Luka 1
1
1Mordemo rınd Teofilos,
Xeylê mordeman wast kı çiyê kı mabênê ma de bi bi, inan bınusnê. 2Ma ki xebera ni meselan, kamo kı verdı ra nat ni çiyan rê sayidinı kerda, inan ra, jü ki kamo kı xızmeta qesa Heqi dero, inan ra gırotı. 3Mın ni çiyê kı biyê, ni pêro rınd kı pers kerdê, mın wast kı ninan têdıma to rê bınusni. 4Mın nia kerd kı tı bızanerê, çiyê kı tı eşiyay pê, i rastê.
Cebrail xebera Yahyay dano
5Waxto kı Hirodesi Welatê Yahudiyan de hukumdarinı kerdenê, i waxtan de ezbeta Aviya ra jü rayib#1:5 Rayib: Yahudiyan, Mabed de, suka Yeruşalim (Qudüs) de xızmetı kerdenê, gorê na xızmetı bırriyenê ya. esti bi, namê niy Zekeriya bi. Cinıka iy Elizabetı ki ezbeta Rayib Haruni#1:5 Harun bıraê Pêxember Musay bi. Rayibi pêro na ezbetı ra amenê. ra biye. 6Ni dı teni ki qatê Heqi de mordemê rasti bi. Emrê u qanunê Heqi zaf rınd ardenê hurindi. 7Elizabetı qısır biye, ay ra domanê Zekeriyay bı ê Elizabet'a çini bi. Ê ni dı tenan ki xeylê serrê xo esti bi.
8 Mabed de waxtê xızmetı, ezbeta Aviya de biye. Zekeriyay ki Heqi rê xızmetı kerdenê. 9Rayiban zê her waxti ancia mabênê xo de qura antê kı kam Mabeda#1:9 Mabed: İtıqatê Yahudiyan de, cao kı mordemi saba ibadeti amenê tê lêwı, uca en cao mühim bi. Na Mabedı suka Yeruşalim de biye. Heqi de bıxur#1:9 Bıxur: Vaso de boya xo wes, Mabed de amenê vesnayenı, niy rê bıxur vatenê. bıvêsno. Qura na rey, Zekeriyay rê veciya. 10Key kı bıxur vêsenê, teber de sılxetiya de gırsı amay bi pêser, düay kerdenê.
11A sırı de, melekanê#1:11 Meleki pêro roê rındê, Heqi rê xızmetı kenê u xeberanê iy anê. Kırmancki de “mılaketi” estê, i ki mandê ninan. Mılaketi tay fekanê Kırmancki de roê rındê, tayênan de ki roê xırabınê. Ay ra ma no çarnayış de, “mılaket” nêvat, “melek” vat. Heqi ra Cebrail Zekeriyay rê aşiya. Cebrail, cao kı ser de bıxur amenê vesnayenı, rastê ucay de fındeti bi. 12Zekeriyay kı Cebrail di, sas bi, xof kut zerrı. 13Cebraili cı rê nia vat: “Zekeriya, metersı, Heq düanê to eşiya pê. Cinıka to Elizabetı to rê jü lacek ana dina, namê iy Yahya nanay pıra. 14Tiyo kêf bıkerê, sa bıberê u xeylê mılet ki saba biyayena Yahyay kêf keno. 15Domano kı bêro dina, çımê Heqi de beno berc. Owo şerab u qe jü içki meno fekê xo ra. Hona kı pizê may dero, bı Rowo Bımbarek'a#1:15 Rowo Bımbarek Heq bıxowo. beno pırr. 16No doman lacanê İsraili ra zafinan peyser ano raya Heqi ser. 17Owo bı roê u qeweta Pêxember İlyasi'a#1:17 Mesih ra raver ancia amayena Pêxember İlyasi amenê pitenı. vırniya Heqi de sêro, zerria piyan saba domanan nerm kero. İyê kı Heqi say nêkenê, fıkrê inan vurneno ya, inan çarneno raya rastı ser. Mıleti saba amayena Wayiri keno hazır.”
18Zekeriyay Cebraili rê vat: “Ez koti ra bızaneri kı na vatena to bena? Ez mêrıko de kokıman, ciniya mın ki zaf kokıma.”
19Cebraili iy rê nia vat: “Ez Cebrailan. Ez her waxt lê Heqi deran. Heqi ez rusnan kı to de qeşi keri, na mijdani bıderi to. 20Qay nıka, hata kı niyê kı mın to rê qeşi kerdê mêrê hurindi, tı nêşkinay qeşi bıkerê. Tı bı qesanê mın'a inam nêbiyay, ay ra zianê to beno lal. Feqet iyê kı mın to rê qeşi kerdê, i waxtê xo de ênê hurindi.”
