Evvan 9
9
Isõs pueʹrad čââʹlmteeʹm
1Da rääi mõõneen Isõs vuõiʹni åumma, kååʹtt leäi leämmaž čââʹlmtem juʹn šõddmest. 2Da suu mättʼtõspäärna kõʹčče suʹst: «Rabbi, ǩii tuejjii rieʹǩǩ, ååum jiõčč avi suu puärraz, što son õõlǥi šõddâd čââʹlmteʹmmen?» 3Isõs vaʹsttii: «Ij ni ǩii leäkku tuejjääm rieʹǩǩ, ij ååum jiõčč jiâ-ǥa suu puärraz. Son šõõddi čââʹlmteʹmmen, što Vuâsppååʹd tuâj kuâsttjeʹčče suʹst. 4Nuʹt kuuʹǩǩ ko lij peiʹvv, mij õlggâp tuejjeed suu reâuǥaid, kååʹtt lij muu vuõlttääm; puätt inn, kuäʹss ij ni ǩii vueiʹt reâuggad. 5Nuʹt kuuʹǩǩ ko mon leäm maaiʹlmest, leäm mon maaiʹlm čuõvv.»
6Nääiʹt ko Isõs cieʹlǩi, čoʹlǧǧii son jânnma da tuejjii čoolǥâst muâil da muâilain pååusai åumma čõõʹlmid 7da cieʹlǩi suʹnne: «Mõõn da põõzzõõđ Siiloa lääddast» — tõt lij jåårǥlââʹtteeʹl: vuõlttuum. — Nuʹt son mõõni da põõzzõõđi da pueʹđi mååusat vueiʹnnʼjen.
8Räʹjjla da tõk, kook leʹjje vuäinnam åumma äännmen, kõõjjee: «Ij-ǥo tät leäkku tõt ååum, kååʹtt åårai išttâd äännmen?» 9Jeärraz cieʹlǩǩe: «Seämma ooumaž i lij.» Jeärraz eʹpet renste: «Ij leäkku, lij pâi suu nallšem.» Son jiõčč cieʹlǩi: «Kâʹl mon leäm seämma ooumaž.» 10De sij kõʹčče: «Mäʹhtt ton ååʹn vuäinak?» 11Ååum vaʹsttii: «Tõt ååum, koon nõmm lij Isõs, raaji vuõddsest da čoolǥâst muâil da pååusai tõiʹn muu čõõʹlmään da säärnai muʹnne: ’Mõõn da põõzzõõđ Siiloa lääddast’. Da mon mõʹnnem da põõzzõʹttem da vueiʹnškuõʹttem.» 12Sij kõʹčče: «Koʹst son ååʹn lij?» «Jiõm mon tieʹđ», ååum vaʹsttii.
Farisõõzz kõõjjee puârrnam åummast
13De sij viʹǩǩe suu, kååʹtt ouddâl leäi leämmaž čââʹlmtem, farisõõzzi årra. 14Tõt peiʹvv, kuäʹss Isõs raaji muâil da pueʹrii čââʹlmteʹmes åumma, leäi prääʹzneǩ. 15Nuʹt še farisõõzz kõõjjee suʹst, mäʹhtt son aaʹlji vueiʹnškueʹtted. De son säärnai siʹjjid: «Son pååusai čõõʹlmään muâilain. Da mon põõzzõʹttem da aʹlǧǧem vueiʹnškueʹtted.» 16Tâʹl måtam farisõõzz cieʹlǩǩe: «Tõt ååum iʹlla Vuâsppååʹdest, ko son ij pââʹzzet prääʹzneǩ.» Jeärraz cieʹlǩǩe: «Vuäitt-a reäkksaž ooumaž raajjâd nåkam õmmsid?» Da sij leʹjje kõskkneez jeeʹres miõl.
17Farisõõzz kõʹčče oʹđđest čââʹlmteʹmes åummast: «Mâiʹd ceälkak tõn oummust, kååʹtt pueʹrii tuu?» Da ååum cieʹlǩi: «Son lij profeʹtt.» 18Leša juudlažneeʹǩǩ jiâ åskkam, što ååum leäi leämmaž čââʹlmtem da leäi puârrnam, ouʹddelgo viʹǩǩe suu eeʹjjes da jieʹnnes årra 19da kõʹčče suännast: «Lij-ǥo tät tuännai päʹrnn? Lij-ǥo son šõddâm čââʹlmteʹmmen? Mäʹhtt son ååʹn vuäinn?» 20Suu puärraz vaʹsttee: «Kâʹl son lij muännai päʹrnnem da čââʹlmteʹmmen son lij šõddâm, 21leša mäʹhtt son ååʹn vuäinn, jeäʹp muäna tieʹđ, jeäʹp-ǥa tieʹđ, ǩii lij suu pueʹrääm. Kõõččâd suʹst jijstes! Kâʹl son lij nuʹt puäʹres, što vuäitt jiõčč vaʹstteed.» 22Nääiʹt suäna cieʹlǩǩe, ko suäna põʹlle juudlažniiʹǩǩin. Ko juudlažneeʹǩǩ leʹjje suåppâm kõskkneez, što tõt, ǩii ååskai suu Isõssân Kristõssân, õõlǥi räʹtǩǩeed ceerkvest. 23Tõn diõtt åumma puärraz cieʹlǩǩe: «Kõõččâd suʹst jijstes. Kâʹl son lij nuʹt puäʹres, što vuäitt jiõčč vaʹstteed.»
