Evvan 7
7
Isõõzz viillji pannåskk
1Mâŋŋa Isõs jooʹđi pirr Galileast. Tâʹl son ij tättam jååʹtted Juudeast, ko juudlažneeʹǩǩ oʹcce suu kåʹddem diõtt. 2Da juudlažniiʹǩǩin leäi sõrgg lõsttkueʹttprääʹzneǩ. 3De Isõõzz viillj cieʹlǩǩe suʹnne: «Vueʹlj Juudea, što tuu mättʼtõspäärnad še vuäiʹnne tuu õmmsid, koiʹd ton tuejjääk. 4Ǩii tätt jiijjâs oummid čuäʹjted, ij tuejjad sueʹleld. Ko ton pââstak nääiʹt tuejjeed, de iʹlmmet jiijjad maaiʹlme.» 5Isõõzz viillj jiâ še åskkam suu.
6Di Isõs cieʹlǩi siʹjjid: «Muu äiʹǧǧ iʹlla veâl puättam, leša tiʹjjid ââʹnat muʹvddem podd täättas. 7Tiʹjjid ij vueiʹt maaiʹlm vâjjeed, a muu tõt vâjjad, ko mon tuõđštam tõʹst, što tõn tuâj liâ ǩeähn. 8Mõõnnâd tij pâi prääʹznka. Mon jiõm vueʹlj, ko muu äiʹǧǧ iʹlla veâl tiuddâm.»
9Nääiʹt Isõs cieʹlǩi da paaʹʒʒi Galilea. 10Leša ko suu viillj leʹjje mõõnnâm prääʹznǩid, tâʹl son še mõõni tåk, ij õlmmsa leša sueʹleld.
Isõs lõsttkueʹttprääʹznǩest
11De juudlažneeʹǩǩ oʹcce suu prääʹzneǩ ääiʹj da cieʹlǩǩe: «Koʹst son lij?» 12Narood jooukâst reeidčõʹtte suʹst: måttmi miõlâst son leäi šiõǥǥ ooumaž, jeärrsi miõlâst son tääjti oummid. 13Leša ni ǩii ij tuõsttâm mainsted suʹst õlmmsa, ko sij põʹlle juudlažniiʹǩǩin.
14Leša ko leäi pieʹllprääʹzneǩ mõõnnâm, Isõs mõõni ceerkva mättʼted. 15Juudlažneeʹǩǩ õõmtõʹšše da cieʹlǩǩe: «Mäʹhtt son vuäitt tieʹtted nuʹt jiânnai, ku iʹlla škooulid jååttam?» 16Isõs vaʹsttii siʹjjid da cieʹlǩi: «Muu mättʼtõõzz jiâ leäkku muu, a suu, kååʹtt lij muu vuõlttääm. 17Jõs ǩii haaʹlad tuejjeed mäʹhtt Vuâsppåʹd tätt, son kâʹl vuâmmaš, lij-a tät mättʼtõs Vuâsppååʹdest avi mainstam-a mon jiõččan mieʹldd. 18Kååʹtt jiijjâs jorddmõõžžees maainast, tõt ååcc jiijjâs ciist. Leša tõt, ǩii räukk vuõltteeʹjes ciist, tõt lij tuõđlaž ij-ǥa suʹst leäkku puästtad tuejjääm. 19Ij-a Moʹssai ouddam tiʹjjid lääʹjj? Da ni ǩii teeʹst ij lääʹjj teeuʹd. Mõõzz juʹrddveʹted muu kåʹdded?»
20Narod vaʹsttii: «Tuʹst lij ǩeähnas jiõgg. Ǩii tuu kååddči?» 21Isõs vaʹsttii da cieʹlǩi siʹjjid: «Tij õõmtõõššveʹted tåʹlǩ õõut tuâj diõtt. 22Moʹssai uuʹdi tiʹjjid pirrčuõppmõõžž — ij nuʹt, što tõt leʹčči Moʹssjest vuâlggam, a tõt lij vuâlggam maaddâreeʹjjin — da tij pirrčuõppveʹted oummu prääʹznǩen še. 23Jõs pirrčuõppmõõžž vuäitt tuejjeed prääʹznǩen, što ij Moʹssai lääʹǩǩ morddjeʹčče, mõn diõtt tij suttveʹted muu ool tõʹst, ko mon pueʹreem oummu prääʹznǩen? 24Jeäʹled suudu tõn mieʹldd, mäʹhtt tij juʹrddveʹted, a suudâd vuõiʹǧǧest.»
Lij-a Isõs Messias?
25De måtam jerusaaʹlemneeʹǩǩ cieʹlǩǩe: «Ij-ǥo tät leäkku tõt, koon sij juʹrdde kåʹdded? 26Da ǩiõčč, son maainast õlmmsa, jiâ-ǥa sij cieʹlǩ suʹnne ni mâiʹd. Leʹčče-a ouddoummu tuõđi vuäǯǯam seʹlvve, što son lij Kristõs? 27Leša mij tieʹttep, koʹst tät lij. Leša ko Kristõs puätt, tâʹl ij ni ǩii tieʹđ, koʹst son lij puättam.»