21Mıleto kı teber ra bi, Zekeriya pitenê, inan merex kerdenê, çay hente waxt wertê Mabed de mandi bi. 22Zekeriya kı wertê Mabed ra veciya, nêşkiyenê qeşi bıkero. Mıleti zana kı Zekeriyay zerrı de çiyo de bımbarek di bi. Zekeriya bi lal, ay ra iy bı destanê xo'a kerd kı çiyê vaco.
23Rocê xızmeta Zekeriyay kı qediyay, şi kê xo. 24Ni rocan ra tepia, ciniya xo Elizabetı dıcani mandı, phanc asmi kê ra qe nêveciyê. 25Elizabetı nia vat: “Heqi na saba mın kerdı, rüyê mı ro sêr kerd, sermo kı mın mıleti ver de antenê, ez ni sermi ra xelesnan ra.”
Cebrail xebera İsay dano
26-27Key kı Elizabetı dıcania xo de kuti bi asma şeşenı, Heqi melekanê xo ra Cebrail rusna lê jü kêneka azebı. Na kênekı hetê Celile de suka Nasıra ra biye. Ezbeta Qıral Dawudi ra amenê, waştiya Usıvi biye. Namê na kênekı Meyremı bi. 28Cebrail, Meyremı rê aşiya, vat: “Ma bı xêr di, Meyrem! Tı restay kerema Heqi. Heq lê to dero.”
29Verê ni qesan de, Meyremı sas biye, xo xo de vat, mana ni sılami çıka? 30Meleki cı rê vat: “Metersı, Meyrem, tı restay kerema Heqi. 31Tiyo dıcani bımanê, jü lacek biyarê dina, namê iy İsa nanay pıra. 32O beno mordemo de gırs. İy rê vanê, no lac, Heqo kı her çi ra berco, lacê İyo. Heq text dano iy, no text, textê khalıkê iy, ê Qıral Dawudio. 33Owo her waxt ezbeta Yaqubi#1:33 Ezbeta Yaqubi: Yaqub tornê İbrahimi bi, Heqi iy rê vat, namê to İsrail bo. Ay ra Yaqub khalıkê Yahudiyan pêronano. sero hukım bıkero, hukumdariya iy qe nêqedina.”
34Meyremı meleki ra pers kerd: “No senên beno? Ez hona jü camerdi'a pia nêbiyan.”
35Meleki vat: “Rowo Bımbarek êno lê to, Heqo kı her çi ra berco, qeweta iy to sero şiyê bena. Domano kı tı biyarê, o bımbarek beno, iy rê vanê Lacê Heqi. 36Qay, saba mordema to Elizabetı ki vatenê qısıra, ê nay xeylê serrê xo ki esti bi, feqet nıka şeş asmio kı dıcaniya, awa jü lacek biyaro. 37Çiyo kı Heq meşkiyo bıkero, çino.”
38Ni qesan ser, Meyremı meleki rê vat: “Ez qula Heqian. Tı senên vanay, va hini bo.” Nay dıma, melek lêwı ra şi.
Meyremı sona kê Elizabetı
39Meyremı i rocan de xo hazır kerd, bı lez'a şiye koyanê Welatê Yahudiyan de jü sukı. 40Meyremı kutı kê Zekeriyay, sılam da Elizabetı. 41Key kı Elizabetı sılamê Meyremı eşiyê pê, domano kı pizê Elizabetı de lewiya. A deqa Elizabetı bı Rowo Bımbarek'a biye pırr. 42Ay kêf ra vengê xo kerd berc, Meyremı rê nia vat: “Tı mabênê cinıkan de bımbarekay. Domano kı tı biyarê rüyê dina, o ki bımbarek beno. 43Senên bi kı mua Wayirê mın ame lê mın? 44Ez se kı sılamê to eşiyan pê, domano kı pizê mın de kêf ra lewiya. 45Ğeji bê to kı, tı owo kı Heq saba to bıkero, bı iy'a inam biyay.”
46Meyremı ki nia vat:
“Ez zerri ra, Heqi rê şukır kenan.
47Owo kı mın bıxelesno ra Heqo,
Ay ra roê mın kêf ra perreno.
48İy qimet da zê mın qula de bêqimetı.
Nay ra tepia neslê her waxti saba mın vanê: Ğeji bê ay.
49Çıkı Heqê qudretıni, saba mın çiyê gırsi kerdi.
Namê iy bımbareko.
50Kam kı iy ra bıterso,
Rama iy serê tornanê u tornanê inan de bena.
51Heqi bı qudreta xoa gırs'a, karê gırsi kerdi.
