewa wangu, tsena wami ujiv̄iwa halisi na waye.»
Actualmente seleccionado:
MATIYO 3: swb
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2021, Wycliffe Bible Translators, Inc. All rights reserved.