Evvan 10
10
Aʹrvvõs sauʒʒkärddsest
1«Tuõđi, tuõđi mon ceälkam tiʹjjid: ǩii ij mõõn sauʒʒkärddsa uus mieʹldd, leša kuärŋŋ tåk jeeʹres sââʹjest, lij suõl da pääkast. 2Tõt, kååʹtt mâânn uus mieʹldd, lij saauʒi peâmmai. 3Suʹnne vahtt ääʹvad uus, da suu jiõn saauʒ tåʹbdde. Son čuârvv jiijjâs saauʒees nõõm mieʹldd da veekk tõiʹd åålǥas. 4Da son luâštt puk jiijjâs saauʒees åålǥas da son jåått tõi ooudâst, da saauʒ puäʹtte suu mieʹldd, ko saauʒ tåʹbdde suu jiõnâst. 5Leša verraz sij jiâ čuâv, leša čõʹǩǩee suʹst, ko jiâ toobd verrsi jiõn.» 6Nääiʹt Isõs mainsti siʹjjid. Leša sij jiâ fiʹttjam, mâiʹd son mainsti.
Šiõǥǥ peâmmai
7Nuʹt Isõs veâl cieʹlǩi siʹjjid: «Tuõđi, tuõđi mon ceälkam tiʹjjid: mon leäm saauʒi uhss. 8Puk, kook liâ puättam ouddâl muu, liâ suõlli da pääkast jiâ-ǥa saauʒ leäkku kulddlam siʹjjid. 9Mon leäm uhss. Tõt, kååʹtt mâânn sizz muu pääiʹǩ, son kaʹjjââvv. Son vuäitt mõõnnâd da pueʹtted sizz da son käunn ǩeeʹdd. 10Suõl puätt pâi suâleed da kåʹdded da hiâvted. Mon leäm puättam, što seeʹst leʹčči kââllasvuõtt.
11Mon leäm tõt šiõǥǥ peâmmai. Šiõǥǥ peâmmai oudd jiõggâs saauʒees ooudâst. 12Päʹlǩǩuum reâuggai iʹlla ni mõõnnallšem peâmmai, tâʹl saauʒ jeäʹla suu jiijjâs. Ko son vuäinn kuuʹmp pueʹttem, tâʹl son kuâđđ saauʒid da čõʹǩǩad; da kuʹmpp ǩeâškad da pieʹđjat tõid. 13Son čõʹǩǩad, ko lij päʹlǩǩuum ijǥa peerast saauʒin.
14Mon leäm šiõǥǥ peâmmai; mon toobdam saauʒään da saauʒ tåʹbdde muu. 15Nuʹt mäʹhtt Eʹčč tåbdd muu, toobdam mon Eččan; da mon ooudam jiõggan saauʒi ooudâst. 16Muʹst liâ jeeʹres saauʒ še, kook jiâ leäkku tän sauʒʒkärddsest. Tõiʹd še mon õõlǥam jååʹđted, da tõk vuäǯǯa kuullâd muu jiõn, da leežž leeʹd õhtt čiõǥǥâr da õhtt peâmmai.
17Tõn diõtt Eʹčč rääʹǩǩast muu, ko leäm vaalmâš uʹvdded jiõggan, što vuäǯǯčem tõn väʹst. 18Ij ni ǩii tõn vääʹld, leša mon ooudam tõn jijstan. Muʹst lij väʹldd uʹvdded tõn, da muʹst lij väʹldd väʹldded tõn väʹst; tõn päkkmuužž mon leäm vuäǯǯam eʹjstan.»
19Da eʹpet aʹlǧǧe juudlažneeʹǩǩ räʹjjtõõllâd täi saaʹni diõtt. 20Määŋgas cieʹlǩǩe: «Suʹst lij piârgglõk da son lij miõltem. Mõnt tij kulddleʹped suu?» 21Jeärraz cieʹlǩǩe: «Täk jiâ leäkku piârgglõõǥǥ sääʹn; ij tâma piârgglõk vueiʹt ääʹveed čââʹlmteeʹmi čõõʹlmid?»