24Farisõõzz kõʹčče oʹđđest åummast, kååʹtt leäi šõddâm čââʹlmteʹmmen: «Muuʹšt, što Vuâsppåʹd kooll, mâiʹd ton mainstak, maainâst tuõđ! Mij tieʹttep, što tõt ooumaž lij reäkksaž.» 25Son vaʹsttii: «Mon jiõm tieʹđ, lij-a son reäkksaž avi ij; leša tõn mon teâđam, što mon leʹjjem ouddâl čââʹlmtem da ååʹn mon vuäinam.» 26De sij kõʹčče suʹst: «Mäʹhtt son pueʹrii tuu? Mäʹhtt son ääʹvii tuu čõõʹlmääd?» 27Son vaʹsttii: «Mon cieʹlǩǩem juʹn tõn. Mõõn diõtt tij jeäʹped kulddlam? Mõõn diõtt tij eʹpet tättveʹted kuullâd seämma ääʹšš? Tättveʹted-a tij še äʹlǧǧed suu mättʼtõspäärnžeʹnes?» 28Farisõõzz aʹlǧǧe suu viggted: «Ton täʹst leäk suu mättʼtõspäärnaž, leša mij leäʹp Moʹssai mättʼtõspäärna. 29Mij tieʹttep, što Vuâsppåʹd lij mainstam Moʹssja, leša koʹst tät lij, tõn jeäʹp tieʹđ.»
30Ååum vaʹsttii da cieʹlǩi siʹjjid: «Tõt-i lij täʹst nuʹt õõmâs, što tij jeäʹped tieʹđ, koʹst son lij, da seâža son pueʹrii muʹst čõõʹlmid. 31Mij tieʹttep, što Vuâsppåʹd ij kuul reäkksaid, pâi tõiʹd, ǩeäk ciʹsttje suu da tuejjee suu täättas mieʹldd. 32Iʹlla ni kuäʹss kullum, što ǩii-ne lij pueʹrääm čââʹlmteʹmmen šõddâm oummu. 33Ij son vuäitče ni mâiʹd tuejjeed, jõs suu iʹlleʹčče Vuâsppåʹd vuõlttääm.»
34Farisõõzz vaʹsttee suʹnne da cieʹlǩǩe: «Ton leäk rieʹǩǩest šõddâm ooumaž. Ton-ǥo täʹst äälǥčiǩ miʹjjid mättʼted?» Da sij vuâjte suu åålǥas.
Jiõglvaž čââʹlmteʹmesvuõtt
35Da Isõs kuuli, što sij leʹjje vuâjtam suu åålǥas; da ko son vuõiʹni suu, son cieʹlǩi suʹnne: «Ååskak-a ton Vuâsppååʹd Pärnna?» 36«Šurr, ǩii son lij?», ååum kõõjji. «Cieʹlǩ da mon ååskam.» 37Isõs cieʹlǩi suʹnne: «Ton leäk suu vuäinnam, da son lij tõt, koiʹn ton ååʹn säärnak.» 38Nuʹt son cieʹlǩi: «Šurr, mon ååskam»; da son kåʹmrdeeʹl moʹlidvõõʹsti suu.
39Da Isõs cieʹlǩi: «Mon leäm puättam maaiʹlme suudâd, što čââʹlmteeʹm äälǥče vueiʹnned, da tõk, kook vuäiʹnne, šõõddče čââʹlmteʹmmen.» 40Da måtam farisõõzz, kook leʹjje tõʹst ââlda, cieʹlǩǩe suʹnne: «Leäʹp-a mij še čââʹlmteeʹm?» 41Isõs cieʹlǩi siʹjjid: «Ko tij leʹččid čââʹlmteeʹm, tij leʹččid määiʹmteeʹm, leša ååʹn tij ceäʹlǩǩveʹted: ’Mij vueiʹnnep’. Tij leäʹped veärla. Tij reäʹǩǩ pââšš.»
Actualmente seleccionado:
Evvan 9: SKOLT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© Lää´dd Pipliaseä´rvv; Suomen Pipliaseura; Finnish Bible Society 1988