28De Isõs säärnai ceerkvest da čuârvai kõrr jiõʹnne: «Tij tobddveʹted muu da tieʹttveʹted, koʹst mon leäm puättam. Leša mon jiõm leäkku puättam jiõččan täättast, a tõt ǩii lij muu vuõlttääm, lij vuõigg vuõltteeja, da suu tij jeäʹped toobd. 29Mon toobdam suu, ko suʹst mon leäm. Son lij vuõlttääm muu.»
30Sij juʹrdde väʹldded suu ǩidd; leša ij ni ǩii välddam suu ǩidd, ko suu äiʹǧǧ iʹlleäm veâl puättam. 31Narood kõõskâst määŋgas oskku suu da kõõjjee: «Tuejjad-a ni Kristõs tän õõmâstuâjaid, tâʹl ko son puätt?»
Isõs ceälkk, što son sõrgg vâidd
32Farisõõzz kuʹlle narood nääiʹt reeidčõõttâm suʹst; tâʹl jõnnpaapp da farisõõzz vuõlttee vieʹǩǩid väʹldded suu ǩidd. 33Isõs cieʹlǩi: «Leäm veâl siõmmna ääiʹj tij luʹnn da tâʹl mõõnam suu årra, kååʹtt lij muu vuõlttääm. 34Tâʹl tij ooccveʹted muu jeäʹped-ǥa kaaun, jeäʹped-ǥa vueiʹt pueʹtted tåk, koʹst mon leäm.»
35Juudlažneeʹǩǩ mainste kõskkneez: «Koozz son jordd mõõnnâd? Ij tâma son juuʹrd mõõnnâd tõi årra, kook jeälste pirr kreikklai kõõskâst, da mättʼted kreikklaid? 36Mii tät sääʹnn lij, koon son cieʹlǩi: ’Tij ooccveʹted muu jeäʹped-ǥa kaaun’, da: ’Jeäʹped-ǥa vueiʹt pueʹtted tåk, koʹst mon leäm’.»
Jieʹllem čääʹcc
37A mââimõs jõnn prääʹzneǩpeeiʹv Isõs kaggõõđi särnnad kõrr jiõnin: «Jõs ǩeän-ne juǥstâtt de puäđas son da jooǥǥas. 38Pââʹss ǩeeʹrj mieʹldd jieʹllem čääʹcc kålgg tõn čâđđmest, kååʹtt åskk muu.» 39Leša son õõlǥti Jiõgg, koon tõk, kook suu oskku, mâŋŋa vuäǯǯče. Tõn ääiʹjest Jiõgg iʹlleäm veâl uvddum, ko Isõs iʹlleäm veâl mõõnnâm suu čuõvvâdvuõʹtte.
Jeeʹresmiõllsažvuõtt naroodâst
40De jeärraz naroodâst, ko kuʹlle tän, cieʹlǩǩe sij: «Tät lij tuõđi profeʹtt.» 41De nuuʹbb cieʹlǩǩe: «Tät kâʹl lij Kristõs.» Leša jeärraz cieʹlǩǩe: «Ij tâma Kristõs puäʹđ Galileast? 42Ij-ǥo Pââʹss ǩeʹrjj cieʹlǩ, što Kristõs lij Daaʹvdest vuâlggam da puätt uʹcc Beetleheeʹm gåårdest, koʹst Daaʹved leäi šõddâm?» 43De naroodâst šõõddi jeeʹresmiõllsažvuõtt Isõõzz diõtt. 44Måtam seeʹst tattu väʹldded suu ǩidd. Leša ij ni ǩii tääʹvtõõttâm suʹnne.
Ouddoummu jiâ ååsk
45De kääzzaǩ maʹcce jõnnpaappi da farisõõzzi årra, da täk kõʹčče seeʹst: «Mõõn diõtt jeäʹped pohttam suu tiiʹǩ?» 46Kääzzaǩ vaʹsttee: «Ij ni ǩii leäkku mainstam ni kuäʹss nääiʹt, mäʹhtt tät-aa ooumaž maainast.» 47«Lij-a son tiʹjjid še čaʹjjâttam?», farisõõzz kõʹčče. 48«Lij-a ni ǩii õuddoummin leʹbe farisõõzzin åskkam suu? 49Tät narod, kååʹtt ij lääʹjj toobd, lij kârruum.»
50Nikodeemus, kååʹtt ouddâl leäi jeällam Isõõzz åʹrnn da leäi še farisõs, cieʹlǩi siʹjjid: 51«Mij lääʹjj mieʹldd ij ni ǩeän vueiʹt suudâd, ouʹddelgo suʹst kõõjjee da čiõlggee, mâiʹd son lij tuejjääm.» 52Jeärraz cieʹlǩǩe suʹnne: «Leäk-a ton še Galileast? Tuʹtǩǩed Pââʹss ǩeeʹrj da vuäinak, što profeʹtt ij puäʹđ Galileast.»
53Da puk vuõʹlǧǧe põrttseez.
Actualmente seleccionado:
Evvan 7: SKOLT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© Lää´dd Pipliaseä´rvv; Suomen Pipliaseura; Finnish Bible Society 1988