İyê kı xo gırs vênenê, i kerdi têser têbını ra.
52Text ra hukumdari nay ro,
Mordemê kı cêr derê, i berc kerdi.
53Vêsani, bı çiyanê rından'a mırd kerdi,
Variyetıni ki dest thal çarnay ya.
54O rest yardımê qulê xo İsraili,
Rama xo inan sero kêmi nêkerdı.
55Senên kı khalıkê ma İbrahimi rê u ezbeta iy rê wad kerdi bi,
O her waxt ni wadi rê sadıqo.”
56Meyremı kı lê Elizabetı de nejdiyê hirê asmi mandı, peyser gêrê ya kê xo.
Biyayena Yahyay
57Waxtê rakutena Elizabetı ama, Elizabetı jü layık ard dina. 58Key kı ciranê xo bı mordemê xo eşiyay pê, Heqi rama xoa gırsı senên muskıti bi Elizabetı, i ki bı Elizabet'a pia sa bi. 59Roca heştını de amay sunetê#1:59 Yahudi, layıkê xo kı bi heşt roci, sunet kenê. domani. Namê pi Zekeriya bi, inan wast kı ni nami domani ra nê. 60Elizabetı vat: “Nê, namê iy Yahya beno.”
61İnan nia vat: “Mabênê mordemanê sıma de, keso kı namê xo Yahyawo çino.”
62Ni qesan dıma, inan bı destan'a pi ra pers kerd, kamci namı wazeno cı dero layıki. 63Zekeriyay jü textı wast, sero nia nusna: “Namê xo Yahya bo.” İyê kı uca de bi, pêro sas bi mandi. 64A deqa zianê Zekeriyay bi ya, ancia qeşi kerd, Heqi rê şukır kerd. 65Ciranê xo pêro tersay, her cayê koyanê Welatê Yahudiyan de, na mesela amenê qeşi kerdenı. 66Kam kı na mesela eşiya pê, zerria xo de nia pers kerd: “Eceb, no doman, se beno?” Heq lê iy de bi; inan ay ra hini pers kerd.
Zekeriya Heqi rê şukır keno
67Piyê Yahyay Zekeriya bı Rowo Bımbarek'a bi pırr, pêxemberinı kerdı,#1:67 Pêxemberinı kerdı: Xeberê kı Heqi ra amenê, mıleti rê vatenê. nia vat:
68“Wayirê ma, Heqê İsraili#1:68 Heqê İsraili: No Heq, teyna ê qomê İsraili niyo, ê mıletê dina pêroyino. Feqet Heqi, qomê İsraili saba xo çinıti bi we kı hekmeta xo bımuskıno mıleti pêroyini. rê şukır bo!
İy sarê xo rê yardım kerd,
İ bındestiye ra xelesnay ra.
69-70İy senên kı waxtanê verênan ra nat
Bı fekanê pêxemberanê bımbarekan'a
xeberı day bi ma,
Ma rê ezbeta qulê xo Dawudi ra
Jü xelesnoğo de qudretın rusna.
71Destê dısmenanê ma ra,
İyê kı ma ra hez nêkenê,
Destê inan ra ma xelesnayım ra.
72İy rama xo muskıtı pi u khalıkanê ma.
Sondê xowo bımbarek ard xo viri.
73İy khalıkê ma İbrahimi rê wad kerdi bi,
74-75Owo ma destê dısmenanê ma ra bıxelesno ra,
Hata kı wesım, ma şikinım verê iy de,
Bêters, wertê pakinı u rastinı de,
İy rê qulini bıkım.
76Lacê mın Yahya, tı ki benay pêxemberê Heqi,
Owo kı her çi ra berco.
Tı vırniya Wayiri ra sonay kı rayanê iy hazır kerê.
77Tı na xeberı danay sarê Heqi:
Gunê inan ef benê kı i bıxeleşiyê ra.
78Heq ramaniyo,
Ay ra o cor ra jü Xelesnoğ rusneno ma rê#1:78 Cor ra roşti rusneno, yanê Heq Mesihi rusneno. Ni qesi kıtabê Pêxember Malaki de verenê ra..
No Xelesnoğ zê tici berc beno.
79Na tici, kamo kı wertê tari bı tersê merdenı de
weşiya xo ramıno,
İnan sero bereqina.
Na tici ma bena raya sılametiye.”
80Yahya biyenê gırs, roê xo biyenê qewetın. Hata roca kı bıveciyo wertê mıletê İsraili, hata a waxt Yahya yaban yaji de mand.
Actualmente seleccionado:
Luka 1: kiu
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2023 (Active), Wycliffe Bible Translators, Inc. All rights reserved.