Juudlažneeʹǩǩ pâiʹlǩeäʹčče Isõõzz
22Leäi täʹlvv da Jerusaaʹlmest leäi ceerkav pââʹzztempeeiʹv prääʹzneǩ. 23Isõs vaaʹʒʒi ceerkvest Salomon pääʹʒʒelmuuʹlcest. 24Juudlažneeʹǩǩ norrõʹtte suu pirr da cieʹlǩǩe suʹnne: «Mõõn kuuʹǩǩ ton ǩiččlõõddak mij ǩeâllʼjemvuõttân? Jõs ton leäk Kristõs, säärn tâʹl miʹjjid tõn vuõiʹǧǧest.» 25Isõs vaʹsttii siʹjjid: «Leäm tõn tiʹjjid ceälkkam, leša tij jeäʹped leäkku åskkam. Tuâj, mâiʹd tuejjääm Eččan nõõmâst, tuõđšte muʹst. 26Leša tij jeäʹped ååsk, ko tij jeäʹped leäkku muu saauʒ. 27Muu saauʒ koʹlle muu jiõnnan, da mon toobdam tõiʹd, da tõk puäʹtte muu mieʹldd. 28Da mon ooudam âʹǩǩpâjjsaž jieʹllem. Sij jiâ jääʹm ni kuäʹss. 29Muu Eʹčč, kååʹtt lij siʹjjid muʹnne ouddam, lij šoorab puki. Ij ni ǩii vueiʹt suâleed siʹjjid muu Eččan ǩiõđâst. 30Mon da Eʹčč leäʹp õhtt.»
31Juudlažneeʹǩǩ noʹrre eʹpet ǩieʹđjid suu čâʹcǩǩem diõtt. 32Isõs cieʹlǩi siʹjjid: «Mon leäm Eččan päkkmuužž mieʹldd tuejjääm mäŋgg šiõǥǥ tuâj. Mij tõiʹn lij tõt, mõõn diõtt tij tättveʹted muu ǩieʹđjivuiʹm čõckkled?» 33Juudlažneeʹǩǩ vaʹsttee suʹnne: «Jeäʹp mij ni mõõn šiõǥǥ tuâj diõtt tuu ǩieʹđjet, leša tõn diõtt, što viggtak Vuâsppååʹd, da tõn diõtt, ko ton, kååʹtt leäk ooumaž, tuejjääk jiijjad Vuâsppååʹden.» 34Isõs vaʹsttii siʹjjid: «Ij-ǥo tij lääʹjjest leäkku ǩeeʹrjtum: ’Mon säärnam: tij leäʹped Vuâsppååʹd’? 35Jõs son ceälkk Vuâsppååʹden tõiʹd, koiʹd Vuâsppååʹd sääʹnn pueʹđi — da Pââʹss ǩeeʹrj sääʹnn ij vueiʹt mõõnnâd tuʹššen— 36mõõzz tij tâʹl ceäʹlǩǩveʹted tõõzz, koon Vuâsppåʹd lij pââʹzztam da vuõlttääm maaiʹlme: ’Ton viggtak Vuâsppååʹd’, tõn diõtt, što mon sarnnum: ’Mon leäm Vuâsppååʹd Päʹrnn’? 37Jõs mon jiõm tuejjad Eččan tuâjaid, jeäʹled oskku muu. 38Leša jõs mon tõiʹd tuejjääm, håʹt jeäʹped ååskče muu, åskkad muu tuâjään, što toobdčid da fiʹttjeʹččid, što Eʹčč lij muʹst da mon leäm Eeʹjjest.»
39Juudlažneeʹǩǩ tattu eʹpet väʹldded suu ǩidd, leša son piâzzi sij ǩiõđi seʹst. 40Isõs mõõni eʹpet Jorddan tun peälla, tõn sâjja, koʹst Evvan vuõššân riisti, da jaauki tåʹben. 41Da määŋgas puõʹtte suu årra da cieʹlǩǩe: «Evvan ij tuejjääm ni õõut õõmâstuâj, leša puk mâiʹd Evvan cieʹlǩi tän åummast, lij tuõtt.» 42Da määŋgas oskku suu tåʹben.
Actualmente seleccionado:
Evvan 10: SKOLT
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© Lää´dd Pipliaseä´rvv; Suomen Pipliaseura; Finnish Bible Society 1988